Isaias
Jun profeet sa’ li Najter Chaq’rab’, li ki’aatinak jo’ profeet chalen 740 toj 701 chihab’ rub’elaj li Kristo. Jo’ aj k’ehol na’leb’ chiru li rey aj Esekias, laj Isaias k’a’jo’ naq kiwan xwankil li raatin sa’ li paab’aal ut sa’ xjolomil li tenamit.
Li Jesus k’a’jo’ wi’chik naq kixye li raatin laj Isaias chiru ani chik chi profeet. Li raatin laj Isaias yeeb’il ajwi’ chi kok’ aj xsa’ xb’aan laj Pedro, laj Jwan, ut laj Pablo sa’ li Ak’ Chaq’rab’. Lix Hu laj Mormon ut li Tzol’leb’ ut Sumwank neke’xye li raatin laj Isaias q’axal wi’chik chiru anihaq chik chi najter profeet, ut neke’tenq’an chixch’olob’ankil xyaalalil laj Isaias. Laj Nefi kixtzoleb’ li xtenamit rik’in lix tz’iib’ahom laj Isaias (2 Ne. 12–24; Isa. 2–14). Li Qaawa’ kixye reheb’ laj Nefita naq “nim ru li ratin laj Isaias” ut naq chixjunil li k’a’aq re ru yeeb’il xb’aan laj Isaias jo’ profeet taatz’aqloq ru (3 Ne. 23:1–3).
Lix hu laj Isaias
Jun li hu sa’ li Najter Chaq’rab’. Naab’al reheb’ lix profeetil aatin laj Isaias naxye resil lix k’ulunik laj Tojol-ix, sa’ lix k’anjel sa’ li ruchich’och’ (Isa. 9:6) jo’ ajwi’ jo’ nimla Rey sa’ roso’jik li kutan (Isa. 63). Jo’kan ajwi’ ki’aatinak chi naab’al jo’ profeet chirix li k’a’ru chalel choq’ re Israel.
Li ch’ol 1 nak’anjelak choq’ xtiklajik li rela’ li hu. Isaias 7:14; 9:6–7; 11:1–5; 53; ut 61:1–3 neke’aatinak chi rub’elaj chirix lix k’anjel li Kolonel. Eb’ li ch’ol 2, 11, 12, ut 35 neke’aatinak chirix li taa’uxmanq sa’ roso’jik li kutan, naq taak’ojob’amanq wi’chik li evangelio, taach’utub’amanq Israel, ut li chaqi ch’och’ taa’atz’umaq jo’ li sununkil utz’u’uj. Sa’ li ch’ol 29 wan jun li profeetil aatin chirix lix k’utunik chaq lix Hu laj Mormon (2 Ne. 27). Eb’ li ch’ol 40–46 neke’xye xyaalal naq li Jehova, li tz’aqal Dios, nim wi’chik xwankil chiruheb’ li pak’b’il dios reheb’ li maak’a’eb’ xnawom chirix li Dios. Eb’ li jun siir chik chi ch’ol, 47–66, neke’aatinak chirix k’a’ru taak’ulmanq naq Israel taak’ojob’amanq wi’chik sa’ roso’jik ut taaxaqab’amanq Sion, rik’in li Qaawa’ sa’ xyanq lix tenamit.