1 Ut anajwan kik’ulman naq laj Alma kisutq’i chaq sa’ li ^ach’och’ Gideon, chirix xk’utb’al chiruheb’ li ani wankeb’ Gideon k’iila k’a’aq re ru li ink’a’ naru xtz’iib’ankil, chirix xtuqub’ankil xk’anjelil li iglees, jo’ chanru kixb’aanu chaq chi junxilaj sa’ li ch’och’ Tzarahemla, relik chi yaal, kisutq’i sa’ tz’aqal li rochoch aran Tzarahemla re taahilanq chirix li k’anjel li kixb’aanu chaq.

2 Ut chi jo’kan kiraqe’ li xb’ele chihab’ rawa’b’ejileb’ laj raqol aatin sa’ xb’een lix tenamit laj Nefi.

3 Ut kik’ulman sa’ xtiklajik li xlaje chihab’ rawa’b’ejileb’ laj raqol aatin sa’ xb’een lix tenamit laj Nefi, naq laj Alma ki’el chaq aran ut kixchap lix b’e aran sa’ li ch’och’ Melek, chi junpak’al li ^anima’ Sidon sa’ rokeb’ saq’e, sa’ xjayal li rokeb’ saq’e chixk’atq lix nub’aal li yamyookil ch’och’.

4 Ut ki’ok chixtzolb’aleb’ li tenamit sa’ li ch’och’ Melek jo’ chanru lix ^asantil k’anjelil li Dios, li kib’oqe’ wi’ chaq, ut ki’ok chixtzolb’aleb’ li tenamit chiru chixjunil li ch’och’ Melek.

5 Ut kik’ulman naq eb’ li tenamit ke’chal chaq rik’in, chiru chixjunil lix nub’aal li ch’och’ li wan sa’ li jun pak’alil wan wi’ li yamyookil ch’och’. Ut ke’kub’e xha’ sa’ chixjunil li ch’och’;

6 Jo’kan naq chirix xchoyb’al lix k’anjel aran Melek ki’el chaq aran, ut xko’o oxib’ kutan xb’eenik chirix li ch’och’ Melek sa’ xnim li saq’e; ut kiwulak sa’ jun li tenamit Ammonihah nayeeman re.

7 Anajwan eb’ lix tenamit laj Nefi k’aynaqeb’ chixk’eeb’al xk’ab’a’ lix ch’och’eb’, ut eb’ lix tenamit, ut lix k’aleb’aaleb’, relik chi yaal, chixjunileb’ lix kok’ k’aleb’aaleb’, jo’ chanru xk’ab’a’ li ani xb’een wa ki’eechanink reheb’; ut jo’kan kiwan rik’in li ch’och’ Ammonihah.

8 Ut kik’ulman naq chirix naq kiwulak laj Alma sa’ li tenamit Ammonihah ki’ok chixjultikankil li raatin li Dios chiruheb’.

9 Anajwan laj Satanas k’a’jo’ naq kiru chaq ^achixchapb’al xch’ooleb’ li wankeb’ sa’ li tenamit Ammonihah; jo’kan naq eb’ a’an ink’a’ ke’raj ab’ink chiru li raatin laj Alma.

10 A’b’anan laj Alma ^akixtawasi rib’ chi naab’al sa’ li musiq’ej, ut ^bkixyal xmetz’ew rik’in li Dios chi ^ctijok rik’in nimla metz’ew, re naq a’an tixhoy lix Musiq’ sa’ xb’eeneb’ li ani wankeb’ sa’ li tenamit; re ajwi’ naq tixkanab’ naq taaruuq tixkub’siheb’ xha’ choq’ re li jalb’a-k’a’uxlej.

11 A’b’anan eb’ a’an ke’xkawob’resi li raameb’, ut ke’xye re: K’e reetal, naqanaw naq laa’at aj Alma; ut naqanaw naq laa’at taqenaqil aj tij sa’ xb’een li iglees li kaxaqab’ sa’ naab’al paay re li ch’och’, jo’ chanru li na’leb’ kanab’anb’il eere; ut laa’o moko reho ta laa iglees, ut ink’a’ naqapaab’ xkomon li na’leb’ a’an li maak’a’ xyaalal.

12 Ut anajwan naqanaw naq rik’in naq moko reho ta laa iglees, naqanaw naq laa’at maak’a’ aawankil sa’ qab’een; ut laa’at xaq’axtesi li raqleb’aal aatin chiru laj ^aNefihah; jo’kan naq maawa’at xb’eenil aj raqol aatin sa’ qab’een.

13 Anajwan chirix naq ke’xye a’in li tenamit, ut ke’xwech’ rix chixjunil li raatin, ut ke’xhob’, ut ke’xchuub’a, ut ke’xb’aanu naq taa’isiiq chaq sa’ xtenamiteb’, a’an ki’el chaq aran ut kixchap xb’e sa’ xjayal li tenamit Aaron xk’ab’a’.

14 Ut kik’ulman, naq yoo chi b’eek aran, chi aalob’resinb’il xch’ool rik’in rahil ch’oolejil, ut yoo chi b’eek chiru naab’al li ^arahilal ut xyot’b’al li raam, xb’aan xmaa’usilaleb’ li ani wankeb’ sa’ li tenamit Ammonihah, naq aalob’resinb’il xch’ool laj Alma chi jo’kan rik’in rahil ch’oolejil, k’ehomaq reetal kik’ulman naq jun lix ^banjel li Qaawa’ kixk’ut rib’ chiru, ut kixye:

15 Osob’tesinb’ilat, at Alma, jo’kan ut, taqsi aajolom ut chisaho’q aach’ool, xb’aan naq k’a’jo’ rajb’al naq taasaho’q aach’ool, xb’aan naq tiikat xatwan chixpaab’ankil lix taqlahom li Dios chalen chaq sa’ li hoonal naq xak’ul xb’een wa jun esil rik’in a’an. K’e reetal, laa’in li ^akinq’axtesi aawe.

