1 Tazama, hivyo ndivyo asemavyo Bwana Mungu wenu kwenu, Enyi wazee wa kanisa langu, sikilizeni na sikieni, na yapokeeni mapenzi yangu juu yenu.

2 Kwani amini ninawaambia, kuwa nataka kwamba muushinde ulimwengu; kwa hiyo nitakuwa na huruma juu yenu.

3 Wapo watu miongoni mwenu ambao wametenda dhambi; lakini amini ninawaambia, kwa mara hii moja, kwa ajili ya utukufu wangu mwenyewe, na kwa ajili ya wokovu wa nafsi, nimewasamehe dhambi zenu.

4 Nitakuwa mwenye huruma kwenu, kwani nimewapa ufalme.

5 Na funguo za siri za ufalme hazitachukuliwa kutoka kwa mtumishi wangu Joseph Smith, Mdogo, kwa njia niliyoteua, wakati akiwa hai, kadiri yeye atakavyotii ibada zangu.

6 Kuna wale ambao wametafuta kupata sababu za kumshtaki bila sababu;

7 Hata hivyo, yeye ametenda dhambi; lakini amini ninawaambia, Mimi, Bwana, husamehe dhambi kwa wale wenye kuungama dhambi zao mbele zangu na kuomba msamaha, wale ambao hawakutenda dhambi ya mauti.

8 Wanafunzi wangu, katika siku za kale, walitafuta makosa kati yao na wala hawakusameheana katika mioyo yao; na kwa uovu huu walipata mateso na kuadhibiwa vikali.

9 Kwa hiyo, ninawaambia, kwamba mnapaswa kusameheana ninyi kwa ninyi; kwani yule asiyemsamehe ndugu yake makosa yake husimama na hatia mbele za Bwana; kwa kuwa ndani yake imebaki dhambi kubwa.

10 Mimi, Bwana, nitamsamehe yule nitakaye kumsamehe, lakini ninyi mnatakiwa kuwasamehe watu wote.

11 Nanyi mnapaswa kusema mioyoni mwenu—Mungu na ahukumu kati ya mimi na wewe, na akulipe sawasawa na matendo yako.

12 Na yule asiyetubu dhambi zake, na hazikiri, mtamleta mbele ya kanisa, na mtamfanya kama maandiko yanavyowaambia iwe kwa amri au kwa ufunuo.

13 Na hili mtalifanya ili Mungu aweze kutukuzwa—siyo kwa sababu ninyi hamsamehi, hamna huruma, bali kwamba ninyi msiwe na hatia machoni pa sheria, ili msimkosee yeye ambaye ni mtunga sheria wenu—

14 Amini ninasema, kwa sababu hii mtafanya mambo haya.

15 Tazama, Mimi, Bwana, nilikasirishwa na yule aliyekuwa mtumishi wangu Ezra Booth, na pia mtumishi wangu Isaac Morley, kwa kuwa hawakuishika sheria, wala amri;

16 Walitafuta ubaya katika mioyo yao, na Mimi, Bwana, nilimzuia Roho wangu. Walishutumu kwa uovu jambo ambalo ndani yake hapakuwa na uovu; hata hivyo nimemsamehe mtumishi wangu Isaac Morley.

17 Na pia mtumishi wangu Edward Partridge, tazama, ametenda dhambi, na Shetani anatafuta kuangamiza roho yake; lakini wakati mambo haya yatakapokuwa yamejulikana kwao, nao wakatubu uovu wao, watasamehewa.

18 Na sasa, amini ninasema kwamba ninaona ni muhimu kuwa mtumishi wangu Sidney Gilbert, baada ya wiki chache, arejee katika shughuli zake, na kwenye uwakala wake katika nchi ya Sayuni;

19 Na kile alichokiona na kusikia anaweza kuwajulisha wanafunzi wangu, ili wasiangamie. Na ni kwa sababu hii nimeyasema mambo haya.

20 Na tena, ninawaambia, kuwa mtumishi wangu Isaac Morley asijaribiwe kupita awezavyo, na kutoa ushauri potofu utakaowaumiza, nilitoa amri kuwa shamba lake liuzwe.

