1 Anajwan toosutq’iiq sa’ li qatz’iib’anb’il esil rik’in laj Amalikiah ut eb’ li ^ake’eelelik chaq chirix chiru li yamyookil ch’och’; xb’aan naq k’ehomaq reetal, a’an kixk’am chirix li ani xkoheb’ rochb’een, ut kitaqe’ sa’ li ^bch’och’ Nefi sa’ xyanqeb’ laj Lamanita, ut kireek’asiheb’ laj Lamanita chi josq’o’k rik’in lix tenamit laj Nefi, jo’kan naq lix reyeb’ laj Lamanita kixtaqla xjek’inkil jun li aatin chiru chixjunil li ch’och’, sa’ xyanqeb’ chixjunil lix tenamit, naq te’xch’utub’ wi’chik rib’ re te’xik chi pleetik rik’ineb’ laj Nefita.

2 Ut kik’ulman naq chirix naq kijek’iman li aatin sa’ xyanqeb’ ke’xuwak chi numtajenaq; relik chi yaal, neke’xxuwa xb’aanunkil li ink’a’ nawulak chiru li rey, ut ke’xxuwa ajwi’ xik chi pleetik rik’ineb’ laj Nefita, maare anchal te’sache’q xyu’ameb’. Ut kik’ulman naq ink’a’ ke’raj, malaj ut lix k’ihaleb’ ink’a’ ke’raj ab’ink chiru lix taqlahom li rey.

3 Ut anajwan kik’ulman naq li rey kijosq’o’ xb’aan naq ink’a’ ke’ab’in chiru; jo’kan naq kixk’e laj Amalikiah chi taqlank sa’ xb’een li jun raqal re lix teep aj pleet li neke’ab’in chiru xtaqlahom, ut kixtaqla naq taaxik ut tixmineb’ ru chi pleetik.

4 Anajwan k’ehomaq reetal, a’in li kiraj laj Amalikiah; xb’aan naq a’an jun winq k’a’jo’ xseeb’al chixb’aanunkil sa’ muqmu li ink’a’ us, ut chi jo’kan kixk’uub’ jun na’leb’ sa’ xch’ool re risinkil chaq lix reyeb’ laj Lamanita sa’ xk’ojarib’aal.

5 Ut anajwan ak kiruhan chi taqlank sa’ xb’een li jun raqal reheb’ laj Lamanita li neke’k’ulub’ank re li rey; ut kixsik’ k’ulub’aak xb’aaneb’ li ink’a’ neke’ab’in chiru; jo’kan naq xko’o chi uub’ej sa’ li na’ajej ^aOnidah nayeeman re, xb’aan naq ke’eelelik aran chixjunileb’ laj Lamanita; xb’aan naq ke’xk’e reetal naq chalk re li teep aj pleet, ut sa’ xch’ooleb’ a’an naq chalkeb’ re chixsachb’aleb’, jo’kan naq ke’eelelik aran Onidah, sa’ li na’ajej wan wi’ li k’anjeleb’aal re pleet.

6 Ut ke’xxaqab’ chaq jun winq re taawanq choq’ rey ut choq’ aj jolominel sa’ xb’eeneb’, ut xaqxookeb’ xk’a’uxl chi k’eek’ookeb’ tz’aqal xch’ool naq ink’a’ te’mine’q ru chi xik chixpleetinkileb’ laj Nefita.

7 Ut kik’ulman naq ak ke’xch’utub’ rib’ sa’ xb’een li tzuul Antipas xk’ab’a’, re xkawresinkil rib’ chi pleetik.

8 Anajwan moko rajom ta laj Amalikiah xpleetinkileb’ jo’ chanru lix taqlahom li rey; k’ehomaq b’an reetal, li rajom, a’an k’ulub’aak xb’aaneb’ li teep aj pleet reheb’ laj Lamanita, re naq taaruuq tixk’ojob’ rib’ sa’ xjolomileb’, ut taarisi chaq li rey sa’ xk’ojarib’aal ut taareechani li awa’b’ejihom.

9 Ut k’ehomaq reetal, kik’ulman naq kixtaqla naq lix teep aj pleet te’xyiib’eb’ lix muheb’aal t’ikr sa’ li ru taq’a li nach’ wan rik’in li tzuul Antipas.

10 Ut naq ki’ok q’ojyin kik’ulman naq kixtaqlaheb’ taql sa’ muqmu sa’ li tzuul Antipas, re xtz’aamankil naq laj jolominel reheb’ li wankeb’ sa’ xb’een li tzuul, aj Lehonti xk’ab’a’, naq taakub’eeq chiroq li tzuul, xb’aan naq kiraj aatinak rik’in.

11 Ut naq kixk’ul laj Lehonti li aatin, kik’ulman naq moko kichal ta xch’ool kub’eek chiroq li tzuul. Ut kik’ulman naq laj Amalikiah kixtaqla wi’chik xkab’ sut, kixtz’aama chiru naq taakub’eeq chaq. Ut kik’ulman naq laj Lehonti ink’a’ kiraj; ut kixtaqla wi’chik rox sut.

