Jerusalen

Jun tenamit li wan Israel anajwan. A’an li jun chi tenamit q’axal nim xwankil sa’ li Santil Hu. Sa’ li tenamit a’in wankeb’ li na’ajej q’axal loq’ choq’ reheb’ laj Kristiano, laj Judio, ut eb’ laj Musulman, ut rajlal neke’wulak laj paab’anel chirilb’al. Santil tenamit nayeeman re chi kok’ aj xsa’.

Junxil Salem yeeb’il re (Gen. 14:18; Sal. 76:2). Jerusalen kiwan choq’ xtenamiteb’ laj Jebusita toj reetal naq ki’eechaniik xb’aan laj David (Jos. 10:1; 15:8; 2 Sam. 5:6–7), ut a’an kixk’e choq’ xjolomil tenamit. Rub’elaj a’an kiwan choq’ jun kawil na’ajej chi tzuul, ut wan tana’ chi 800 metro xtaqenaqil sa’ xb’een li palaw. Sutsu xb’aaneb’ li uul, ka’ajwi’ sa’ xnim li saq’e maak’a’.

Chiru li kutan kiwan wi’ li rey aj David chi awa’b’ejink Jerusalen, kiwan a’an sa’ jun ochoch che’. A’b’an chiru lix awa’b’ejil laj Salomon, eb’ li tenamit naab’al ke’xb’aanu re xk’eeb’al xch’ina-usal li tenamit; ke’xyiib’ li rochochil li rey ut li santil ochoch.

Chirix naq ke’jache’ ru li awa’b’ejihom Israel rik’in Juda, Jerusalen kikana choq’ jolomil tenamit re Juda. Chi kok’ aj xsa’ kiwan chi pleetinb’il xb’aaneb’ li teep aj pleet li yookeb’ chi ok (1 Rey. 14:25; 2 Rey. 14:13; 16:5; 18–19; 24:10; 25). Sa’ x’awa’b’ejil laj Esekias, Jerusalen ki’ok choq’ xjolomil li paab’aal a’b’anan kisache’ jun raqal sa’ 320 chihab’, 168 chihab’, ut 65 chihab’ rub’elaj li Kristo. Laj Herodes kixyiib’ wi’chik li tz’ak ut li santil ochoch, a’b’an sa’ li chihab’ 70 chirix li Kristo eb’ laj Romano ke’xsach chi junajwa.