1 Anajwan kik’ulman naq chirix naq laj Amulek kixk’e xraqik li aatin a’in, ke’risi rib’ rik’in li ch’utch’uukil tenamit ut kole’nume’q junpak’al sa’ li ch’och’ Jerxon.

2 Relik chi yaal, ut li rela’ li komon, chirix naq ke’xjultika li aatin chiruheb’ laj Tzoramita, kole’nume’q ajwi’ junpak’al sa’ li ch’och’ Jerxon.

3 Ut kik’ulman naq chirix naq li jun raqal reheb’ laj Tzoramita li na’nookeb’ ru ke’xk’uub’ xna’leb’ sa’ komonil chirix li aatin li kijultikaman chaq chiruheb’, ke’chal xjosq’il xb’aan li aatin, xb’aan naq naxsach ^axk’anjeleb’, jo’kan naq ink’a’ ke’raj ab’ink chiru li aatin.

4 Ut ke’xtaqla xch’utub’ankil chiru chixjunil li ch’och’ chixjunileb’ li tenamit, ut ke’xsik’ xna’leb’eb’ chirix li aatin li kiyeeman chaq.

5 Anajwan eb’ lix taqlanel ut laj tij ut lix tzoloneleb’ ink’a’ ke’xk’e chixnaw li tenamit chirix li rajomeb’, jo’kan naq sa’ muqmu ke’xtaw xyaalal lix k’oxlahomeb’ chixjunil li tenamit.

6 Ut kik’ulman naq chirix naq ke’xtaw xyaalal lix k’oxlahomeb’ chixjunil li tenamit, eb’ li neke’wulak chiru li aatin yeeb’il chaq xb’aan laj Alma ut eb’ lix komon ke’isiik chaq sa’ li ch’och’; ut k’iheb’ a’an, ut kole’nume’q ajwi’ junpak’al sa’ li ch’och’ Jerxon.

7 Ut kik’ulman naq laj Alma ut eb’ lix komon ke’k’anjelak chiruheb’.

8 Anajwan eb’ lix tenamiteb’ laj Tzoramita ke’chal xjosq’il rik’in lix tenamit laj Ammon li wankeb’ chaq Jerxon, ut li xb’eenil aj taqlanel reheb’ laj Tzoramita, rik’in naq a’an jun winq q’axal aj maak, kixtaqla xyeeb’al reheb’ lix tenamit laj Ammon naq che’risi chaq sa’ xch’och’eb’ chixjunileb’ li chalenaqeb’ chaq rik’ineb’ toj sa’ xch’och’eb’ a’an.

9 Ut k’iila rahilal kixyeechi’i xb’aanunkil reheb’. Anajwan ut eb’ lix tenamit laj Ammon ink’a’ ke’xxuwa ru li raatineb’, jo’kan naq ink’a’ ke’risiheb’ chaq; ke’xk’uleb’ b’an chixjunil li neb’a’ reheb’ laj Tzoramita li ke’nume’ chaq rik’ineb’; ut ^ake’xch’olaniheb’, ut ke’xk’e raq’eb’, ut ke’xk’e li ch’och’ reheb’ choq’ reechanihomeb’; ut ke’k’ehok reheb’ jo’ chanru li ajb’il xb’aaneb’.

10 Anajwan a’in kireek’asiheb’ laj Tzoramita chi josq’o’k rik’in lix tenamit laj Ammon, ut ke’ok chixjunajinkil rib’eb’ rik’ineb’ laj Lamanita, ut chireek’asinkileb’ ajwi’ a’an chi josq’o’k rik’ineb’.

11 Ut chi jo’kan eb’ laj Tzoramita ut eb’ laj Lamanita ke’ok chixkawresinkil rib’ chi pleetik rik’in lix tenamit laj Ammon, ut rik’ineb’ ajwi’ laj Nefita.

12 Ut chi jo’kan kiraqe’ li xwuqlaju chihab’ rawa’b’ejileb’ laj raqol aatin sa’ xb’een lix tenamit laj Nefi.

13 Ut eb’ lix tenamit laj Ammon ke’el chaq sa’ li ch’och’ Jerxon, ut kole’nume’q junpak’al sa’ li ch’och’ Melek, ut ke’xk’e na’ajej sa’ li ch’och’ Jerxon choq’ reheb’ li teep aj pleet reheb’ laj Nefita, re te’ruuq chixyalb’al ru rik’ineb’ li teep aj pleet reheb’ laj Lamanita ut li teep aj pleet reheb’ laj Tzoramita; ut chi jo’kan kitikla jun li pleet ke’wan wi’ laj Lamanita rik’ineb’ laj Nefita, sa’ li xwaqxaqlaju chihab’ rawa’b’ejileb’ laj raqol aatin; ut moqon ^ataak’ehe’q resil lix pleetihomeb’.

14 Ut laj Alma, ut laj Ammon, ut eb’ lix komoneb’, ut jo’kan ajwi’ xkab’ichaleb’ li ralal laj Alma ke’sutq’i sa’ li ch’och’ Tzarahemla, chirix wank choq’ k’anjeleb’aal sa’ ruq’ li Dios re xk’amb’al ^anaab’al reheb’ laj Tzoramita sa’ li jalb’a-k’a’uxlej; ut jo’ k’ihaleb’ li ke’k’ame’ sa’ li jalb’a-k’a’uxlej ke’alinasiik chaq sa’ xch’och’eb’; a’ut wan li ch’och’ k’eeb’il choq’ reechanihomeb’ sa’ li ch’och’ Jerxon, ut ke’xchap li k’anjeleb’aal re pleet re xkolb’al rib’eb’, ut li rixaqileb’, ut lix kok’aleb’, ut lix ch’och’eb’.

15 Anajwan laj Alma, rik’in naq ra xch’ool xb’aan xmaa’usilal lix tenamit; relik chi yaal, xb’aan li pleet, ut li hoyok kik’, ut li wech’ok-ib’ li kiwan sa’ xyanqeb’, ut chirix wank chixch’olob’ankil li aatin, malaj chirix xtaqlankil xch’olob’ankil li aatin, sa’ xyanqeb’ chixjunil li ani wankeb’ sa’ li junjunq chi tenamit; ut rik’in rilb’al naq li raameb’ li tenamit ke’ok chi kawuk, ut naq ke’ok chi ^ach’a’ajko’k xch’ooleb’ xb’aan xkawil li aatin, kiraho’ xch’ool chi numtajenaq.

16 Jo’kan ut, kixtaqla xch’utub’ankileb’ li ralal, re tixk’e ^axchaq’rab’inkil chixjunjunqaleb’, li junjunq xjunes, chirix li k’a’aq re ru re tiikilal. Ut wan qik’in resil lix taqlahom, li kixk’e reheb’ jo’ chanru li esil kixtz’iib’a a’an.