1 At walal raarookat inb’aan, nintz’iib’ak wi’chik aawik’in re taaruuq taanaw naq toj yo’yookin; a’b’an nintz’iib’ak ka’ch’inaq chirix li k’a’ru narahob’tesin ch’oolej.

2 Xb’aan naq k’e reetal, wanjenaqin sa’ jun rahil pleet rik’ineb’ laj Lamanita, sa’ li ink’a’ wi’ koonumta; ut laj Arjeantus t’anenaq chaq xb’aan li yok’leb’ ch’iich’, ut jo’kan ajwi’ laj Luram ut laj Emron; relik chi yaal, ut nim xk’ihaleb’ li qasik’b’il ru winq li ke’sach chiqu.

3 Ut anajwan k’e reetal, at walal, ninxuwa maare anchal eb’ laj Lamanita te’xsach li tenamit a’in; xb’aan naq ink’a’ neke’xjal xk’a’uxl, ut laj Satanas nareek’asiheb’ rajlal chi josq’o’k chirib’ileb’ rib’.

4 K’e reetal, yookin chi k’anjelak rajlal rik’ineb’; ut naq ninye li raatin li Dios rik’in ^akawil aatin neke’siksot ut neke’josq’o’ wik’in; ut naq moko kaw ta li waatin neke’xkawob’resi li raameb’ rik’in; jo’kan ut, ninxuwa maare anchal lix Musiq’ li Qaawa’ xkanab’ ^bxyalb’al xq’e rik’ineb’.

5 Xb’aan naq q’axal naq neke’josq’o’, jo’kan naq chanchan chiwu naq maak’a’eb’ xxiw chiru li kamk; ut xsach chiruheb’ li rahok chirib’ileb’ rib’; ut rajlal ^aneke’rataw li kik’ ut eeqajunk.

6 Ut anajwan, at walal raarookat inb’aan, us ta kawujenaqeb’, ^achiqayal qaq’e chi k’anjelak, xb’aan naq wi ta taqakanab’ ^bk’anjelak, took’ame’q raj rub’el tojb’a-maak; xb’aan naq wan jun k’anjel chiqab’aanu naq wanko choq’ muheb’aal ch’och’ a’in, re taaruuq toonumtaaq sa’ xb’een laj xik’ ilonel re chixjunil li tiikilal, ut taqahiltesi li qaam sa’ li rawa’b’ejihom li Dios.

7 Ut anajwan nintz’iib’ak ka’ch’inaq chirix li rahilal ke’xk’ul li tenamit a’in. Xb’aan naq jo’ chanru k’eeb’il chinnaw xb’aan laj Amoron, k’e reetal, eb’ laj Lamanita ke’xchap k’iila preex, li ke’xk’am chaq sa’ li najt xteramil kab’l Xerritzah; ut ke’wan winq, ixq, ut kok’al.

8 Ut lix b’eelomeb’ ut xyuwa’eb’ li ixq ut kok’al a’an ke’xkamsi; ut neke’xk’e li ixq che’xtiw lix tib’eleb’ lix b’eelomeb’, ut li kok’al che’xtiw xtib’eleb’ lix yuwa’eb’; ut maak’a’ li ha’, yal ka’ch’in ajwi’, li neke’xk’e reheb’.

9 Ut us ta nim li tz’eqb’eetalil a’in reheb’ laj Lamanita, moko naxq’ax ta li reheb’ li qatenamit aran Moriantum. Xb’aan naq k’e reetal, naab’al reheb’ lix rab’ineb’ laj Lamanita ke’xchap choq’ preex; ut chirix xmaq’b’al chiruheb’ li k’a’ru q’axal ajb’il wi’chik ut loq’ wi’chik chiru chixjunil li k’a’aq re ru, a’an li ^asaqru ch’oolejil ut li ^bchaab’il yu’amej—

10 Ut chirix naq ke’xb’aanu li na’leb’ a’in, ke’xkamsiheb’ chi q’axal numtajenaq xrahil, ut ke’xrahob’tesi lix tib’eleb’ toj reetal ajwi’ naq ke’kam; ut chirix naq ke’xb’aanu a’in, neke’xk’ux lix tib’eleb’ chanchan li k’iche’ xul, xb’aan xkawileb’ li raam; ut neke’xb’aanu jo’ reetalil lix kawilaleb’ xch’ool.

11 At walal raarookat inb’aan, chan tab’i’ ru naru jun tenamit jo’ a’in, li maak’a’ sahil wank rik’ineb’—

12 (Ut moko naab’al ta chihab’ numenaq, ut a’aneb’ chaq jun tenamit li ke’wan sa’ sahilal ut sa chaq rilb’aleb’)

13 A’b’anan at walal, chan tab’i’ ru naru jun tenamit jo’ a’in, li neke’xsahila wi’ xch’ool rik’in xk’ihal li tz’eqb’eetalil a’in—

14 Chan tab’i’ ru naru naqak’oxla naq li Dios ^atixram li ruq’ sa’ raqb’a-aatin sa’ qab’een?

15 K’e reetal, li waam naxjap re chixyeeb’al: Rahilal sa’ xb’een li tenamit a’in. Chatchalq sa’ raqb’a-aatin, at Dios, ut chamuq lix maakeb’ ut maa’usilaleb’, ut tz’eqb’eetalileb’, chiru chaq laa wilob’aal!

