Ebʼ li loqʼlaj hu
Alma 21


Jun esil chirix lix jultikahom laj Aaron, ut laj Muloki, ut eb’ lix komon, reheb’ laj Lamanita.

Natikla sa’ li ch’ol 21 toj sa’ li ch’ol 25.

Ch’ol 21

Laj Aaron naxtzoleb’ laj Amalekita chirix li Kristo ut li xtojb’al rix maak tixb’aanu—Laj Aaron ut eb’ lix komon neke’tz’ape’ sa’ tz’alam aran Middoni—Chirix naq ach’ab’anb’ileb’, neke’xk’ut li na’leb’ sa’eb’ li ch’utleb’aal ut naab’aleb’ neke’jale’ xch’ool—Laj Lamoni naxkanab’eb’ li tenamit sa’ li ch’och’ Ismael chi paab’ank jo’ chanru neke’raj. Wan na 90–77 chihab’ ma nayo’la li Kristo.

1 Anajwan naq laj Ammon ut eb’ lix komon ake’xjach rib’ sa’ xnub’aal lix ch’och’eb’ laj Lamanita, k’ehomaq reetal, laj Aaron kixchap xb’e sa’ xjayal li ch’och’ Jerusalen yeeb’il re xb’aaneb’ laj Lamanita, nak’ab’a’in jo’ chanru li ch’och’ ke’yo’la wi’ lix yuwa’eb’; ut wan aran chire lix nub’aal Mormon.

2 Anajwan eb’ laj Lamanita ut eb’ laj Amalekita ut eb’ lix tenamit laj aAmulon ke’xyiib’ chaq jun li nimla tenamit, ut a’an Jerusalen yeeb’il re.

3 Anajwan eb’ laj Lamanita tz’aqal kawujenaqeb’, a’ut eb’ laj Amalekita ut eb’ laj Amulonita kaweb’ wi’chik xjolomeb’; jo’kan naq ke’xtenq’aheb’ laj Lamanita re te’xkawob’resi li raameb’, re te’nimanq xmetz’eweb’ sa’ li maa’usilal ut lix tz’eqb’eetalileb’.

4 Ut kik’ulman naq laj Aaron kik’ulun sa’ li tenamit Jerusalen, ut ki’ok xb’een wa chi jultikank aatin chiruheb’ laj Amalekita. Ut ki’ok chi jultikank chiruheb’ sa’eb’ lix ch’utleb’aaleb’, xb’aan naq ke’xyiib’eb’ chaq li ch’utleb’aal jo’ chanru lix ak’anjelileb’ laj Nehoril; xb’aan naq naab’al reheb’ laj Amalekita ut laj Amulonita neke’tz’aqon sa’ lix k’anjelileb’ laj Nehoril.

5 Jo’kan ut, naq ki’ok laj Aaron sa’ jun reheb’ lix ch’utleb’aal re jultikank aatin chiruheb’ li tenamit, ut naq yoo chiraatinankileb’, k’ehomaq reetal, kiwakli jun aj Amalekita ut ki’ok chixwech’b’al, kixye: K’a’ru a’an li xach’olob’? Ma aawilom junaq li aanjel? K’a’ut naq eb’ li anjel ink’a’ neke’xk’ut rib’ chiqu laa’o? K’e reetal, ma ink’a’ tab’i’ wan xchaab’ilal li tenamit a’in jo’ laa tenamit laa’at?

6 Nakaye ajwi’, wi ink’a’ naqajal qak’a’uxl too’oso’q. Chan put ru nakanaw laa’at lix k’oxlahom ut li rajom li qach’ool? Chan ru nakanaw naq na’aje’ ru naq taqajal qak’a’uxl? Chanru nakanaw naq maawa’o jun tenamit tiik xch’ool? K’e reetal, qayiib’ahomeb’ li santil muheb’aal, ut naqach’utub’ qib’ re xloq’oninkil li Dios. Naqapaab’ naq li Dios tixkol chixjunileb’ li winq.

7 Anajwan laj Aaron kixye re: Ma nakapaab’ naq li Ralal li Dios taachalq chixtojb’aleb’ rix li winq chiruheb’ lix maak?

8 Ut li winq kixye re: Laa’o ink’a’ naqapaab’ naq laa’at nakanaw xkomon li na’leb’ a’an. Ink’a’ naqapaab’ li jo’maajo’il kanab’anb’il na’leb’ a’in. Ink’a’ naqapaab’ naq laa’at nakanaw chirix li ak’a’aq re ru chalel, chi moko naqapaab’ naq eb’ laa yuwa’, chi moko ajwi’ naq eb’ li qayuwa’ laa’o ke’xnaw chirix li k’a’aq re ru ke’aatinak wi’, chirix li k’a’ru toj chalel.

9 Anajwan laj Aaron ki’ok chixteeb’aleb’ li loq’laj hu chiruheb’ chirix lix k’ulunik li Kristo, ut jo’kan ajwi’ chirix lix waklijikeb’ li kamenaq chi yo’yo, ut naq amoko taaruuq ta taawanq xtojb’aleb’ rix li winq wi ta ink’a’ xb’aan lix kamik ut li rahilal tixk’ul li Kristo, ut lix btojb’al rix li maak xb’aan xkik’el.

