I le 1830, sa feagai ai le Perofeta o Iosefa Samita ma se luitau ona sa le malamalama tagata o le Ekalesia i le auala e maua ai faaaliga i le Ekalesia. Sa tautino e Ailama Page lona mauaina o faaaliga mo le Ekalesia e ala i se maa faapitoa, ma sa talitonu ai ni isi o tagata o le Ekalesia, e aofia ai ma Oliva Kaotui. I se taimi e le’i mamao ae amata se konafesi a le Ekalesia sa faia i le aso 26 o Setema, 1830, na faaali mai ai e le Alii ni upu moni ia sa fesoasoani ia Oliva Kaotui ma isi ia malamalama i le auala e maua ai faaaliga i le Ekalesia.
Na tautino mai e le Alii o le Peresitene o le Ekalesia ua na o le pau lea o le tagata e mafai ona maua faaaliga e taitaia ai le Ekalesia
Tusi le [upu] faataitai i luga o le laupapa.
O a ni faataitaiga o ni mea ua na o ni faataitai? (O se vaega o lenei talanoaga, atonu e te manao e faaali atu se faataitaiga o se aitema faataitai, e pei o se ata vali ua kopiina, tupe faataitai, po o se fualaauaina uga.)
Aisea e afaina ai le sese i se mea faataitai e faapea o se mea moni?
Valaaulia se tagata o le vasega e faitau leotele le lapataiga lenei mai ia Elder Dallin H. Oaks o le Korama a Aposetolo e Toasefululua:
Ata
Elder Dallin H. Oaks
“O le tiapolo o le tamā o pepelo uma, ma e manao pea o ia e taofia le galuega a le Atua i ana faaoleolega poto” (“O Laina e Lua o Fesootaiga,” Ensign po o le Liahona, Nov. 2010, 84).
Valaaulia se tagata o le vasega e faitau leotele le folasaga o le vaega mo le Mataupu Faavae ma Feagaiga 28. Fai atu i le vasega e mulimuli i le faitauga ma faailoa mai se mea faataitai na faaaoga e Satani e faasese ai nisi o tagata o le Ekalesia anamua.
O le a le mea faataitai na faaaoga e Satani e faasese ai tagata o le Ekalesia? (Afai e le ta‘ua mai e tagata o le vasega le tulaga tutusa i le va o le maa a Ailama ma le Urima ma le Tumema lea na faaaoga i nisi o taimi e Iosefa Samita, ia faailoa atu lenei tulaga tutusa.)
Faamalamalama atu, sa talitonu nisi o tagata o le Ekalesia i faaaliga sese ia na faailoa mai e Satani ia Ailama Page. A o suesue ma talanoaina e tagata o le vasega le faaaliga i le Mataupu Faavae ma Feagaiga 28, uunaia i latou e vaavaai mo upumoni e mafai ona fesoasoani ia i latou e aloese ai mai le taitaiseseina i mea faataitai a Satani. Faailoa atu i tagata o le vasega o le a e tusia nei upumoni i luga o le laupapa a o latou mauaina i le aluga o le lesona. Atonu e te manao e fautua atu i tagata o le vasega e tusi nei upumoni i le laina i autafa o a latou tusitusiga paia.
Valaaulia se tagata o le vasega e faitau leotele le Mataupu Faavae ma Feagaiga 28:1-4, ma valaaulia le vasega e faailoa mai po o le a le eseesega o tiutetauave i le Ekalesia a Oliva Kaotui mai tiutetauave a Iosefa Samita.
O le a le eseesega o tiutetauave a Oliva Kaotui mai [tiutetauave] a Iosefa Samita? (O Iosefa sa nafa ma le mauaina o poloaiga ma faaaliga mo le Ekalesia. O Oliva sa nafa ma le aoao atu e ala i le Faamafanafana, e faatatau i poloaiga ma faaaliga na maua e Iosefa.)
O a ni upumoni taua e uiga i le Peresitene o le Ekalesia e mafai ona tatou aoaoina mai i le Mataupu Faavae ma Feagaiga 28:2? (E tatau ona faailoa mai e tagata o le vasega le aoaoga faavae lenei: O le Peresitene o le Ekalesia e na o le pau lea o le tagata e mafai ona maua faaaliga mo le Ekalesia atoa. Tusi lenei faamatalaga i luga o le laupapa.)
E mafai faapefea e lo tatou malamalama i lenei upumoni ona fesoasoani ia i tatou e aloese ai mai le faaseseina?
