Tenq’ choq’ re li tzolok
Samuel, profeet sa’ li Najter Chaq’rab’


Samuel, profeet sa’ li Najter Chaq’rab’

Ralal laj Elkana ut li xAna, laj Samuel kiyo’la jo’ xsumenkil ru lix tij lix na’ (1 Sam. 1). Jo’ ch’ina al kik’ehe’ rub’el xtaql laj Eli, xb’eenil aj tij sa’ li loq’laj muheb’aal sa’ Silo (1 Sam. 2:11; 3:1). Li Qaawa’ kixb’oq laj Samuel naq toj ka’ch’in xyu’am chi wank choq’ profeet (1 Sam. 3). Chirix lix kamik laj Eli, laj Samuel ki’ok choq’ nimla profeet ut aj raqol aatin sa’ xb’een Israel, ut kixk’ojob’ wi’chik li chaq’rab’, li tustuukilal, ut li loq’onink sa’ li ch’och’ (1 Sam. 4:15–18; 7:3–17).

Sa’ 1 Sam. 28:5–20 yeeb’il resil naq kik’ame’ laj Samuel sa’ xyanqeb’ chaq li kamenaq xb’aan li ixq aj tul aran Endor, chi tz’aamanb’il xb’aan laj Saul. Ink’a’ naru naq kik’utb’esiik li na’leb’ a’in xb’aan li Dios, xb’aan naq jun aj tuul malaj jalan chik aj aatinanel kamenaq ink’a’ naru chireek’asinkil jun li profeet chi k’utmank yal chi tz’aamanb’il xb’aan.

Eb’ li hu 1 ut 2 Samuel

Sa’ junjunq li Santil Hu, wankeb’ li hu 1 ut 2 Samuel jo’ jun ajwi’ chi hu. Sa’ jalaneb’ chik, wiib’ chi hu neke’el. Eb’ li hu a’in neke’xye resil 130 chihab’, chalen chaq xyo’lajik laj Samuel toj rub’elaj xkamik li rey aj David.

Li xb’een xhu laj Samuel

Sa’eb’ li ch’ol 1–3 yeeb’il resil naq li Qaawa’ kixmajewa ut kixk’e tojb’a-maak sa’ xb’een lix junkab’al laj Eli, ut kixb’oq laj Samuel choq’ xb’eenil aj tij ut aj raqol aatin. Sa’eb’ li ch’ol 4–6, yeeb’il resil chan ru naq lix kaaxil li sumwank kit’ane’ sa’ ruq’eb’ laj Filisteo. Sa’eb’ li ch’ol 7–8 tz’iib’anb’il resil lix tijom laj Samuel chirixeb’ li b’alaq’il dios ut li maa’us aj rey. Sa’eb’ li ch’ol 9–15 naxye resil naq kixaqab’aak laj Saul, ut li rawa’b’ejil choq’ rey. Sa’eb’ li ch’ol 16–31 yeeb’il resil laj David ut chanru kixtaw li wankilal—laj Samuel kixyul laj David li kikamsink chaq re laj Goliat. Laj Saul xik’ kiril laj David, a’b’an laj David ink’a’ kiraj xkamsinkil laj Saul, us ta kiru raj chixb’aanunkil.

Li xkab’ xhu laj Samuel

Sa’ li hu a’in wan resil li rawa’b’ejil laj David jo’ rey sa’ xb’een Juda ut chirix a’an sa’ xb’een chixjunil Israel. Sa’eb’ li ch’ol 1–4 yeeb’il resil li nimla yalok ke’wan wi’ li ani neke’taaqenk re laj David, chirix naq kixaqab’aak choq’ rey aran Juda, rik’ineb’ li ke’taaqenk re laj Saul. Sa’eb’ li ch’ol 5–10 yeeb’il resil naq laj David kiniman xwankil sa’ naab’al li ch’och’. Sa’eb’ li ch’ol 11–21 yeeb’il resil naq kikub’e xmetz’ew laj David sa’ musiq’ejil xb’aan lix maak ut li po’resink ch’oolej sa’ lix junkab’al. Sa’eb’ li ch’ol 22–24 yeeb’il resil chan ru naq laj David kixyal xq’e chixk’amb’al wi’chik rib’ sa’ usilal rik’in li Qaawa’.