1 Cherab’i lix yaab’ xkux li Jesukristo, laj Tojol eerix, li Xnimal ru Laa’inin, li tojb’il wi’ rix lee maak xb’aan li ruq’ aj uxtaan;

2 Li taach’utub’anq re lix tenamit jo’ chanru ajwi’ jun xan kaxlan naxch’utub’eb’ lix kok’ kaxlan rub’el xxik’, jo’ k’ihaleb’ ajwi’ li te’ab’inq chiru lix yaab’ inkux ut te’xtuulanob’resi rib’ chiwu, ut te’xpatz’ ink’ab’a’ rik’in tijok chi anchaleb’ xmetz’ew.

3 K’ehomaq reetal, chi yaal, chi yaal, ninye eere, naq sa’ li hoonal a’in kuyb’il lee maak, jo’kan naq nekek’ul li k’a’aq re ru a’in, a’b’anan chijultiko’q eere naq mexmaakob’ chik, maare anchal taachalq rahilal sa’ eeb’een.

4 Chi yaal ninye eere naq sik’b’il chaq eeru sa’ li ruchich’och’ re xch’olob’ankil lin evangelio rik’in xyaab’ li saho’k ch’oolej, jo’ rik’in xyaab’ xkux li trompeet.

5 Waklesihomaq eech’ool ut chisaho’q sa’ eech’ool, xb’aan naq laa’in wankin sa’ eeyi, ut laa’in aj aatinanel cherix chiru li Yuwa’b’ej; ut a’an xchaab’ilal li rajom xch’ool xk’eeb’al eere li awa’b’ejihom.

6 Ut, jo’ tz’iib’anb’il—Yalaq k’a’ru teetz’aama rik’in paab’aal, chi wankex sa’ junajil chi tijok jo’ chanru lin taqlahom, a’an teek’ul.

7 Ut b’oqb’ilex re xk’eeb’al chi uxmank lix ch’utub’ankileb’ li sik’b’ileb’ ru inb’aan; xb’aan naq eb’ li sik’b’ileb’ ru inb’aan neke’rab’i lix yaab’ inkux ut ink’a’ neke’xkawob’resi li raameb’;

8 Jo’kan naq elenaq chaq li aatin chi taqlanb’il xb’aan li Yuwa’b’ej naq te’ch’utub’amanq sa’ jun chi na’ajej chiru lix b’een li ch’och’ a’in, re xkawresinkil lix ch’ooleb’, ut re te’kawresimanq sa’ chixjunil li k’a’aq re ru choq’ re li kutan naq taataqlamanq li rahilal ut li sache’k-u sa’ xb’eeneb’ laj maak.

9 Xb’aan naq ak taahaye’q li hoonal ut taanach’oq chaq li kutan naq li ruchich’och’ q’ano’jenaqaq; ut chixjunileb’ laj q’etq’et ut eb’ li neke’b’aanunk re li maa’usilal te’wanq chanchan li roq waj; ut laa’in teb’ink’at, chan li Qaawa’ reheb’ li Teepal, re naq maak’a’aq li maa’usilal sa’ xb’een li ruchich’och’;

10 Xb’aan naq ak taahaye’q li hoonal, ut li k’a’ru yeeb’il chaq xb’aaneb’ lin apostol taatz’aqloq ru; xb’aan naq jo’ chanru ke’xye jo’kan taak’ulmanq;

11 Xb’aan naq laa’in tink’utb’esi wib’ chalen chaq sa’ choxa rik’in wankilal ut nimla loq’alil, wochb’eenaqeb’ chixjunil li teep aj aran, ut sa’ tiikilal tinwanq rik’ineb’ li winq sa’ ruchich’och’ chiru jun mil chihab’, ut eb’ laj maak moko te’wanq ta chi xaqxo.

12 Ut jo’kan wi’chik, chi yaal, chi yaal, ninye eere, ut xikenaq sa’ jun kawil taqlanb’il aatin, xb’aan li rajom li Yuwa’b’ej, naq eb’ lin apostol, li Kab’laju li ke’wan wik’in sa’ lin k’anjel aran Jerusalen, te’xaqliiq sa’ lin nim uq’ sa’ xkutankil lin k’ulunik sa’ jun xaqal li xam, chi tiqtooqeb’ rik’in b’aatal re tiikilal, chi wanq koroon sa’ xb’eeneb’ xjolom, sa’ loq’alil, jo’ chanru ajwi’ naq wankin laa’in, re xraqb’al aatin chirix chixjunil lix junkab’al laj Israel, jo’ k’ihaleb’ ajwi’ li ke’rahok we ut ke’xpaab’eb’ lin taqlahom, ut maa’ani chik.