A o talanoaina e tagata o le vasega nei fesili, atonu e te manao e faamautinoa atu ia i latou, e mafai ona tatou faatuatuaina i taimi uma aoaoga ma fautuaga a le Peresitene o le Ekalesia, ona o le a le faatagaina lava e le Alii le Peresitene e taitaieseina i tatou. (Manatua o lenei folafolaga o loo maua i se saunoaga a Peresitene Uilifoti Uitilafi. O lena faamatalaga o loo aofia ai i le Mataupu Faavae ma Feagaiga, i anomea faaopoopo i tua atu o le Folafolaga Aloaia 1.)
Faamalamalama atu, e lei leva ona faaali mai e le Alii ia upumoni o loo ua tusia nei i le Mataupu Faavae ma Feagaiga 28, ae fai e Oliva Kaotui se mea na faaalia ai sa le’i malamalama atoatoa lava o ia i le eseesega o ona tiutetauave i le Ekalesia ma tiutetauave o Iosefa Samita i le avea ai o se Peresitene o le Ekalesia. Fai atu i se tagata o le vasega e faitau le tala lenei:
Sa nofo Iosefa Samita i Haramoni, Penisilevania, ae ona mauaina se tusi mai ia Oliva Kaotui, o le sa i Feiete, Niu Ioka, e tusa ma le 100 maila (160 kilomita) le mamao. Na fai mai Oliva, sa tau i se mea sese i le faaaliga lea tatou te ta’ua nei o le Mataupu Faavae ma Feagaiga 20. Na tusia e Oliva: “Ou te poloai atu ia te oe i le suafa o le Atua e aveese na upu.” Sa malaga atu Iosefa i Feiete ma iloa ai, na ioe faatasi le aiga o Uitimera ma Oliva e uiga i le mea sa faapea o se mea sese i le faaaliga. Na tusia e Iosefa, “Sa le faapea sa leai se galuega ma se faapalepale na mafai ona ou onosaia i soo se tasi o i latou e soalaupule malie ai e uiga i le mataupu.” Mulimuli ane, “sa faamanuiaina [le Perofeta] i le aumaia e le gata o le aiga o Uitimera, ae … faapena foi ia Oliva Kaotui e faailoa mai sa sese i latou” (Histories, Volume 1: 1832–1844, vol. 1 of the Histories series of The Joseph Smith Papers [2012], 426; tagai foi i itulau 424–25).
Fai atu i tagata o le vasega e faitau filemu le Mataupu Faavae ma Feagaiga 28:6–7, ma vaavaai mo le faatonuga a le Alii ia Oliva Kaotui.
O a mea na aoao mai e le Alii ia Oliva Kaotui? (A uma ona tali mai tagata o le vasega, ia tusi le aoaoga faavae lenei i luga o le laupapa: I le Ekalesia a Iesu Keriso, e le maua e tagata taitoatasi ni faaaliga e faatonu ai se tasi o loo pulefaamalumalu ia i latou.)
E faapefea ona fesootai lenei upumoni i le tala na faatoa tatou faitauina?
E mafai faapefea ona fesoasoani lenei upumoni ia i tatou i aso nei?
Ua valaau le Alii ia Oliva Kaotui e talai atu le talalelei i sa Lamana
Valaaulia se tagata o le vasega e faitau leotele le Mataupu Faavae ma Feagaiga 28:8-10, ma fai atu i le vasega e faailoa mai le mea na valaauina e le Alii ia Oliva Kaotui e fai.
O le a le mea na valaau le Alii ia Oliva e fai? (Talai atu le talalelei i sa Lamanā.)
O le a se mea e mafai ona tatou iloa e uiga i faaaliga faaletagata lava ia mai le Mataupu Faavae ma Feagaiga 28:8? (A uma ona tali mai tagata o le vasega, tusi le mataupu faavae lenei i luga o le laupapa: E mafai ona tatou maua faaaliga mo lo tatou lava manuia, ma fesoasoani ia i tatou i valaauga ma tofiga e tuuina mai ia i tatou.)
