Tasal 31
K’utb’esinb’il na’leb’ k’eeb’il rik’in xtz’uumal re laj Jose Smith li Profeet re laj Thomas B. Marsh, Septiembre 1830. Kik’eeman junpaat chirix jun ch’utub’aj-ib’ re li Iglees (chi’ilmanq xtiklajik li tasal 30). Laj Thomas B. Marsh ak kikub’siik xha’ junxilaj sa’ li po a’an, ut kik’ojob’aak choq’ xb’eenil sa’ li Iglees rub’elaj naq kik’eeman li k’utb’esinb’il na’leb’ a’in.
1–6, Laj Thomas B. Marsh nab’oqe’ chixjultikankil li evangelio, ut nak’ehe’ xk’ojob’ankil xch’ool chirix xchaab’ilal lix junkab’al; 7–13, Nak’ehe’ xna’leb’ naq aj kuyunelaq, junelik chitijoq, ut chixtaaqe laj K’ojob’anel Ch’oolej.
1 At walal Thomas, osob’tesinb’ilat xb’aan laa paab’aal chirix lin k’anjel.
2 K’e reetal, wanjenaq xk’ihal aach’a’ajkilal xb’aan laa junkab’al; a’b’anan, laa’in tatwosob’tesi laa’at ut laa junkab’al, relik chi yaal, eb’ laa kok’al; ut taachalq xkutankil naq te’paab’anq ut te’xnaw li yaal, ut te’wanq sa’ junajil aawik’in sa’ lin iglees.
3 Waklesi aawaam ut chisaho’q sa’ aach’ool, xb’aan naq xwulak xhoonal aataqlanb’il k’anjel; ut taahite’q li ru’uj aawaq’, ut taach’olob’ li sahil esilal re nimla sahil ch’oolejil chiru li tasal tenamit a’in.
4 Taach’olob’ li k’a’aq re ru li k’utb’esinb’il chiru lin moos, aj Jose Smith, alalb’ej. Tat-ok chi jultikank aatin chalen sa’ li hoonal a’in, relik chi yaal, chi q’olok sa’ li awimq li ak q’an ru choq’ re k’ate’k.
5 Jo’kan ut, ch’ik laa setleb’ ch’iich’ chi anchal aawaam, ut kuyb’il laa maak, ut taatub’laaq li q’olom chawix, xb’aan naq laj k’anjel xk’ulub’ lix tojb’al. Jo’kan ut, te’wanq xyu’am laa junkab’al.
6 K’e reetal, chi yaal ninye aawe, elen chaq rik’ineb’ yal chiru junjunq kutan, ut ch’olob’ li waatin, ut laa’in tinkawresi jun li na’ajej choq’ reheb’.
7 Relik chi yaal, laa’in tinte xch’ooleb’ li tenamit, ut eb’ a’an tate’xk’ul. Ut tinxaqab’ jun iglees rik’in laa wuq’;
8 Ut laa’at taak’eheb’ xkawilal ut taakawresiheb’ choq’ re li kutan naq te’ch’utub’aaq.
9 Aj kuyunelaqat sa’ li ch’a’ajkilal; maahob’eb’ li neke’hob’ok. Jolomi laa junkab’al sa’ tuulanil, ut xaqxooqat junelik.
10 K’e reetal, ninye aawe naq tatwanq choq’ aj b’anonel choq’ re li iglees, a’b’an moko re ta li ruchich’och’, xb’aan naq eb’ a’an ink’a’ tate’xk’ul.
11 Chap aab’e yalaq b’ar nawaj, ut taak’ehe’q aawe xb’aan laj K’ojob’anel Ch’oolej k’a’ru taab’aanu ut toj b’ar tatxik.
12 Junelik chattijoq, maare anchal tat-ok sa’ li aaleek ut taasachq laa q’ajkamunkil.
13 Tiikaqat chi paab’ank toj sa’ roso’jik, ut il, laa’in wankin aawik’in. Li aatin a’in moko re ta winq chi moko reheb’ li winq; we b’an laa’in, li Jesukristo ajwi’, laj Tojol aawix, xb’aan li rajom li Yuwa’b’ej. Amen.