I le usiusitai i faatonuga a le Alii, na faatuina ai e le Perofeta o Iosefa Samita ma isi e tusa ma le 200 o volenitia ma e na lesitala i le fitafita le mea na ta’ua o le Tolauapiga a Siona e o atu e fesoasoani i le Au Paia o e na faate’a ese mai le Itumalo o Jackson, Misuri. I le aso 22 o Iuni, 1834, a o tolauapi i tafatafa o le Vaitafe o Fagotaga i Misuri, na maua ai e Iosefa Samita le faaaliga ua faamaumauina i le Mataupu Faavae ma Feagaiga 105. I le faaaliga lenei, na faailoa mai ai e le Alii i le Au Paia, o le a le laveaiina le laueleele o Siona i lena taimi. Na tuuina mai foi e le Alii faatonuga e faatatau i mea e tatau ona tutupu ina ia laveaiina Siona i se taimi o i luma.
Ua faatonu e le Alii le Au Paia e faatalitali mo le laveaiina o Siona
A o lei amataina le vasega, ia i ai se ipuinu pepa, se pa‘u, ma ni fasi manoa se tolu. O le vatele o le pa’u e tatau ona laitiiti ifo nai lo o le vatele o le ipu. Nonoa fasi manoa i le pa‘u ia tutusa o latou va.
Ata
ipu pepa, pa’u meme’i, manoa
Amata le lesona i le talosaga atu mo ni volenitia se toatolu. Tuu le ipu i luga o se laualau mafolafola, ma faatonu volenitia e sii i luga le ipu e ala i le faaaogaina na o le pa’u meme’i ma manoa. Ta‘u atu ia i latou e le mafai ona latou pa’i atu i le pa‘u; e tatau ona latou uuina ia fasi manoa. (Ina ia ausia lenei galuega, o le a manaomia e tagata aoga ona galulue faatasi ma toso faatasi i le taimi lava e tasi ia manoa taitasi ma le malosi tutusa ina ia mafai ona lava le meme’i o le pa’u e tuu ai faataamilo i le ipu ona sii loa lea i luga.)
A uma ona fai e tagata aoga le gaoioiga lenei, fai atu le fesili lenei:
O le a le matafaioi a le lotogatasi na fai i le ausiaina o lenei galuega?
Faamanatu atu i tagata aoga e faapea, ia Fepuari o le 1834, na faatonuina ai e le Alii le Perofeta o Iosefa Samita ma isi e faaputu mai punaoa faaletino ma su’e mai ni volenitia e fesoasoani i le Au Paia o e na tutuli ese mai le Itumalo o Jackson, Misuri, i le toe mauaina mai o lo latou laueleele. A o amata e tagata aoga ona talanoaina le Mataupu Faavae ma Feagaiga 105, uunaia i latou e vaavaai mo le matafaioi na faia e le lotogatasi i taumafaiga a le Au Paia e toe maua mai le laueleele o Siona.
Fai atu i tagata aoga e ta’u mai i la latou suesuega o le Mataupu Faavae ma Feagaiga 103 le aofai o volenitia sa manaomia e le Alii e auai i le Tolauapiga a Siona (500) ae o le aofaiga aupito maualalo sa Ia manaomia e (100). Valaaulia se tagata aoga e faitau leotele le palakalafa lenei. Fai atu i le vasega e faalogologo mo le aofai o tagata o e na ofo moni mai mo le Tolauapiga a Siona i le taimi muamua na o malaga ese ai le vaega.