Ina ia fesoasoani i tagata o le vasega ia malamalama i lenei mataupu faavae, fai atu i se tagata o le vasega e faitau leotele le faamatalaga lenei a Peresitene Boyd K. Packer, o le Korama a Aposetolo e Toasefululua:
Ata
Peresitene Boyd K. Packer
“Tatou te agavaa mo faaaliga faaletagata lava ia. Ae peitai, sei vagana lava ua vaetofia i tatou i se tofiga pulefaamalumalu, o le a tatou le maua ni faaaliga e faatatau i mea e tatau ona faia e isi. …
“E le tatau ona manatu i se aafiaga faaleagaga e le masani ai, o se valaau patino e faatonu ai isi. O lo‘u talitonuga maumaututu o aafiaga faapitoa faapena, e patino ma e tatau ona gata ai lava i le tagata ia” (“Revelation in a Changing World,” Ensign, Nov. 1989, 14–15).
A o lei amataina le vasega, tusi matafaioi ma valaauga nei i luga o ni fasi pepa: matua, Pulega Aoao, epikopo, faifeautalai, faiaoga o le Aoga Sa, peresitene o le Maea Meite, faiaoga o aiga, faiaoga asiasi. Tuu ia pepa i totonu o se koneteina.
Valaaulia tagata o le vasega e filifili ia pepa mai le koneteina ma faitau atu taitasi i le vasega. A o faitauina pepa taitasi, fai atu i tagata o le vasega e fautua mai ni ituaiga faaaliga e mafai ona maua e tagata taitoatasi, e fesoasoani ia i latou e faataunuu ai lena matafaioi po o le valaauga.
Atonu e te manao e valaaulia tagata o le vasega e faasoa mai ni aafiaga lea na latou maua i faaaliga i se tofiga po o se tiutetauave. Atonu foi e te manao e faasoa atu se aafiaga na e maua ai ni faaaliga e fesoasoani ia te oe i se valaauga po o se tofiga. Faamanatu atu i tagata o le vasega o nisi o aafiaga e paia pe patino tele mo le faasoaina mai.
Uunaia tagata o le vasega e tatalo mo faaaliga ina ia fesoasoani ia i latou i o latou olaga faaletagata lava ia ma i o latou valaauga ma tofiga o le Ekalesia. Ia uunaia foi i latou e tatalo ina ia faamanuiaina taitai o le Ekalesia i le soifua maloloina ma le saogalemu, faatasi ai ma musumusuga latou te manaomia e faataunuu ai o latou tiutetauave.
Ua faatonu e le Alii ia Oliva Kaotui e faasa’o Ailama Page ma fesoasoani e faatulaga tatau le Ekalesia
Faamanatu i tagata o le vasega ia faaaliga sese na faailoa mai e Ailama Page i nisi o tagata o le Ekalesia. Valaaulia tagata o le vasega e faitau filemu le Mataupu Faavae ma Feagaiga 28:11–14 ina ia iloa ai le mea na faatonuina e le Alii ia Oliva Kaotui e fai e fesoasoani ai e foia lenei faafitauli.
O le a le mea na poloai mai le Alii ia Oliva e fai e fesoasoani e foia ai le faafitauli ia Ailama Page?
O le a se mea e mafai ona tatou aoao mai i nei fuaiupu e uiga i tiutetauave o taitai o le Ekalesia? (E mafai ona faailoa mai e tagata o le vasega ni mataupu faavae eseese, ae ia mautinoa e faamamafa atu le faamatalaga lenei: Ua i ai i taitai o le Ekalesia le tiutetauave e faasa‘o ai i latou o e o loo taitaiseseina isi. Tusi le mataupu faavae lenei i le laupapa.)
O le a se mea e mafai ona tatou aoao mai i le Mataupu Faavae ma Feagaiga 28:13 i le ala e taitai ai e le Alii Lana Ekalesia? (Atonu e faaaoga e tagata o le vasega upu eseese, ae ia mautinoa latou te faailoa mai le mataupu faavae lenei: I le Ekalesia a Iesu Keriso, e tatau ona faia mea uma i le faatulagaga tatau. Tusi lenei mataupu faavae i le laupapa.)
Faamalamalama atu o se tasi o auala tatou te faia ai mea “i le faatulagaga tatau, ma i le finagalo autasi” o le tatou lagolagoina faalauaitele o tagata taitoatasi i le valaauga o le Ekalesia.
Aisea e te manatu e taua ai le lagolagoina faalauaitele o tagata taitoatasi i o latou valaauga?
