Mateo
Jun lix Apostol li Jesukristo ut aj tz’iib’ahom re li xb’een hu sa’ li Ak’ Chaq’rab’. Laj Mateo, jun aj Judio li kiwan choq’ aj k’ulul tojleb’ choq’ reheb’ laj Romano sa’ Kafarnaum, kiwan tana’ chi k’anjelak chiru laj Herodes Antipas. Rub’elaj lix jalajik xch’ool kinawman ru jo’ aj Levi, ralal laj Alfeo (Mar. 2:14). Ka’ch’in chik chirix naq kib’oqe’ jo’ xtzolom li Jesus, kixk’e jun ninq’e sa’ li kiwan wi’ li Qaawa’ (Mat. 9:9–13; Mar. 2:14–17; Luk. 5:27–32). Laj Mateo kiwan tana’ xnimal xna’leb’ chirixeb’ li loq’laj hu sa’ li Najter Chaq’rab’, ut kiru chirilb’al lix tz’aqlojik ru li profeetil aatin sa’ lix yu’am li Qaawa’. Moko naab’al ta chik nanawman chirix lix yu’am li Apostol moqon. Wankeb’ li neke’seraq’ink re naq kikamsiik sa’ xk’ab’a’ xpaab’aal.
Li Evangelio re laj Mateo
Li xb’een hu sa’ li Ak’ Chaq’rab’. Nak’oxlaman naq kitz’iib’aman xb’een wa lix Evangelio laj Mateo re te’roksi laj Judio sa’ Palestina. Naxk’ut resil k’iila aatin sa’ li Najter Chaq’rab’. Li rajom laj Mateo a’an xk’utb’al naq li Jesus a’an li Mesias li ke’aatinak wi’ chaq li profeet sa’ li Najter Chaq’rab’. Kixch’olob’ ajwi’ xyaalal naq li Jesus a’an li Rey ut aj Raqol Aatin reheb’ li winq.
Re rilb’al xtusulal li k’a’ru kik’ulman sa’ xyu’am li Kolonel jo’ ch’olob’anb’il sa’ li Evangelio re laj Mateo, chi’ilmanq Xjunajileb’ li Kaahib’ chi Evangelio sa’ li apendice.