Timoteo, eb’ li hu re laj

Laj Pablo kixtz’iib’a li xb’een hu chirix naq kiwan sa’ tz’alam xb’een wa. A’an kixkanab’ chaq laj Timoteo sa’ Efeso, ut kixk’oxla sutq’iik aran moqon (1 Tim. 3:14). A’b’anan laj Pablo kixk’oxla naq taab’ayq chaq, jo’kan naq kitz’iib’ak rik’in laj Timoteo, maare chalen chaq Macedonia (1 Tim. 1:3), re xk’eeb’al xna’leb’ ut re xwaklesinkil xch’ool sa’ xb’aanunkil lix k’anjel.

Sa’ li ch’ol 1 laj Pablo naxk’e sahil ch’oolejil ut naxk’e li na’leb’ chirix li jo’maajo’il k’a’uxlej li yoo chi ok sa’ li Iglees. Sa’eb’ li ch’ol 2–3 naxk’e li na’leb’ chirix chan ru taa’uxmanq li loq’onink chiru li tenamit, ut chan ru naq tento taawanq lix ch’ooleb’ ut lix b’aanuhomeb’ laj k’anjel. Sa’eb’ li ch’ol 4–5 ch’olob’anb’il resil li q’etok paab’ank li taawanq sa’ roso’jik li kutan, ut nak’ehe’ xna’leb’ laj Timoteo chirix chan ru taak’anjelaq chiruheb’ li ani b’eresinb’ileb’ xb’aan. Sa’ li ch’ol 6 nak’ehe’ xch’ool re taakanaaq chi tiik chi paab’ank ut tixtz’eqtaana li b’ihomal re li ruchich’och’.

Laj Pablo kixtz’iib’a li xkab’ hu naq k’eeb’il sa’ tz’alam xkab’ sut, ka’ch’in rub’el lix kamik sa’ xk’ab’a’ xpaab’aal. Sa’ a’an wan roso’jik li raatin li Apostol, ut naxk’ut chan ru naq kaw xch’ool ut k’eeb’il xch’ool naq taanach’oq chaq li kamk.

Sa’ li ch’ol 1 laj Pablo naxk’e sahil ch’oolej ut naxk’e xchaq’rab’inkil laj Timoteo. Sa’eb’ li ch’ol 2–3 wan junjunq lix tijom ut li na’leb’ kixk’e, ut naxkawresi xch’ool choq’ re li ch’a’ajkilal li taachalq. Sa’ li ch’ol 4 wan li aatin choq’ reheb’ lix komon laj Pablo, naxk’eheb’ xna’leb’ chirix k’a’ru te’xb’aanu rik’ineb’ laj q’etol paab’aal.