1 Lin moos aj Orson Hyde kib’oqe’, rik’in lix k’ojob’ankil, re tixch’olob’ li evangelio li junelik nakana, rik’in lix Musiq’ li yo’yookil li Dios, chiru li junjunq teepal, ut sa’ li junjunq chi ch’och’, sa’ xch’utameb’ laj maak, sa’eb’ lix ch’utleb’aaleb’, re taana’leb’anq rik’ineb’ ut tixch’olob’ chixjunil li loq’laj hu chiruheb’.

2 Ut k’ehomaq reetal, ut ilomaq, a’in jun k’utb’il na’leb’ choq’ reheb’ chixjunileb’ li k’ojob’anb’ileb’ choq’ re li tijonelil a’in, li ke’xaqab’aak wi’ lix taqlanb’il k’anjeleb’ re te’xik—

3 Ut a’in li k’utb’il na’leb’ choq’ reheb’, naq te’aatinaq jo’ chanru eek’asinb’ileb’ xb’aan li Santil Musiq’ej.

4 Ut yalaq k’a’ru te’xye naq eek’asinb’ileb’ xb’aan li Santil Musiq’ej, a’anaq loq’laj hu, a’anaq li rajom li Dios, a’anaq lix k’oxlahom li Dios, a’anaq li raatin li Dios, a’anaq lix yaab’ xkux li Dios, ut lix wankilal li Dios choq’ re li kolb’a-ib’.

5 K’ehomaq reetal, a’in lix yeechi’ihom li Qaawa’ choq’ eere, ex inmoos.

6 Jo’kan ut, chiwanq xsahil eech’ool, ut mexxuwak, xb’aan naq laa’in, li Qaawa’, wankin eerik’in, ut tinxaqliiq chek’atq; ut laa’ex teech’olob’ inyaalal laa’in, li Jesukristo ajwi’, naq laa’in li Ralal li yo’yookil li Dios, naq kinwan, naq wankin, ut naq toj tinwanq.

7 A’in li raatin li Qaawa’ aawe laa’at, at inmoos Orson Hyde, ut jo’kan ajwi’ re lin moos aj Luke Johnson, ut re lin moos aj Lyman Johnson, ut re lin moos aj William E. McLellin, ut reheb’ chixjunileb’ li xb’eenil re lin iglees li tiikeb’ chi paab’ank—

8 Ayuqex sa’ chixjunil li ruchich’och’, chejultika li evangelio chiru li junjunq li yo’ob’tesinb’il, rik’in k’anjelak sa’ li wankilal li kink’e eere, rik’in kub’sink ha’ sa’ lix k’ab’a’ li Yuwa’b’ej, ut li K’ajolb’ej, ut li Santil Musiq’ej.

9 Ut ani napaab’an ut nakub’e xha’ taakole’q, ut ani ink’a’ napaab’an taak’ehe’q sa’ tojb’a-maak.

10 Ut ani napaab’an taa’osob’tesiiq rik’ineb’ li eetalil li te’taaqenq re, jo’ chanru ajwi’ tz’iib’anb’il.

11 Ut eere laa’ex k’eeb’ilaq xnawb’al li reetalileb’ li kutan, ut eb’ li reetalil lix k’ulunik li Ralal li Winq;

12 Ut jo’ k’ihaleb’ li tixch’olob’ xyaalaleb’ li Yuwa’b’ej, eere laa’ex k’eeb’ilaq li wankilal re xtz’apb’aleb’ chaq choq’ re li junelik yu’am. Amen.

13 Anajwan ut, chirix li k’a’aq chik re ru xkomoneb’ li sumwank ut li taqlahom, a’an a’in—

14 Te’wanq moqon, sa’ li kutan k’oxlanb’il xb’aan li Qaawa’, jalaneb’ chik li obiisp re te’xaqab’amanq choq’ re li iglees, re te’k’anjelaq jo’ chanru li xb’een;

15 Jo’kan ut, a’anaqeb’ taqenaqil aj tij li k’ulub’ejeb’, ut te’xaqab’aaq xb’aan li Xb’eenil Awa’b’ejil re li Tijonelil re Melkisedek, ka’ajwi’ wi tz’aqaleb’ ralal xk’ajol laj Aaron ink’a’.

16 Ut wi tz’aqaleb’ ralal xk’ajol laj Aaron, ak xk’ulub’eb’ xb’aan li chaq’rab’ xk’ulb’al li obiispil, wi a’aneb’ li xb’een yo’lajenaq sa’ xyanqeb’ li ralal laj Aaron;

17 Xb’aan naq li xb’een yo’lajenaq wan jo’ xk’ulub’il li awa’b’ejil sa’ xb’een li tijonelil a’in, ut lix laawil malaj li wankilal k’eeb’il choq’ re a’an.

18 Maajun winq xk’ulub’ xb’aan li chaq’rab’ li opiis a’in, re xk’amb’al xlaawil li tijonelil a’in, ka’ajwi’ wi a’an tz’aqal ralal xk’ajol laj Aaron ut li xb’een alalb’ej.

19 A’b’anan, rik’in naq jun taqenaqil aj tij re li Tijonelil re Melkisedek k’eebil xwankil chi k’anjelank sa’ chixjunil li opiis li kub’enaq wi’chik xwankil, naru nak’anjelank sa’ ropiis li obiisp naq maajun tz’aqal ralal xk’ajol laj Aaron naru natawman, wi b’oqb’il ut xaqab’anb’il ut k’ojob’anb’il choq’ re li wankilal a’in, rub’el ruq’eb’ li Xb’eenil Awa’b’ejil re li Tijonelil re Melkisedek.

