Tasal 123
Xteneb’ankileb’ laj santil paab’anel chirixeb’ laj rahob’tesihom reheb’, jo’ tz’iib’anb’il xb’aan laj Jose Smith li Profeet naq wan choq’ preex sa’ li tz’alam sa’ Liberty, Missouri. Li jun tasal a’in, a’an jun raqal isinb’il sa’ jun li hu taqlanb’il re li Iglees sa’ 20 Marzo, 1839 (chi’ilmanq xtiklajik li tasal 121).
1–6, Eb’ laj santil paab’anel tento te’xch’utub’ ut te’xpuktesi resil li rahilal ut rahob’tesink ke’xk’ul; 7–10, Li musiq’ej li kixaqab’ank reheb’ li b’alaq’il paab’aal jo’kan ajwi’ naxjolomi xrahob’tesinkileb’ laj santil paab’anel; 11–17, Naab’al sa’ xyanqeb’ li jar ch’uut chi paab’aal toj te’xk’ul li yaal.
1 Ut jo’kan wi’chik, naqatz’aama naq chek’oxlahaq naq na’ajman ru naq chixjunileb’ laj santil paab’anel te’xch’utub’ xnawomeb’ chirix chixjunil li uxb’il, ut li rahilal ut ch’a’ajkilank li k’eeb’il sa’ xb’eeneb’ xb’aaneb’ li ani wankeb’ sa’ li Estado a’in;
2 Ut jo’kan ajwi’ chirix chixjunil li eechej ut jo’ nimal li sachk xe’xk’ul, rik’in li k’a’ru yeeb’il chirixeb’ jo’ ajwi’ li rahob’tesink b’aanunb’il reheb’, ut jo’kan ajwi’ li k’a’ru reheb’;
3 Ut jo’kan ajwi’ lix k’ab’a’eb’ chixjunil li ani ke’tz’aqon sa’ xrahob’tesinkileb’, a’ yaal jo’ neke’ru chixtawb’aleb’ ut chixtz’ilb’aleb’ rix.
4 Ut maare naru naxaqab’aman jun ch’uut aj k’anjenel re xtz’ilb’al rix li k’a’aq re ru a’in, ut re xk’ulb’al li aatin li yeeb’il ut li xaqab’anb’il; ut jo’kan ajwi’ re xch’utub’ankileb’ li puktesinb’il hu aj tik’ti’ li wankeb’ chi numsimank;
5 Ut chixjunil li wan chi sa’eb’ li hu li neke’puktesiman chi po, ut sa’eb’ li tzoleb’aal hu, ut chixjunil li tik’ti’ esil li puktesinb’il, ut li yoo chi tz’iib’amank, ut ani aj b’aan, ut te’xq’axtesi chixjunil li ch’utub’anb’il aatin chirix li ajtzahil ch’i’ch’i’ink ut li maa’us aj minok-u aj kamsinel, li b’aanunb’il re li tenamit a’in—
6 Re naq ink’a’ ka’ajwi’ taqapuktesi a’an re chixjunil li ruchich’och’, re aj b’an wi’ taqak’ut chiruheb’ lix jolomileb’ li tenamit sa’ chixjunil li raak’ab’il ut xb’alb’ahil b’onol, jo’ li junaj chik chi yalok q’e li elajinb’il chiqu xb’aan li qaChoxahil Yuwa’, re naq chi tz’aqal ut chi ch’olch’o tooruuq chixtz’aamankil li yeechi’inb’il, naq taab’oqe’q chaq a’an sa’ li ana’ajej muqmu wi’; ut jo’kan ajwi’ re naq chixjunil li nimla tenamit taakanaaq chi maak’a’ te’xpatz’ wi’ xkuyb’aleb’ rub’elaj naq a’an taaruuq tixtaqla xwankil lix tel li nim xmetz’ew.