10 Ut naq ki’ok chixch’olob’ankil li k’a’aq re ru a’in chiruheb’ kik’ulman naq ke’josq’o’ rik’in, ut ke’ok chireetz’unkil, ut ink’a’ ke’raj rab’inkil li aatin kixye.

11 Jo’kan ut, naq kiril naq ink’a’ te’rab’i li raatin, ki’el chaq sa’ xch’utleb’aaleb’, ut kik’ulun junpak’al sa’ jun li k’aleb’aal Ani-Anti xk’ab’a’, ut aran kixtaw laj Muloki chixjultikankil li aatin chiruheb’, ut jo’kan ajwi’ laj Ammah ut eb’ lix komon. Ut ke’xwech’ rib’ rik’in naab’al chirix li aatin.

12 Ut kik’ulman naq ke’ril naq eb’ li tenamit te’xkawob’resi li raameb’, jo’kan naq ke’el chaq ut xkoheb’ sa’ li ch’och’ Middoni. Ut ke’xjultika li aatin chiruheb’ naab’al, ut moko k’iheb’ ta li ke’paab’ank re li aatin ke’xk’ut.

13 A’b’anan laj Aaron ut junjunq reheb’ lix komon ke’chape’ ut ke’tz’ape’ sa’ tz’alam, ut li jun ch’ol chik reheb’ ke’eelelik chaq sa’ li ch’och’ Middoni sa’eb’ li na’ajej sa’ xsutam.

14 Ut eb’ li tz’apb’ileb’ sa’ tz’alam ake’xnumsi k’iila rahilal, ut ke’ach’ab’aak xb’aan ruq’ laj Lamoni ut laj Ammon, ut ke’k’ehe’ xtzakemqeb’ ut raq’eb’.

15 Ut xkoheb’ wi’chik chixch’olob’ankil li aatin, ut chi jo’kan ke’kole’ chaq xb’een wa chiru li tz’alam, ut chi jo’kan ke’xk’ul chaq rahilal.

16 Ut xkoheb’ a’ yaal b’ar b’eresinb’ileb’ wi’ xb’aan lix aMusiq’ li Qaawa’, ut ke’xjultika li raatin li Dios sa’ li junjunq chi ch’utleb’aal reheb’ laj Amalekita, malaj sa’ li junjunq chi ch’utlajik reheb’ laj Lamanita li ke’ru wi’ chi oksiik.

17 Ut kik’ulman naq li Qaawa’ ki’ok chirosob’tesinkileb’, jo’kan naq naab’aleb’ ke’xk’am chixnawb’al chirix li yaal; relik chi yaal, ake’xq’unb’esiheb’ xch’ool naab’al chirixeb’ lix maak, ut chirix li na’leb’ kanab’anb’il chaq xb’aaneb’ lix yuwa’eb’, li moko yaal ta.

18 Ut kik’ulman naq laj Ammon ut laj Lamoni ke’sutq’i chaq sa’ li ch’och’ Middoni toj sa’ li ch’och’ Ismael, a’an xch’och’il li reechanihomeb’.

19 Ut li rey aj Lamoni ink’a’ kiraj xkanab’ankil naq laj Ammon taak’anjelaq chiru, chi moko naq taawanq choq’ xmoos.

20 A’ut kixtaqla naq te’kab’lamanq li ch’utleb’aal sa’ li ch’och’ Ismael; ut kixtaqla naq eb’ lix tenamit, malaj li ani awa’b’ejinb’ileb’ xb’aan, te’xch’utub’ rib’eb’.

21 Ut kisaho’ sa’ xch’ool chirixeb’, ut kixk’ut k’iila na’leb’ chiruheb’. Ut kixch’olob’ ajwi’ chiruheb’ naq a’aneb’ jun tenamit li taqlanb’ileb’ xb’aan a’an, ut naq a’aneb’ jun tenamit ach’ab’anb’il, ut naq ach’ab’anb’ileb’ chiru raalal lix taqlahom li rey, lix yuwa’, rik’in naq lix yuwa’ kixk’e chaq re a’an naq taa’awa’b’ejinq sa’ xb’een li tenamit li wankeb’ sa’ li ch’och’ Ismael, ut sa’ chixjunil li ch’och’ sa’ xsutam.

22 Ut kixch’olob’ ajwi’ chiruheb’ naq taaruuq te’wanq chi aach’ab’anb’il re xloq’oninkil li Qaawa’ lix Dios jo’ chanru li rajomeb’, sa’ b’araq chi na’ajej wankeb’ wi’, wi wan sa’ li li ch’och’ li awa’b’ejinb’il xb’aan li rey aj Lamoni.

23 Ut laj Ammon kijultikan aatin chiru lix tenamit li rey aj Lamoni, ut kik’ulman naq kixk’ut chiruheb’ chixjunil li na’leb’ chirix li k’a’aq re ru re li tiikilal. Ut wulaj wulaj ki’elajink chiruheb’, chi yalb’il anchal xq’e; ut ke’xk’e xxik chirix li raatin, ut anchaleb’ xch’ool chirix xpaab’ankileb’ lix taqlahom li Dios.