យ៉ាកុប 7

សេចក្តីផ្ដើម

យ៉ាកុបបានពឹងផ្អែកទៅលើព្រះអម្ចាស់ និង នៅលើទីបន្ទាល់ដ៏មិនអាចធ្វើឲ្យរង្គោះរង្គើបានរបស់គាត់ដើម្បីយកឈ្នះទៅលើគំនិតខុសឆ្គង និង អំណះអំណាងរបស់សេរេម ជាអ្នកដែលប្រឆាំងនឹងព្រះគ្រីស្ទ ។ គាត់បានទទួលកម្លាំងជាពិសេសមកពីបទពិសោធន៍ពីអតីតកាល ដែលបានពង្រឹងសេចក្ដីជំនឿរបស់គាត់ទៅលើព្រះយេស៊ូវគ្រីស្ទ ។ គាត់ក៏បានពឹងផ្អែកទៅលើការណែនាំមកពីព្រះវិញ្ញាណបរិសុទ្ធ ចំណេះដឹងរបស់គាត់អំពីព្រះគម្ពីរ និង ពាក្យរបស់ព្យាការី និង ទីបន្ទាល់របស់គាត់អំពីព្រះយេស៊ូវគ្រីស្ទ ។ នៅពេលសេរេមបានទាមទារចង់បានទីសម្គាល់មួយដែលបង្ហាញភស្ដុតាងអំពីពាក្យរបស់យ៉ាកុប នោះគាត់ត្រូវបានវាយដោយព្រះ ។ យ៉ាកុបបានបញ្ចប់កំណត់ត្រារបស់គាត់ដោយការពិពណ៌នាអំពីរបៀបដែលសាសន៍នីហ្វៃបានទុកចិត្តទៅលើព្រះអម្ចាស់ នៅពេលពួកគេបានចម្រើនកម្លាំងខ្លួនគេទាស់នឹងពួកសាសន៍លេមិន ។ មុនពេលយ៉ាកុបស្លាប់ គាត់បានបន្ដឲ្យផ្ទាំងតូចនោះទៅដល់កូនប្រុសរបស់គាត់គឺ អេណុស ។

យោបល់សម្រាប់ការបង្រៀន

យ៉ាកុប 7:1–14

យ៉ាកុបពឹងផ្អែកទៅលើព្រះអម្ចាស់ នៅពេលគាត់ជួបនឹងសេរេម ជាអ្នកប្រឆាំងនឹងព្រះគ្រីស្ទ

មុនពេលចាប់ផ្ដើមថ្នាក់ សូមសរសេរនៅលើក្ដារខៀននូវសេចក្ដីថ្លែងការណ៍ខាងក្រោមនេះដោយអែលឌើរ រ៉ូបឺតឌី.ហែល នៃកូរ៉ុមនៃពួកសាវកដប់ពីរនាក់ ( បានដកស្រង់ពី « Christian Courage: The Price of Discipleship »Ensign ឬលីអាហូណាខែ វិច្ឆិកា ឆ្នាំ 2008 ទំព័រ 72 ) ៖

« ការសាកល្បងដ៏អស្ចារ្យមួយនៅក្នុងជីវិតរមែងស្លាប់នេះមក នៅពេលសេចក្ដីជំនឿរបស់យើងនៅមានមន្ទិល ឬ ការរិះគន់នៅឡើយ » ( អែលឌើរ រ៉ូបឺតឌី.ហែល ) ។

សូមឲ្យសិស្សគិតអំពីគ្រាដែលមាននរណាម្នាក់សង្ស័យ ឬ រិះគន់សេចក្ដីជំនឿរបស់ពួកគេ ។ សូមអញ្ជើញពួកគេបីបួននាក់ឲ្យចែកចាយពីរបៀបដែលពួកគេមានអារម្មណ៍ នៅពេលហេតុការណ៍នោះកើតឡើង ។ អ្នកក៏អាចចែកចាយដោយសង្ខេបអំពីបទពិសោធន៍មួយក្នុងជីវិតរបស់អ្នកដែរ ។