13 Xb’aan naq taayaab’asimanq jun trompeet, najtaq xyaab’ ut kawaq, chanchan ajwi’ sa’ xb’een li Tzuul Sinai, ut taahiikanq chixjunil li ruchich’och’, ut te’elq chaq—relik chi yaal, eb’ li kamenaq li ke’kam chi weheb’, re te’xk’ul jun koroon re tiikilal, ut re te’tiqib’amanq, jo’ chanru ajwi’ laa’in, re te’wanq wik’in, re naq junajaqo.

14 A’ut k’ehomaq reetal, ninye eere naq rub’elaj naq taachalq li xnimal ru kutan a’in li saq’e taaq’ojyino’q ru, ut li po taakik’o’q ru, ut eb’ li chahim te’t’anje’q chaq sa’ choxa, ut te’wanq eetalil q’axal ninq wi’chik sa’ choxa taqe’q ut sa’ li ruchich’och’ taq’a;

15 Ut taawanq yaab’ak ut ayaynak sa’ xyanqeb’ lix teepaleb’ li winq;

16 Ut taawanq jun nimla saqb’ach, taqlanb’il chaq re xsachb’aleb’ li awimq sa’ ruchich’och’.

17 Ut taak’ulmanq, xb’aan lix maa’usilal li ruchich’och’, naq tink’e li eeqajunk sa’ xb’eeneb’ laj maak, xb’aan naq ink’a’ te’xjal xk’a’uxl; xb’aan naq nujenaq li sek’ re li xik’ eek’anb’il inb’aan; xb’aan naq k’ehomaq reetal, lin kik’el ink’a’ tixch’ajob’resiheb’ wi ink’a’ nikine’rab’i.

18 Jo’kan ut, laa’in li Qaawa’ Dios tintaqlaheb’ li raxyaat chiru lix b’een li ch’och’, li te’chapoq reheb’ li wankeb’ chi sa’, ut te’xtiw lix tib’eleb’, ut te’xk’e li motzo’ chi chalk sa’ xb’eeneb’;

19 Ut te’chape’q li ru’ujeb’ li raq’ re naq ink’a’ te’aatinaq re inmaa’usilankil; ut lix tib’eleb’ taat’ane’q chiruheb’ chaq lix b’aqel, ut lix sa’eb’ li ru sa’eb’ chaq xna’aj;

20 Ut taak’ulmanq naq lix xulel li k’iche’ ut li xik’anel xul rub’el choxa te’xk’uxiheb’ chaq.

21 Ut li nimla tz’eqb’eetal iglees, a’an li ixq aj yumb’eet re chixjunil li ruchich’och’, taa’uq’e’q xb’aan li xam aj sachonel, a’ yaal jo’ chanru yeeb’il xb’aan xtz’uumal re laj Esekiel li profeet, li ki’aatinak chirix li k’a’aq re ru a’in, li maji’ nak’ulman a’ut tento taak’ulmanq ajwi’ chi ch’olch’o, jo’ naq yo’yookin laa’in, xb’aan naq eb’ li tz’eqb’eetalil ink’a’ te’awa’b’ejinq.

22 Ut jo’kan wi’chik, chi yaal, chi yaal, ninye eere naq jo’q’e taaraqe’q li jun mil chihab’, ut eb’ li winq te’ok wi’chik chixsachb’al xyaalal lix Dios, chirix a’an yal jarub’aq kutan chik tinkuy li ruchich’och’;

23 Toja’ ut naq taachalq li roso’jik, li choxa ut li ruchich’och’ te’sache’q ru ut te’oso’q, ut taawanq jun li ak’ choxa ut jun li ak’ ruchich’och’.