20 Ut jun tz’aqal ralal xk’ajol laj Aaron, jo’kan ajwi’, tento taa’eetaliiq xb’aan li Awa’b’ejil a’in, ut taatawmanq chi k’ulub’ej, ut taayule’q ut taak’ojob’amanq rub’el ruq’ li Awa’b’ejil a’in, malaj ut moko kanab’anb’ileb’ ta xb’aan li chaq’rab’ chi k’anjelank sa’ lix tijonelileb’.

21 A’ut, sa’ xk’ab’a’ li aatin taqlanb’il chirix lix k’ulub’eb’ sa’ li tijonelil, li nanumsiman chalen li yuwa’b’ej toj rik’in li alalb’ej, neke’ru chixpatz’b’al lix yulb’aleb’ wi sa’ junaq hoonal neke’ru chixk’utb’al xyaalal lix xe’toonil, malaj ut neke’xnaw xyaalal chi k’utb’esinb’il xb’aan li Qaawa’ rub’el ruq’ li Awa’b’ejil li ak yeeb’il resil.

22 Ut jo’kan wi’chik, maajun obiisp chi moko junaq taqenaqil aj tij li xaqab’anb’ilaq choq’ re li k’anjel a’in taatz’ile’q rix chi moko taak’ehe’q xtojb’al xmaak xb’aan junaq maak xb’aanu, ka’ajwi’ wi taawanq chiru li Xb’eenil Awa’b’ejil re li iglees;

23 Ut a’ yaal jo’ natawe’ chi wank xmaak chiru li Awa’b’ejil a’in, rik’in li ch’olob’anb’il aatin li ink’a’ naru xsachb’al xwankil, taateneb’amanq xtojb’a-maak;

24 Ut wi naxjal xk’a’uxl taakuymanq xmaak, jo’ chanru li sumwank ut li taqlahom re li iglees.

25 Ut jo’kan wi’chik, a’ yaal jo’ naq eb’ li na’b’ej yuwa’b’ej wankeb’ ralal xk’ajol sa’ Sion, malaj sa’ junaq reheb’ li roqechal li k’uub’anb’ileb’, li moko neke’xk’ut ta chiruheb’ li tzol’leb’ re jalb’a-k’a’uxlej, xpaab’ankil li Kristo li Ralal li yo’yookil Dios, ut li kub’iha’ ut li maatan re li Santil Musiq’ej rik’in xk’eeb’al li uq’ej, naq waqxaqib’ chihab’ xyu’ameb’, chiwanq li maak sa’ xb’een xjolomeb’ li na’b’ej yuwa’b’ej.

26 Xb’aan naq a’inaq jun chaq’rab’ choq’ reheb’ li wankeb’ Sion, malaj sa’ junaq reheb’ li roqechal a’an li k’uub’anb’il.

27 Ut te’kub’eeq xha’ li ralal xk’ajoleb’ choq’ re risinkil lix maakeb’ naq waqxaqib’ chihab’ xyu’ameb’, ut te’xk’ul lix k’ehonik li uq’ej.

28 Ut te’xk’ut ajwi’ chiruheb’ li ralal xk’ajol naq te’tijoq, ut naq te’b’eeq chi tiik chiru li Qaawa’.

29 Ut eb’ li wankeb’ Sion te’roxloq’i ajwi’ li hilob’aal kutan re xk’uulankil xsantilal.

30 Ut eb’ li wankeb’ Sion te’jultiko’q ajwi’ reheb’ lix k’anjeleb’, a’ yaal jo’ xaqab’anb’ileb’ chi k’anjelak, chi anchal xxaqxookileb’ xch’ool; xb’aan naq laj q’em taawanq chi jultikanb’il chiru li Qaawa’.

31 Anajwan, laa’in, li Qaawa’, ink’a’ nasaho’ chi tz’aqal inch’ool rik’ineb’ li ani wankeb’ Sion, xb’aan naq wankeb’ laj q’em sa’ xyanqeb’; ut eb’ li ralal xk’ajol yookeb’ ajwi’ chi ninqank sa’ li maa’usilal; ink’a’ ajwi’ neke’xsik’ chi anchaleb’ xch’ool li b’ihomal re junelik q’e kutan; nujenaq b’an lix naq’eb’ ru rik’in rahok eechej.

32 Li k’a’aq re ru a’in tento raj naq ink’a’ taawanq, ut tento taasache’q chaq sa’ xyanqeb’; jo’kan ut, lin moos aj Oliver Cowdery chixk’amaq li aatin a’in toj sa’ li ch’och’ Sion.

33 Ut jun taqlahom nink’e reheb’—naq ani li moko naxb’aanu ta lix tij chiru li Qaawa’ sa’ xkutankil a’an, chiwanq chi jultikanb’il chiru laj raqol aatin re lin tenamit.

34 Li aatin a’in yaal ut paab’ajel; jo’kan ut, meeq’et, chi moko cherisi chaq k’a’ruhaq chi sa’.

35 K’ehomaq reetal, laa’in li Alfa ut li Omega, ut tink’ulunq chi seeb’. Amen.