សូមអញ្ជើញសិស្សឲ្យចែកចាយពីបទពិសោធន៍

នៅពេលសិស្សចែកចាយពីបទពិសោធន៍ដ៏បំផុសទាំងឡាយ វាអញ្ជើញព្រះវិញ្ញណនៃព្រះអម្ចាស់មកក្នុងថ្នាក់រៀន ។ នៅពេលសិស្សស្ដាប់ពីបទពិសោធន៍ និង ទីបន្ទាល់របស់មិត្តភក្ដិរបស់ពួកគេ នោះទីបន្ទាល់របស់ពួកគេត្រូវបានពង្រឹង ហើយពួកគេរៀនពីរបៀបថ្មីដើម្បីអនុវត្តគោលការណ៍ដំណឹងល្អនានានៅក្នុងជីវិតរបស់ពួកគេ ។ ជាធម្មតា វាគ្រប់គ្រាន់ដើម្បីមានសិស្សពីម្នាក់ទៅបីនាក់ឲ្យចែកចាយបទពិសោធន៍នេះ ។ សូមចៀសវាងការហៅសិស្សពីរបីនាក់ដដែលឲ្យចែកចាយរាល់ថ្ងៃ សូមព្យាយាមឲ្យគ្រប់គ្នាបានចូលរួម ។

សូមពន្យល់ថា យ៉ាកុប 7 ប្រាប់ពីបទពិសោធន៍របស់យ៉ាកុបជាមួយនឹងសេរេម ជាអ្នកប្រឆាំងនឹងព្រះគ្រីស្ទ ។ ( អ្នកអាចពន្យល់ថា អ្នកប្រឆាំងនឹងព្រះគ្រីស្ទម្នាក់គឺជា « នរណាម្នាក់ ឬ អ្វីមួយដែលបន្លំដំណឹងល្អដ៏ពិត ឬ ផែនការសង្គ្រោះ ហើយថាការបើក ឬ ការប្រឆាំងជំទាស់លាក់បាំងទៅនឹងព្រះគ្រីស្ទ » [ Bible Dictionary, “Antichrist” ] ) សេរេមបានទៅរកយ៉ាកុប ដើម្បីផ្ចាញ់ផ្ចាលសេចក្ដីជំនឿរបស់គាត់ ។

សូមអញ្ជើញសិស្សឲ្យអាន យ៉ាកុប 7:1–5 ដោយស្ងាត់ៗ ។ សូមឲ្យពួកគេរក (1) អ្វីដែលសេរេមព្យាយាមធ្វើ និង (២) របៀបដែលគាត់ព្យាយាមសម្រេចគោលដៅរបស់គាត់នោះ ។ ក្រោយពីសិស្សបានអានចប់ហើយ សូមឲ្យពួកគេពិពណ៌នាពីអ្វីដែលពួកគេបានរៀនអំពីសេរេមនោះ ។ អ្នកអាចសួរសំណួរខាងក្រោមខ្លះដើម្បីពង្រីកការពិភាក្សានេះ ៖

តើសេរេមមានឥទ្ធិពលអ្វីខ្លះទៅលើប្រជាជននេះ ?
តើអ្នកឃើញអ្វីខ្លះនៅក្នុង យ៉ាកុប 7:1–5 ដែលរំឭកអ្នកអំពីពេលដែលអ្នកផ្សេងបានសង្ស័យ ឬ រិះគន់សេចក្ដីជំនឿរបស់អ្នក ? ( នៅពេលអ្នកពិភាក្សាសំណួរនេះ អ្នកអាចត្រូវជួយសិស្សឲ្យយល់ថា មិនមែនមនុស្សទាំងអស់ដែលសង្ស័យ ឬ រិះគន់សេចក្ដីជំនឿរបស់យើងមានចិត្តដូចគ្នានឹងសេរេមនោះទេ ។ ខណៈពេលដែលមនុស្សខ្លះដូចជាសេរេម បានចង់បំផ្លាញសេចក្ដីជំនឿដោយចេតនា អ្នកដទៃអាចសង្ស័យពីសេចក្ដីជំនឿរបស់យើង ដោយសារពួកគេឆ្ងល់ ឬ ដោយសារពួកគេត្រូវគេប្រាប់ខុសអំពីជំនឿរបស់យើង ) ។
ហេតុអ្វីបានជាពេលខ្លះវាពិបាកដើម្បីការពារសេចក្ដីជំនឿរបស់យើងទាស់នឹងមនុស្សប្រភេទសេរេមនេះ ?

