Naq li musiq’ejil junxaqalil najunajiik rik’in li tz’ejwalejil junxaqalil li tib’ ut b’aq okenaq, chirix naq kamenaq. Chirix li wakliik chi yo’yo, maa’jo’q’e chik taajachmanq ru li musiq’ej rik’in li tz’ejwalej, ut taawanq chi kolb’il chiru li kamk. Li junjunq li kiyo’la sa’ li ruchich’och’ taawakliiq wi’chik chi yo’yo xb’aan naq li Jesus kinumta sa’ xb’een li kamk (1 Kor. 15:20–22).
Li Jesukristo a’an li xb’een li kiwakli chi yo’yo sa’ li ruchich’och’ a’in (Hech. 26:23; Kol. 1:18; Apok. 1:5). Li Ak’ Chaq’rab’ naxk’ut tz’aqal xyaalal naq li Jesus kiwakli tz’aqal chi tz’ejwalejil: kikana lix muqleb’aal chi yamyo xsa’, kixk’ux li kar ut xya’al kab’, kiwan xjunxaqalil re tib’ ut b’aq, wankeb’ li ke’ch’e’ok re, ut eb’ li anjel ke’xye naq waklijenaq (Mar. 16:1–6; Luk. 24:1–12, 36–43; Jwan 20:1–18). Li na’leb’ k’utb’esinb’il sa’ roso’jikeb’ li kutan naxch’olob’ naq tz’aqal yaal lix waklijik chi yo’yo li Kristo ut chixjunileb’ li winq (Alma 11:40–45; 40; 3 Ne. 11:1–17; Tz. ut S. 76; Mois. 7:62).
Ink’a’ te’wakliiq chixjunileb’ chi juntaq’eeteb’ xloq’al (1 Kor. 15:39–42; Tz. ut S. 76:89–98), chi moko te’wakliiq chixjunil sa’ jun chi hoonal (1 Kor. 15:22–23; Alma 40:8; Tz. ut S. 76:64–65, 85; 88:96–102). Naab’al reheb’ laj santil paab’anel ke’wakli chi yo’yo chirix lix waklijik li Kristo chi yo’yo (Mat. 27:52). Eb’ li tiikeb’ xch’ool te’wakliiq chi yo’yo xb’een wa chiruheb’ laj maak ut te’elq chaq sa’ li xb’een wakliik chi yo’yo (1 Tes. 4:16); eb’ laj maak li ink’a’ jalb’ileb’ xk’a’uxl te’wakliiq chaq sa’ li roso’jikil wakliik chi yo’yo (Apok. 20:5–13; Tz. ut S. 76:85).