16 Ut k’e reetal, taqlanb’ilin re aataqlankil naq tatsutq’iiq sa’ li tenamit Ammonihah, ut tatjultikanq wi’chik aatin chiruheb’ li wankeb’ sa’ li tenamit; relik chi yaal, jultikan chiruheb’. Relik chi yaal, ye reheb’, wi ink’a’ te’xjal xk’a’uxl, li Qaawa’ Dios ^atixsacheb’.

17 Xb’aan naq neke’xtzol sa’ li hoonal a’in chan ru naq taaruuq te’xsach li ach’ab’aak wan wi’ aatenamit, (xb’aan naq jo’kan naxye li Qaawa’) ut rik’in a’an taaq’etmanq li k’uub’anb’il aatin, ut li raqb’a-aatin, ut li taqlahom li kixk’e re lix tenamit.

18 Anajwan kik’ulman naq chirix naq laj Alma kixk’ul li esil rik’in lix anjel li Qaawa’, sa’ junpaat kisutq’i sa’ li ch’och’ Ammonihah. Ut ki’ok sa’ li tenamit chiru jalan chik li b’e, relik chi yaal, chiru li b’e li wan sa’ xtz’e li saq’e sa’ li tenamit Ammonihah.

19 Ut naq ki’ok sa’ li tenamit yoo xtz’okajik, ut re jun winq kixye: Ma taak’e k’a’ruhaq re jun xtuulanil moos li Dios re taawa’aq?

20 Ut li winq kixye re: Laa’in jun aj Nefita, ut ninnaw naq laa’at jun xsantil profeet li Dios, xb’aan naq laa’at li winq li kixye we jun li ^aanjel sa’ jun k’utb’esinb’il matk’: Laa’at taak’ul. Jo’kan ut, yo’o chiwix sa’ wochoch ut tink’e aawe xkomon intzakemq; ut ninnaw naq tatwanq jo’ osob’tesink choq’ we laa’in ut li wochoch.

21 Ut kik’ulman naq li winq kixk’ul a’an sa’ rochoch; ut li winq aj ^aAmulek xk’ab’a’, ut kixk’am chaq li wa ut li tib’ ut kixk’e chiru laj Alma.

22 Ut kik’ulman naq laj Alma kixtzeka li wa ut kinujak; ut ^akirosob’tesi laj Amulek ut li rochoch, ut kib’antioxin chiru li Dios.

23 Ut chirix naq kiwa’ak ut kinujak kixye re laj Amulek: Laa’in laj Alma, ut laa’in ^ataqenaqil aj tij sa’ xb’een lix iglees li Dios chiru chixjunil li ch’och’.

24 Ut k’e reetal, b’oqb’ilin chixjultikankil li raatin li Dios sa’ xyanq chixjunil li tenamit a’in, jo’ chanru li musiq’ej re k’utb’esink ut profeetil aatin; ut kinwan sa’ li ch’och’ a’in ut ink’a’ ke’raj ink’ulb’al, ^akine’risi chaq b’an ut ok raj we chixkanab’ankil chiwix li ch’och’ a’in chi junajwa.

25 A’b’anan k’e reetal, xintaqlaak naq tinsutq’iiq wi’chik ut tin’aatinaq jo’ profeet chiru li tenamit a’in, relik chi yaal, ut re tinch’olob’ li yaal chiruheb’ chirix lix maa’usilaleb’.

26 Ut anajwan, Amulek, rik’in naq xak’e intzakemq ut xinaak’ul sa’ laa wochoch, osob’tesinb’ilat, xb’aan naq yoo chaq intz’okajik, xb’aan naq xinkuy insa’ chiru k’iila kutan.

27 Ut laj Alma kikana k’iila kutan rik’in laj Amulek rub’elaj naq ki’ok chi jultikank aatin chiru li tenamit.

28 Ut kik’ulman naq eb’ li tenamit q’axal wi’chik ke’niman sa’ xmaa’usilaleb’.

29 Ut kichal li aatin rik’in laj Alma, ut kixye: Ayu, ut ye ajwi’ re laj Amulek inmoos, ayu ut aatinanqex jo’ profeet chiru li tenamit a’in, ut cheye—^aChejal eek’a’uxl, xb’aan naq jo’ka’in naxye li Qaawa’, wi ink’a’ teejal eek’a’uxl laa’in tinwula’ani li tenamit a’in sa’ injosq’il; relik chi yaal, moko tinsutq’isi ta xnimal injosq’il.

30 Ut laj Alma xko’o, ut jo’kan ajwi’ laj Amulek, sa’ xyanqeb’ li tenamit, re xch’olob’ankil li raatin li Dios chiruheb’; ut ke’nujak rik’in li Santil Musiq’ej.

31 Ut eb’ a’an wan ^awankilal k’eeb’il reheb’, jo’kan naq ink’a’ ke’ru chi tz’ape’k sa’ tz’aptz’ookil jul; chi moko kiru ani chi winq chi kamsink reheb’; a’b’anan ink’a’ ke’xk’anjela lix ^bwankilaleb’ toj reetal naq ke’b’ak’e’ rik’in b’ak’leb’ ut ke’tz’ape’ sa’ tz’alam.

32 Ut kik’ulman naq xkoheb’ ut ke’ok chi jultikank aatin ut chi aatinak jo’ profeet chiruheb’ li tenamit, jo’ chanru li musiq’ej ut li wankilal li kixk’e chaq li Qaawa’ reheb’.