Moroni, ralal laj Mormon
Roso’jikil profeet aj Nefita sa’ lix Hu laj Mormon (421 chihab’ tana’ chirix li Kristo). Ka’ch’in chik rub’elaj xkamik laj Mormon, a’an kixq’axtesi jun li tz’iib’anb’il esil re laj Moroni li ralal, a’an lix perel ch’iich’ laj Mormon nayeeman re (R laj M 1:1). Laj Moroni kixchoy xk’uub’ankileb’ lix perel ch’iich’ laj Mormon. A’an kixtiq li ch’ol 8 ut 9 sa’ lix hu laj Mormon (Morm. 8:1). Kixk’os ru ut kixtz’iib’a lix hu laj Eter (Eter 1:1–2) ut kixk’e tz’aqal lix hu, a’an lix hu laj Moroni yeeb’il re (Moro. 1). Laj Moroni kixk’e xtz’apb’aleb’ li perel ch’iich’, ut kixmuqeb’ sa’ li tzuul Kumorah (Morm. 8:14; Moro. 10:2). Sa’ 1823 laj Moroni kitaqlaak chi ak waklijenaq chi yo’yo re xk’utb’esinkil lix Hu laj Mormon re laj Jose Smith (Tz. ut S. 27:5; JS—R 1:30–42, 45). A’an kixtzol li saaj profeet rajlal chihab’ chalen 1823 toj 1827 (JS—R 1:54), ut moqon kixq’axtesiheb’ li perel ch’iich’ sa’ ruq’ sa’ 1827 (JS—R 1:59). Chirix naq kixchoy xjaltesinkil ru, laj Jose Smith kixq’ajsiheb’ li perel ch’iich’ rik’in laj Moroni.
Lix hu laj Moroni
Xraqikil hu sa’ lix Hu laj Mormon. Kitz’iib’aak xb’aan laj Moroni, li profeet aj Nefita. Sa’eb’ li ch’ol 1–3 naxye resil lix sachlijik chi junajwa eb’ laj Nefita, ut naxk’e li na’leb’ chirix xk’eeb’al li Santil Musiq’ej ut li tijonelil. Sa’eb’ li ch’ol 4–5 naxye resil chanru tz’aqal taak’anjelamanq li loq’laj wa’ak. Sa’ li ch’ol 6 naxye resil chanru na’ux li k’anjel sa’ li Iglees. Sa’eb’ li ch’ol 7–8 wan li aatin chirix li xb’eenil na’leb’ re li evangelio, ut wan lix k’utum laj Mormon chirix li paab’aal, li yo’onink ut li rahok, ut chan ru xtz’ilb’al rix li us ut li ink’a’ us (Moro. 7), ut lix ch’olob’ahom laj Mormon chirix naq eb’ li kok’al li ka’ch’ineb’ xyu’am yo’yookeb’ rik’in li Kristo ut ink’a’ neke’raj ru li kub’iha’ (Moro. 8). Sa’ li ch’ol 9 naxye resil chanru xpo’jikeb’ xna’leb’ li tenamit aj Nefita. Sa’ li ch’ol 10 wan roso’jik li raatin laj Moroni, ut naxye chanru naru xnawb’al naq yaal lix Hu laj Mormon (Moro. 10:3–5).