Ina ia fesoasoani i le vasega ia malamalama i le auala e aumai ai e le finagalo autasi le faatulagaga sa’o ma le puipuiga mo le Ekalesia, fai atu i se tagata o le vasega e faitau le saunoaga lenei a Peresitene Packer:
Ata
Peresitene Boyd K. Packer
“E oo mai faaaliga i le Ekalesia ia i latou o e ua sa’o ona valaauina, lagolagoina, faauuina, pe vaetofia. Mo se faataitaiga, o se epikopo, o le a le mauaina se faaaliga e faatatau i se uarota tuaoi, aua o lena [uarota] e i fafo atu o lana eria.
“O nisi taimi o le a faapea mai ai se tasi ua ia maua le pule e aoao atu ma faamanuia ai e aunoa ma le valaauina ma vaetofia. …
“O le mafuaaga lena ua puipuia ai ma le faaeteete i le Ekalesia le faagasologa o le lagolagoina o i latou ua valaauina i tofi—ina ia iloa e tagata uma le ua i ai le pule e aoao atu ma faamanuia” (“Revelation in a Changing World,” 15).
E tusa ai ma le saunoaga a Peresitene Packer, aisea tatou te lagolagoina ai faalauaitele i latou e maua valaauga o le Ekalesia?
A uma ona sii o tatou lima e fai atu o le a tatou lagolagoina tagata i o latou valaauga, o le a le mea e tatau ona tatou faia e lagolago moni ai i latou?
Ina ia fesoasoani i tagata o le vasega e faaaoga ia mataupu faavae na latou aoaoina i le lesona o le aso, faitau leotele tulaga nei ma fai atu i ai pe faapefea ona latou tali atu i ai:
Ua e maua se fesootaiga faaeletonika e faapea o se faaaliga fou. O loo i ai aoaoga e le ogatasi ma tusitusiga paia po o upu a perofeta soifua.
Ua e matauina ua fai e se tagata o lau uarota se faamatalaga e sese le aoaoga faavae a’o faia lana molimau i le taimi o le sauniga faamanatuga. Ua e popole ona afai e ave sese mo le mea moni, e ono i ai se aafiaga tiga i isi. O ai e tatau ona faasa’oa le tagata sa le sa’o le mea na tautala ai?
Valaaulia se tagata o le vasega e faitau leotele le Mataupu Faavae ma Feagaiga 28:15-16, ma fai atu i le vasega e faailoa mai le fautuaga faaiu a le Alii ia Oliva Kaotui i le faaaliga lenei.
Faamalamalama atu ina ua uma ona maua e Iosefa Samita le faaaliga lenei, sa ia tauaofiaina se konafesi e faatulaga tatau ai le Ekalesia. I le konafesi, “sa lafoai ai e Uso Page, faapea foi ma le ekalesia atoa o e sa i ai, le maa sa ta’ua, ma mea uma na faatatau i ai” (Histories, Voluma 1: 1832 – 1844, 452). Ina ia faaiuina lenei lesona, molimau atu i upumoni sa outou talanoaina ma lo latou taua i le fesoasoani ia i tatou e aloese ai mai le taitaiseseina.
Sa tuuina mai e le Alii ia Oliva Kaotui ni tiutetauave e faaopoopo atu i na [tiutetauave] o loo lisiina i le Mataupu Faavae ma Feagaiga 28:1-4. Sa umia e Oliva Kaotui ma Iosefa Samita ia ki o le meaalofa e faaliliu ai le Tusi a Mamona (tagai i le MF&F 6:25-28). Sa avea foi Oliva ma “se aposetolo a Iesu Keriso” ma se “toeaina lona lua o [le] ekalesia” (MF&F 20:3).