12 Ut naq laj Amalikiah kiril naq ink’a’ kiru chixkub’sinkil chaq laj Lehonti chixb’een li tzuul, kik’ulman naq kitaqe’ chiru li tzuul, ka’ch’in chik ma sa’ xna’aj lix teep laj Lehonti; ut kixtaqla wi’chik xkaa sut li raatin re laj Lehonti, kixtz’aama naq chikub’eeq chaq, ut naq te’chalq lix moos aj kolol rix rochb’een.

13 Ut kik’ulman naq chirix naq kikub’e chaq laj Lehonti rochb’eeneb’ lix moos aj kolol rix rik’in laj Amalikiah, naq laj Amalikiah kixtz’aama chiru naq taakub’eeq chaq chiru q’ojyin rochb’een lix teep aj pleet, ut tixsutiheb’ rix li winq a’an b’ar k’ojk’ookeb’ wi’, li k’eeb’il chaq a’an chixtaqlankil xb’aan li rey, ut naq a’an tixq’axtesiheb’ sa’ ruq’ laj Lehonti, wi a’an tixk’e a’an (laj Amalikiah) choq’ xkab’il aj jolominel sa’ xb’een chixjunil li teep aj pleet.

14 Ut kik’ulman naq kikub’e chaq laj Lehonti rochb’eeneb’ lix winq ut kixsutiheb’ rix lix winq laj Amalikiah, jo’kan naq chi maji’ neke’aj ru naq nasaqew li kutan, ak sutsuukeb’ rix xb’aaneb’ li teep aj pleet re laj Lehonti.

15 Ut naq ke’ril naq sutsuukeb’ rix, kik’ulman naq ke’relaji ru laj Amalikiah naq tixkanab’eb’ chixjunajinkil rib’ rik’ineb’ li ras riitz’ineb’, re naq ink’a’ te’sache’q. Anajwan, a’in tz’aqal li k’a’ru kiraj laj Amalikiah.

16 Ut kik’ulman naq kixq’axtesiheb’ lix winq, ut ^akixq’et li k’a’ru taqlanb’il xb’aan li rey. Anajwan a’in li k’a’ru kiraj laj Amalikiah, re taaruuq tixb’aanu li k’a’ru xk’oxlahom re risinkil chaq li rey sa’ xk’ojarib’aal.

17 Anajwan li na’leb’ sa’ xyanqeb’ laj Lamanita, wi nakamsiik li xb’eenil aj jolominel, a’an naq taaxaqab’aaq li xkab’il aj jolominel re taawanq choq’ xb’eenil aj jolominel.

18 Ut kik’ulman naq laj Amalikiah kixtaqla naq jun reheb’ lix moos tixk’e li b’an nakamsin chi timil re laj Lehonti, jo’kan naq kikam.

19 Anajwan, naq kamenaq chik laj Lehonti, eb’ laj Lamanita ke’xxaqab’ laj Amalikiah re taawanq choq’ aj jolominel ut choq’ xb’eenil aj taqlanel sa’ xb’eeneb’.

20 Ut kik’ulman naq laj Amalikiah kib’eek rochb’een lix teep aj pleet (xb’aan naq ak kixtaw li rajom) sa’ li ch’och’ Nefi, sa’ li tenamit Nefi, a’an li xb’eenil tenamit.

21 Ut kol’elq li rey chixk’ulb’al rochb’eeneb’ lix moos aj kolol rix, xb’aan naq sa’ xch’ool a’an naq laj Amalikiah kixtz’aqob’resi ru li taqlanb’il xb’aan, ut naq laj Amalikiah kixch’utub’ chaq xnimal li teep aj pleet a’an re xik chi pleetik rik’ineb’ laj Nefita.

22 A’b’anan k’ehomaq reetal, naq yoo chi chalk li rey chixk’ulb’al, laj Amalikiah kixtaqla naq te’xik lix moos chixk’ulb’al li rey. Ut xkoheb’ ut ke’xkub’si rib’ chiru li rey, chanchan naq te’roxloq’i xb’aan xnimal ru.

23 Ut kik’ulman naq li rey kixye’ li ruq’ re xwaklesinkileb’, jo’ chanru xna’leb’eb’ laj Lamanita, choq’ reetalil li tuqtuukilal, ut a’ na’leb’ a’an ke’xk’ul chaq rik’ineb’ laj Nefita.

24 Ut kik’ulman naq chirix naq kixwaklesi chaq chi ch’och’ li xb’een, k’ehomaq reetal kixk’ob’ li rey toj sa’ raam, ut a’an kit’ane’ chi ch’och’.

25 Anajwan ke’eelelik lix moos aj kolol rix li rey, ut eb’ lix moos laj Amalikiah ke’xjap re chixyeeb’al:

26 K’ehomaq reetal, eb’ lix moos li rey ke’xk’ob’ chi raam, ut a’an t’anenaq ut eb’ a’an ke’eelelik; k’ehomaq reetal, ilomaq chaq.

