Najter Chaq’rab’

Lix tz’iib’ahomeb’ li najter profeet li ke’k’anjelak chi eek’asinb’il xb’aan li Santil Musiq’ej ut chiru k’iila cient chihab’ ke’xch’olob’ resil li Kristo ut lix k’anjel li toj taawanq. Naxye ajwi’ resil laj Abraham ut eb’ li ralal xk’ajol chalen chaq laj Abraham, ut li sumwank li kixk’uub’ li Qaawa’ rik’in laj Abraham ut eb’ li ralal xk’ajol.

Li oob’ chi hu sa’ xtiklajik li Najter Chaq’rab’ ke’wan chi tz’iib’anb’il xb’aan laj Moises. A’aneb’ Genesis, Exodo, Levitico, Numeros, ut Deuteronomio. Genesis na’aatinak chirix lix tiklajik li ruchich’och’, eb’ li winq, li aatinob’aal, ut li jar teepal chi tenamit, jo’ ajwi’ lix tiklajik lix junkab’al laj Israel.

Eb’ lix huhil li esilal neke’xye li k’a’ru ki’ux rik’in Israel. Eb’ li hu a’in, a’aneb’ Josue, Jueces, Rut, 1 ut 2 Samuel, 1 ut 2 Reyes, 1 ut 2 Kronikas, Esdras, Nehemias, ut Ester.

Sa’eb’ lix huhil li chaq’al ru aatin wan li chaab’il na’leb’ ut lix tz’iib’ahomeb’ li profeet. A’aneb’ Job, Salmos, Proverbios, Eklesiastes, Cantares, ut Lamentaciones.

Eb’ li profeet ke’xtijeb’ laj Israel chirix lix maakeb’ ut ke’xch’olob’ xyaalal li osob’tesink li taachalq rik’in ab’ink chiru li chaq’rab’. Ke’xye resil chi junxilaj lix k’ulunik li Kristo, li tixtoj rix lix maakeb’ li ani te’xjal xk’a’uxl, te’xk’ul li k’ojob’anb’il k’anjel, ut te’xpaab’ li evangelio. Eb’ lix huhileb’ li profeet a’aneb’ Isaias, Jeremias, Esekiel, Daniel, Oseas, Joel, Amos, Abdias, Jonas, Mikeas, Nahum, Habakuk, Sofonias, Hageo, Sakarias, ut Malakias.

Lix k’ihaleb’ li hu sa’ li Najter Chaq’rab’ ke’wan chi tz’iib’anb’il sa’ Hebreo. Junjunq li tz’iib’ahom wankeb’ chi tz’iib’anb’il sa’ Arameo, jun aatinob’aal xkomon ajwi’ a’an.