Ch’ajob’resinb’il ut moko ch’ajob’resinb’il ta

Sa’ li Najter Chaq’rab’, li Qaawa’ kixk’utb’esi chiru laj Moises ut chiruheb’ li najter aj Israelita naq ka’ajwi’ junjunq li tzakemq neke’wan chi ch’ajob’resinb’il, malaj sa’ jalan chik li aatin, naru natzekaman. Choq’ reheb’ laj Hebreo li tzakemq wan chi jachb’il ru, li ch’ajob’resinb’il ut li moko ch’ajob’resinb’il ta, ut a’in k’a’jo’ naq kiwan xwankil sa’ lix paab’aaleb’ ut lix yu’ameb’. Wankeb’ li xul, li xik’anel xul, ut li kar li k’oxlanb’ileb’ jo’ ch’ajob’resinb’il li naru natzekaman, a’ut wankeb’ li moko ch’ajob’resinb’ileb’ ta, ut yeeb’il naq ink’a’ taatzekamanq (Lev. 11; Deut. 14:3–20).

Sa’ li musiq’ejil k’a’aq re ru, naq ch’ajob’resinb’il junaq, naraj naxye naq maak’a’ li maak rik’in, chi moko atawanb’il li maak xb’aan. Chi jo’ka’in, na’oksiman li aatin chirix ani chaab’il xyu’am ut saq ru xch’ool (Sal. 24:4). Eb’ lix tenamit li Dios re li sumwank junelik taqlanb’il naq ch’ajb’ilaqeb’ (3 Ne. 20:41; Tz. ut S. 38:42; 133:5).