O le tali i taumafaiga a le Perofeta o Iosefa Samita ma isi ia maua mai ni volenitia ma ni punaoa mo le Tolauapiga a Siona, sa le’i faamanuiaina i le mea sa faamoemoe i ai. E oo ane i le taimi na amata ai ona savavali le tolauapiga i le amataga o Me 1834, sa na o le toa 122 tagata sa volenitia e o. Sa maua e le Tolauapiga a Siona ni volenitia faaopoopo a’o agai atu i le ala i Misuri. Ina ua fetaui le vaega sa maua mai e Ailama Samita ma Laimani Wight mai le Teritori o Michigan ma le vaega a Iosefa Samita i le amataga o Iuni 1834, sa sili teisi atu i le 200 alii, 12 tamaitai, ae toa 9 tamaiti o le Tolauapiga a Siona (tagai Alexander L. Baugh, “Joseph Smith and Zion’s Camp,” Ensign, Iuni 2005, 45).
Valaaulia se tagata aoga e faitau leotele le Mataupu Faavae ma Feagaiga 105:7–8. Fai atu i le vasega e mulimuli i le faitauga, ma vaavaai mo se mafuaaga se tasi na ala ai ona filifili nisi o tagata o le Ekalesia e le fesoasoani i o latou uso o le Au Paia i Misuri. Ona fai atu lea i tagata aoga e lipoti mai mea na latou mauaina.
Valaaulia ni nai tagata aoga e auauai e faitau leotele mai i le Mataupu Faavae ma Feagaiga 105:1–6. Fai atu i le vasega e mulimuli i le faitauga, ma vaavaai mo auala na aafia ai tagata o le Ekalesia i le le usiusitai ma le leai o se lotogatasi. (Ina ia fesoasoani i tagata aoga ia malamalama lelei i le uiga o le fuaiupu e 5, atonu e aoga le faamalamalama atu, “o le tulafono o le malo selesitila” e aofia ai tulafono ma mataupu faavae uma e tatau ona tatou usitaia, o sauniga e tatau ona tatou maua, ma feagaiga e tatau ona tatou tausia ina ia mautofi ai i le malo selesitila.)
O a ni auala na le lotogatasi ma le usiusitai ai tagata o le Ekalesia?
E tusa ai ma nei fuaiupu, o le a se mea e tatau ona tatou faia e fesoasoani e fausia ai Siona? (A o tali mai tagata aoga, fesoasoani ia latou faailoa mai le mataupu faavae lenei: Ina ia fesoasoani e atiina ae Siona, e tatau ona tatou lotogatasi ma usiusitai i mea uma e finagalo mai ai le Atua.)
Aisea e te manatu e manaomia ai le lotogatasi ma le usiusitai mo le atiina a’e o Siona?
O a ni aafiaga na fesoasoani e te malamalama ai i le taua o le lotogatasi o tagata o le Ekalesia?
Faamalamalama atu, o i latou o e na volenitia mo le Tolauapiga a Siona, sa oo i ai le tele o luitau ma vavega i la latou malaga. Valaaulia se tagata aoga e faitau leotele le palakalafa lenei. Fai atu i le vasega e mafaufau loloto pe ono faapefea ona latou tali atu i nisi o luitau.
Sa savavali le Tolauapiga a Siona e tusa ma le 900 maila (1,450 kilomita) sa ui atu i setete e 4, malaga i le va o le 20 ma le 40 maila (pe tusa e 30–60 kilomita) i le aso mo aso e 45. Sa aafia tagata o le tolauapiga i faafitauli o le mafoefoe o vae, vevela ma le susu o tulaga o le tau, lelava o meaai, ma meaai le maloloina. I nisi taimi, o le galala i le fia feinu na faaosofia ai nisi tagata o le tolauapiga e feinu i vaivaito’a lea na vaimama ese ai tugatuga (o nisi taimi e faaaoga ai o latou nifo o ni faamama) po o le feinu i vai mai tulagavae o solofanua pe a mavae se timu afa. I le malaga atoa, sa masani ona faamatauina ai le Tolauapiga a Siona i le faasaua mai o isi. (Tagai i le Church History in the Fulness of Times Student Manual, 2nd ed. [Church Educational System manual, 2003], 143–45.)
O le a sou manatu, mata e faapefea ona e tali atu i nei luitau?