I se faaaliga i le Perofeta o Iosefa Samita, sa ta’u mai ai e le Alii ia Oliva Kaotui, e na o le Peresitene o le Ekalesia e mafai ona “maua poloaiga ma faaaliga” mo le Ekalesia atoa (tagai i le MF&F 28:1-2). Na fetalai mai foi le Alii o le a “maua [e Oliva Kaotui] faaaliga” i ona tiutetauave patino (tagai i le MF&F 28:8). Na aoao mai Elder Dallin H. Oaks o le Korama a Aposetolo e Toasefululua, e uiga i le paleni i le va o faaaliga faaletagata lava ia ma faaaliga e tuuina mai e ala i taitai perisitua:
Ata
Elder Dallin H. Oaks
“Ua tuuina mai e lo tatou Tama Faalelagi i Ana fanau ni laina se lua o fesootaiga ma Ia—o mea e mafai ona tatou ta’ua o le laina patino ma le laina o le perisitua. E tatau ona malamalama i ai tagata uma ma taitaiina ai e nei laina taua uma e lua o fesootaiga. …
“… I lona atoaga o le laina patino e le mafai ona faagaoioia na o ia ae le i ai le laina o le perisitua. O le meaalofa o le Agaga Paia—o le auala lea o fesootaiga mai le Atua i tagata—e faaeeina atu e ala i le pule o le perisitua e pei ona faatagaina ai e i latou o umiaina ia ki o le perisitua. …
“… Ae paga lea, ua taatele lava i tagata o loo solia poloaiga a le Atua pe le usiusitai i le fautuaga a o latou taitai perisitua ona folafola mai e faapea, ua faaali mai e le Atua ia i latou ua tuusaunoa i latou mai le usitaia o nisi o poloaiga pe mai le mulimuli i nisi o fautuaga. O tagata faapena e mafai ona mauaina faaaliga po o musumusuga, ae e le mai le punavai ua latou manatu o loo ala mai ai. O le tiapolo o le tamā o pepelo uma, ma ua faateteleina lona naunau e taofia le galuega a le Atua e ala i ana faiga faataitai poto” (“O Laina e Lua o Fesootaiga,” Ensign po o le Liahona, Nov. 2010, 83–84).
Na molimau mai Peresitene James E. Faust o le Au Peresitene Sili e faapea, o le Peresitene o le Ekalesia ua na o le pau lea o le tagata e mafai ona maua faaaliga mo le Ekalesia atoa. Sa ia faamatala mai le auala e tuuina mai ai e lenei mea le faatulagaga tatau ma le puipuiga mo le Au Paia o Aso e Gata ai:
Ata
Peresitene James E. Faust
“Ua tautino mai nisi [ua ia i latou] meaalofa faaleagaga po o le pule maualuga atu i fafo atu o le pule o le perisitua ua faatulagaina a le Ekalesia. Ua latou fai mai latou te talitonu i mataupu faavae ma sauniga o le talalelei, ma talia le Peresitene o le Ekalesia o le taitai faatulafonoina ua i ai, ae ua tautino mai ua ia i latou se faatulagaga tatau e maualuga atu lea e le o i ai i le Peresitene. O lenei mea e masani ona faia e ta’uamiotonu ai se gaoioiga e le o tusa ai ma aoaoga faavae o le Ekalesia. Ae peitai, e le mafai ona i ai se faatulagaga tatau maualuga atu, aua o le Peresitene o le Ekalesia e umia ma faaaogaina uma ki o le malo o le Atua i le lalolagi. Na fetalai mai le Alii e uiga i le Peresitene o le Ekalesia ‘e leai se isi e ese mai e tofia [e maua poloaiga ma faaaliga] vagana ai ua ala mai ia te ia.’ [MF&F 115:4]. …
“…O faaaliga faifaipea ma le taitaiga mo le Ekalesia e oo mai e ala i le Peresitene o le Ekalesia, ma o le a ia le taitaieseina lava le Au Paia” (“The Prophetic Voice,” Ensign, Me 1996, 6–7).
Na aoao mai le Perofeta o Iosefa Samita, e le maua e tagata taitoatasi ni faaaliga e faatonu ai se tasi o loo pulefaamalumalu ia i latou i le Ekalesia:
Ata
Perofeta o Iosefa Samita
“E feteenai ma le faatulagaga a le Atua mo soo se tagata o le Ekalesia, po o soo se isi lava, e mauaina ni faatonuga mo e o loo i ai le pule, e sili atu i lo latou” (Aoaoga a Peresitene o le Ekalesia: Iosefa Samita [2007], 210).
O le faaupuga sa Lamanā e faatatau i se vaega o tagata i le Tusi a Mamona, o le toatele o i latou na tupuga mai ia Lamana, o le atalii matua o Liae. O le faaaogaina e le Alii o le faaupuga sa Lamanā i le Mataupu Faavae ma Feagaiga 28:9 ua faailoa mai ai o nisi e tupuga mai ia Liae sa faatasi ai ma tagata Initia Amerika, i le taimi lea, sa nonofo ai i le mea sa ta’ua o le tuaoi i sisifo o le Iunaite Setete. Ia Me 1830, na pasiaina ai e le Konakelesi a le Iunaite Setete le Pili e Faatulai ai Tagata Initia [Indian Removal Bill], lea na manaomia ai le siitia atu o tagata Initia e nofoia le Teritori Initia i sisifo o le setete o Misuri. O lea la, na malaga ai Oliva Kaotui ma ana soa i Misuri i sisifo, “i tuaoi latalata i sa Lamanā” (MF&F 28:9), e aoao atu le talalelei i tagata Initia Amerika.
