Tenq’ choq’ re li tzolok
Smith, Jose, alalb’ej


Smith, Jose, alalb’ej

Li profeet li kisik’e’ ru re xk’ojob’ankil wi’chik lix tz’aqal Iglees li Jesukristo sa’ li ruchich’och’. Laj Jose Smith kiyo’la sa’ li estado Vermont sa’ li tenamit Estados Unidos de America, ut kiwan lix yu’am chalen 1805 toj 1844.

Sa’ 1820, li Dios Yuwa’b’ej ut li Jesukristo ke’xk’ut rib’ chiru laj Jose, ut a’an kixtzol naq maajun reheb’ li iglees sa’ li ruchich’och’ yaal (JS—R 1:1–20). Moqon ki’ula’aniik xb’aan li anjel aj Moroni, li kixk’ut chiru li na’ajej muqb’ileb’ wi’ li perel ch’iich’ oor wan wi’ li tz’iib’anb’il esil reheb’ li najter tenamit sa’ li nimla ch’och’ America (JS—R 1:29–54).

Laj Jose kixjaltesi ru li aatin sa’eb’ li perel ch’iich’ oor, ut sa’ 1830 kixpuktesi jo’ lix Hu laj Mormon (JS—R 1:66–67, 75). Sa’ 1829, kixk’ul xwankil li tijonelil rik’in laj Jwan aj Kub’sihom Ha’ ut rik’in laj Pedro, laj Santiago, ut laj Jwan (Tz. ut S. 13; 27:12; 128:20; JS—R 1:68–70).

Jo’ b’eresinb’il xb’aan li Dios, sa’ 6 Abril 1830, laj Jose ut junjunq chik ke’xk’uub’ lix Iglees li Jesukristo li k’ojob’anb’il wi’chik (Tz. ut S. 20:1–4). Chi jolominb’il xb’aan laj Jose, kiniman li Iglees sa’ Canada, Inglaterra, ut sa’ li jun raqal re Estados Unidos li wan sa’ releb’aal saq’e, ut q’axal wi’chik sa’ Ohio, Missouri, ut Illinois. Kitaaqeek laj Jose ut eb’ laj santil paab’anel xb’aan li rahil rahob’tesink yalaq b’ar ke’kana wi’. Sa’ 27 Junio 1844, laj Jose rochb’een laj Hyrum li ras ke’kamsiik sa’ xk’ab’a’ xpaab’aaleb’ sa’ Carthage, Illinois, sa’ Estados Unidos de America.

Eb’ li loq’laj hu li k’amb’ileb’ chi kutankil xb’aan li Profeet aj Jose Smith

Laj Jose kixjaltesi ru jun jachal reheb’ li perel ch’iich’ oor li ke’k’ehe’ re xb’aan li anjel aj Moroni, ut a’ jaltesinb’il aatin kipuktesiman sa’ 1830 jo’ The Book of Mormon. Kixk’ul ajwi’ naab’al li k’utb’esinb’il na’leb’ rik’in li Qaawa’ li nach’olob’ank re li tzol’leb’ ut xk’uub’lajik li Iglees. Naab’al xkomoneb’ li k’utb’esinb’il na’leb’ a’in wan chi ch’utub’anb’il sa’ li hu Tzol’leb’ ut Sumwank yeeb’il re anajwan. Xb’aan ajwi’ laj Jose Smith naq kik’ame’ chi kutankil li Q’ol Nim Xtz’aq, wan wi’ raatin laj Moises, laj Abraham, ut laj Mateo li jaltesinb’il ru chi musiq’anb’il; jun raqal li resilal lix yu’am ut lix ch’olob’ahom, ut oxlaju raqal chi aatin chirix li tzol’leb’ ut li k’a’ru paab’anb’il xb’aan li Iglees.