សូមចម្លងសេចក្ដីយោងនៃព្រះគម្ពីរខាងក្រោម និង សេចក្ដីថ្លែងការណ៍នេះដាក់លើក្ដារខៀន ។ ( ដើម្បីសន្សំពេលវេលា អ្នកអាចថតចម្លងអ្វីៗទាំងអស់នេះដាក់លើក្ដារខៀន មុនពេលចាប់ផ្ដើមថ្នាក់ ។ អ្នកក៏អាចរៀបចំវាជាក្រដាសចែកឲ្យសិស្សផងដែរ )

1. យ៉ាកុប 7:5	ក. ថ្លែងទីបន្ទាល់អំពីព្រះគម្ពីរ និង ពាក្យសម្ដីរបស់ព្យាការី ។
2.យ៉ាកុប 7:8	ខ. ទុកលទ្ធផលនៅក្នុងព្រះហស្ដរបស់ព្រះ ។
3. យ៉ាកុប 7:10–11	គ. ទុកចិត្តលើការណែនាំ និង កម្លាំងមកពីព្រះវិញ្ញាណបរិសុទ្ធ ។
4. យ៉ាកុប 7:12	ឃ. នឹកចាំពីបទពិសោធន៍កាលពីអតីតកាលដែលបានពង្រឹងសេចក្ដីជំនឿរបស់គាត់ ។
5. យ៉ាកុប 7:13–14	ង. ចែកចាយទីបន្ទាល់ដែលគាត់បានទទួលតាមរយៈព្រះវិញ្ញាណបរិសុទ្ធ ។

សូមពន្យល់ថា ខគម្ពីរនៅក្នុងបញ្ជីនេះពិពណ៌នាអំពីចម្លើយរបស់យ៉ាកុប នៅពេលសេរេមបានផ្ចាញ់ផ្ចាលជំនឿរបស់យើង ។ សេចក្ដីថ្លែងការណ៍នៅលើខាងស្ដាំ តំណាងឲ្យចម្លើយរបស់យ៉ាកុប ប៉ុន្ដែវាដាក់មិនតាមលំដាប់ ហើយត្រូវតែផ្គូផ្គងទៅតាមខគម្ពីរដែលស្របគ្នា ។ សូមអញ្ជើញសិស្សបីបួននាក់ឲ្យប្ដូរវេនគ្នាអានឮៗពីក្នុង យ៉ាកុប 7:5–14 ។ នៅពេលពួកគេអាន សូមឲ្យពួកគេឈប់បន្ទាប់ពីអានវគ្គមួយៗដែលសរសេរនៅលើក្ដារខៀនចប់ហើយ ។ សូមឲ្យសិស្សផ្គូផ្គងវគ្គនីមួយៗទៅនឹងប្រយោគដែលត្រូវគ្នារបស់វា ។ អ្នកអាចអញ្ជើញសិស្សម្នាក់ឲ្យឡើងមកកាន់ក្ដារខៀន ហើយគូសបន្ទាត់ពីខាងសេចក្ដីយោងព្រះគម្ពីរ ទៅកាន់ប្រយោគដែលត្រូវគ្នានោះ ។ ( ចម្លើយ ៖ 1-ឃ ; 2-គ ; 3-ក ; 4-ង ; 5-ខ )

នៅពេលសិស្សបញ្ចប់សកម្មភាពផ្គូផ្គងនេះហើយ សូមសួរ ៖

តើគោលការណ៍អ្វីដែលអ្នកបានឃើញថា ត្រូវបានបង្រៀននៅក្នុងខគម្ពីរដែលយើងទើបតែបានអាននេះ ?

ប្រសិនបើគ្មាននរណាម្នាក់សួរវាទេ សូមធ្វើប្រាកដថាសិស្សយល់ថា នៅពេលយើងពឹងផ្អែកទៅលើព្រះអម្ចាស់ នោះយើងអានយកឈ្នះលើឧបសគ្គចំពោះសេចក្ដីជំនឿរបស់យើង ។ ( អ្នកអាចសរសេរគោលការណ៍នេះនៅលើក្ដារខៀន )

សូមពន្យល់ថា ចម្លើយរបស់យ៉ាកុបចំពោះសេរេម ផ្ដល់ជាឧទាហរណ៍មួយដល់យើងដើម្បីធ្វើតាម នៅពេលយើងឆ្លើយតបទៅនឹងអ្នកណាដែលសួរ ឬ រិះគន់សេចក្ដីជំនឿរបស់យើង ។

