Jeremias
Jun profeet sa’ li Najter Chaq’rab’ li kiyo’la sa’ jun kab’al reheb’ laj tij ut ki’aatinak jo’ profeet sa’ Juda chalen 626 toj 586 chihab’ rub’elaj li Kristo. Kiwan sa’ xkutaneb’ junjunq chik li xninqal ru profeet: laj Lehi, laj Esekiel, laj Oseas, ut laj Daniel.
Laj Jeremias kik’ojob’aak jo’ profeet sa’ li yu’am naq maji’ nokoyo’la (Jer. 1:4–5). Chiru tana’ ka’k’aal chihab’ li kiwan wi’ choq’ profeet kixtijeb’ lix tenamiteb’ laj Judio chirix li loq’onink pak’b’il dios ut li yib’ ruhil na’leb’ li kiwan sa’ xyanqeb’ (Jer. 3:1–5; 7:8–10). Rajlal kixnumsi li ch’a’ajkilal ut li hob’e’k (Jer. 20:2; 36:18–19; 38:4). Chirix lix t’anik Jerusalen, eb’ laj Judio li ke’eelelik toj Egipto ke’xk’am laj Jeremias chirixeb’ (Jer. 43:5–6), ut yeeb’il resil naq aran ke’xkamsi chi kutinb’il chi pek.
Lix hu laj Jeremias
Sa’eb’ li ch’ol 1–6 wan junjunq li profeetil aatin li kik’eeman sa’ x’awa’b’ejil laj Josias. Sa’eb’ li ch’ol 7–20 wan li profeetil aatin chiru lix kutankil laj Johakin. Sa’eb’ li ch’ol 21–38 na’aatinak chirix lix awa’b’ejil laj Sedekias. Sa’eb’ li ch’ol 39–44 wan junjunq li profeetil aatin, ut yeeb’il resil li kik’ulman chirix lix t’anik Jerusalen. Sa’ li ch’ol 45 wan k’a’ru nayeechi’iman re laj Baruk, lix tz’iib’anel, naq taakole’q xyu’am laj Baruk. Sa’ roso’jik, sa’eb’ li ch’ol 46–51 wan li profeetil aatin chirixeb’ li jalanil tenamit. Sa’ li ch’ol 52 wan xraqik li esilal, chirix li k’a’ru kixk’ul li tenamit. Jun raqal lix profeetil aatin laj Jeremias kiwan sa’eb’ li perel ch’iich’ bronce re laj Laban, li kik’ame’ xb’aan laj Nefi (1 Ne. 5:10–13). Laj Jeremias yeeb’il resil wiib’ sut chik sa’ lix Hu laj Mormon (1 Ne. 7:14; Hel. 8:20).
Lix hu laj Jeremias jo’kan ajwi’ naxch’olob’ xyaalal naq ke’wan li winq rub’elaj li ruchich’och’ ut naq laj Jeremias kik’ojob’aman chalen chaq a’an (Jer. 1:4–5); wan jun profeetil aatin naq te’sutq’iiq chaq Israel chalen chaq b’ar jek’inb’ileb’ wi’ chaq, naq te’ch’utub’amanq chaq chi junjunqil sa’ li junjunq tenamit, ut chi ka’kab’il sa’ li junq kab’al toj sa’ Sion, jun sahil ch’och’ b’ar wi’ te’wanq Israel ut Juda sa’ xyaalalil ut tuqtuukilal (Jer. 3:12–19); wan jun profeetil aatin chirix naq li Qaawa’ tixch’utub’eb’ laj Israel chalen chaq sa’eb’ li ch’och’ sa’ xnim li saq’e, ut tixtaqla k’iila “aj kar” ut “aj yo” re xsik’b’aleb’ (Jer. 16:14–21). A’in li taak’ulmanq sa’ roso’jikeb’ li kutan, nimaq wi’chik ru chiru naq laj Moises kixk’ameb’ chaq laj Israel chi elk chaq Egipto (Jer. 16:13–15; 23:8).