7 A’an jun li qateneb’ankil aajel ru, li tento sa’ qab’een chiru li Dios, chiruheb’ li anjel, rochb’eeneb’ li took’ame’q wi’ chi xaqliik, ut jo’kan ajwi’ chiqu laa’o, chiruheb’ li qixaqil ut li qakok’al, li ke’mine’ ru chixkub’sinkil rib’eb’ rik’in yaab’ak, raho’k ch’oolej, ut xiw, rub’el li uq’ej q’axal xik’ob’aal re kamsink, maa’usil taqlank, ut rahob’tesink, chi tenq’anb’il ut chi elajinb’il ut chi xaqab’anb’il xb’aan lix wankil li musiq’ej a’an li kixjunaji chi q’axal kaw lix paab’ahomeb’ li yuwa’b’ej, li ke’eechanink re li tik’ti’, rik’in lix ch’ooleb’ li alal k’ajolb’ej, ut li kixnujob’resi li ruchich’och’ rik’in xsachik li na’leb’, ut timil timil xniman xmetz’ew, ut anajwan a’an tz’aqal laj tiikisinel re chixjunil li po’e’k, ut na’aakanak chixjunil li aruchich’och’ rub’el raalil lix maa’usilal.
8 A’an jun aiiqleb’ ch’iich’, a’an jun kawil b’ak’leb’; a’an tz’aqal li b’ak’leb’ uq’ej, ut li k’aam ch’iich’, ut li b’ak’leb’ oqej, ut li b’ak’leb’ ch’iich’ re xb’alb’a.
9 Jo’kan ut, a’an jun li qateneb’ankil aajel ru li tento sa’ qab’een, moko ka’aj ta wi’ choq’ reheb’ tz’aqal li qixaqil ut li qakok’al, choq’ reheb’ b’an li xmalka’an ut li maak’a’eb’ xyuwa’, li akamsinb’ileb’ lix b’elomeb’ ut lix yuwa’eb’ rub’el lix ch’iich’il uq’;
10 Ut eb’ a’ aak’ab’il ut q’eqil b’aanuhom a’in tz’aqaleb’ re taachenchotq ajwi’ li xb’alb’a, ut re taakanaaq chi xeb’esinb’il ut chi saqirk li rilob’aal, ut tz’aqal li ruq’ laj tza chi siksotk ut chi parpotk.
11 Ut a’an ajwi’ jun li qateneb’ankil aajel ru li tento sa’ qab’een chiru chixjunil li tasal tenamit li yoo chi wakliik, ut chiruheb’ chixjunileb’ li saqeb’ ru xch’ool—
12 Xb’aan naq toj wankeb’ naab’al sa’ li ruchich’och’ sa’ xyanqeb’ chixjunil li ch’uut chi paab’aal, li molam, ut li raqal chi iglees, li amutz’ob’resinb’ileb’ ru xb’aan li muqmuukil k’oxlanb’il b’alaq’ reheb’ li winq, li neke’royb’eni wi’ b’alaq’ik, ut ramb’il li yaal chiruheb’ yal xb’aan naq bink’a’ neke’xnaw b’ar te’xtaw—
13 Jo’kan ut, re naq taqanumsi ut taqaq’ax ru li qayu’am sa’ xk’amb’al chi kutankil chixjunil li ak’a’aq re ru muqmu re q’ojyin, a’ yaal jo’ naqanaw; ut k’utb’esinb’ileb’ chi yaal chalen chaq sa’ choxa—
14 Tento ut naq taab’aanumanq li k’a’aq re ru a’in chi yalb’il anchal qaq’e.
15 Maajun winq chik’oxlanq re naq yal ka’ch’in xwankil a’in, xb’aan naq wan naab’al li toj chalel, chirixeb’ laj santil paab’anel, li taa’ajmanq wi’ ru li k’a’aq re ru a’in.
16 Nekenaw, ex was wiitz’in, naq jun li jukub’ q’axal nim atenq’anb’il chi naab’al xb’aan jun lix b’eresinkil q’axal ka’ch’in sa’ xhoonal li kaq-sut-iq’, xb’aan naq nak’ame’k xb’e chi xik chiru li iq’ ut lix b’oolam li ha’.
17 Jo’kan ut, ex was wiitz’in q’axal raarookex inb’aan, chi asa qach’ool chiqab’aanu chixjunil li k’a’aq re ru li naru chiqu; toja’ ut naq tooruuq chi xaqliik, chi anchal xkawilal qach’ool, re taqil lix bkolb’a-ib’ li Dios, ut re taak’utb’esimanq lix tel.