Jwan, ralal laj Sebedeo
Jun reheb’ li Kab’laju chi Apostol sa’ li Ak’ Chaq’rab’, ralal laj Sebedeo ut riitz’in laj Santiago. Sa’ xtiklajik kiwan choq’ aj kar (Mar. 1:17–20). Naru naq a’an li jun tzolom re laj Jwan aj Kub’sihom Ha’ li moko yeeb’il ta xk’ab’a’, li yeeb’il resil sa’ Jwan 1:40. Moqon kib’oqe’ re taawanq choq’ xtzolom li Jesukristo (Mat. 4:21–22; Luk. 5:1–11). Kixtz’iib’a li Evangelio re laj Jwan, oxib’ li taqlanb’il hu, ut li hu Apokalipsis. A’an jun reheb’ li oxib’ li ke’wan rik’in li Qaawa’ naq kiwaklesiik lix rab’in laj Jairo (Mar. 5:35–42), sa’ li tzuul re jaltesiik-u (Mat. 17:1–9), ut sa’ Getsemani (Mat. 26:36–46). Sa’ lix tz’iib’ahom naxye rib’ jo’ li tzolom li raaro xb’aan li Jesus (Jwan 13:23; 21:20) ut jo’ li “tzolom jun chik” (Jwan 20:2–8). Li Jesus kixk’ab’a’i a’an rochb’een li ras Boanerges, “ralaleb’ li kaaq” (Mar. 3:17). K’iila sut yeeb’il resil a’an naq yeeb’il resil lix kamik li Jesus chiru krus ut lix waklijik chi yo’yo (Luk. 22:8; Jwan 18:15; 19:26–27; 20:2–8; 21:1–2). Laj Jwan moqon kimine’ ru chi q’axonk Patmos, b’ar wi’ kixtz’iib’a li hu Apokalipsis (Apok. 1:9).
Laj Jwan yeeb’il resil chi kok’ aj xsa’ sa’ li na’leb’ k’utb’esinb’il sa’ roso’jik li kutan (1 Ne. 14:18–27; 3 Ne. 28:6; Eter 4:16; Tz. ut S. 7; 27:12; 61:14; 77; 88:141). Eb’ li jar raqal a’in neke’xxaqab’ xyaalal li yeeb’il sa’ li Santil Hu chirix laj Jwan, ut neke’xk’ut chik li na’leb’ chirix lix nimal ru a’an ut lix nimal li k’anjel li k’eeb’il re xb’aan li Qaawa’ re tixb’aanu sa’ li ruchich’och’ sa’ xkutankil li Ak’ Chaq’rab’ jo’ ajwi’ sa’eb’ li roso’jik kutan. Eb’ li loq’laj hu re roso’jik li kutan neke’xch’olob’ xyaalal naq laj Jwan ink’a’ kikam; kikanab’aak b’an chi kanaak sa’ li ruchich’och’ jo’ moos aj k’anjelanel toj reetal lix kab’ xk’ulunik li Qaawa’ (Jwan 21:20–23; 3 Ne. 28:6–7; Tz. ut S. 7).
Eb’ li hu taqlanb’ileb’ xb’aan laj Jwan
Us ta laj tz’iib’ahom re a’ oxib’ chi hu a’in ink’a’ naxye ani xk’ab’a’, li aatin chanchan tz’aqal li raatin laj Jwan li Apostol, jo’kan naq k’oxlanb’il naq a’an kixtz’iib’a li oxib’.
1 Jwan 1 naxtijeb’ laj santil paab’anel naq te’wanq sa’ xyaalal rik’in li Dios. Li ch’ol 2 naxye naq eb’ laj santil paab’anel tento te’xnaw ru li Dios rik’in ab’ink chiru, ut naxye reheb’ naq me’xra li ruchich’och’. Li ch’ol 3 naxb’oqeb’ chixjunil chi wank choq’ ralal xk’ajol li Dios ut chixraab’al rib’ chirib’ileb’ rib’. Li ch’ol 4 naxye naq li Dios a’an ajwi’ li rahok ut naq nawan rik’in li ani narahok re. Li ch’ol 5 naxch’olob’ naq eb’ laj santil paab’anel neke’yo’la rik’in li Dios xb’aan xpaab’ankil li Kristo.
2 Jwan chanchan ajwi’ 1 Jwan. Sa’ li hu a’in laj Jwan nasaho’ xch’ool xb’aan lix tiikilaleb’ chi paab’ank li ani wankeb’ choq’ ralal xk’ajol li “Qana’ sik’b’il ru.”
3 Jwan naxb’antioxi re jun winq aj Gayo xk’ab’a’ xb’aan xtiikilal chi paab’ank ut xb’aan xtenq’ankileb’ li neke’rahok re li yaal.
Lix evangelio laj Jwan
Sa’ li hu a’in sa’ li Ak’ Chaq’rab’, laj Jwan li Apostol kixch’olob’ xyaalal: (1) naq li Jesus a’an li Kristo malaj li Mesias ut (2) naq li Jesus a’an li Ralal li Dios (Jwan 20:31). Li k’a’ru yeeb’il resil chirix lix yu’am li Jesus wan chi sik’b’il ru ut chi tuqub’anb’il re xch’olob’ankil xyaalal a’in. Natikla li hu rik’in xyeeb’al resil lix wanjik li Kristo rub’elaj naq kiwan li ruchich’och’: a’an kiwan rik’in li Dios, a’an chaq li Dios, ut a’an laj yo’ob’tesihom re chixjunil li k’a’aq re ru. Kiyo’la sa’ li tz’ejwalej jo’ li Ralal li Yuwa’b’ej li Junaj Chirib’il. Laj Jwan naxye resil lix k’anjel li Jesus, ut k’a’jo’ naq kixye xyaalal lix diosilal ut lix waklijik sa’ xyanqeb’ chaq li kamenaq. Naxch’olob’ xyaalal chi saqen ru naq li Jesus a’an li Ralal li Dios, chi k’utb’il xyaalal xb’aaneb’ li sachb’a-ch’oolej, xb’aaneb’ laj yehol nawom, xb’aaneb’ li profeet, ut xb’aan lix yaab’ xkux li Kristo ajwi’. Re xk’utb’al li na’leb’, laj Jwan naxch’olob’ resil li saqen ut li aak’ab’, li yaal ut li tik’ti’, li us ut li ink’a’ us, li Dios ut laj Tza. Maare maajun chik hu naxye resil lix santilal li Jesus ut lix maak’a’il xpaab’aaleb’ laj taqlanel aj Judio chi ch’olch’o ru jo’ li hu a’in.
Laj Jwan kixtz’iib’a resil lix k’anjel li Jesus sa’ Judea, ut q’axal wi’chik sa’ li jun xamaan sa’ xraqik lix k’anjel sa’ li ruchich’och’, a’b’anan laj Mateo, laj Markos, ut laj Lukas ke’xtz’iib’a resil lix k’anjel sa’ Galilea. Junjunq li na’leb’ sa’ li Evangelio a’in wankeb’ chi ch’olob’anb’il xb’aan li k’utb’esinb’il na’leb’ sa’ roso’jik li kutan (Tz. ut S. 7 ut Tz. ut S. 88:138–141).
Re rilb’al xtusulal li k’a’ru kik’ulman sa’ xyu’am li Kolonel jo’ ch’olob’anb’il sa’ li Evangelio re laj Jwan, chi’ilmanq Xjunajileb’ li Kaahib’ chi Evangelio sa’ li apendice.