Alma, ralal laj Alma

Jun li hu sa’ lix Hu laj Mormon, sa’ li k’osb’il wi’ ru li esil tz’iib’anb’il xb’aaneb’ li profeet aj Alma, ralal laj Alma, ut laj Helaman li ralal. Li k’a’ru yeeb’il resil sa’ li hu ki’uxman chalen chaq 91 chihab’ toj 52 chihab’ rub’elaj li Kristo. Sa’ li hu wankeb’ 63 ch’ol. Li ch’ol 1–4 naxye resil lix po’jikeb’ xch’ool li ani ke’taaqenk re laj Nehor ut laj Amlici sa’ xpleetinkileb’ laj Nefita. Sa’eb’ li pleet li ki’ux xb’aan a’in, q’axal nim li sachok kiwan, nim wi’chik chiru li wanjenaq chaq toj aran sa’ xyanqeb’ laj Nefita. Li ch’ol 5–16 naxye resil lix b’eenik laj Alma jo’ aj k’amol aatin sa’ xtiklajik, ut wan li raatin chirix li chaab’il aj ilol karneer (Alma 5) ut li jultikank aatin kixb’aanu rochb’een laj Amulek sa’ li tenamit Ammonihah. Sa’eb’ li ch’ol 17–27 tz’iib’anb’il resileb’ li ralal laj Mosiah ut lix k’anjeleb’ sa’ xyanqeb’ laj Lamanita. Sa’eb’ li ch’ol 28–44 wankeb’ junjunq li raatin laj Alma li q’axal nim xwankil. Sa’ li ch’ol 32 laj Alma kixjuntaq’eeta li aatin rik’in jun li iyaj; sa’ li ch’ol 36 kixye resil lix jalajik lix ch’ool re laj Helaman li ralal. Sa’eb’ li ch’ol 39–42 tz’iib’anb’il resil li na’leb’ kixk’e laj Alma re laj Korianton li ralal, li ki’ok chaq chixb’aanunkil li q’etok aatin chirix li saq ru ch’oolejil; li xnimal ru aatin a’in naxch’olob’ xyaalal li tiik ruhil na’leb’, li uxtaan, li wakliik chi yo’yo, ut lix tojb’al rix li maak. Eb’ li ch’ol 45–63 neke’xye resileb’ li pleet ke’wan wi’ laj Nefita sa’ li kutan a’an, ut lix xikikeb’ chi k’amb’ileb’ xb’e xb’aan laj Hagot. Wankeb’ li xninqal ru aj jolominel jo’ aj Moroni li taqlanel, aj Teankum, ut aj Lehi li ke’tenq’an chixkolb’aleb’ rix laj Nefita rik’in lix kawileb’ xch’ool chi k’anjelak tz’aqal naq ki’ajman ru.