សំណួរតាមដានដែលសរសេរនៅខាងក្រោមនេះ ធ្វើឡើងដើម្បីជួយសិស្សឲ្យគិតបានជ្រៅជ្រះជាងនេះអំពីអ្វីដែលយ៉ាកុបបានធ្វើដើម្បីទុកចិត្តទៅលើព្រះអម្ចាស់ ។ ការឆ្លើយទៅនឹងសំណួរទាំងនេះ នឹងផ្ដល់ឱកាសឲ្យសិស្សដើម្បីបង្ហាញ និង ថ្លែងទីបន្ទាល់ពីរបៀបដែលសកម្មភាពដូចគ្នានេះបានជួយពួកគេ នៅពេលអ្នកផ្សេងបានផ្ចាញ់ផ្ចាលសេចក្ដីជំនឿរបស់ពួកគេ ។ វាក៏នឹងជួយពួកគេឲ្យរៀនពីរបៀបដើម្បីឆ្លើយតបដោយសមរម្យទៅនឹងឧបសគ្គចំពោះសេចក្ដីជំនឿរបស់ពួកគេនាពេលអនាគត ។ ដោយសារមានសំណួរច្រើនទៀតនៅខាងក្រោម ដែលអ្នកមិនអាចមានពេលគ្រប់គ្រាន់ដើម្បីសួរនៅក្នុងថ្នាក់បាន សូមជ្រើសរើសតែសំណួរពីរបីប៉ុណ្ណោះដើម្បីសួរនៅក្នុងការពិភាក្សារបស់អ្នក ។ នៅពេលអ្នកធ្វើដូច្នេះ សូមស្វែងរកការណែនាំពីព្រះវិញ្ញាណបរិសុទ្ធ ហើយចាំពីបទពិសោធន៍ដែលសិស្សបានចែកចាយនៅពេលចាប់ផ្ដើមថ្នាក់ដំបូង ។ អ្នកក៏អាចគិតពីការសួរសិស្សអំពីអ្វីដែលសកម្មភាពរបស់យ៉ាកុបណាមួយ ដែលពួកគេចង់ពិភាក្សាបន្ថែមទៀតនោះ ។

សូមសួរសំណួរតាមដាន

នៅពេលអ្នកសួរសំណួរតាមដាន វាផ្ដល់ឲ្យសិស្សនូវឱកាសមួយដើម្បីបង្ហាញពីអ្វីដែលពួកគេបានរៀន ពង្រីកការយល់ដឹងរបស់ពួកគេបន្ថែមទៀត ហើយគិតអំពីរបៀបដែលសេចក្ដីពិតនៃដំណឹងល្អទាំងឡាយទាក់ទងទៅនឹងជីវិតរបស់ពួកគេ ។ សូមប្រយ័ត្នកុំប្រញាប់អានតាមបញ្ជីសំណួរតាមដានដ៏វែងឡើយ ។ ជាធម្មតា វាប្រសើរជាងដើម្បីសួរពីរបីសំណួរ ហើយឲ្យពេលវេលាសិស្សឆ្លើយតបដោយបានគិតពិចារណានោះ ។

