Tasal 66
K’utb’esinb’il na’leb’ k’eeb’il rik’in xtz’uumal re laj Jose Smith li Profeet, sa’ Hiram, Ohio, 29 Octubre, 1831. Laj William E. McLellin ak kixtz’aama sa’ muqmu chiru li Qaawa’ naq tixk’e chi nawmank rik’in xtz’uumal re li Profeet lix sumenkil ru oob’ chi patz’om, li moko nawb’il ta xb’aan laj Jose Smith. Chi tz’aamanb’il xb’aan laj William E. McLellin, li Profeet kipatz’ok chiru li Qaawa’ ut kixk’ul li k’utb’esinb’il na’leb’ a’in.
1–4, Li sumwank li junelik nakana a’an lix tz’aqalil li evangelio; 5–8, Eb’ li xb’eenil tento te’jultikanq aatin, te’xch’olob’ li yaal, ut te’na’leb’anq rik’ineb’ li tenamit; 9–13, Rik’in k’anjelak sa’ li k’anjel rik’in tiikilal chi paab’ank, na’eechaniman li junelik yu’am.
1 K’ehomaq reetal, jo’ka’in naxye li Qaawa’ re lin moos aj William E. McLellin—Osob’tesinb’ilat laa’at, a’ yaal jo’ chanru xawisi aawib’ rik’ineb’ laa maa’usilal, ut xak’ul lin yaal, chan li Qaawa’ laj Tojol aawix, laj Kolol re li ruchich’och’, re ajwi’ jo’ k’ihaleb’ li aneke’paab’ank re lin k’ab’a’.
2 Chi yaal ninye aawe, osob’tesinb’ilat xb’aan xk’ulb’al lin asumwank li junelik nakana, a’ lix tz’aqalil lin evangelio, taqlanb’il rik’ineb’ li ralal xk’ajoleb’ li winq, re naq taaruuq te’wanq bxyu’am ut te’tz’aqonq sa’ li loq’alil li taak’utb’esimanq sa’ roso’jikeb’ li kutan, jo’ tz’iib’anb’il chaq xb’aaneb’ li profeet ut eb’ li apostol sa’ najter kutan.
3 Chi yaal ninye aawe, at inmoos William, naq ch’ajb’ilat, a’b’an moko chixjunil ta; chajal ut aak’a’uxl chirix li k’a’aq re ru moko chaab’il ta sa’ wilob’aal, chan li Qaawa’, xb’aan naq li Qaawa’ atixk’ut chawu.
4 Ut anajwan chi yaal, laa’in, li Qaawa’, tink’ut chawu k’a’ru nawaj chawix, malaj k’a’ru li rajom inch’ool chawix.
5 K’e reetal, chi yaal ninye aawe, naq a’an rajom inch’ool naq ataach’olob’ lin evangelio sa’ li junjunq chi ch’och’, ut sa’ li junjunq chi tenamit, relik chi yaal, sa’eb’ li na’ajej sa’ aasutam b’ar wi’ maji’ ch’olob’anb’il.
6 Matkanaak k’iila kutan sa’ li na’ajej a’in; maji’ tattaqe’q sa’ li ch’och’ Sion; a’ut a’ yaal jo’ nakatru chixtaqlankil k’a’ruhaq, chataqla; ut chirix a’an, maak’oxla li k’a’ru aawe.
7 aAyu sa’eb’ li ch’och’ sa’ releb’aal li saq’e, bchach’olob’ li yaal sa’ li junjunq chi na’ajej, chiru li junjunq tenamit ut sa’eb’ lix ch’utleb’aal, ut tatna’leb’anq rik’ineb’ li tenamit.
8 Lin moos aj Samuel H. Smith chixikaq chawix, ut maakanab’ a’an xjunes, ut k’e xb’eresinkil re; ut li ani tiik chi paab’ank, taak’eemanq xnimal axmetz’ew sa’ li junjunq chi na’ajej; ut Laa’in, li Qaawa’, tinxik eerochb’een.
9 Chak’e laa awuq’ sa’ xb’eeneb’ li yaj, ut bte’k’iraaq. Matsutq’i toj reetal naq laa’in, li Qaawa’, tatintaqla chaq. Aj kuyunelaqat sa’ li ch’a’ajkilal. cChattz’aamanq, ut tatk’uluq; chattoch’oq, ut taatehe’q chawu.
10 Chasik’ risinkil li taa’aalob’resinq raj aawe. Chakanab’ chixjunil li maa’usilal. aMatmuxuk sumsu—jun li aaleek li xatch’a’ajkilo’ wi’.
11 aChapaab’ li yehom a’in, xb’aan naq yaal ut paab’ajel; ut laa’at taanimob’resi ru laa wopiis, ut taatiikisi k’iila tenamit toj bSion chi wank sa’ xb’een xjolomeb’ li cb’ich re sahil ch’oolejil li junelik nakana.
12 aChatkanaaq sa’ xb’aanunkil li k’a’aq re ru a’in toj sa’ ajwi’ li roso’jik, ut taawanq jun baakoroon re junelik yu’am sa’ xnim uq’ lin Yuwa’, li nujenaq chi usilal ut chi yaal.
13 Chi yaal, jo’ka’in naxye li Qaawa’ laa aDios, laj Tojol aawix, li Jesukristo ajwi’. Amen.