24 Xb’aan naq chixjunil li k’a’aq re ru q’eel taa’oso’q, ut taa’ak’ob’resimanq chixjunil li k’a’aq re ru, li choxa jo’ ajwi’ li ruchich’och’, ut chixjunil lix tz’aqalil ru, li winq jo’ ajwi’ li xul, li xik’anel xul rub’el choxa, ut lix karil li palaw;

25 Ut yal ta junaq rismal jolomej, malaj junaq k’ajil ink’a’ taasachq, xb’aan naq a’an xyiib’ahom li wuq’.

26 A’ut k’ehomaq reetal, chi yaal ninye eere, chi toj maji’aq taa’oso’q li ruchich’och’, laj Miguel, lin taqenaqil anjel, tixyaab’asi lix trompeet, toja’ ut naq te’ajq ru chixjunileb’ li kamenaq, xb’aan naq te’teeliiq lix muqleb’aaleb’, ut te’elq chaq—relik chi yaal, chixjunileb’ ajwi’.

27 Ut li tiikeb’ xch’ool te’ch’utub’aaq sa’ lin nim uq’ choq’ re li junelik yu’am; ut eb’ laj maak sa’ lin tz’e uq’, tinxutaanaq chireechaninkileb’ chiru li Yuwa’b’ej.

28 Jo’kan naq tinye reheb’—Elenqex wik’in, ex majewanb’ilex, toj sa’ li xam li junelik nakana, kawresinb’il choq’ re laj tza ut eb’ lix anjel.

29 Ut anajwan, k’ehomaq reetal, ninye eere, maajun wa kinch’olob’ rik’in tz’aqal xtz’uumal we naq te’sutq’iiq chaq, xb’aan naq b’ar wankin laa’in ink’a’ neke’ru chi chalk, xb’aan naq moko wan ta wankilal rik’ineb’.

30 A’ut chijultiko’q eere naq moko k’eeb’il ta chixjunil lin raqb’a-aatin reheb’ li winq; ut jo’ xikenaq chaq li aatin sa’ xtz’uumal we, jo’kan ajwi’ taatz’aqloq ru, re naq li xb’eenil taawanq sa’ roso’jik, ut li wan sa’ roso’jik taawanq choq’ xb’eenil sa’ chixjunil li k’a’aq re ru li b’arwan kinyo’ob’tesi rik’in li raatin lin wankilal, a’an lix wankilal lin Musiq’.

31 Xb’aan naq rik’in lix wankilal lin Musiq’ keb’inyo’ob’tesi; relik chi yaal, chixjunil li k’a’aq re ru re li musiq’ej jo’ ajwi’ re li yu’am a’in.

32 Xb’een wa re li musiq’ej, xkab’ re li yu’am a’in, a’an xtiklajik lin k’anjel; ut jo’kan wi’chik, xb’een wa re li yu’am a’in, ut xkab’ re li musiq’ej, a’an roso’jik lin k’anjel—

33 Nekexwaatina re texruuq chixtawb’al ru a’ yaal jo’ li ak eere; a’b’anan choq’ we laa’in lin k’anjel maak’a’ roso’jik, chi moko wan xtiklajik; a’b’an k’eeb’il eere naq texruuq chixtawb’al ru, xb’aan naq xetz’aama chiwu ut wankex sa’ aatin.

34 Jo’kan ut, chi yaal ninye eere naq choq’ we laa’in, chixjunil li k’a’aq re ru a’an re musiq’ej, ut maajun wa kink’e eere junaq chaq’rab’ li re ta li yu’am a’in; chi moko re junaq winq, chi moko eb’ li ralal xk’ajoleb’ li winq, chi moko laj Adan, lee yuwa’, li kinyo’ob’tesi chaq.

35 K’ehomaq reetal, kink’e re a’an naq taawanq choq’ aj b’aanunel xjunes rib’, ut kink’e taqlahom re, a’b’an maajun taqlahom re li yu’am a’in kink’e re, xb’aan naq re musiq’ej lin taqlahom, maawa’eb’ re ruchich’och’ chi moko re li yu’am a’in, chi moko re li tz’ejwalej chi moko re li atawanb’il.

36 Ut kik’ulman naq laj Adan, chi aalenb’il xb’aan laj tza—xb’aan naq, k’ehomaq reetal, laj tza kiwan rub’elaj laj Adan, xb’aan naq a’an kixpo’resi xch’ool wik’in, ut kixye, K’e we laa loq’al, a’an lin wankilal; ut jo’kan ajwi’ jun rox jachal reheb’ lix teepal li choxa kixjalb’ehi chaq wik’in xb’aaneb’ lix taql xch’ool;

37 Ut ke’tz’eqe’ taq’a, ut chi jo’kan kichal laj tza ut eb’ lix anjel;

38 Ut k’ehomaq reetal, wan jun li na’ajej kawresinb’il choq’ reheb’ chalen chaq sa’ xtiklajik, ut a’ na’ajej a’an li xb’alb’a.