21 Sitaki mtumishi wangu Frederick G. Williams auze shamba lake, kwani Mimi, Bwana, ninataka kupaimarisha mahali hapa katika nchi ya Kirtland, kwa kipindi cha miaka mitano, kipindi ambacho sitawaangusha waovu, ili kwamba kwa njia hii niweze kuwakomboa baadhi yao.

22 Na baada ya siku hiyo, Mimi, Bwana, sitamshika na hatia yeyote ambaye atakwenda na moyo uliofunguka katika nchi ya Sayuni; kwa kuwa Mimi, Bwana, ninaitaka mioyo ya wanadamu.

23 Tazama, sasa inaitwa leo hadi kuja kwa Mwana wa Mtu, na hakika ni siku ya kujitoa dhabihu, na siku ya watu wangu kulipa zaka; kwani yule ambaye analipa zaka hataunguzwa moto wakati wa kuja kwake.

24 Kwani baada ya leo kwaja kuungua—hii nikiongea kwa jinsi ya Bwana—kwani amini ninasema, kesho wote wenye kiburi na wote watendao uovu watakuwa makapi; na Mimi nitawachoma, kwani Mimi ndimi Bwana wa Majeshi; na sitamwacha yeyote ambaye atabaki katika Babilonia.

25 Kwa hiyo, kama mnaniamini Mimi, mtafanya kazi wakati ingali inaitwa leo.

26 Na siyo vyema kwamba watumishi wangu Newel K. Whitney na Sidney Gilbert, wauze maduka yao na mali zao hapa; kwa kuwa hiyo siyo hekima hadi mabaki ya kanisa, ambayo yamebakia mahali hapa, watakapokwenda katika nchi ya Sayuni.

27 Tazama, inasemekana katika sheria zangu, au umekatazwa, kujiingiza katika deni kwa maadui zako;

28 Lakini tazama, haijasemwa wakati wowote kwamba Bwana hatachukua wakati atakao, na kulipa wakati aonavyo yeye kuwa ni vyema.

29 Kwa hiyo, ninyi mkiwa kama mawakala, mpo katika utumishi wa Bwana; na lolote mfanyalo sawasawa na mapenzi ya Bwana ni kazi ya Bwana.

30 Na amewaweka ninyi kuwahudumia watakatifu wake katika siku hizi za mwisho, ili waweze kujipatia urithi katika nchi ya Sayuni.

31 Na tazama, Mimi, Bwana, ninawatangazia, na maneno yangu ni hakika na hayatakuwa bure, kwamba watapata.

32 Lakini mambo yote lazima yatakuja kutimia katika wakati wake.

33 Kwa hiyo, msichoke kutenda mema, kwa kuwa mnaijenga misingi ya kazi kubwa. Na kutokana na mambo madogo huja yale yaliyo makuu.

34 Tazama, Bwana anahitaji moyo na akili yenye kukubali, na wenye kukubali na kutii watakula mema ya Sayuni katika siku za mwisho.

35 Na waasi watakatiliwa mbali kutoka nchi ya Sayuni, na watapelekwa mbali na hawatairithi nchi.

36 Kwani, amini ninawaambia, kwamba waasi siyo wa damu ya Efraimu, kwa hiyo wataondoshwa.

37 Tazama, Mimi, Bwana, nimelifanya kanisa langu katika siku hizi za mwisho kuwa kama mwamuzi aliyekaa juu ya mlima, au katika mahali pa juu, kuwahukumu mataifa.

38 Kwani itakuwa kwamba wakazi wa Sayuni watahukumu mambo yote yahusuyo Sayuni.

39 Na waongo na wanafiki watadhihirishwa na wao, na wale wasio mitume na manabii watajulikana.

40 Na hata askofu, ambaye ni mwamuzi na washauri wake, ikiwa siyo waaminifu katika usimamizi wao watahukumiwa, na wengine watapandwa badala yao.

41 Kwani, tazama, ninawaambia ninyi kwamba Sayuni itastawi, na utukufu wa Bwana utakuwa juu yake;

42 Naye atakuwa bendera kwa watu, na hapo watakuja kutoka kila taifa chini ya mbingu.

43 Na siku itakuja ambayo mataifa ya dunia yatatetemeka kwa sababu yake, na wataogopa kwa sababu ya wingi wao watishao. Bwana amesema hili. Amina.