Faamalamalama atu faapea, ina ua taunuu atu tagata o le Tolauapiga a Siona i Misuri, sa latou iloa ai, o le a le tausisia e Daniel Dunklin, o le kovana o Misuri, lana folafolaga e fesoasoani i le Au Paia e toe foi atu i o latou laueleele i le Itumalo o Jackson. E ui lava i lenei tala faavaivai loto, sa faaauau pea ona agai atu le Tolauapiga a Siona i le Itumalo o Jackson, ma faatalitali mo se faatonuga faaopoopo mai le Alii.
Faailoa atu i tagata aoga, o faatonuga na manaomia sa oo mai i se faaaliga mai le Alii i le aso 22 o Iuni, 1834, ina ua mavae le toeitiiti fitu vaiaso o malaga le Tolauapiga a Siona, ma sa toe na o le 10–20 maila (po o le 15–30 kilomita) le mamao mai le Itumalo o Jackson. Valaaulia se tagata aoga e faitau leotele le Mataupu Faavae ma Feagaiga 105:9-14. Fai atu i le vasega e mulimuli i le faitauga, ma vaavaai mo le mea na fetalai mai le Alii na tatau ona latou faia e faatatau i le laveaiina o Siona.
O le a le mea na faatonu e le Alii le togalauapiga e fai e faatatau i le laveaiga o Siona?
Ana faapea sa avea oe ma se tasi o le Tolauapiga a Siona, mata o a ni ou lagona na i ai i le faalogoina o lenei faaaliga ae ua toeitiiti taunuu i lo outou faamoemoega?
O a mafuaaga na tuuina mai e le Alii mo le pogai o le a le laveaiina ai Siona i lena taimi?
Valaaulia se tagata aoga e faitau leotele le Mataupu Faavae ma Feagaiga 105:18-19. Fai atu i le vasega e vaavaai mo mafuaaga na faatonuina ai e le Alii le Tolauapiga a Siona e malaga mamao atu i Misuri, ona toe faaali mai lea o le a latou le faafoi atu le Au Paia i o latou laueleele i Siona i lena taimi.
E tusa ai ma nei fuaiupu, aisea na poloaiina ai e le Alii le Tolauapiga a Siona e malaga mamao atu i Misuri, ona toe faaali mai lea o le a latou le laveaiina Siona i lena taimi? (O se tofotofoga lenei o le faatuatua. Atonu e aoga le faamalamalama atu faapea, o se tofotofoga o le faatuatua e mafai ona faasino i se suega pe o le a tatou filifili e faalagolago ma usitai i le Alii e tusa lava po o a tulaga e oo i ai.)
O a ni auala na tofotofoina ai le faatuatua o tagata o le Tolauapiga a Siona i le taimi o lo latou aafiaga?
O a ni mea e mafai ona tatou aoaoina mai nei fuaiupu? (O se tasi o mataupu faavae e mafai ona faailoa mai e tagata aoga o le, Ua saunia e le Atua ni faamanuiaga maoae mo i latou o e faamaoni i o latou tofotofoga.)
O le a se taimi na e oo ai pe na oo ai se tasi e te iloa i le tofotofoina o le faatuatua? O a auala ua sania ai oe e ala i tofotofoga o lou faatuatua mo faamanuiaga sili atu?
Faailoa atu i tagata aoga faapea, o le toatele o alii sa auauna i le Tolauapiga a Siona sa faamanuiaina i avanoa e auauna ai i le malo o le Alii. Ia Fepuari 1835, na faatulagaina ai le Korama a Aposetolo e Toasefululua ma le Korama Muamua a Fitugafulu. O le toaiva o uluai Aposetolo ma sui uma o le Korama a Fitugafulu sa auauna atu i le Tolauapiga a Siona. (Tagai i le Church History in the Fulness of Times, 151.)