តើមានអ្វីកើតឡើងដល់យ៉ាកុប នៅក្នុងអតីតកាលដែលធ្វើឲ្យសេចក្ដីជំនឿរបស់គាត់មិនអាចរង្គោះរង្គើបាន ? ( សូមមើល យ៉ាកុប 7:5 )
តើអ្វីជាបទពិសោធន៍ខ្លះៗ ដែលបានពង្រឹងដល់សេចក្ដីជំនឿរបស់អ្នក ? ( អ្នកអាចផ្ដល់ពេលដល់សិស្សឲ្យសញ្ជឹងគិតអំពីសំណួរនេះ មុនពេលសុំពួកគេឲ្យឆ្លើយ ។ សូមធានាពួកគេថា ពួកគេមិនចាំបាច់ចែកចាយបទពិសោធន៍ណាដែលផ្ទាល់ខ្លួនពេកនោះទេ ) តើការនឹកចាំពីបទពិសោធន៍ទាំងនេះ អាចជួយអ្នកនៅពេលនរណាម្នាក់សង្ស័យ ឬ រិះគន់សេចក្ដីជំនឿរបស់អ្នកដោយរបៀបណា ?
តើនៅពេលណាដែលព្រះវិញ្ញាណបរិសុទ្ធបានជួយអ្នកឲ្យឆ្លើយនឹងសំណួរ ឬ ការរិះគន់អំពីសេចក្ដីជំនឿរបស់អ្នកនោះ ? ( សូមមើល យ៉ាកុប 7:8 )
តើទម្លាប់ប្រចាំថ្ងៃមួយនៃការសិក្សាព្រះគម្ពីរ និង ពាក្យសម្ដីនៃព្យាការីថ្ងៃចុងក្រោយនោះ អាចជួយអ្នកនៅពេលអ្នកផ្សេងសួរ ឬ រិះគន់សេចក្ដីជំនឿរបស់អ្នកដោយរបៀបណា ? ( សូមមើល យ៉ាកុប 7:10–11 ។ )
តើនៅពេលណាដែលអ្នកបានចែកចាយទីបន្ទាល់របស់អ្នកជាមួយនឹងនរណាម្នាក់ ដែលមានសំណួរ ឬ ការរិះគន់សេចក្ដីជំនឿរបស់អ្នកនោះ ? ( សូមមើល យ៉ាកុប 7:12 ) តើអ្វីគឺជាលទ្ធផល ?
នៅពេលសេរេមបានទាមទាររកទីសម្គាល់មួយ ហេតុអ្វីបានជាវាជាការឆ្លាតវៃចំពោះយ៉ាកុបដែលទុកលទ្ធផលឲ្យនៅក្នុងព្រះហស្ដរបស់ព្រះអម្ចាស់ ជាជាងការស្វែងរកបង្ហាញភស្ដុតាងពីភាពពេញលេញនៃសេចក្ដីពិតនៃទីបន្ទាល់ផ្ទាល់គាត់នោះ ? ( សូមមើល យ៉ាកុប 7:14 ) ។ តើវាបានជួយអ្នកឲ្យដឹងថា វាមិនចាំបាច់ចំពោះអ្នកដើម្បីបង្ហាញភស្ដុតាងអំពីភាពពេញលេញនៃសេចក្ដីពិតនៃទីបន្ទាល់របស់អ្នកទៅដល់អស់អ្នកណាដែលបានផ្ចាញ់ផ្ចាលសេចក្ដីជំនឿរបស់អ្នកដោយរបៀបណា ?

យ៉ាកុប 7:15–27

ក្រោយពីសេរេមត្រូវបានវាយឲ្យគហើយ គាត់បានសារភាពពីអំពើបាបរបស់និង គាត់ ថ្លែងទីបន្ទាល់អំពីសេចក្ដីពិត ហើយបន្ទាប់មកក៏បានស្លាប់ទៅ ដោយដឹកនាំក្រុមពួកសាសន៍នីហ្វៃឲ្យត្រឡប់ទៅរកព្រះអម្ចាស់វិញ

សូមអានសេចក្ដីថ្លែងការណ៍ខាងក្រោមដោយអែលឌើរ រ៉ូបឺតឌី.ហែល ៖

« រយៈពេលជាច្រើនឆ្នាំមក យើងដឹងថា ឧបសគ្គចំពោះសេចក្ដីជំនឿរបស់យើងគឺមិនមែនថ្មីនោះទេ ហើយវាក៏មិនងាយផុតទៅភ្លាមៗដែរ ។ ប៉ុន្ដែ សិស្សពិតរបស់ព្រះគ្រីស្ទ ឃើញពីឱកាសនៅក្នុងចំណោមការប្រឆាំងជំទាស់នោះ ។ …

« … សំណាងល្អ ព្រះអម្ចាស់ដឹងពីដួងចិត្តនៃអ្នកចោទប្រកាន់យើង និង របៀបដែលយើងអាចឆ្លើយតបទៅកាន់ពួកគេវិញដោយមានប្រសិទ្ធភាពបំផុត ។ នៅពេលសិស្សដ៏ពិតស្វែងរកការណែនាំមកពីព្រះវិញ្ញាណ នោះពួកគេទទួលបានការបំផុសគំនិតដែលទាក់ទងនឹងរឿងប្រឈមនីមួយៗ ។ហើយនៅគ្រប់ការប្រឈមនីមួយៗ សិស្សដ៏ពិតឆ្លើយតបតាមរបៀបដែលអញ្ជើញព្រះវិញ្ញាណនៃព្រះអម្ចាស់ » ( « Christian Courage: The Price of Discipleship » ទំព័រ 72–73 ; អក្សរេ្រេតជាឯកសារដើម ) ។

