Nefi, ralal laj Nefi, ralal laj Helaman

Jun li hu tz’iib’anb’il xb’aan laj Nefi, ralal laj Nefi, sa’ lix Hu laj Mormon. Sa’eb’ li ch’ol 1–10 k’utb’il lix tz’aqob’resinkil ru li profeetil aatin chirix lix k’ulunik li Qaawa’. Kik’eeman li jar eetalil re lix yo’lajik li Kristo; eb’ li tenamit ke’xjal xk’a’uxl; a’b’an moqon ke’sutq’i sa’ li maa’usilal. Moqon eb’ li ninqi hab’, li hiik, li kawil kaq-sut-iq’, ut li nimla sache’k ke’xk’ut reetalil lix kamik li Kristo. Sa’eb’ li ch’ol 11–28 tz’iib’anb’il resil lix k’ulunik li Kristo sa’ li nimla ch’och’ America. A’in xch’oolil li hu 3 Nefi. Naab’al li raatin li Kristo chanchan ajwi’ lix yehom li tz’iib’anb’il resil sa’ li Santil Hu (qayehaq, Mat. 5–7 ut 3 Ne. 12–14). Eb’ li ch’ol 29–30 a’an li raatin laj Mormon reheb’ li tenamit sa’ roso’jikeb’ li kutan.

Sa’ li hu a’in yal 49 raqal wan, ut jun ch’ol ajwi’, a’ut naxye resil ka’ch’in chik ma oxib’ cient chihab’ lix k’ulumeb’ laj Nefita (34–321 chihab’ chirix li Kristo). Junjunq tasal chi aj tz’iib’anel ke’tz’iib’ank re li esil, ut laj Nefi ajwi’ kitz’iib’ank chiru. Sa’eb’ li raqal 1–19, naxye naq chirix naq kiwulak li Kristo chi ak waklijenaq chi yo’yo, chixjunileb’ laj Nefita ut laj Lamanita ke’jale’ xch’ool chixpaab’ankil li evangelio. Ki’awa’b’ejin li tuqtuukilal, li rahok, ut li xyaalalil. Li oxib’ chi tzolom aj Nefita, li kixkanab’ li Kristo chi kanaak sa’ li ruchich’och’ toj reetal lix kab’ xk’ulunik (3 Ne. 28:4–9), ke’k’anjelak chiruheb’ li tenamit. Laj Nefi kixkanab’ li tz’iib’anb’il esil rik’in laj Amos li ralal. Eb’ li raqal 19–47 a’an li tz’iib’anb’il chirix lix k’anjel laj Amos (84 chihab’) ut laj Amos li ralal (112 chihab’). Sa’ 201 chihab’ chirix li Kristo, ki’ok li ch’a’ajkilal sa’ xyanq li tenamit xb’aan li q’etq’etil, ut ke’xjach rib’ chi tasalil ut ke’xtikib’ li b’alaq’il iglees re xk’ulb’al xtumineb’ (4 Ne. 1:24–34).

Eb’ li raqal sa’ roso’jik 4 Nefi neke’xk’ut naq eb’ li tenamit ak ke’sutq’i rik’in li maa’usilal (4 Ne. 1:35–49). Sa’ 305 chihab’ chirix li Kristo, kikam laj Amos ralal laj Amos, ut laj Ammaron li riitz’in kixmuqeb’ chixjunil li loq’laj tz’iib’anb’il esil re xkolb’aleb’ rix. Laj Ammaron moqon kixkanab’ li tz’iib’anb’il esil sa’ ruq’ laj Mormon, li kitz’iib’ank re naab’al li k’a’ru kixk’ul sa’ lix yu’am a’an, toja’ naq kixtz’iib’a li hu chi k’osb’il ru (Morm. 1:2–4).