Ebʼ li loqʼlaj hu
Tzol’leb’ ut Sumwank 89


Tasal 89

K’utb’esinb’il na’leb’ k’eeb’il rik’in xtz’uumal re laj Jose Smith li Profeet, sa’ Kirtland, Ohio, 27 Febrero 1833. Sa’ xk’ab’a’ naq eb’ li komon winq junxil neke’roksi li may sa’eb’ lix ch’utam, ki’ok li Profeet chixtz’ilb’al rix sa’ xch’ool li na’leb’ a’an; xb’aan a’an, kipatz’ok chiru li Qaawa’ chirix. Li k’utb’esinb’il na’leb’ a’in, li nawb’il ru jo’ li Aatin re Chaab’il Na’leb’, kik’eeman xb’aan a’an.

1–9, Yeeb’il naq ink’a’ naru roksinkil li viin, li uk’a nakaltesin, li may, ut li tiqwal uk’a; 10–17, Li q’een, li ru che’, li tib’, ut li iyaj li nak’uxman k’ojob’anb’ileb’ re te’oksiiq xb’aaneb’ li winq ut li xul; 18–21, Xpaab’ankil lix chaq’rab’ li evangelio, jo’ li Aatin re Chaab’il Na’leb’, naxk’am chaq li osob’tesink, re li yu’am a’in ut re li musiq’ej.

1 Jun aAatin re Chaab’il Na’leb, choq’ re lix chaab’ilal li ch’utam re taqenaqil aj tij, ch’utch’uukeb’ Kirtland, ut li iglees, ut jo’kaneb’ ajwi’ laj santil paab’anel sa’ Sion—

2 Taqlanb’ilaq re xk’eeb’al xsahil eech’ool, moko jo’ ta taqlahom malaj minb’il na’leb’; jo’ b’an k’utb’esinb’il na’leb’ ut li aatin re chaab’il na’leb’, li naxk’ut lix k’oxlahom ut li arajom li Dios chirix li kolb’a-ib’ re li yu’am a’in choq’ reheb’ chixjunil laj santil paab’anel sa’ roso’jik li kutan—

3 K’eeb’il choq’ jun na’leb’ li wan axyeechi’ihom, k’uub’anb’il re te’ruuq chixk’ulb’al li q’uneb’ xmetz’ew malaj li ani q’axal q’un xmetz’ew re chixjunileb’ laj bsantil paab’anel, li wankeb’ choq’ aj santil paab’anel, malaj li naru chi yeemank reheb’ chi jo’kan.

4 K’ehomaq reetal, jo’ka’in naxye chi yaal li Qaawa’ eere: Sa’ xk’ab’a’ li amaa’usilal ut li k’uub’anb’il k’a’uxl li wan anajwan ut toj taawanq sa’ xch’ooleb’ li winq aj btakchi’ihom rib’ sa’ muqmu sa’ roso’jik li kutan, cxexintij, ut nekexintij chi rub’elaj, rik’in xk’eeb’al eere li aatin a’in re chaab’il na’leb’ chi k’utb’esinb’il—

5 Naq a’ yaal jo’ yalaq ani chi winq naruk’ li aviin malaj li uk’a nakaltesin sa’ eeyanq, k’ehomaq reetal, moko us ta, chi moko chaab’il sa’ rilob’aal lee Yuwa’, ka’ajwi’ sa’ xch’utub’ankil eerib’ re xq’axtesinkil lee loq’laj k’anjel chiru.

6 Ut, k’ehomaq reetal, tento naq a’inaq li viin, relik chi yaal, atz’aqal xviinul li uva re xtoonal li awimq, yiib’anb’il eeb’aan laa’ex.

7 Ut jo’kan wi’chik, li auk’a nakaltesin moko re ta li sa’ej, re b’an xch’ajb’al lee tib’el.

8 Ut jo’kan wi’chik, li may moko re ta li atib’elej, chi moko re li sa’ej, ut moko chaab’il ta choq’ re li winq; a’an b’an jun q’een choq’ re li toch’olal ut chixjunil li wakax yaj, re taa’oksimanq chi k’oxlanb’il ut rik’in seeb’al.

9 Ut jo’kan wi’chik, li tiqwal uk’a moko re ta li tib’elej chi moko li sa’ej.

10 Ut jo’kan wi’chik, chi yaal ninye eere, chixjunil li chaab’il aq’een, li Dios kixk’ojob’ choq’ re lix kawilal, lix winqilal, ut li roksihom li winq—

11 Li junjunq chi q’een sa’ xq’ehil, ut li junjunq ru che’ sa’ xq’ehil; chixjunileb’ a’in oksinb’ilaqeb’ rik’in xchaab’ilal li na’leb’ ut ab’antioxink.

12 Relik chi yaal, lix atib’eleb’ ajwi’ li bxul ut li xik’anel xul rub’el choxa, laa’in, li Qaawa’, kink’ojob’ choq’ roksihom li winq rik’in b’antioxink; a’b’anan tento taa’oksimanq chi cmoko naab’al ta;

13 Ut nasaho’ inch’ool naq ink’a’ taa’oksimanq, ka’ajwi’ sa’ xkutankil li hab’alq’e, malaj li ke, malaj we’ej.

14 Chixjunil li aiyaj nak’uxman k’ojob’anb’il choq’ roksihom li winq ut eb’ li xul, re taawanq choq’ roqechal li yu’amej, moko ka’aj ta wi’ re li winq, re b’an lix xulel li ch’och’, ut eb’ li xik’anel xul chiru choxa, ut li k’iche’ xul li neke’alinak malaj neke’jukuknak sa’ xb’een li ch’och’;

15 Ut eb’ a’in kixyiib’ li Dios choq’ roksihom li winq ka’ajwi’ sa’ xkutankil li we’ej ut xnaab’alil li tz’okaak.

16 Chixjunil li iyaj nak’uxman chaab’il choq’ xtzakemq li winq; jo’ chanru ajwi’ li ruuchinihom li k’aam; li k’a’ru na’uuchin, ma sa’ li ch’och’ malaj sa’ xb’een li ch’och’—

17 A’b’anan, trigo choq’ re li winq, ut ixim choq’ re li b’ooyx, ut avena choq’ re li kawaay, ut li centeno choq’ reheb’ li xul neke’purik, ut choq’ reheb’ li aaq, ut choq’ re chixjunileb’ lix xulel li ch’och’, ut li cebada choq’ reheb’ chixjunil li xul neke’oksiman, ut choq’ re li uk’a ink’a’ nakaltesin, jo’ ajwi’ xkomon chik li iyaj nak’uxman.

18 Ut chixjunileb’ laj santil paab’anel li neke’jultiko’ re xpaab’ankil ut xb’aanunkil li yehom a’in, rik’in b’eek sa’ ab’ink chiruheb’ li taqlahom, te’xk’ul akawilal sa’ xch’up ut sulutz sa’ xb’aqeleb’;

19 Ut te’xtaw axchaab’ilal li na’leb’ ut li ninqi b’ihomal re bnawom, a’ li muqmuukil b’ihomal;

20 Ut ate’alinaq ut ink’a’ te’lub’q, ut te’b’eeq ut ink’a’ te’tawaaq.

21 Ut laa’in, li Qaawa’, nink’e reheb’ jun ayeechi’ihom, naq li anjel aj sachonel btaanume’q sa’ xb’eeneb’, jo’eb’ li ralal xk’ajol laj Israel, ut ink’a’ tixkamsiheb’. Amen.