39 Ut tento taa’uxq naq laj tza taaraaleheb’ li ralal xk’ajoleb’ li winq, malaj ut ink’a’ raj te’ruuq chi wank choq’ aj b’aanunel xjuneseb’ rib’; xb’aan naq wi ta maajo’q’e taawanq li k’a rik’ineb’, ink’a’ raj te’ruuq chixnawb’al ru li ki’—

40 Jo’kan ut, kik’ulman naq laj tza kiraale laj Adan, ut a’an kixyal li ru che’ li xyehe’ naq ink’a’ taak’uxmanq, ut kixq’et li taqlahom, sa’ li ki’ok wi’ rub’el xwankil li rajom laj tza, xb’aan naq kixq’axtesi rib’ chiru li aaleek.

41 Jo’kan ut, laa’in, li Qaawa’ Dios, kintaqla naq taa’isiiq chaq sa’ li Awimq Eden, chiru chaq li wilob’aal, xb’aan li q’etok aatin kixb’aanu, sa’ li ki’ok wi’ chi kamenaq sa’ musiq’ejil, a’an li xb’een kamk, a’an ajwi’ li kamk li taawanq choq’ xraqikil kamk, a’an re musiq’ej, li taach’olob’amanq sa’ xb’eeneb’ laj maak naq tinye: Elenqex, ex majewanb’ilex.

42 A’ut k’ehomaq reetal, ninye eere, naq laa’in, li Qaawa’ Dios, kink’e re laj Adan ut reheb’ li riyajil, naq ink’a’ te’kamq jo’ chanru li kamk re li yu’am a’in, toj reetal naq laa’in, li Qaawa’ Dios, tintaqlaheb’ li anjel re xch’olob’ankil chiruheb’ li jalb’a-k’a’uxlej ut li tojb’al-ix, xb’aan xpaab’ankil lix k’ab’a’ li Walal Junaj Chirib’il.

43 Ut chi jo’kan laa’in, li Qaawa’ Dios, kiweetali choq’ re li winq lix kutankil lix yalb’al rix—re naq rik’in lix ruchich’och’il kamik taaruuq chi waklesiik chi ink’a’ chik taakamq choq’ re li junelik yu’am, jo’ k’ihaleb’ ajwi’ li te’paab’anq;

44 Ut eb’ li moko neke’paab’an ta, choq’ re li junelikil tojb’a-maak; xb’aan naq ink’a’ neke’ru chi toje’k chaq rix chiru lix t’anikeb’ re musiq’ej, xb’aan naq ink’a’ neke’xjal xk’a’uxl;

45 Xb’aan naq neke’xra li q’ojyin chiru li saqen, ut ink’a’ us lix b’aanuhomeb’, ut neke’xk’ul lix tojb’aleb’ rik’in li ani neke’xk’e xch’ool chi ab’ink chiru.

46 A’b’an k’ehomaq reetal, ninye eere, naq eb’ li kok’al li ka’ch’ineb’ xyu’am tojb’ileb’ rix chalen chaq sa’ xk’ojlajik li ruchich’och’, sa’ xk’ab’a’ li Junaj Yo’lajenaq chiwu.

47 Jo’kan ut, ink’a’ neke’ru chi maakob’k, xb’aan naq moko k’eeb’il ta wankilal re laj Satanas re raalenkileb’ li kok’al toj reetal naq neke’ok chi wank chi teneb’anb’il chiwu;

48 Xb’aan naq k’eeb’il reheb’ jo’ chanru ajwi’ nawaj, jo’ chanru li nasaho’ wi’ inch’ool, re naq teneb’anb’ilaq li xninqal ru na’leb’ sa’ ruq’eb’ lix yuwa’eb’.

49 Ut jo’kan wi’chik, ninye eere, naq ani wan xnawom, ma ink’a’ xintaqla chixjalb’al xk’a’uxl?

50 Ut li ani maak’a’ xtawom ru, nakana wik’in laa’in xb’aanunkil re jo’ chanru tz’iib’anb’il. Ut anajwan maak’a’ chik ninch’olob’ cheru sa’ li hoonal a’in. Amen.