1 Ut anajwan naq yoo laj Alma chi b’eek chaq sa’ li ch’och’ Gideon sa’ xjayal lix tz’e li saq’e, aran sa’ xjayal li ch’och’ Manti, k’ehomaq reetal, kik’ulman naq sachso xch’ool naq ^akixk’uleb’ li ^bralal laj Mosiah chi b’eek sa’ xjayal li ch’och’ Tzarahemla.

2 Anajwan eb’ li ralal laj Mosiah a’in ke’wan rik’in laj Alma sa’ li hoonal naq li anjel ^akixk’ut rib’ xb’een wa chiru; jo’kan naq laj Alma kisaho’ xch’ool chi numtajenaq chirilb’aleb’ li ras riitz’in; ut wan k’a’ru k’a’jo’ wi’chik kiniman wi’ xsahil xch’ool, a’an naq toj ras riitz’ineb’ sa’ li Qaawa’; relik chi yaal, ut ke’kawu xmetz’ew sa’ xnawb’al li yaal; xb’aan naq a’aneb’ winq tz’aqal xnawomeb’ ut ^bke’xtz’ileb’ rix li loq’laj hu chi yalb’ileb’ xq’e, re taaruuq te’xnaw li raatin li Dios.

3 A’ut moko ka’aj ta wi’ a’in; ke’xk’e rib’ aj b’an wi’ rik’in naab’al li ^atijok ut li kuyuk sa’, jo’kan naq kiwan rik’ineb’ li musiq’ej re profeetil aatin, ut li musiq’ej re k’utb’esink, ut naq ^bke’k’utuk, ke’k’utuk rik’in wankilal, ut chi k’eeb’ileb’ xwankil xb’aan li Dios.

4 Ut ke’wan chaq chixk’utb’al li raatin li Dios chiru xnumik kaalaju chihab’ sa’ xyanqeb’ laj Lamanita, ut k’a’jo’ naq ^ake’usa chaq rik’in ^bxk’amb’aleb’ naab’al chixnawb’al li yaal; relik chi yaal, rik’in lix wankil li raatineb’ naab’al ke’k’ame’ chiru lix artal li Dios, re xpatz’b’al lix k’ab’a’ ut ^cxch’olob’ankil lix maakeb’ chiru.

5 Ut a’in li kik’ulman rik’ineb’ sa’ xb’eenikeb’, xb’aan naq ke’wan naab’al lix ch’a’ajkilaleb’; k’a’jo’ li rahilal ke’xk’ul, sa’ tz’ejwalej jo’ ajwi’ sa’ k’a’uxlej, jo’ li tz’okaak, li chaqi-eel ut tawaak, ut jo’kan ajwi’ naab’al li ^ak’anjelak sa’ li musiq’ej.

6 Anajwan jo’ka’in lix b’eenikeb’: Chirix naq ^ake’el chaq rik’in laj Mosiah, lix yuwa’eb’, sa’ li xb’een xchihab’eb’ laj raqol aatin; chirix xyeeb’al naq ^bmoko te’xk’ul ta li awa’b’ejihom li kiraj raj lix yuwa’ xq’axtesinkil sa’ xb’eeneb’, ut a’in ajwi’ xna’leb’eb’ chaq li tenamit;

7 A’b’anan ke’el chaq sa’ li ch’och’ Tzarahemla, ut ke’xchapeb’ lix yok’leb’ ch’iich’, ut lix jutz’juukil che’, ut li roq tzimaj, ut lix tzimajeb’, ut lix jok’eb’; ut a’in ke’xb’aanu re taaruuq te’xtaw li tzakemq choq’ reheb’ naq wankeb’ sa’ li yamyookil ch’och’.

8 Ut chi jo’kan ke’el chiru yamyookil ch’och’ rochb’een jo’ nimal rajlankileb’ li ke’xsik’ chaq ru, re te’taqe’q sa’ li ch’och’ Nefi, re xjultikankil li raatin li Dios chiruheb’ laj Lamanita.

9 Ut kik’ulman naq ke’b’eek k’iila kutan sa’ li yamyookil ch’och’, ut k’a’jo’ naq ke’xkuy xsa’ ut k’a’jo’ naq ^ake’tijok re naq li Qaawa’ tixk’e reheb’ jun raqal lix Musiq’ re taaxik chirixeb’, ut taakanaaq rik’ineb’, re naq taaruuq te’wanq choq’ ^bk’anjeleb’aal sa’ ruq’ li Dios re xk’amb’aleb’, wi naru chi jo’kan, li ras riitz’ineb’ aj Lamanita chixnawb’al chirix li yaal, chixnawb’al chirix xmaa’usilal li ^cna’leb’ kanab’anb’il chaq xb’aaneb’ lix yuwa’eb’, li moko yaal ta.

