David

Jun rey sa’ xb’een Israel najter sa’ li Najter Chaq’rab’.

Laj David a’an ralal laj Isai sa’ xteepal laj Juda. A’an jun saaj winq kaw xch’ool li kikamsink re jun kaqkojl, jun oso, ut li xnimal roq winq aj Goliat. (1 Sam. 17). Laj David kisik’e’ ru ut kiyule’ re taawanq choq’ rey sa’ xb’een Israel. Jo’ chanru laj Saul, chirix naq xwinqilo’ wan nimla maak kixb’aanu, a’ut laj David moko chanchan ta laj Saul rik’in naq kiyot’e’ xch’ool chi yaal. Chi jo’kan kixk’ul risinkil lix maak, ka’ajwi’ sa’ xkamsinkil laj Urias ink’a’ kixtaw (Tz. ut S. 132:39). Lix yu’am naru najachman sa’ kaahib’ raqal: (1) sa’ Belen, b’ar wi’ kiwan choq’ aj ilol karneer (1 Sam. 16–17); (2) sa’ rochochil li Rey aj Saul (1 Sam. 18:1–19:18); (3) jo’ aj eelel (1 Sam. 19:18–31:13; 2 Sam. 1); (4) jo’ rey sa’ xb’een Juda sa’ Hebron (2 Sam. 2–4) ut moqon jo’ rey sa’ xb’een chixjunil Israel (2 Sam. 5–24; 1 Rey. 1:1–2:11).

Chirix lix maak laj David naq kimuxuk sumsu rik’in li xBetsabe, ke’chal li rahilal sa’ xb’een chiru li junmay chihab’ chik li kikana sa’ xyu’am. Li tenamit ki’usa chiru li rawa’b’ejil, a’b’anan laj David xjunes kixk’ul rahilal rik’in li ki’ux sa’ xk’ab’a’ lix maak. Ke’wan li jachok-ib’ sa’ lix junkab’al, ut rik’in laj Absalon ut laj Adonias kiwan li pleetink chi k’utk’u. A’in kiwan choq’ xtz’aqlojik ru lix yehom laj Natan li profeet sa’ xb’een laj David sa’ xk’ab’a’ lix maak (2 Sam. 12:7–13).

Us ta kichal li rahilal a’in sa’ xb’een, lix awa’b’ejil laj David a’an li q’axal xnimal ru sa’ chixjunil lix wanjik li tenamit Israel, xb’aan naq: (1) kixjunajiheb’ li jar teepal sa’ jun chi tenamit, (2) kixtaw xwankil sa’ xb’een li ch’och’ chi ch’olch’o ru, (3) kixxaqab’ li jolomil tenamit sa’ xb’een li tz’aqal paab’aal, re naq li rajom xch’ool li Dios a’anaq lix chaq’rab’ Israel. Xb’aan a’in, lix awa’b’ejil laj David kik’oxlaman moqon jo’ li kutan q’axal chaab’il re li tenamit, ut jo’ reetalil li kutan nimaq xloq’al naq taachalq li Mesias (Isa. 16:5; Jer. 23:5; Esek. 37:24–28).

Lix yu’am laj David naxk’ut xyaalal k’a’ut naq na’ajman ru naq li junjunq taakuyuq sa’ tiikilal toj sa’ roso’jik. Jo’ saaj winq, kiyeeman naq a’an jun winq “jo’ chanru xch’ool li Qaawa’” (1 Sam. 13:14); jo’ winq, ki’aatinak rik’in li Musiq’ej ut kixk’ul k’iila k’utb’esinb’il na’leb’. A’b’anan terto lix tz’aq kixtoj xb’aan xq’etb’al lix taqlahom li Dios (Tz. ut S. 132:39).