16 Ut jo’kan wi’chik, at walal, wankeb’ naab’al li ^axmalka’an ut eb’ lix ko’eb’ li toj wankeb’ chaq Xerritzah; ut li jun raqal re li tzakemq li ink’a’ ke’xk’am laj Lamanita, k’e reetal, lix teep aj pleet laj Tzenefi ke’xk’am chaq, ut ke’xkanab’eb’ a’an chi b’eenink yalaq b’ar neke’ru re xsik’b’al tzakemq, ut naab’al li tiixil ixq neke’lukta chire li b’e ut neke’kam.

17 Ut li teep aj pleet li wan wik’in q’un xmetz’ew; ut eb’ li teep aj pleet reheb’ laj Lamanita wankeb’ chiwu, ut wan Xerritzah chirixeb’; ut jo’ k’ihaleb’ li ke’eelelik rik’in li teep aj pleet re laj ^aAaron, ke’t’ane’ chiru xxuwajelil lix josq’ileb’.

18 Aay, k’a’jo’ xpo’jikeb’ xna’leb’ lin tenamit! Wankeb’ chi maak’a’ xtustuukileb’ ut chi maak’a’ ruxtaaneb’. K’e reetal, yal winqin, ut yal xmetz’ew li winq wan wik’in, ut ink’a’ chik ninru chixk’anjelankil intaqlahom.

19 Ut eb’ a’an ke’kawu sa’ xtz’eqb’eetalil lix na’leb’eb’, ut numtajenaq xjosq’ileb’ chixjunileb’, maajun neke’xkol xyu’am, chi moko li tiix chi moko li saaj, ut neke’xsahila xch’ool rik’in chixjunil, ka’ajwi’ rik’in li chaab’il ink’a’; ut li rahilal neke’xk’ul li qixqilal ut li qakok’al chiru chixjunil lix b’een li ch’och’ a’in naq’axok re chixjunil; relik chi yaal, li ru’uj aq’ej ink’a’ naru chixyeeb’al, chi moko naru chi tz’iib’amank.

20 Ut anajwan, at walal, ink’a’ chik nin’aatinak chirix xxik’ob’aalil a’in li yoo chi k’utmank. K’e reetal, laa’at nakanaw ru lix maa’usilal li tenamit a’in; nakanaw naq maak’a’ xtiikilal xk’a’uxleb’, ut ak numenaq reek’ahomeb’; ut lix maa’usilaleb’ ^anaxq’ax xmaa’usilaleb’ laj Lamanita.

21 K’e reetal, at walal, ink’a’ ninru chixch’olob’ankil xchaab’ilaleb’ chiru li Dios, maare anchal tinixsak’.

22 A’b’an k’e reetal, at walal, ninch’olob’ aachaab’ilal laa’at chiru li Dios, ut nawoyb’eni chiru li Kristo naq laa’at tatkole’q; ut nintz’aama chiru li Dios naq a’an ^atixkol aayu’am, re taawil xsutq’ijik lix tenamit rik’in a’an, malaj ut lix sachlijikeb’ chi junajwa; xb’aan naq ninnaw naq tento te’oso’q wi ink’a’ ^bte’xjal xk’a’uxl ut te’sutq’iiq rik’in.

23 Ut wi neke’oso’, taawanq chanchaneb’ laj Jaredita, xb’aan xxikenaqil lix ch’ooleb’, sa’ ^axsik’b’al li kik’ ut li ^beeqajunk.

24 Ut wi taa’uxq naq te’oso’q, naqanaw naq naab’al reheb’ li qakomon ^ake’risi rib’ ut ke’q’axon rik’ineb’ laj Lamanita, ut wankeb’ ajwi’ chik li toj te’risi rib’ ut te’q’axonq rik’ineb’; jo’kan ut, chatz’iib’a ka’ch’inaq li k’a’aq re ru, wi taakole’q aayu’am ut tin’oso’q laa’in ut ink’a’ tinwil aawu; a’b’an nawoyb’eni naq sa’ junpaat chik tatwil; xb’aan naq wan li loq’laj tz’iib’anb’il esil wik’in li nawaj ^bxq’axtesinkil aawe.

25 At walal, tiikaqat chixpaab’ankil li Kristo; ut li k’a’aq re ru kintz’iib’a mixrahob’tesi aach’ool, ut mi’aalo’ sa’ aach’ool toj sa’ li kamk; li Kristo b’an chiwaklesinq aawe; ut chiwanq li ^arahilal li kixk’ul ut lix kamik, ut xk’utunik lix tib’el chiruheb’ li qayuwa’, ut li ruxtaan ut xnajtil li royb’enihom, ut xyo’oninkil lix loq’al ut li ^bjunelik yu’am, sa’ laa ^ck’a’uxl chi junelik.

26 Ut li rusilal li Dios Yuwa’b’ej, li wan xk’ojarib’aal chi taqenaq sa’ li choxa, ut li Qaawa’ Jesukristo, li k’ojk’o sa’ ^axnim uq’ lix wankilal, toj reetal naq chixjunil li k’a’aq re ru taa’ok rub’el xwankil, chiwanq ut chikanaaq aawik’in chi junelik. Amen.