Pedro

Sa’ li Ak’ Chaq’rab’, sa’ xtiklajik laj Pedro kinawman ru jo’ aj Simehon malaj laj Simon (2 Pe. 1:1), jun aj kar aj Betsaida li wan chaq Kafarnaum rochb’een li rixaqil. Li Jesus kixk’irtesi lix na’ li rixaqil laj Pedro (Mar. 1:29–31). Laj Pedro kib’oqe’ rochb’een laj Andres li riitz’in re taawanq choq’ xtzolom li Jesukristo (Mat. 4:18–22; Mar. 1:16–18; Luk. 5:1–11). Lix k’ab’a’ sa’ Arameo, aj Sefas, li naraj naxye “aj ilol na’leb’,” malaj “pek,” kik’ehe’ re xb’aan li Qaawa’ (Jwan 1:40–42; JJS, Jwan 1:42 [apendice]). Us ta sa’ li Ak’ Chaq’rab’ yeeb’il resil junjunq lix q’unal xmetz’ew laj Pedro, k’utb’il ajwi’ xyaalal naq kinumta sa’ xb’een a’an ut kik’ehe’ xmetz’ew xb’aan lix paab’aal chirix li Jesukristo.

Laj Pedro kixch’olob’ xyaalal naq li Jesus a’an li Kristo ut Ralal li Dios (Jwan 6:68–69), ut li Qaawa’ kixsik’ ru a’an re tixk’am lix laawil li awa’b’ejihom sa’ li ruchich’och’ (Mat. 16:13–19). Sa’ li tzuul re Jaltesiik-u, laj Pedro kiril li Kolonel chi jaltesinb’il ru, jo’ ajwi’ laj Moises ut laj Elias (Mat. 17:1–9).

Laj Pedro a’an xb’eenil li Apostol sa’ lix kutan a’an. Chirix lix kamik, lix waklijik chi yo’yo, ut lix taqik li Kolonel sa’ choxa, laj Pedro kixb’oqeb’ li Iglees chi ch’utlaak ut kixb’eresi xsik’b’al ru jun li Apostol re xk’ulb’al xna’aj laj Judas Iskariote (Hech. 1:15–26). Laj Pedro ut laj Jwan ke’xk’irtesi jun li winq li yeeq roq chalen chaq xyo’lajik (Hech. 3:1–16) ut ke’ach’ab’aak chaq sa’ tz’alam rik’in sachb’a-ch’oolej (Hech. 5:11–29; 12:1–19). A’ xb’aan lix k’anjel laj Pedro naq kik’eeman xb’een wa li evangelio reheb’ laj Gentil (Hech. 10–11). Sa’ roso’jikeb’ li kutan, laj Pedro, rochb’een laj Santiago ut laj Jwan, ke’kub’e chaq sa’ choxa ut ke’xk’e li Tijonelil re Melkisedek ut lix laawil a’an sa’ xb’een laj Jose Smith ut laj Oliver Cowdery (Tz. ut S. 27:12–13; 128:20).

Li xb’een xhu laj Pedro

Li xb’een hu kitz’iib’aman chalen chaq “Babilonia” (nak’oxlaman naq Roma) ut kitaqlaak rik’ineb’ laj santil paab’anel sa’ li ch’och’ Asia Menor yeeb’il re ka’ch’in chik chirix naq laj Neron ki’ok chixrahob’tesinkileb’ laj Kristiano.

Li ch’ol 1 na’aatinak chirix lix k’anjel li Kristo li kik’ojob’aak wi’ chaq chi junxilaj, jo’ aj Tojol-ix. Eb’ li ch’ol 2–3 neke’xch’olob’ naq li Kristo wan choq’ xb’eenil pek sa’ xxuk li Iglees, naq eb’ laj santil paab’anel xe’xk’ul jun li reyil tijonelil, ut naq li Kristo kijultikan aatin chiruheb’ li musiq’ej sa’ tz’alam. Eb’ li ch’ol 4–5 neke’xch’olob’ k’a’ut naq najultikaman li evangelio chiruheb’ li kamenaq, ut k’a’ut naq eb’ li xb’eenil tento te’xch’olaniheb’ li karneer.

Li xkab’ xhu laj Pedro

Li ch’ol 1 naxwaklesiheb’ xch’ool laj santil paab’anel naq te’xyal xq’e re naq kawob’resinb’ilaq lix b’oqb’aleb’ ut lix sik’b’aleb’ ru. Sa’ li ch’ol 2 wan li tije’k chirixeb’ laj tzolonel aj b’alaq’. Sa’ li ch’ol 3 na’aatinak chirixeb’ li roso’jikil kutan ut li xkab’ xk’ulunik li Kristo.