27 Ut kik’ulman naq laj Amalikiah kixtaqlaheb’ lix teep aj pleet naq choxe’b’eeq ut che’ril li k’a’ru kixk’ul chaq li rey; ut naq chalenaqeb’ sa’ li na’ajej, ut ke’xtaw li rey tz’eqtz’o sa’ xkik’el, laj Amalikiah kixpak’ xjosq’il, ut kixye: Ani kirahok re li rey, chixik ut chixtaaqeheb’ lix moos aj kolol rix, re te’kamsiiq.

28 Ut kik’ulman naq chixjunileb’ li ke’rahok re li rey, naq ke’rab’i li aatin a’an, xkoheb’ ut ke’xtaaqeheb’ lix moos li rey.

29 Anajwan naq eb’ lix moos li rey ke’ril jun teep aj pleet chixtaaqenkileb’, ke’chal wi’chik xxiweb’, ut ke’eelelik chiru yamyookil ch’och’, ut ke’q’axon sa’ li ch’och’ Tzarahemla ut ke’xjunaji rib’ rik’in ^axtenamit laj Ammon.

30 Ut li teep aj pleet li kitaaqenk reheb’ kisutq’i, chirix xtaaqenkileb’ chi ink’a’ neke’xtaweb’; ut chi jo’kan laj Amalikiah, rik’in lix b’alaq’, kixk’am xch’ooleb’ li tenamit.

31 Ut kik’ulman naq wulajaq chik a’an ki’ok sa’ li tenamit Nefi rochb’eeneb’ lix teep aj pleet, ut kireechani li tenamit.

32 Anajwan ut kik’ulman naq li rixaqil li rey, naq kirab’i naq kamsinb’il li rey—xb’aan naq laj Amalikiah kixtaqlaheb’ aj taql re li rixaqil li rey, chixyeeb’al resil re naq kikamsiik li rey xb’aaneb’ lix moos aj kolol rix, naq a’an kixtaaqeheb’ chaq rik’in lix teep aj pleet, a’b’anan maak’a’ ki’ok wi’, ut ak ke’ru chaq chi eelelik—

33 Jo’kan ut, chirix naq li rixaqil li rey kixk’ul li esil a’in kixtaqla xtz’aamankil re laj Amalikiah naq tixkol xyu’ameb’ li ani wankeb’ sa’ li tenamit, ut kixtz’aama ajwi’ re naq chichalq rik’in; ut kixtz’aama ajwi’ naq tixk’ameb’ laj yehol nawom rochb’een re te’xch’olob’ xnawomeb’ chirix lix kamik li rey.

34 Ut kik’ulman naq laj Amalikiah kixk’am chirix li moos ajwi’ a’an li kikamsink chaq re li rey, ut chixjunileb’ li ke’wan chaq rochb’een, ut kox’okaq rik’in li rixaqil li rey, toj sa’ li na’ajej chunchu wi’ a’an; ut chixjunileb’ ke’xch’olob’ resil chiru, naq li rey kamsinb’il xb’aaneb’ lix moos a’an; ut ke’xye ajwi’: Ke’eelelik; ma ink’a’ ut naxch’olob’ a’in xyaalal lix maakeb’? Ut chi jo’kan ke’xk’ojob’ xch’ool li rixaqil li rey chirix xkamik li rey.

35 Ut kik’ulman naq laj Amalikiah kixsik’ k’ulub’aak xb’aan li rixaqil li rey, ut kixk’am a’an choq’ rixaqil; ut chi jo’kan rik’in xb’alaq’, ut chi tenq’anb’il xb’aaneb’ lix moos li seeb’eb’ chi b’alaq’ink, kixtaw li awa’b’ejihom; relik chi yaal, kik’ulub’aak choq’ rey chiru chixjunil li ch’och’, sa’ xyanqeb’ chixjunil lix tenamiteb’ laj Lamanita, a’aneb’ chi junajinb’il ^aeb’ laj Lamanita ut laj Lemuelita ut laj Ismaelita, ut chixjunileb’ li risihomeb’ chaq rib’ rik’ineb’ laj Nefita, chalen chaq rawa’b’ejil laj Nefi toj sa’ li kutan a’an.

36 Anajwan eb’ a’in li ^ake’risi chaq rib’, ak tzolb’ileb’ ut xk’ulumeb’ li na’leb’ jo’ chanru ajwi’ eb’ laj Nefita; relik chi yaal, tzolb’ileb’ chi juntaq’eet sa’ ^bxnawb’al chirix li Qaawa’, a’b’anan nasach qach’ool chixseraq’inkil, moko najt ta chik chirix risinkil chaq rib’, q’axal wi’chik kawujenaqeb’ ut ^cmoko yot’b’il ta xch’ooleb’ ke’kana, ut q’axal wi’chik xulo’jenaqeb’, aj maakeb’ ut josq’eb’ chiruheb’ laj Lamanita—ke’ruk’ chaq lix na’leb’eb’ laj Lamanita; ke’xq’axtesi rib’ sa’ li q’emal, ut li k’iila paay chi yib’ ru k’a’uxlej; relik chi yaal, kisach chi junajwa sa’ xch’ooleb’ li Qaawa’ lix Dios.