Ebʼ li loqʼlaj hu
Tzol’leb’ ut Sumwank 48
Eb’ li raqalil
Tema

Tasal 48

K’utb’esinb’il na’leb’ k’eeb’il rik’in xtz’uumal re laj Jose Smith li Profeet, sa’ Kirtland, Ohio, 10 Marzo, 1831. Li profeet kipatz’ok chiru li Qaawa’ chirix k’a’ru taab’aanumanq re xtawb’al li ch’och’ re te’k’ojob’amanq aran laj santil paab’anel. Ki’aje’ ru xnawb’al chirix li na’leb’ a’in, xb’aan xq’axonikeb’ chaq li komon re li Iglees li chalenaqeb’ chaq sa’ li jun raqal li Estados Unidos sa’ releb’aal saq’e, re xpaab’ankil lix taqlahom li Qaawa’ naq te’xch’utub’ rib’ sa’ Ohio (chi’ilmanq sa’eb’ li tasal 37:1–3; 45:64).

1–3, Eb’ laj santil paab’anel sa’ Ohio tento te’xk’e xkomon lix ch’och’eb’ reheb’ lix komon; 4–6, Eb’ laj santil paab’anel tento te’xloq’ li ch’och’, te’xyiib’ jun tenamit, ut te’ab’inq chiru li na’leb’ te’xk’e laj jolominel reheb’.

1 Na’ajman ru naq texkanaaq sa’ li kutan a’in sa’eb’ li na’ajej wan wi’ eerochoch, jo’ chanru taak’anjelaq eere sa’ li wankex wi’.

2 Ut a’ yaal jo’ wank eech’och’, ateek’e reheb’ li komon aj releb’aal saq’e;

3 Ut a’ yaal jo’ maak’a’ lee ch’och’, che’xloq’aq sa’ li kutan a’in sa’eb’ li na’ajej chesutam, jo’ neke’xk’oxla naq us, xb’aan naq tento naq taa’ajmanq ru naq te’wanq xna’aj re te’wanq rochoch sa’ li kutan a’in.

4 Tento naq taa’ajmanq ru naq teek’uula chixjunil li tumin li naru cheru, ut naq teek’ul jo’ nimal naru cheru sa’ tiikilal, re naq chirix xnumikeb’ li kutan texruhanq achixloq’b’al li ch’och’ choq’ eechanihomej, ba’anaq xna’aj li tenamit.

5 Li na’ajej toj maji’ taak’utb’esimanq; a’ut chirix naq te’chalq chaq lee komon sa’ releb’aal li saq’e te’wanq ajunjunq li winq xaqab’anb’il, ut reheb’ a’an k’eeb’ilaq bxnawb’al li na’ajej, malaj chiruheb’ a’an taak’utb’esimanq.

6 Ut eb’ a’an te’xaqab’amanq re xloq’b’aleb’ li ch’och’, ut re xtikib’ankil xk’eeb’al xk’ojob’ankil li atenamit; ut chirix a’an tex’ok chi ch’utub’aak eerochb’eenaq eejunkab’al, li junjunq chi winq jo’ chanru bxjunkab’al, jo’ chanru li wan wi’, ut jo’ chanru xaqab’anb’il choq’ re xb’aan li awa’b’ejil ut li obiisp re li iglees, jo’ chanruheb’ li chaq’rab’ ut taqlahom li xek’ul, ut li moqon chik teek’ul. Chi jo’kan. Amen.