Mayejak

Sa’ najter kutan, mayejak kiraj xyeeb’al xsantob’resinkil k’a’ruhaq malaj anihaq. Anajwan naraj chik naxye xk’ulb’al xsachik li k’a’ru re li ruchich’och’ choq’ re li Qaawa’ ut lix awa’b’ejihom. Eb’ li komon sa’ lix Iglees li Qaawa’ tento naq te’wanq xch’ool chixmayejankil chixjunil li k’a’aq re ru choq’ re li Qaawa’. Laj Jose Smith kixk’ut naq “jun li paab’aal li ink’a’ narelaji naq taamayejamanq chixjunil li k’a’aq re ru maajo’q’e wan tz’aqal xwankil re xk’eeb’al li paab’aal li na’ajman choq’ re li yu’am ut li kolb’a-ib’.” Naq nak’eeman reetal li k’a’ru re junelik, li osob’tesink li nachal xb’aan li mayejak q’axal nim wi’chik chiru yalaq k’a’ru li mayejanb’il.

Chirix naq ke’isiik chaq laj Adan ut li xEva sa’ li Awimq Eden, li Qaawa’ kixk’e reheb’ li chaq’rab’ re li mayejak. Sa’ li chaq’rab’ a’an taqlanb’il naq te’xmayeja li xb’een raleb’ lix ketomq. Li mayej a’in wan choq’ reetalil li mayej taak’ehe’q xb’aan li Ralal li Dios Junaj Chirib’il (Mois. 5:4–8). Kikana li k’anjel a’in toj reetal lix kamik li Jesukristo, li kixk’e xraqik li mayejanb’il xul jo’ k’ojob’anb’il k’anjel re li evangelio (Alma 34:13–14). Sa’ li Iglees anajwan eb’ li komon neke’xk’ul li loq’laj wa’ak, wan wi’ li kaxlan wa ut li ha’, re xjultikankil li mayej re li Jesukristo. Patz’b’il ajwi’ reheb’ li komon sa’ li Iglees anajwan naq te’xmayeja li mayej re jun ch’oolej chi q’etb’il ut jun musiq’ej chi tuulan (3 Ne. 9:19–22). A’in naraj naxye naq tuulaneb’ xch’ool, jalb’ileb’ xk’a’uxl, ut wankeb’ xch’ool chixpaab’ankileb’ lix taqlahom li Dios.