1 Chi yaal, jo’ka’in naxye li Qaawa’: Taak’ulmanq naq li junjunq chi aamej li nakanab’ank re lix maak ut nachal wik’in, ut naxpatz’ ink’ab’a’, ut na’ab’in chiru lix yaab’ inkux, ut naxpaab’eb’ lin taqlahom, taaril li wilob’aal ut tixnaw naq wankin;

2 Ut naq laa’in li tz’aqal saqen li nakutanob’resink re li junjunq chi winq li nachal sa’ li ruchich’och’;

3 Ut naq laa’in wankin rik’in li Yuwa’b’ej, ut li Yuwa’b’ej wik’in laa’in, ut li Yuwa’b’ej ut laa’in junajo—

4 Li Yuwa’b’ej xb’aan naq a’an kixk’e we xkomon lix tz’aqalil ru, ut li K’ajolb’ej xb’aan naq kinwan sa’ li ruchich’och’, ut kink’ul li tz’ejwalej choq’ inmuheb’aal, ut kinwan sa’ xyanqeb’ li ralaleb’ li winq.

5 Kinwan sa’ li ruchich’och’ ut kink’uluk rik’in lin Yuwa’, ut lix k’anjel a’an kik’utb’esiman chi ch’olch’o.

6 Ut laj Jwan kiril ut kixch’olob’ xyaalal lix tz’aqalil inloq’al, ut lix tz’aqalil lix tz’iib’anb’il esil laj Jwan k’utb’esinb’ilaq moqon.

7 Ut a’an kixch’olob’ xyaalal, ut kixye: Kiwil lix loq’al, naq kiwan a’an sa’ xtiklajik, rub’elaj naq kiwan li ruchich’och’;

8 Jo’kan ut, sa’ xtiklajik chaq kiwan li Aatin, xb’aan naq a’an chaq li Aatin, a’ laj k’amol resil li kolb’a-ib’—

9 Lix saqen ut laj Tojol rix li ruchich’och’; li Musiq’ej re li yaal, li kichal sa’ li ruchich’och’, xb’aan naq li ruchich’och’ yiib’anb’il xb’aan a’an, ut sa’ a’an kiwan lix yu’ameb’ li winq ut lix saqenkeb’ li winq.

10 Eb’ li ruchich’och’ yiib’anb’ileb’ chaq xb’aan a’an; eb’ li winq yiib’anb’ileb’ chaq xb’aan a’an; chixjunil li k’a’aq re ru yiib’anb’il chaq xb’aan a’an, ut rik’in a’an, ut sa’ xk’ab’a’ a’an.

11 Ut laa’in, aj Jwan, ninch’olob’ xyaalal naq kink’e reetal lix loq’al, chanchan xloq’al li Junaj Yo’lajenaq chiru li Yuwa’b’ej, nujenaq chi usilal ut chi yaal, a’ li Musiq’ej re li yaal, li kichal ut kiwan sa’ li tz’ejwalej, ut kiwan sa’ qayanq.

12 Ut laa’in, aj Jwan, kiwil naq moko kixk’ul ta xkomon li tz’aqalil sa’ xtiklajik; kixk’ul b’an li usilal jo’ reeqaj li usilal.

13 Ut moko kixk’ul ta xkomon li tz’aqalil sa’ xtiklajik; kinume’ b’an chalen chaq sa’ li jun usilal toj sa’ li jun chik, toj reetal naq kixk’ul jun xtz’aqalil ru;

14 Jo’kan ut naq li Ralal li Dios kiyeeman re, xb’aan naq moko kixk’ul ta xkomon li tz’aqalil sa’ xtiklajik.

15 Ut laa’in, aj Jwan, ninch’olob’ xyaalal, ut ilomaq, kiteeliik li choxa, ut li Santil Musiq’ej kikub’e sa’ xb’een jo’ jun mukuy, ut kik’ojla sa’ xb’een, ut kichal jun xyaab’ kuxej chalen chaq sa’ choxa ut kixye: a’in li Walal raaro inb’aan.

16 Ut laa’in, aj Jwan, ninch’olob’ xyaalal naq kixk’ul jun xtz’aqalil lix loq’al li Yuwa’b’ej;

17 Ut kixk’ul chixjunil li wankilal, jo’ sa’ choxa jo’ ajwi’ sa’ ruchich’och’, ut lix loq’al li Yuwa’b’ej kiwan rik’in, xb’aan naq kiwan a’an rik’in.

