Tenq’ choq’ re li tzolok
Tijonelil re Melkisedek

Tijonelil re Melkisedek

Li Tijonelil re Melkisedek a’an li taqenaqil malaj li xnimal ru tijonelil; li Tijonelil re Aaron a’an li kub’enaqil tijonelil. Sa’ li Tijonelil re Melkisedek wan xlaawil li musiq’ejil osob’tesink re li Iglees. Rik’in li k’ojob’anb’il k’anjel re li taqenaqil tijonelil nak’utman li wankilal re choxahilal chiruheb’ li winq (Tz. ut S. 84:18–25; 107:18–21).

Li Dios kixk’utb’esi li taqenaqil tijonelil a’in xb’een wa chiru laj Adan. Eb’ li najter yuwa’b’ej ut li profeet sa’ li junjunq chi k’ojlajik ke’xk’ul li wankilal a’in li kik’eeman (Tz. ut S. 84:6–17). Sa’ xtiklajik a’an li Santil Tijonelil jo’ chanru Xk’anjelil li Ralal li Dios nayeeman re. Moqon kinawman ru jo’ li Tijonelil re Melkisedek (Tz. ut S. 107:2–4).

Naq eb’ li ralal xk’ajol laj Israel ink’a’ tz’aqal xchaab’ilaleb’ re xk’ulb’al ut re xpaab’ankil li sumwank sa’ li Tijonelil re Melkisedek, li Qaawa’ kirisi chaq li taqenaqil chaq’rab’, ut kixk’e reheb’ jun li tijonelil ut jun li chaq’rab’ li kub’enaq wi’chik xwankil (Tz. ut S. 84:23–26). A’aneb’ a’in li Tijonelil re Aaron ut lix chaq’rab’ laj Moises yeeb’il reheb’. Naq kichal li Jesus sa’ li ruchich’och’, kixk’ojob’ wi’chik li Tijonelil re Melkisedek rik’ineb’ laj Judio, ut ki’ok chixwaklesinkil li Iglees sa’ xyanqeb’. A’b’anan li tijonelil ut li Iglees ke’sache’ wi’chik xb’aan li q’etok paab’ank. Moqon ke’k’ojob’aman wi’chik rik’in ruq’ laj Jose Smith, alalb’ej (Tz. ut S. 27:12–13; 128:20; JS—R 1:73).

Sa’ li Tijonelil re Melkisedek wankeb’ li opiis re xb’eenil, taqenaqil aj tij, yuwa’b’ejil aj k’anjel, Setenta, ut Apostol (Tz. ut S. 107). Li Tijonelil re Melkisedek junelik taawanq choq’ jun raqal lix awa’b’ejihom li Dios sa’ li ruchich’och’.

Li Awa’b’ej re Lix Iglees li Jesukristo reheb’ laj Santil Paab’anel sa’ Roso’jikeb’ li Kutan a’an li awa’b’ej re li taqenaqil tijonelil, a’an re Melkisedek, ut wan rik’in a’an chixjunil li laaw chirix lix awa’b’ejihom li Dios sa’ li ruchich’och’. Jun ajwi’ li winq nak’uluk re lix b’oqb’al choq’ awa’b’ej sa’ li jun kutan, ut ka’ajwi’ a’an k’eeb’il xwankil sa’ li ruchich’och’ chixk’anjelankil chixjunil lix laawil li tijonelil (Tz. ut S. 107:64–67; 132:7).