តើអ្នកគិតថា « ឃើញពីឱកាសនៅក្នុងចំណោមការប្រឆាំងជំទាស់នោះ » មានន័យយ៉ាងណាដែរ ? ( នៅពេលសិស្សឆ្លើយតបទៅនឹងសំណួរនេះ សូមជួយពួកគេឲ្យយល់ថា អំពើល្អអាចផ្ដល់លទ្ធផល នៅពេលយើងឆ្លើយតបទៅនឹងឧបសគ្គរបស់យើងតាមរបៀបផ្សេងៗ ដែលអញ្ជើញព្រះវិញ្ញាណនៃព្រះអម្ចាស់ )

សូមបែងចែកសិស្សទៅជាដៃគូ ។ សូមឲ្យដៃគូនីមួយៗអាន យ៉ាកុប 7:15–23 ដោយរកមើលអ្វីៗដែលល្អដែលជាលទ្ធផលមកពីរឿងប្រឈមរបស់យ៉ាកុបជាមួយនឹងសេរេម ។ ក្រោយពីសិស្សអានចប់ហើយ សូមអញ្ជើញសិស្សពីរបីនាក់ឲ្យពន្យល់ពីអ្វីដែលពួកគេបានរកឃើញ ។ សូមគិតអំពីការប្រើសំណួរខាងក្រោមខ្លះៗ ដើម្បីជួយសិស្សឲ្យវិភាគខគម្ពីរទាំងនេះ ៖

តើភស្ដុតាងអ្វីដែលអ្នកឃើញថា យ៉ាកុបបានសង្ឃឹមថារឿងប្រឈមរបស់គាត់ជាមួយនឹងសេរេមនឹងជួយដល់អ្នកដទៃនោះ ? ( សូមមើល យ៉ាកុប 7:22 ។ សូមជួយសិស្សឲ្យយល់ថា យ៉ាកុបបានអធិស្ឋានសម្រាប់ក្រុមមនុស្សសាសន៍នីហ្វៃដែលបានធ្វើជាសាក្សីអំពីការសារភាពរបស់សេរេម និង ការស្លាប់របស់គាត់ ) ។
យោងតាម យ៉ាកុប 7:23 តើរឿងប្រឈមរបស់យ៉ាកុបជាមួយនឹងសេរេម ទីបំផុតនឹងមានឥទ្ធិពលលើក្រុមមនុស្សនោះយ៉ាងដូចម្ដេចដែរ ?
តើសេចក្ដីពិតអ្វីដែលយើងអាចរៀនពីលទ្ធផលនៃការប្រឈមរបស់យ៉ាកុបជាមួយនឹងសេរេមនេះ ? ( សិស្សអាចរកបានចម្លើយជាច្រើនចំពោះសំណួរនេះ ។ អ្នកខ្លះអាចស្នើពីគោលការណ៍ដែលបានសរសេរនៅខាងក្រោមនេះ ) ។

ព្យាការីទាំងអស់ថ្លែងទីបន្ទាល់អំពីព្រះយេស៊ូវគ្រីស្ទ ។
នៅពេលយើងឆ្លើយតបទៅនឹងសំណួរ ឬ ការរិះគន់នានាអំពីសេចក្ដីជំនឿរបស់យើងតាមរបៀបដែលអាចអញ្ជើញព្រះវិញ្ញាណ នោះយើងអាចជួយអ្នកដទៃឲ្យបែរទៅរកព្រះអង្គម្ចាស់បាន ។
ព្យាការីជួយយើងឲ្យស្គាល់ និង យកឈ្នះលើការបោកបញ្ឆោតរបស់សាតាំង ។
អស់អ្នកដែលបះបោរទាស់នឹងព្រះ ហើយផ្សព្វផ្សាយយ៉ាងសកម្មប្រឆាំងនឹងសេចក្ដីពិត នឹងជួបនូវផលវិបាកយ៉ាងធ្ងន់ធ្ងរមកពីព្រះអម្ចាស់ ។
ការសិក្សាព្រះគម្ពីរ នឹងជួយយើងឲ្យចៀសវាងពីការត្រូវគេបោកបញ្ឆោតបាន ។

នៅពេលសិស្សរកឃើញគោលការណ៍ដូចជាអ្វីដែលបានសរសេរនៅខាងលើនេះ សូមគិតពីការសួរសំណួរតាមដានដើម្បីជួយពួកគេឲ្យអនុវត្តគោលការណ៍ទាំងនេះនៅក្នុងជីវិតរបស់ពួកគេ ។

តើការរស់នៅតាមគោលការណ៍នេះ អាចជួយអ្នកដោយរបៀបណា ?
តើការដឹងពីគោលការណ៍នេះ អាចជួយអ្នកឲ្យជួយអ្នកដទៃដោយរបៀបណា ?
តើអ្នកអាចអនុវត្តគោលការណ៍នេះនៅក្នុងជីវិតរបស់អ្នកដោយរបៀបណា ?

