Ebʼ li loqʼlaj hu
Tzol’leb’ ut Sumwank 119
Eb’ li raqalil
Tema

Tasal 119

K’utb’esinb’il na’leb’ k’eeb’il rik’in xtz’uumal re laj Jose Smith li Profeet, sa’ Far West, Missouri, 8 Julio, 1838, re xsumenkil lix tz’aamahom: “At Qaawa’ k’ut chiruheb’ laa moos jo’ nimal re li k’a’ru reheb’ laa tenamit nakateneb’ chi k’eemank choq’ lajetqil.” Li chaq’rab’ re li lajetqil, jo’ natawman ru anajwan, toj maji’ nak’eeman re li Iglees rub’elaj li k’utb’esinb’il na’leb’ a’in. Li aatin lajetqil sa’ li tij ak yeeb’il, ut sa’eb’ li k’utb’esinb’il na’leb’ junxil (64:23; 85:3; 97:11) moko naraj ta xyeeb’al jun xlajetq raqal, chixjunil b’an li mayej re anchal ch’oolej, malaj li k’a’ru kub’sinb’il choq’ xtuminal li Iglees. Li Qaawa’ ak junxil kixk’e re li Iglees li chaq’rab’ re q’axtesink-ib’ ut re mertoomil sa’ xb’een li eechej, li ke’ok wi’ li komon (a’eb’ li b’eresinel xb’eenil lix k’ihaleb’) rik’in jun sumwank li tento taakanaaq chi junelik. Rik’in naq naab’al ink’a’ ke’xpaab’ li sumwank a’in, li Qaawa’ kirisi chiru jarub’aq kutan ut kixk’e sa’ xna’aj li chaq’rab’ re lajetqil re chixjunil li Iglees. Li profeet kixpatz’ re li Qaawa’ jo’ nimal re li k’a’ru reheb’ taaraj choq’ re li loq’laj k’anjel. Kisumeek ru rik’in li k’utb’esinb’il na’leb’ a’in.

1–5, Eb’ laj santil paab’anel tento te’xtoj li k’a’ru reheb’ li numenaq sa’ xb’een li nak’anjelak reheb’, ut chirix a’an te’xk’e jo’ lajetqil lix lajetq raqal lix k’iijikeb’ rajlal chihab’; 6–7, Rik’in xb’aanunkil chi jo’kan, santob’resinb’ilaq li ch’och’ Sion.

1 Chi yaal, jo’ka’in naxye li Qaawa’, ninpatz’ naq chixjunil li k’a’ru reheb’ li anumenaq sa’ xb’een li nak’anjelak reheb’, taak’eemanq sa’ ruq’ li obiisp re lin iglees sa’ Sion,

2 Choq’ re lix kab’lankil li awochoch, ut choq’ re xk’eeb’al xk’ojob’ankil Sion ut choq’ re li tijonelil, ut choq’ re lix k’aseb’ li Awa’b’ejil re lin Iglees.

3 Ut a’inaq xtiklajik lix ak’ulb’al xlajetqileb’ lin tenamit.

4 Ut chirix a’an, eb’ li xe’k’ule’ xlajetqil chi jo’kan te’xtoj lix lajetq raqal chixjunil lix k’iijikeb’ rajlal chihab’; ut a’in taawanq choq’ xaqxookil chaq’rab’ chiruheb’ chi junelik, choq’ re lin santil tijonelil, chan li Qaawa’.

5 Chi yaal ninye eere, taak’ulmanq naq chixjunileb’ li neke’xch’utub’ rib’ toj sa’ li ch’och’ aSion te’k’ule’q jo’ xlajetqil li k’a’ru reheb’ li numenaq sa’ xb’een li nak’anjelak reheb’, ut te’xpaab’ li chaq’rab’ a’in, malaj ut ink’a’ te’tawmanq chi k’ulub’ej re te’kanaaq sa’ eeyanq.

6 Ut ninye eere, wi eb’ lin tenamit ink’a’ te’xpaab’ li chaq’rab’ a’in, re xk’uulankil xsantilal, ut rik’in li chaq’rab’ a’in xsantob’resinkil li ch’och’ aSion choq’ we, re naq taapaab’amanq lin k’uub’anb’il aatin ut lin raqb’a-aatin sa’ xb’een, re naq q’axal santaq, k’ehomaq reetal, chi yaal ninye eere, maawa’aq jun ch’och’ Sion choq’ eere.

7 Ut a’inaq jun k’utb’il na’leb’ choq’ reheb’ chixjunil li aroqechal Sion. Chi jo’kan. Amen.