Daniel

Li winq li yeeb’il resil sa’ lix hu laj Daniel sa’ li Najter Chaq’rab’; jun xprofeet li Dios ut jun winq q’axal nim xpaab’aal.

Maak’a’ nanawman chirix lix na’ xyuwa’, a’ut nanawman naq kiwan sa’ xyanqeb’ li ralal xk’ajoleb’ li rey (Dan. 1:3). Kik’ame’ chi preexil toj Babilonia, b’ar wi’ kixk’ul choq’ xk’ab’a’ aj Beltesasar (Dan. 1:6–7). Laj Daniel ut oxib’ li rech aj preex ink’a’ ke’xtzeka lix tzakemq li rey xb’aan xpaab’aaleb’ (Dan. 1:8–16).

Laj Daniel kixtaw usilal rik’in laj Nabukodonosor ut laj Dario rik’in lix wankilal chixk’utb’al xyaalalileb’ li matk’ (Dan. 2; 4; 6). Jo’kan ajwi’ kiril ut kixk’ut xyaalalil li k’a’ru tz’iib’anb’il chiru li tz’ak (Dan. 5). Eb’ li xik’ neke’ilok re ke’xk’uub’ xna’leb’ re xsachb’al, ut kikute’ sa’ xjuleb’ li kaqkojl, a’b’an li Qaawa’ kixkol lix yu’am (Dan. 6).

Lix hu laj Daniel

Wiib’ jachal li hu a’in: li ch’ol 1–6 naxye resil laj Daniel ut oxib’ li rochb’een; li ch’ol 7–12 a’aneb’ li profeetil k’utb’esinb’il matk’ kiril laj Daniel. Li hu naxk’ut naq aajel ru naq xaqxooqo chixpaab’ankil li Dios, ut naxk’ut naq li Qaawa’ narosob’tesiheb’ li tiikeb’ chi paab’ank.

Jun na’leb’ xnimal ru sa’ li hu, a’an lix matk’ li Rey aj Nabukodonosor li k’utb’il xyaalalil chi sa’. Sa’ li matk’, lix awa’b’ejihom li Dios sa’ roso’jik li kutan kik’utman jo’ jun pek li k’okb’il chaq sa’ jun li tzuul. Li pek a’an taatololnaq chi uub’ej toj reetal naq tixnujob’resi chixjunil li ruchich’och’ (Dan. 2; chi’ilmanq ajwi’ Tz. ut S. 65:2).