E le o tautino mai e le Tusi a Mamona e faapea o tagata Initia Amerika e tupuga uma mai i le aiga o Liae. Na saunoa mai Peresitene Anthony W. Ivins o le Au Peresitene Sili:
Ata
Peresitene Anthony W. Ivins
“E tatau ona tatou faaeteete i a tatou faaiuga tatou te faia. O le Tusi a Mamona o loo aoao mai ai le talafaasolopito o tagata ma’oti e toatolu … o e na o mai i lenei konetineta mai le lalolagi tuai. E le o ta’u mai ai faapea, sa leai se tasi iinei na muamua mai ia i latou. E le o ta’u mai ai faapea e lei o mai ni tagata mulimuli ane. Ma o lea, afai na i ai ni mea fou na maua o loo ta’u mai ai le eseesega i le afuaga o tupuaga o tagata, e faigofie lava ona tusia se tala, ma alagatatau ai, aua ua tatou talitonu na i ai isi tagata na o mai i lenei konetineta” (i le Conference Report, Apr. 1929, 15).
I Niu Ioka i matusisifo i le taimi o le popofou o le 1800, e toatele tagata sa talitonu e mafai e tagata taitoatasi ona maua le malamalama faamaneta e ala i se mea faigaluega e pei o se maa po o se tootoo maga. Na faapea mai Ailama Page e mafai ona faaali mai ni upu i luga o le maa sa ia te ia. Sa ia fai mai, a uma ona ia faalauina mai ia upu ma kopiina i se pepa, ona mouese lea o upu mai le maa ae faaali mai isi (tagai i le Documents: Volume 1: July 1828-June 1831, vol. 1 of the Documents series of The Joseph Smith Papers [2013], 184). Sa teena e le Alii faaaliga sese a Ailama Page. E faaopoopo atu i le faaaogaina o le Urima ma le Tumema, atonu sa faaaoga e Iosefa se maa vaai sa ia maua i lona talavou e faaliliu ai se vaega o le Tusi a Mamona. E tele faamatalaga o loo i ai e uiga i le auala na faaaogaina ai e le Perofeta le Urima ma le Tumema e faaliliu ai le Tusi a Mamona ma e uiga i isi mea o le faagasologa o le faaliliuga, ae na saunoa mai Elder Neal A. Maxwell o le Korama a Aposetolo e Toasefululua, “Tatou te le iloa lava ia faamatalaga” (“By the Gift and Power of God,” Ensign, Jan. 1997, 39). O se tasi o eseesega taua tele i le va o Iosefa Samita ma Ailama Page ona na valaauina e le Atua ia Iosefa Samita e faatino le galuega o le faaliliuga, ma ia maua faaaliga mo le Ekalesia (tagai i le MF&F 21:1-6). E ese mai la, na manino ona ta’u mai e le Alii e faapea, sa faasese e Satani ia Ailama Page ma i latou na talitonu i upu sa ia faalauina (tagai i le MF&F 28:11).
Sa lapataia i tatou e Peresitene James E. Faust o le Au Peresitene Sili, ia aloese mai gaoioiga e ono valaaulia ai le faatosinaga a Satani i o tatou olaga:
Ata
Peresitene James E. Faust
“O Satani e le o se mataupu faagaeetia. Ou te manatu ia te ia, o le tau faasese mua. …
“E le o se mea lelei le tosina atu ia Satani ma ana mea lilo. E leai se mea lelei e maua i le faalatalata atu i le leaga. E pei o le taalo i le afi, e faigofie lava ona mu ai. … Pau lava le ala saogalemu, o le taumamao ese lea mai ia te ia ma soo sana gaoioiga leaga po o ana faiga faatiapolo. O aafiaga faataumaoi o le tapuai i le tiapolo, faataulaitu, temoni, faalauatau, vaafaatau, faitogafiti eleelea, ma isi ituaiga uma o faiga faatemoni, e tatau ona aloese mai ai i taimi uma” (“O Malosiaga O Le A Laveaiina Ai i Tatou,” Ensign, Ian. 2007, 5).