10 Ut kik’ulman naq li Qaawa’ ^akirula’aniheb’ rik’in lix ^bMusiq’, ut kixye reheb’: ^cChik’ojob’aaq eech’ool. Ut ke’k’ojob’aak xch’ool.

11 Ut li Qaawa’ kixye ajwi’ reheb’: Ayuqex sa’ xyanqeb’ laj Lamanita, a’eb’ lee ras eeriitz’in, ut xaqab’omaq xwankil li waatin; a’ut aj ^akuyunelaqex sa’ li najtil oyb’enink ut li ch’a’ajkilal, re naq chaab’ilaq eeb’aanuhom li teek’ut chiruheb’ sa’ ink’ab’a’, ut laa’in texink’e choq’ k’anjeleb’aal sa’ wuq’ choq’ re xkolb’al k’iila aamej.

12 Ut kik’ulman naq eb’ li ralal laj Mosiah, ut eb’ ajwi’ li ke’wan rik’ineb’, kichal xkawilaleb’ xch’ool re te’xik rik’ineb’ laj Lamanita ut te’xch’olob’ chiruheb’ li raatin li Dios.

13 Ut kik’ulman chirix naq ke’wulak sa’ xnub’aal lix ch’och’eb’ laj Lamanita, naq ^ake’xjach rib’ ut ke’el li jun rik’in li jun chik, ut ke’xkanab’ rib’ chiru li Qaawa’ naq te’xk’ul wi’chik rib’ sa’ xraqik lix ^bq’olomeb’, xb’aan naq ke’xk’oxla naq nim li k’anjel li ke’xk’am chaq sa’ xb’eeneb’.

14 Ut relik chi yaal naq nim, xb’aan naq ke’xk’am sa’ xb’eeneb’ xjultikankil li raatin li Dios chiru jun li tenamit ^axulo’jenaqeb’ ut kawujenaqeb’ ut josq’eb’; jun tenamit li neke’saho’ xch’ool rik’in xkamsinkileb’ laj Nefita, ut elq’ak chiruheb’ ut xpoqlenkileb’; ut k’eek’ookeb’ xch’ool chirix li b’ihomal, malaj chirix li oor ut li plaat, ut li q’ol terto xtz’aq; a’ut neke’xsik’ xk’ulb’al li k’a’aq re ru a’in rik’in kamsink ut poqlenk, re naq ink’a’ te’k’anjelaq rik’in ruq’ re xk’ulb’aleb’.

15 Chi jo’kan ke’ok choq’ jun tenamit q’axal aj q’em, ut naab’al reheb’ neke’xloq’oni li pak’b’il dios, ut lix ^amajewahom li Dios t’anenaq sa’ xb’eeneb’ sa’ xk’ab’a’ li ^bna’leb’ kanab’anb’il chaq xb’aaneb’ lix yuwa’eb’; a’b’anan lix yeechi’ihom li Dios ye’b’il reheb’ wi taa’uxq naq te’xjal xk’a’uxleb’.

16 Jo’kan ut, ^axb’aan ajwi’ a’in naq eb’ li ralal laj Mosiah ke’xk’am chaq li k’anjel sa’ xb’eeneb’, re naq maare te’xk’ameb’ sa’ li jalb’a-k’a’uxlej; re naq maare te’xk’ameb’ chixnawb’al chirix li k’uub’anb’il na’leb’ re li tojb’al-ix.

17 Jo’kan naq ke’xjach rib’ chixjunjunqaleb’, ut xkoheb’ sa’ xyanqeb’, li junjunq chi winq xjunes, jo’ chanru li raatin ut xwankil li Dios li k’eeb’il chaq re.

18 Anajwan laj Ammon rik’in naq a’an xb’eenil sa’ xyanqeb’, malaj ut a’an li nak’anjelak chiruheb’, ut a’an ki’el rik’ineb’ chirix ^arosob’tesinkileb’ jo’ chanru lix jar tasal chi k’anjel, chirix xk’eeb’al li raatin li Dios reheb’, malaj chirix k’anjelak chiruheb’ rub’elaj lix xikik; ut chi jo’kan ke’xchap lix jar paay chi b’e chiru chixjunil li ch’och’.

19 Ut laj Ammon xko’o sa’ li ch’och’ Ismael, ut k’eeb’il xk’ab’a’ li ch’och’ jo’ chanruheb’ li ralal laj ^aIsmael, li ke’ok ajwi’ choq’ aj Lamanita.

