Reyes (eb’ li awa’b’ej)
Wiib’ li hu sa’ li Najter Chaq’rab’. Eb’ li hu a’in neke’xye resil li tenamit Israel chalen chaq sa’ li po’resink ch’oolej xb’aan laj Adonias, xkaa ralal li rey aj David (maare 1015 chihab’ rub’elaj li Kristo) toj reetal naq ke’k’ame’ laj Juda chi preexil (maare 586 chihab’ rub’elaj li Kristo). Neke’xye resil li awa’b’ejihom sa’ xnim li saq’e (reheb’ li lajeeb’ xteepal laj Israel) chalen chaq naq ke’xjach rib’ toj reetal naq ke’k’ame’ chi preexil xb’aaneb’ laj Asiria toj sa’eb’ li ch’och’ sa’ xnim li saq’e. Chi’ilmanq ajwi’ Tusleb’aal Chihab’ sa’ li apendice.
Xb’een Reyes
Sa’ li ch’ol 1 naxye resil lix raqil lix yu’am li rey aj David. Sa’eb’ li ch’ol 2–11 tz’iib’anb’il resil lix yu’am laj Salomon. Sa’eb’ li ch’ol 12–16 yeeb’il resil li ani ke’awa’b’ejin ruuchil laj Salomon, a’aneb’ laj Roboam ut laj Jeroboam. Laj Jeroboam kixk’e chi jachmank ru li awa’b’ejihom Israel. Yeeb’il ajwi’ resil jalaneb’ chik li rey. Sa’eb’ li ch’ol 17–21 tz’iib’anb’il resil lix k’anjel laj Elias naq kixch’iila laj Ajab, rey sa’ xb’een Israel. Sa’ li ch’ol 22 tz’iib’anb’il resil jun pleet rik’in Siria sa’ li ke’xch’utub’ rib’ chi pleetik laj Ajab ut laj Josafat, rey aj Juda. Li profeet aj Mikeas naxye profeetil aatin chirix xkab’ichal li rey.
Xkab’ Reyes
Sa’ li ch’ol 1:1–2:11 toj naxye resil lix yu’am laj Elias, toj reetal naq kitaqe’ laj Elias sa’ choxa sa’ jun kareet re xam. Sa’eb’ li ch’ol 2–9 nayeeman resil chan ru naq laj Eliseo kik’anjelak rik’in paab’aal ut nimla wankilal. Li ch’ol 10 naxye resil laj Jehu, li rey, ut chan ru naq kixsach lix junkab’al laj Ajab ut eb’ laj tij re Bahal. Sa’eb’ li ch’ol 11–13 tz’iib’anb’il resil li rawa’b’ejil laj Johas, li tiik xch’ool, jo’ ajwi’ lix kamik laj Eliseo. Sa’eb’ li ch’ol 14–17 yeeb’il resil junjunq li rey li ke’awa’b’ejin sa’ Israel ut sa’ Juda, naab’al reheb’ rik’in maa’usilal. Sa’ li ch’ol 15 tz’iib’anb’il resil naq li tenamit Asiria kixchapeb’ choq’ preex li lajeeb’ xteepal Israel. Sa’ li ch’ol 18–20 tz’iib’anb’il lix tiikil yu’am laj Esekias, li rey aj Juda, ut li profeet aj Isaias. Sa’eb’ li ch’ol 21–23 yeeb’il resileb’ li rey aj Manases ut aj Josias. Jo’ chanru seraq’inb’il, a’an xb’aan laj Manases naq kikamsiik laj Isaias. Laj Josias a’an jun li rey tiik xch’ool li kixxaqab’ wi’chik li chaq’rab’ sa’ xyanqeb’ laj Judio. Sa’eb’ li ch’ol 24–25 tz’iibanb’il resil lix xikikeb’ chi preexil toj Babilonia.