Valaaulia se tagata aoga e faitau leotele le faamatalaga lenei mai i le Perofeta o Iosefa Samita. Fai atu i le vasega e faalogologo mo le matafaioi sa faia a le Tolauapiga a Siona i le sauniaina o alii mo tulaga faaletaitai:
Ata
Perofeta o Iosefa Samita
“Sa le’i finagalo le Atua tou te tau. Sa le mafai ona Ia faatulagaina Lona malo i ni tamalii e toasefululua e tatalaina faitotoa o le Talalelei i atunuu o le lalolagi, ma i ni tamalii e toa fitusefulu i lalo o la latou taitaiga ia mulimuli i o latou tulagaaao, seiiloga na Ia aveina i latou mai se tino o alii o e na ofoina atu o latou ola, ma o e na faia se osigataulaga maoae e pei ona sa faia e Aperaamo” (i le History of the Church, 2:182; tagai foi i le Church History in the Fulness of Times, 151).
Faasoa atu lau molimau i le taua o le faatuatuaina ma le usitai i le Alii i taimi e tofotofoina ai o tatou faatuatua.
Ua aoao mai e le Alii le Au Paia i le mea e tatau ona latou faia a’o le’i laveaiina Siona
Aotele le Mataupu Faavae ma Feagaiga 105:20–37 i le faamatala atu e faapea, na ta’u mai e le Alii i le Au Paia i Misuri le auala na tatau ona latou tali atu ai i sauaga sa latou oo i ai, a’o faatalitali i le laveaiga na loma o Siona. Sa Ia fautuaina i latou e lotomaualalalo ma aloese mai le faaosoina o finauga. Sa Ia faamalamalama mai na tatau ona faapaiaina i latou e sauniuni ai mo le laveaiga mulimuli ane o Siona. E pei ona Ia fetalaia muamua mai i le faaaliga lava lea, na tatau ona latou “aoaoina atili atoatoa, ma maua le poto masani, ma iloa atili atoatoa e faatatau i lo latou tiute, ma mea ua [Ia] manaomia [ina] mai i o latou lima” (MF&F 105:10).
O a nisi o auala e tatau ona tatou tali atu ai i sauaga?
Valaaulia tagata aoga e faitau filemu le Mataupu Faavae ma Feagaiga 105:38–41 ma filifili se fasifuaitau mai fuaiupu e aotele ai mea na faatonuina e le Alii le Au Paia e fai e tali atu ai i tagata faasaua ia i latou.
E tusa ai ma le fuaiupu e 40, o a faamanuiaga o le a oo mai i le Au Paia i Misuri, pe afai latou te saili e faatu le filemu i isi? (O tali a tagata aoga e tatau ona atagia mai ai le mataupu faavae lenei: Afai tatou te saili e faatu le filemu ma isi, o le a faapea ona galulue faatasi mea uma mo lo tatou lelei.)
O a ni mea e mafai ona tatou faia e fesoasoani e faatu ai le filemu i isi?
E faapefea ona faamanuiaina oe a o e saili e faatu le filemu, e aofia ai ma i latou o e e ono faasaua mai ia te oe?
Valaaulia tagata aoga e mafaufau loloto i se mea se tasi latou te faia ia saili atili atu ai e faatuina le filemu ma isi i o latou olaga, aemaise lava pe a ono le sa’o le taulimaina o i latou, ma ia tusi se sini i a latou api mo le vasega po o api talaaga mo le suesueina o tusitusiga paia, ina ia mulimuli i lenei mataupu faavae.
A o lei tuua Katelani, Ohaio, na folafola atu e Iosefa Samita “i le usoga e faapea, afai o le a ola i latou uma i le ala e tatau ona latou ola ai, i luma o le Alii, tausi ana poloaiga, … e tatau ona latou toe foi saogalemu uma mai” (i le Church History in the Fulness of Times Student Manual, 2nd ed. [Church Educational System manual, 2003], 143) A le o lena, na lapatai mai ai le Perofeta, o le a latou tigaina i le toasa o le Atua.