18 Ut taak’ulmanq, naq wi tiikex chi paab’ank teek’ul xtz’aqalil lix tz’iib’anb’il esil laj Jwan.

19 Nink’e eere li yehom a’in re teetaw ru ut teenaw chan ru loq’onink, ut teenaw k’a’ru nekeloq’oni, re texruuq chi chalk rik’in li Yuwa’b’ej sa’ lin k’ab’a’, ut sa’ tz’aqal xq’ehil, teek’ul xkomon lix tz’aqalil ru.

20 Xb’aan naq wi nekepaab’ lin taqlahom, teek’ul xkomon lix tz’aqalil ru, ut taanimaaq eeloq’al wik’in jo’ chanru naq laa’in wankin rik’in li Yuwa’b’ej; jo’kan ut, ninye eere, teek’ul li usilal jo’ reeqaj li usilal.

21 Ut anajwan, chi yaal ninye eere, laa’in kinwan sa’ xtiklajik rik’in li Yuwa’b’ej, ut laa’in li Xb’een Yo’lajenaq;

22 Ut chixjunileb’ li yo’lajenaqeb’ sa’ ink’ab’a’ neke’tz’aqon sa’ xloq’alil ajwi’ a’an, ut a’aneb’ li iglees re li Xb’een Yo’lajenaq.

23 Laa’ex ajwi’ kexwan sa’ xtiklajik rik’in li Yuwa’b’ej; li k’a’ru re Musiq’ej, a’ li Musiq’ej re li yaal;

24 Ut li yaal, a’an xnawb’al li k’a’aq re ru jo’ chanru wan, jo’ kiwan, ut jo’ toj taawanq;

25 Ut yalaq k’a’ru tiqb’il ru malaj k’osb’il ru chiru a’in, a’an lix musiq’ li maa’us a’an li kiwan choq’ aj tik’ti’ chalen chaq sa’ xtiklajik.

26 Li Musiq’ej re li yaal a’an re li Dios. Laa’in li Musiq’ej re li yaal, ut laj Jwan kixch’olob’ xyaalal chiwix, ut kixye: A’an kixk’ul jun xtz’aqalil li yaal, relik chi yaal, re ajwi’ chixjunil li yaal;

27 Ut maajun winq nak’uluk re jun tz’aqalil, ka’ajwi’ wi naxpaab’ lix taqlahom.

28 Li ani napaab’ank re lix taqlahom naxk’ul li yaal ut li saqen, toj reetal naq nanimaak xloq’al chi yaal, ut naxnaw chixjunil li k’a’aq re ru.

29 Li winq kiwan ajwi’ sa’ xtiklajik rik’in li Dios. Li wankilal chi k’oxlak, malaj lix saqenkil li yaal, ink’a’ kiyo’ob’tesiman chi moko kiyiib’aman, chi moko ajwi’ naru xyo’ob’tesinkil.

30 Chixjunil li yaal xaqxo xjunes sa’ li jun t’oram li kixk’ojob’ wi’ li Dios, re taak’anjelaq xjunes rib’, jo’ chanru ajwi’ chixjunil li wankilal chi k’oxlak; wi ut ink’a’ jo’kan, maak’a’aq raj li wank.

31 K’ehomaq reetal, wahi’ lix taql xch’ool li winq, ut wahi’ li k’eeb’il wi’ li tojb’a-maak sa’ xb’een li winq; xb’aan naq li k’a’ru kiwan chalen chaq sa’ xtiklajik k’utk’u chi ch’olch’o ru chiruheb’, ut moko neke’xk’ul ta li saqen.

32 Ut li junjunq chi winq li moko naxk’ul ta li saqen lix musiq’, wan rub’el li tojb’a-maak.

33 Xb’aan naq li winq, a’an musiq’ej. Li yiib’anb’il wi’ li k’a’aq re ru, junelik nawan, ut li musiq’ej ut li yiib’ahom, naq laq’lookeb’ chi ink’a’ naru xjachb’al rib’, neke’xk’ul xtz’aqalil li sahil ch’oolejil;

34 Ut naq jachjookeb’ ru, li winq ink’a’ naru chixk’ulb’al xtz’aqalil li sahil ch’oolejil.

35 Li yiib’anb’il wi’ li k’a’aq re ru, a’an lix muheb’aal li Dios; relik chi yaal, li winq a’an xmuheb’aal li Dios, a’eb’ santil ochoch ajwi’; ut yalaq santil ochoch li muxb’il, li Dios tixsach li santil ochoch a’an.

36 Lix loq’al li Dios a’an li wankilal chi k’oxlak, malaj sa’ jalan chik aatin, li saqen ut li yaal.

37 Li saqen ut li yaal neke’xtz’eqtaana li maa’us a’an.

38 Li junjunq xmusiq’ li winq kiwan chi maak’a’ xmaak sa’ xtiklajik; ut rik’in naq li Dios kixtoj rix li winq chiru li t’ane’k, eb’ li winq ke’ok wi’chik, sa’ xk’uula’alileb’, chi maak’a’eb’ xmaak chiru li Dios.

