Jose, ralal laj Jakob

Sa’ li Najter Chaq’rab’, li xb’een ralal laj Jakob ut li xRakel (Gen. 30:22–24; 37:3).

Laj Jose kixk’ul xk’ulub’il li xb’een alalb’ej sa’ Israel, xb’aan naq laj Reuben, li xb’een xyum li xb’een rixaqil laj Jakob, kixsach li chaab’ilal a’an rik’in li q’etok aatin (1 Kro. 5:1–2). Rik’in naq a’an k’ulub’ej, laj Jose, jo’ li xb’een xyum li xkab’ rixaqil laj Jakob, kixtz’aq li osob’tesink chirix a’an. Laj Jose kixk’ul ajwi’ jun li rosob’tesinkil rik’in lix yuwa’ ka’ch’in chik ma nakam laj Jakob (Gen. 49:22–26).

Laj Jose a’an jun li winq numtajenaq xchaab’ilal xch’ool, jun winq “seeb’ chi k’oxlak ut chaab’il xna’leb’” (Gen. 41:39). Naq kixtz’eqtaana li rixaqil laj Potifar, kik’utun lix paab’aal, lix saqal ru xch’ool, ut x’anchalil lix ch’ool (Gen. 39:7–12). Aran Egipto, naq laj Jose kixk’ut chiruheb’ li ras ani tz’aqal, kib’antioxin chiruheb’ ruuchil xjitb’aleb’ xb’aan li xe’xb’aanu chaq re. A’an kixpaab’ naq rik’in lix b’aanuhomeb’ kiru chi uxmank li rajom xch’ool li Dios (Gen. 45:4–15).

Rik’in li k’utb’esinb’il sa’ roso’jikeb’ li kutan, xk’utman k’a’ru xnimal xk’anjel lix junkab’al laj Jose sa’ roso’jik li kutan (JJS, Gen. 50:24–38 [apendice]; 2 Ne. 3:3–24; 3 Ne. 20:25–27).