Tasal 118
K’utb’esinb’il na’leb’ k’eeb’il rik’in xtz’uumal re laj Jose Smith li Profeet, sa’ Far West, Missouri, 8 Julio 1838, re xsumenkil ru lix tz’aamahom, “K’ut chiqu li rajom aach’ool, at Qaawa’, chirixeb’ li Kab’laju.”
1–3, Li Qaawa’ tixk’e li taak’anjelaq reheb’ lix junkab’aleb’ li Kab’laju; 4–6, Na’ux li b’oqe’k sa’ li na’ajej yamyo sa’ li Kab’laju.
1 Chi yaal, jo’ka’in naxye li Qaawa’: Chi’uxmanq jun ch’utub’aj-ib’ chi tikto; che’tuqub’aaq ru li Kab’laju; ut che’xaqab’aaq li winq re ate’ok sa’ xna’ajeb’ li ani t’anenaqeb’.
2 Lin moos aj aThomas chikanaaq chiru jarub’aq kutan sa’ li ch’och’ Sion re xpuktesinkil li waatin.
3 Li rela’ che’kanaaq sa’ jultikank aatin chalen sa’ li hoonal a’an, ut wi te’xb’aanu a’in chi kub’enaqeb’ anchal xch’ool, sa’ q’unal ch’oolej ut atuulanil, ut bnajtil oyb’enink, laa’in, li Qaawa’ nink’e reheb’ jun yeechi’ihom, naq tink’e li taak’anjelaq reheb’ lix junkab’aleb’; ut jun nimla okeb’aal taateemanq choq’ reheb’, chalen anajwan.
4 Ut sa’ xtiklajik li saq’ehil li taachalq, che’elq re te’xik chirix li ninqi ha’, ut aran che’xk’e chi yeemank lin evangelio, lix tz’aqalil a’an, ut che’xch’olob’ xyaalal lin k’ab’a’.
5 Che’xchaq’rab’iheb’ lin santil paab’anel sa’ li tenamit Far West, sa’ li waqib’ xka’k’aal xb’e li po Abril jun chik, sa’ li na’ajej taakab’lamanq wi’ li wochoch, chan li Qaawa’.
6 Lin moos aj John Taylor, ut jo’kan ajwi’ lin moos aj John E. Page, ut jo’kan ajwi’ lin moos aj Wilford Woodruff, ut jo’kan ajwi’ lin moos aj Willard Richards, che’xaqab’amanq chixnujob’resinkil lix na’ajeb’ li ani xe’t’ane’, ut chiyeemanq chi ch’olch’o reheb’ naq xaqab’anb’ileb’.