20 Ut naq yoo laj Ammon chi ok sa’ li ch’och’ Ismael, eb’ laj Lamanita ke’xchap ut ke’xb’ak’, jo’ chanru naq k’aynaqeb’ chixb’ak’b’al chixjunileb’ laj Nefita li neke’t’ane’ sa’ ruq’eb’, ut chixk’amb’aleb’ chiru li rey; ut chi jo’kan a’ yaal re xch’ool li rey ma tixkamsiheb’, malaj tixk’eheb’ chi preexil, malaj tixtz’apeb’ sa’ tz’alam, malaj ut taarisiheb’ chaq sa’ xch’och’, jo’ chanru li naraj ut li nasaho’ wi’ xch’ool.

21 Ut chi jo’kan laj Ammon kik’ame’ chiru li rey li wan sa’ xb’een li ch’och’ Ismael; ut aj Lamoni xk’ab’a’ a’an; ut a’an ralal xk’ajol laj Ismael.

22 Ut li rey kixpatz’ re laj Ammon ma taaraj wank sa’ li ch’och’ sa’ xyanqeb’ laj Lamanita, malaj sa’ xyanq lix tenamit a’an.

23 Ut laj Ammon kixye re: Yaal, nawaj wank sa’ xyanqeb’ li tenamit a’in chiru jun k’amok; relik chi yaal, ut maare toj sa’ xkutankil inkamik.

24 Ut kik’ulman naq li rey aj Lamoni k’a’jo’ naq kisaho’ sa’ xch’ool rik’in laj Ammon, ut kixtaqla naq te’hite’q lix b’ak’leb’, ut kiraj raj naq laj Ammon tixk’am jun reheb’ lix rab’in choq’ rixaqil.

25 A’b’anan laj Ammon kixye re: Ink’a’, tinwanq b’an choq’ aamoos. Jo’kan naq laj Ammon ki’ok choq’ moos chiru li rey aj Lamoni. Ut kik’ulman naq kik’ehe’ sa’ xyanqeb’ li jun ch’ol chik chi moos re xk’aak’alenkileb’ lix ketomq laj Lamoni, jo’ chanru xna’leb’eb’ laj Lamanita.

26 Ut naq wanjenaq oxib’ kutan chi k’anjelak chiru li rey, naq rochb’eeneb’ li moos aj Lamanita yookeb’ chi xik rik’ineb’ lix ketomq sa’ xna’aj li ha’, a’an li ha’ Sebus nayeeman re, ut chixjunileb’ laj Lamanita neke’xb’eresi aran lix ketomq, re te’wanq xha’—

27 Jo’kan ut, naq laj Ammon ut eb’ lix moos li rey yookeb’ chixb’eresinkil lix ketomq sa’ xna’aj li ha’ a’in, k’ehomaq reetal, junjunq reheb’ laj Lamanita, li wanjenaqeb’ rik’in xketomqeb’ sa’ li ha’, ke’xaqli ut ke’xjek’i lix ketomqeb’ laj Ammon ut eb’ lix moos li rey, ut ke’xjek’iheb’ toj reetal naq ke’eelelik chiru k’iila b’e.

28 Anajwan eb’ lix moos li rey ke’ok chi wech’ink, ke’xye: Anajwan li rey tooxkamsi, jo’ chanru xb’aanu reheb’ li qas qiitz’in xb’aan naq ke’jek’iik lix ketomqeb’ xb’aan xmaa’usilaleb’ li winq a’in. Ut ke’ok chi yaab’ak chi numtajenaq, ut ke’xye: K’ehomaq reetal, ak jek’inb’ileb’ li qaketomq.

29 Anajwan ke’yaab’ak xb’aan xxiweb’ naq te’kamsiiq. Anajwan naq kiril a’in laj Ammon kiniman xch’ool xb’aan xsahil; xb’aan naq laa’in, chan, tink’ut lin wankil reheb’ li wech moosil a’in, malaj li wankilal li wan wik’in, rik’in xk’amb’aleb’ wi’chik li ketomq a’in choq’ re li rey, re naq taaruuq tink’ameb’ ru xch’ooleb’ li wech moosil a’in, re taaruuq tink’ameb’ chixpaab’ankil li waatin.

30 Anajwan ut, a’in li kixk’oxla laj Ammon, naq kiril lix ch’a’ajkilaleb’ li ani ras riitz’in naxyeheb’ re.

31 Ut kik’ulman naq kixsahob’resiheb’ xch’ool rik’in li raatin, ut kixye: Ex was wiitz’in, chiwanq xsahil eech’ool, ut xikaqo chixsik’b’aleb’ li ketomq, ut taqach’utub’eb’ wi’chik ut taqasutq’isiheb’ sa’ xna’aj li ha’, ut chi jo’kan taqakoleb’ rix li ketomq choq’ re li rey, ut a’an ink’a’ tooxkamsi.