សូមអញ្ជើញសិស្សឲ្យឆ្លើយតបទៅនឹងសំណួរខាងក្រោមនេះ នៅក្នុងកំណត់ហេតុសិក្សាព្រះគម្ពីររបស់ពួកគេ ៖

តើរឿងមួយដែលអ្នកនឹងចាប់ផ្ដើមធ្វើ ( ឬ បន្ដធ្វើ ) ដើម្បីជួយអ្នកឲ្យរៀបចំសម្រាប់ពេលមួយ នៅពេលនរណាម្នាក់ផ្ចាញ់ផ្ចាលសេចក្ដីជំនឿរបស់អ្នកនោះ គឺជាអ្វី ?

សូមចែកចាយទីបន្ទាល់របស់អ្នកថា យើងអាចយកឈ្នះដោយជោគជ័យលើឧបសគ្គចំពោះសេចក្ដីជំនឿរបស់យើង នៅពេលយើងធ្វើតាមគំរូរបស់យ៉ាកុបក្នុងការទុកចិត្តលើព្រះអម្ចាស់ ។

ការរំឭកក្នុងគម្ពីរ យ៉ាកុប

សូមយកពេលខ្លះៗជួយសិស្សឲ្យរំឭកពីសៀវភៅយ៉ាកុបនេះ ។ សូមឲ្យពួកគេគិតអំពីអ្វីដែលពួកគេបានរៀនពីសៀវភៅនេះ ទាំងនៅក្នុងថ្នាក់សិក្ខាសាលា និង នៅក្នុងការសិក្សាព្រះគម្ពីរផ្ទាល់ខ្លួនរបស់ពួកគេ ។ ប្រសិនបើចាំបាច់ សូមអញ្ជើញពួកគេឲ្យមើលត្រួសៗលើជំពូកទាំងប្រាំពីរនៃសៀវភៅយ៉ាកុប ដើម្បីជួយឲ្យពួកគេចងចាំ ។ សូមឲ្យពួកគេរៀបចំចែកចាយអ្វីមួយអំពីយ៉ាកុប ឬ ការសរសេររបស់គាត់ដែលបានធ្វើឲ្យពួកគេចាប់អារម្មណ៍ ។ អ្នកអាចរំឭកពួកគេថា យ៉ាកុបបានកើតនៅក្នុងទីរហោស្ថាន នៅក្នុងដែនដីបរិបូរណ៍ ( នៅជិតសមុទ្រក្រហម ) ហើយគាត់បានស្លាប់នៅក្នុងដែនដីនីហ្វៃ ។ គាត់ក៏ត្រូវបានប្រទានពរដោយលីហៃផងដែរ ( សូមមើល នីហ្វៃទី2 2:1–4 ) ហើយគាត់បានឃើញព្រះអង្គសង្គ្រោះ ( សូមមើល នីហ្វៃទី2 11:3 ) ។ បងប្រុសរបស់គាត់ នីហ្វៃ បានបញ្ចូលទេសនកថារបស់គាត់ខ្លះនៅលើផ្ទាំងនីហ្វៃតូច ( សូមមើល នីហ្វៃទី2 6–10 ) ។ ក្រោយពីមានពេលគ្រប់គ្រាន់ហើយ សូមអញ្ជើញសិស្សបីបួននាក់ឲ្យចែកចាយនូវគំនិត និង អារម្មណ៍របស់ពួកគេ ។ សូមគិតពីការចែកចាយទីបន្ទាល់របស់អ្នកអំពីរបៀបដែលគំរូ និង ការបង្រៀនរបស់យ៉ាកុបបានប្រទានពរដល់ជីវិតរបស់អ្នក ។

វិចារណកថា និង ព័ត៌មានសាច់រឿង

យ៉ាកុប 7:5 ។ « ហើយគាត់បានសង្ឃឹមថានឹងធ្វើឲ្យខ្ញុំបាត់បង់សេចក្ដីជំនឿ »

