Naq na’ux aatinak rik’in li Dios chi tiik ru li k’a’uxlej, sa’ li na’ux wi’ li b’antioxink ut napatz’man li osob’tesink. Nab’eresiman li tijok re li qaChoxahil Yuwa’ sa’ lix k’ab’a’ li Jesukristo. Naru nawan li tijok chi yeeb’il malaj sa’ li qach’ool. Li k’a’ru k’oxlanb’il xb’aan junaq naru nawan choq’ tij wi b’eresinb’il re li Dios. Jun b’ich re li ani tiik xch’ool naru nawan choq’ tij chiru li Dios (Tz. ut S. 25:12).
Ink’a’ na’ux li tijok re xjalb’al li rajom li Dios; re b’an xk’ulb’al choq’ qe laa’o ut choq’ reheb’ li jun ch’ol chik li k’a’ru ak wan xch’ool li Dios chixk’eeb’al, li tento b’an taqapatz’ re taqak’ul.
Nokotijok chiru li Yuwa’b’ej sa’ lix k’ab’a’ li Kristo (Jwan 14:13–14; 16:23–24). Naru nokotijok chi yaal sa’ lix k’ab’a’ li Kristo wi li rajom qach’ool laa’o a’an ajwi’ li rajom xch’ool li Kristo (Jwan 15:7; Tz. ut S. 46:30). Chi jo’kan yooko chixtz’aamankil li k’a’ru tiik, ut li k’a’ru naru li Dios chixk’eeb’al (3 Ne. 18:20). Wan li tij li ink’a’ neke’sumeek xb’aan naq ink’a’ neke’xsik’ li rajom li Kristo, neke’xsik’ b’an li raab’il ru xb’aaneb’ li winq (Stgo. 4:3; Tz. ut S. 46:9). Relik chi yaal, wi naqatz’aama chiru li Dios li k’a’ru ink’a’ tiik, taasutq’iiq choq’ qajitb’al (Tz. ut S. 88:65).