32 Ut kik’ulman naq xkoheb’ chixsik’b’aleb’ li ketomq, ut ke’xtaaqe laj Ammon, ut q’axal sa’ aanil naq ke’xseeb’a rib’ ut ke’xrameb’ lix ketomq li rey, ut ke’xch’utub’eb’ wi’chik sa’ xna’aj li ha’.

33 Ut eb’ a’ winq a’an ke’xaqli wi’chik chixjek’inkileb’ lix ketomq; a’b’an laj Ammon kixye reheb’ li ras riitz’in: Sutumaqeb’ rix li ketomq re naq ink’a’ te’eeleliq; ut laa’in tinxik ut tinyal wu xk’ulb’aleb’ li winq a’in li neke’jek’ink reheb’ li qaketomq.

34 Jo’kan ut, ke’xb’aanu jo’ chanru taqlanb’ileb’ xb’aan laj Ammon, ut a’an xko’o chixyalb’al ru xk’ulb’aleb’ li ani ke’xaqli chire li ha’ Sebus; ut maaka’ch’in rajlankileb’.

35 Jo’kan naq ink’a’ neke’xxuwa ru laj Ammon, xb’aan naq neke’xk’oxla naq jun reheb’ lix winq taaruuq chixkamsinkil jo’ chanru neke’saho’ wi’ xch’ool, xb’aan naq moko neke’xnaw ta naq li Qaawa’ kixxaqab’ chaq li raatin rik’in laj Mosiah naq ^atixkoleb’ chaq li ralal sa’ ruq’eb’; chi moko neke’xnaw k’a’ruhaq chirix li Qaawa’; jo’kan naq neke’saho’ sa’ xch’ool rik’in xsachlijikeb’ li ras riitz’ineb’; ut xb’aan a’in ke’xaqli chixjek’inkil lix ketomq li rey.

36 A’b’anan laj ^aAmmon kixxaqab’ chaq rib’ ut ki’ok chixkutb’aleb’ chi pek rik’in xjok’; relik chi yaal, rik’in nimla metz’ew kixkut li pek sa’ xyanqeb’; ut chi jo’kan kixkamsi ^bjunjunq reheb’, jo’kan naq ke’ok chi sachk xch’ool rik’in xnimal lix metz’ew; a’b’anan ke’chal xjosq’il sa’ xk’ab’a’eb’ li ras riitz’ineb’ li kamsinb’ileb’, ut ke’xk’e xch’ool naq taat’ane’q a’an; jo’kan ut, naq ke’ril naq ^cink’a’ ke’ru chixkutb’al rik’in xpekeb’, ke’chal rik’in tenleb’ che’ re xkamsinkil.

37 A’b’an k’ehomaq reetal, li junjunq chi winq li nataqsin re xtenleb’ che’ re xsak’b’al laj Ammon, a’an kixch’oteb’ li ruq’ rik’in xyok’leb’ ch’iich’; xb’aan naq a’an kixrameb’ lix lob’ rik’in xsak’b’aleb’ li ruq’ rik’in xq’esnal lix yok’leb’ ch’iich’, jo’kan naq ke’ok chi sachk xch’ooleb’, ut chi eelelik chiru; relik chi yaal, ut maaka’ch’in rajlankileb’, ut kixk’eheb’ chi eelelik xb’aan xmetz’ew lix tel.

38 Anajwan waqib’ reheb’ ke’t’ane’ chiru li jok’, a’b’an maajun reheb’ kixkamsi rik’in xyok’leb’ ch’iich’, ka’ajwi’ li najolomin reheb’; ut kixch’ot jo’ k’ihaleb’ li ruq’ li ke’taqsiik sa’ xb’een, ut maaka’ch’in xk’ihaleb’.

39 Ut chirix naq kiralinasiheb’ chi najt, kisutq’i ut ke’xk’e xha’eb’ lix ketomq ut ke’xsutq’isiheb’ sa’ xch’och’ li rey, toja’ ut naq ke’ok rik’in li rey, ut ke’xk’am li uq’ej li ke’ch’ote’ chaq xb’aan xyok’leb’ ch’iich’ laj Ammon, reheb’ li ke’xsik’ chaq xkamsinkil; ut ke’k’ame’ chiru li rey re xk’utb’al xyaalalil li k’a’aq re ru ke’xb’aanu chaq.