Tenq’ choq’ re li tzolok
Elias


Elias

Jun profeet sa’ li Najter Chaq’rab’ li kisutq’i sa’ roso’jikeb’ li kutan re xq’axtesinkil lix laawil li wankilal re tz’apok sa’ xb’een laj Jose Smith ut laj Oliver Cowdery. Sa’ lix kutankil a’an, laj Elias kik’anjelak sa’ li awa’b’ejihom re Israel sa’ xnim li saq’e (1 Rey. 17–22; 2 Rey. 1–2). K’a’jo’ xnimal xpaab’aal chirix li Qaawa’, ut nawb’il ru xb’aan xk’ihal li sachb’a-ch’oolej kixb’aanu. Chi tz’aamanb’il xb’aan, chiru oxib’ chihab’ rik’in xyijach li Dios ink’a’ kixkanab’ chi t’ane’k li hab’. Kixwaklesi jun li al sa’ xyanqeb’ chaq li kamenaq ut kixb’oq chaq li xam sa’ choxa (1 Rey. 17–18). Eb’ lix tenamiteb’ laj Judio toj yookeb’ chiroyb’eninkil naq taasutq’iiq laj Elias, jo’ chanru kixye laj Malakias jo’ profeet (Mal. 4:5). Toj b’oqb’il a’an choq’ ula’ naq eb’ laj Judio neke’xnima li paswa, ut junelik neke’xkanab’ jun okeb’aal chi teeto ut jun tem chi yamyo choq’ re.

Li Profeet aj Jose Smith kixye naq laj Elias nak’amok re li wankilal aj tz’aponel re li Tijonelil re Melkisedek, ut a’an xraqikeb’ li profeet li kik’amok re rub’elaj xkutankil li Jesukristo. A’an kixk’ut rib’ sa’ li tzuul re jaltesiik-u rochb’een laj Moises, ut kixq’axtesi lix laawil li tijonelil sa’ xb’een laj Pedro, laj Santiago, ut laj Jwan (Mat. 17:3). Kixk’ut wi’chik rib’, rochb’een laj Moises ut jalaneb’ chik, sa’ rox xb’e Abril 1836, sa’ li Santil ochoch re Kirtland, Ohio, ut kixq’axtesi li laaw ajwi’ a’an sa’ xb’een laj Jose Smith ut laj Oliver Cowdery (Tz. ut S. 110:13–16). Chixjunil a’in kiwan re xkawresinkil li b’e chiru li xkab’ xk’ulunik li Qaawa’, jo’ yeeb’il resil sa’ Malakias 4:5–6.

Lix wankilal laj Elias a’an li wankilal aj tz’aponel re li tijonelil, rik’in li nab’ak’e’ wi’ malaj na’ach’ab’aak wi’ sa’ choxa li k’a’ru b’ak’b’il malaj ach’ab’anb’il sa’ li ruchich’och’ (Tz. ut S. 128:8–18). Eb’ lix moos li Qaawa’ li sik’b’ileb’ ru sa’ li ruchich’och’ anajwan neke’xk’ul li wankilal a’in aj tz’aponel ut neke’xb’aanu li k’ojob’anb’il k’anjel re li evangelio re kolok, choq’ reheb’ li yo’yo ut li kamenaq (Tz. ut S. 128:8).