39 Ut nachal li maa’us a’an ut naxmaq’ li saqen ut li yaal, rik’in li q’etok chaq’rab’, chiruheb’ li ralal xk’ajoleb’ li winq, ut xb’aan li na’leb’ li kanab’anb’il chaq xb’aaneb’ lix yuwa’eb’.

40 A’b’anan laa’in kexintaqla chixk’iresinkileb’ lee kok’al sa’ li saqen ut li yaal.

41 A’b’an chi yaal ninye aawe, at inmoos Frederick G. Williams, laa’at katkana rub’el li tojb’a-maak a’in;

42 Ink’a’ kak’ut li saqen ut li yaal chiruheb’ laa walal aak’ajol, jo’ chanruheb’ li taqlahom; ut li maa’us a’an toj wan xwankil sa’ aab’een, ut a’in xyaalalil laa ch’a’ajkilal.

43 Ut anajwan jun taqlahom nink’e aawe—wi taawaj kole’k taak’e xtuqub’ankil ru laa wochoch laa’at, xb’aan naq wan k’iila k’a’aq re ru li moko tiik ta sa’ laa wochoch.

44 Chi yaal ninye re lin moos aj Sidney Rigdon, naq wan k’a’aq re ru li ink’a’ kixpaab’eb’ wi’ li taqlahom chirixeb’ li ralal xk’ajol; jo’kan ut, xb’een wa k’e xtuqub’ankil ru laa wochoch.

45 Chi yaal ninye re lin moos aj Jose Smith, alalb’ej, malaj sa’ jalan chik aatin, raab’ilex inb’aan tinye eere, xb’aan naq laa’ex li raab’ilex inb’aan, ut taawanq eereechanihom wochb’een—

46 Moos xinye eere choq’ re li ruchich’och’, ut laa’ex xmooseb’ a’an choq’ we laa’in—

47 Ut anajwan, chi yaal ninye re laj Jose Smith, alalb’ej—Laa’at ink’a’ xapaab’ li taqlahom, ut tento tatwanq chi ch’iilanb’il chiru li Qaawa’;

48 Laa junkab’al tento te’xjal xk’a’uxl ut te’xkanab’ junjunq li k’a’aq re ru, ut q’axal wi’chik te’ab’inq chiru laa yehom, malaj ut te’isimanq chaq sa’ xna’ajeb’.

49 Li k’a’ru ninye re li jun ninye re chixjunil; chattijoq junelik, maare anchal li maa’us a’an taawanq xwankil sa’ aab’een, ut tatrisi chaq sa’ laa na’aj.

50 Jo’kan ajwi’ lin moos aj Newel K. Whitney, jun obiisp re lin iglees, tento naq taak’ehe’q xq’usb’al, ut tixk’e xtuqub’ankil ru lix junkab’al, ut taaril naq q’axal wi’chik yalb’ilaqeb’ xq’e ut anchalaqeb’ xch’ool sa’ rochocheb’, ut junelik te’tijoq, malaj ut te’isimanq chaq sa’ xna’ajeb’.

51 Anajwan, ninye eere, ex raab’ilex inb’aan, lin moos aj Sidney Rigdon chixchapaq xb’e, ut chixseeb’a rib’, ut chixch’olob’ ajwi’ resil li chihab’ k’ulub’ajel re li Qaawa’, ut li evangelio re li kolb’a-ib’, jo’ tink’e li aatin re; ut rik’in li tijok sa’ paab’aal chi junaj eech’ool, laa’in tinxaqab’ a’an.

52 Ut eb’ lin moos aj Jose Smith, alalb’ej, ut aj Frederick G. Williams che’xseeb’a ajwi’ rib’, ut taak’eemanq reheb’ jo’ chanru ajwi’ li tijok rik’in paab’aal, ut a’ yaal jo’ nekepaab’ lin yehom moko taasache’q ta eena’leb’ sa’ li ruchich’och’ a’in, chi moko sa’ li ruchich’och’ chalel.

53 Ut chi yaal ninye eere, naq a’an li wajom naq teeseeb’a eerib’ chixjaltesinkileb’ ru lin loq’laj hu, ut chixtawb’al eenawom chirix li k’a’ru ak uxb’il, ut chirixeb’ li tenamit, ut chirixeb’ li awa’b’ejihom, chirixeb’ lix chaq’rab’ li Dios ut xchaq’rab’eb’ li winq, ut chixjunil a’in choq’ re lix kolb’al Sion. Amen.