Faatasi ai ma na faamalosiauga na malaga ese atu ai le Tolauapiga a Siona, ma le iloa na latou tuu atu o latou olaga i se tulaga matautia e ala i le auai i lenei malaga. Sa faailoa mai e Heber C. Kimball lagona o le toatele i lena taimi:
Ata
Heber C. Kimball
“Sa matou amata i le aso 5 o Me (1834), ma e moni lava sa o se taeao paia lenei ia te au. Sa ou tuua lo’u toalua ma [la’u] fanau ma uo, ma le le iloa pe ou te toe vaai ia i latou i le tino, a o faamata’uina a’u ma le usoga e le fili i totonu o lena atunuu ma i Misuri, e faapea o le a latou faaumatia i matou ma aveese i matou mai le laueleele” (i le Orson F. Whitney, The Life of Heber C. Kimball [1945], 40).
O le toatele o alii i le Tolauapiga a Siona na tuua aiga ma le utiuti po o le leai foi o se tupe, ma le leai o se auala e maua ai se tupe maua. Ina ia taofia ni faigata le talafeagai, na totoina ai e tagata o le Ekalesia ni togalaau ina ia mafai e fafine ma tamaiti ona selesele ia sana ma isi laau toto i le taimi a’o toesea le autau. O le averesi o le matutua o alii i le tolauapiga e 29 tausaga. O le tausoga o le Perofeta o Siaosi Alapati Samita, sa 16 ona tausaga, ae o Addison Greene sa 14 ona tausaga. O le tagata aupito matua sa 79 ona tausaga. O Iosefa Samita, o le na filifilia e avea ma “taitaiau o autau a Isaraelu”, sa na o le 28 tausaga o lona matua. (Tagai i le Church History in the Fulness of Times, 142–52.)
I le malaga atoa, sa masani ona faamatauina ai le Tolauapiga a Siona i le faatupu vevesi o isi. Ae ui i lea, na faataunuuina lava e le Alii le folafolaga o loo i ai i le Mataupu Faavae ma Feagaiga 103:20. Na saunoa Iosefa Samita, “E ui lava ina sa faaauau pea e o matou fili ona pua’iina mai le taufaamata’u o le faatupu vevesi, sa matou le fefefe lava, pe matou te tau faavaivai e faaauau la matou malaga,aua o le Atua sa faatasi ma i matou, ma o ana agelu sa muamua ia i matou, ma o le faatuatua o la matou vaega toaitiiti ua le maluelue lava. Ua matou iloa o agelu o a matou paaga, aua sa matou vaai ia i latou” (Aoaoga a Peresitene o le Ekalesia: Iosefa Samita [2007], 307–08).
Na aoao mai Elder D. Todd Christoffferson o le Korama a Aposetolo e Toasefululua:
Ata
Elder D. Todd Christofferson
“O le tulafono o le malo selesitila o le … tulafono ma feagaiga o le talalelei, lea e aofia ai lo tatou manatuaina pea o le Faaola ma la tatou tautinoga o le usiusitai, ositaulaga, faapaiaina, ma le faamaoni a’ia’i” (“O Mai i Siona,” Ensign po o le Liahona, Nov. 2008, 38).
Na saunoa mai Peresitene Ezra Taft Benson e faapea:
Ata
Peresitene Ezra Taft Benson
“O le tulafono o le talalelei e fusia uma ai tulafono, mataupu faavae ma sauniga e manaomia mo lo tatou faaeaga” (The Teachings of Ezra Taft Benson [1988], 337).
