1 Ut kik’ulman sa’ xtiklajik li xwaqlaju xka’k’aal chihab’ rawa’b’ejileb’ laj raqol aatin sa’ xb’een lix tenamit laj Nefi, naq laj ^aXiblon kireechani li ^bk’a’aq re ru loq’ li q’axtesinb’il chaq re laj Helaman xb’aan laj Alma.

2 Ut a’an jun winq tiik xna’leb’, ut nab’eek chi tiik chiru li Dios; ut kixk’e xch’ool chixb’aanunkil li chaab’il rajlal, re xpaab’ankil lix taqlahom li Qaawa’ lix Dios; ut jo’kan ajwi’ kixb’aanu li riitz’in.

3 Ut kik’ulman naq kikam ajwi’ laj Moroni. Ut chi jo’kan kiraqe’ li xwaqlaju xka’k’aal chihab’ rawa’b’ejileb’ laj raqol aatin.

4 Ut kik’ulman naq sa’ li xwuqlaju xka’k’aal chihab’ rawa’b’ejileb’ laj raqol aatin, kiwan jun nimla ch’uut chi winq, oob’ mil rik’in kaahib’ cient ajwi’ rajlankileb’, rochb’eeneb’ li rixaqil ut ralal xk’ajoleb’, li ke’el chaq sa’ li ch’och’ Tzarahemla toj sa’ li ch’och’ li wan sa’ ^axjayal lix nim li saq’e.

5 Ut kik’ulman naq laj Hagot, rik’in naq a’an jun winq q’axal k’eek’o xk’a’uxl chirix li na’leb’, jo’kan naq xko’o ut kixyiib’ jun li jukub’ numtajenaq nim choq’ re, sa’ xnub’aal li ch’och’ Naab’alil, chixk’atq li ch’och’ Sachenaqil, ut kixtaqla chiru li palaw li wan sa’ rokeb’ saq’e, chixk’atq li ^aru’uj chi ch’och’ ka’ch’in ru li naxik sa’ li ch’och’ sa’ xjayal lix nim li saq’e.

6 Ut k’ehomaq reetal, wankeb’ naab’al xkomoneb’ laj Nefita li ke’ok chi sa’ ut xkoheb’, chi wan rik’ineb’ naab’al li taak’anjelaq reheb’, jo’ ajwi’ naab’al li ixq ut li kok’al; ut ke’xchap xb’e sa’ xjayal lix nim li saq’e. Ut chi jo’kan kiraqe’ li xwuqlaju xka’k’aal chihab’.

7 Ut sa’ li xwaqxaqlaju xka’k’aal chihab’, li winq a’in kixyiib’ jalaneb’ chik li jukub’. Ut kisutq’i ajwi’ li xb’een jukub’, ut naab’al chik li tenamit ke’ok chi sa’, ut ke’xk’am ajwi’ naab’al li taak’anjelaq reheb’, ut xkoheb’ wi’chik re te’xik sa’ li ch’och’ sa’ xjayal lix nim li saq’e.

8 Ut kik’ulman naq maajo’q’e chik ke’ab’iman resil. Ut naqak’oxla naq ke’ok chi ha’ sa’ xchamal li palaw. Ut kik’ulman naq jun chik jukub’ xko’o ajwi’, ut b’ar xko’o a’an ink’a’ naqanaw.

9 Ut kik’ulman naq ke’wan naab’al li tenamit li xkoheb’ sa’ li ch’och’ sa’ ^axjayal lix nim li saq’e. Ut chi jo’kan kiraqe’ li xwaqxaqlaju xka’k’aal chihab’.

10 Ut kik’ulman sa’ li xb’elelaju xka’k’aal chihab’ rawa’b’ejileb’ laj raqol aatin, kikam ajwi’ laj Xiblon, ut laj Korianton ak xikenaq sa’ li ch’och’ sa’ xjayal lix nim li saq’e sa’ jun jukub’, re xk’amb’al li k’a’ru taak’anjelaq reheb’ li tenamit li ak xkoheb’ chaq sa’ li ch’och’ a’an.

11 Jo’kan naq ki’aje’ ru chiru laj Xiblon naq tixq’axtesi li k’a’aq re ru a’an li loq’, rub’elaj xkamik, re li ^aralal laj Helaman, a’an aj Helaman xk’ab’a’, k’ab’a’inb’il jo’ chanru xk’ab’a’ lix yuwa’.

12 K’ehomaq reetal anajwan, chixjunil li k’a’ru ^atz’iib’anb’il li eechaninb’il xb’aan laj Helaman kitz’iib’aman ut kitaqlaman sa’ xyanqeb’ li ralal xk’ajoleb’ li winq chiru chixjunil li ch’och’, ka’aj b’an wi’ naq ink’a’ kitaqlaman li jar raqal kixtaqla laj Alma naq ^bink’a’ taaxik.

13 A’b’anan kiteneb’aman xk’uulankil xloq’al li k’a’aq re ru a’an, ut ^akinumsiik chaq xb’aan li jun tasal tenamit re li jun tasal chik; jo’kan naq sa’ li chihab’ a’in, kiq’axtesiman re laj Helaman, rub’elaj xkamik laj Xiblon.

14 Ut kik’ulman ajwi’ sa’ li chihab’ a’in naq wankeb’ junjunq li ke’risi chaq rib’ li xikenaqeb’ rik’ineb’ laj Lamanita, ut eb’ a’an ke’eek’asiik wi’chik xjosq’il chirixeb’ laj Nefita.

15 Ut jo’kan ajwi’ sa’ li chihab’ ajwi’ a’in ke’kub’e chaq rochb’een jun teep aj pleet nim rajlankileb’ re xpleetinkil lix tenamit laj ^aMoronihah, malaj re xpleetinkil lix teep aj pleet laj Moronihah, sa’ li ke’q’axe’ wi’ ru ut ke’sutq’isiik wi’chik chirix sa’ tz’aqal lix ch’och’eb’, ut naab’al li sachk ke’xk’ul.

16 Ut chi jo’kan kiraqe’ li xb’elelaju xka’k’aal chihab’ rawa’b’ejileb’ laj raqol aatin sa’ xb’een lix tenamit laj Nefi.

17 Ut chi jo’kan kiraqe’ resil laj Alma, ut laj Helaman li ralal, jo’ ajwi’ laj Xiblon, a’an li ralal.