Tasal 137
Jun k’utb’esinb’il matk’ k’eeb’il re laj Jose Smith li Profeet, sa’ li santil ochoch sa’ Kirtland, Ohio, 21 Enero 1836. Kik’eeman naq ke’k’anjelaman li k’ojob’anb’il k’anjel jo’ kawresink-ib’ re rosob’tesinkil li santil ochoch.
1–6, li Profeet naril laj Alvin li ras sa’ li choxahil awa’b’ejihom; 7–9, Nak’utb’esiman li tzol’leb’ re li kolb’a-ib’ choq’ reheb’ li kamenaq; 10, Chixjunileb’ li kok’al kolb’ileb’ sa’ li choxahil awa’b’ejihom.
1 Kiteeli li choxa sa’ qab’een, ut kiwil lix choxahil awa’b’ejihom li Dios, ut lix loq’al a’an, ma sa’ li tz’ejwalej malaj chi elenaq sa’ li tz’ejwalej ink’a’ naru ninye.
2 Kiwil xq’axalil lix chaq’al ru li okeb’aal li te’ok wi’ laj eechanihom re li awa’b’ejihom a’an, li chanchan sutsuukil raq’ xam;
3 Jo’kan ajwi’ lix k’ojarib’aal li Dios li naxamnak, li k’ojk’o wi’ li Yuwa’b’ej ut li K’ajolb’ej.
4 Kiwil xch’ina-usal li b’e sa’ li awa’b’ejihom a’an, li chanchan tz’akanb’il rik’in tz’aqal ch’iich’ oor.
5 Kiwil li qayuwa’ aj Adan ut laj Abraham; ut lin yuwa’ ut lin na’, laj Alvin li was, li ak najter chaq xwarjik;
6 Ut kisach inch’ool rilb’al chan ru naq kixtaw chaq jun reechanihom sa’ li awa’b’ejihom a’an, rik’in naq a’an ki’el chaq sa’ li yu’am a’in rub’elaj naq li Qaawa’ kixk’e li ruq’ re xch’utub’ankil xkab’ sut Israel, ut ink’a’ kikub’e chaq xha’ choq’ re li risinkil li maak.
7 Jo’ka’in kichal lix yaab’ xkux li Qaawa’ wik’in, kixye: Chixjunileb’ li ke’kam chi maak’a’ xnawomeb’ chirix li evangelio a’in, li ke’xk’ul raj wi ta kanab’anb’ileb’ chi kanaak, te’wanq choq’ aj eechanihom re lix choxahil awa’b’ejihom li Dios;
8 Jo’kan ajwi’ chixjunileb’ li te’kamq chalen anajwan chi maak’a’eb’ xnawom chirix, li ke’xk’ul raj chi anchaleb’ xch’ool, te’wanq choq’ aj eechanihom re li awa’b’ejihom a’an.
9 Xb’aan naq laa’in, li Qaawa’, tinraqoq aatin chirix chixjunileb’ li winq jo’ chanru lix k’anjeleb’, jo’ chanru li rajomeb’ lix ch’ool.
10 Ut kink’e ajwi’ reetal naq chixjunileb’ li kok’al li neke’kam chi maji’ neke’tz’aqlok xchihab’ re te’ruuq chi teneb’aak, kolb’ileb’ sa’ li choxahil awa’b’ejihom re choxa.