O le poloaiga ina ia toe foi atu i Katelani e aunoa ma le tau mo le Au Paia i Misuri sa o se tofotofoga o le faatuatua mo le toatele o tagata o le Tolauapiga a Siona. O nisi sa fouvale faaaliali ma mulimuli ane liliu ese ai. I le amataga o la latou malaga, sa lapataiina ai e le Perofeta tagata o le Tolauapiga a Siona e faapea, o lo latou le lotogatasi, finauga, ma le le usiusitai o le a aumaia ai se sasa (o se puapuaga tele po o se ma‘i) i o latou luga. O se taunuuga o le ita ma faitioga amioletonu e amata mai i faatonuga a le Alii e aua le tau, na toe ta‘ua ai e le Perofeta lenei lapataiga. I le aso 24 o Iuni, 1834, sa taia ai nisi o tagata o le Tolauapiga a Siona i le kolela. Na salalau atu le faamai pipisi, na mafua ai le ogaoga o le manavatatā, faasuati ma le malo o vae. A’o lei uma, e tusa o le 68 o tagata, e aofia ai Iosefa Samita, sa taia i le faamai, ma e toa 13 tagata o le tolauapiga ma tagata e toa 2 o le lotoifale na maliliu ai. Na saunoa mai Iosefa Samita e faapea, i le aso 2 o Iulai, sa ia “fai atu ai, afai o le a latou faamaualaloina i latou lava i luma o le Alii ma osi feagaiga e tausia Ana poloaiga ma usitai i laʼu fautuaga, o le a taofia le mala mai i lena itula, ma e le tatau ona i ai se isi tulaga o le kolela i totonu o i latou. Sa osifeagaiga le usoga e faatatau i lena mea i le siitia o lima, ma sa taofia ai le mala” (i le History of the Church, 2:120).
Sa taliaina e le Alii le osigataulaga a tagata o le tolauapiga ma faamanuiaina i latou ona o mea sa latou naunau e fai. Ia Iulai 1834, sa faataape ai e le Perofeta o Iosefa Samita le Tolauapiga a Siona. E ui o nisi sa le manumalo i le tofotofoga o lo latou faatuatua ma faapea ona tuua ai le Ekalesia, ae o i latou o e sa faamaoni sa faamalosia e lenei aafiaga.
Na faamalamalama mai e Elder Franklin D. Richards o le Au Peresitene o Fitugafulu e faapea:
Ata
Elder Franklin D. Richards
“Ua i ai le manatu o le toatele, o le ‘malaga a le Tolauapiga a Siona’ e leai se aoga ma e lei faamanuiaina. Sa i ai se tasi uso sa nofo pea i Katelani, ma e lei malaga atu o ia ma le tolauapiga, o lea uso na fesili atu ia Polika Iaga i le taimi na Ia fetaiai ai, ‘O le a le mea na outou maua i lenei malaga e leai se aoga i Misuri, lea na outou faia ma Iosefa Samita?’ O le tali lenei a Polika Iaga, ‘E le mafai e tamaoaiga uma ua i ai i le Itumalo o Geauga ona faatau ai aoaoga na ou maua i lea malaga,’ o le itumalo lea sa i ai Katelani i le taimi lea. (B. H. Roberts, “Brigham Young, A Character Sketch,” Improvement Era, vol. 6 Iuni 1903], p. 567.)” (“O Le Faamoemoega o le Olaga: Ia Faamaonia,” Liahona, Me 1972, 17).
O le Tolauapiga a Siona o se avanoa mo ona tagata e faaali atu ai i le Alii ma i latou lava le loloto o lo latou faatuatua, ma le tuuto i le galuega a le Alii. E pei o Aperaamo, o le toatele o le uluai taitai o le Ekalesia sa uia se suega na mamanuina e faataunuu ai faamoemoega paia. Na saunoa mai Elder Neal A. Maxwell o le Korama a Aposetolo e Toasefululua, “O i latou o e na savavali i le Tolauapiga a Siona sa le’i suesueina le nuu maotua o Misuri ae o o latou lava avanoa” (“Notwithstanding My Weakness,” Ensign, Nov. 1976, 14).