ប្រធាន ឌៀថើរអេស្វ.អុជដូហ្វ នៃគណៈប្រធានទីមួយបានផ្ដល់ការទូន្មានដែលអាចជួយយើងឲ្យដឹងពីអ្វីដែលត្រូវធ្វើនៅពេលមានសំណួរ ការបារម្ភ ឬ ព្រឹត្តិការណ៍គំរាមថានឹងធ្វើឲ្យយើងបាត់បង់សេចក្ដីជំនឿ ៖

« ចុះការសង្ស័យ និង សំណួរវិញ ? តើអ្នកឃើញថា ដំណឹងល្អនេះពិតដោយរបៀបណា ? តើវាមិនអីទេឬដែលមានសំណួរអំពីសាសនាចក្រ ឬ គោលលទ្ធិរបស់សាសនាចក្រនោះ ? មិត្តភក្ដិវ័យក្មេងជាទីស្រឡាញ់របស់ខ្ញុំអើយ យើងគឺជាមនុស្សដែលសួរសំណួរ ដោយសារយើងដឹងថាសំណួរនាំទៅរកសេចក្ដីពិត ។ នោះគឺជារបៀបដែលសាសនាចក្រនេះចាប់ផ្ដើមឡើង--មកពីយុវជនម្នាក់ដែលមានសំណួរនោះ ។ តាមពិត ខ្ញុំមិនប្រាកដពីរបៀបដែលមនុស្សម្នាក់អានរកឃើញសេចក្ដីពិត ដោយគ្មានការសួរសំណួរនោះទេ ។ នៅក្នុងព្រះគម្ពីរ អ្នកនឹងកម្ររកឃើញវិវរណៈមួយដែលមក ដោយមិនបានឆ្លើយតបទៅនឹងសំណួរណាស់ ។ នៅពេលណាដែលមានសំណួរមួយលេចឡើង ហើយយ៉ូសែប ស្ម៊ីធ មិនបានប្រាកដពីចម្លើយនោះ គាត់បានទៅរកព្រះអម្ចាស់ ហើយលទ្ធផលគឺជាវិវរណៈដ៏អស្ចារ្យនៅក្នុងគោលលទ្ធិ និង សេចក្ដីសញ្ញា ។ ជាញឹកញាប់ ចំណេះដឹងដែលយ៉ូសែប បានទទួលនោះបានលាតសន្ធឹងឆ្ងាយលើសពីសំណួរដើមទៅទៀត ។ នេះគឺដោយសារមិនត្រឹមតែព្រះអម្ចាស់អាចឆ្លើយនឹងសំណួរដែលយើងសួរប៉ុណ្ណោះទេ ប៉ុន្ដែអ្វីដែលសំខាន់ជាងនេះទៅទៀតនោះគឺ ទ្រង់អាចផ្ដល់ចម្លើយឲ្យយើងចំពោះសំណួរទាំងឡាយដែលយើងគួរតែបានសួរនោះ ។ ចូរយើងស្ដាប់តាមចម្លើយទាំងនោះ ។

« ការខិតខំរបស់អ្នកផ្សព្វផ្សាយសាសនានៃសាសនាចក្រនេះ គឺមាននៅលើអ្នករៀនថ្មីដ៏ស្មោះត្រង់ ដែលសួរសំណួរដោយអស់ពីចិត្ត ។ ការសួរគឺជាទីកំណើតនៃទីបន្ទាល់ ។ អ្នកខ្លះអាចមានអារម្មណ៍អៀនខ្មាស់ ឬ ថាមិនស័ក្ដិសម ដោយសារពួកគេបានរកសំណួរដែលទាក់ទងទៅនឹងដំណឹងល្អ ប៉ុន្ដែពួកគេមិនចាំបាច់មានអារម្មណ៍បែបនោះទេ ។ ការសួរសំណួរ មិនមែនជាសញ្ញានៃភាពទន់ខ្សោយនោះទេ វាគឺជាប្រផ្នូលមួយនៃការរីកចម្រើន ។

« ព្រះបានបញ្ជាយើងឲ្យស្វែងរកចម្លើយចំពោះសំណួររបស់យើង ( សូមមើល យ៉ាកុប ១: ៥ –៦ ) ហើយសួរតែអ្វីដែលយើងស្វែងរក ‹ ដោយចិត្តស្មោះស គឺដោយស្មោះអស់ពីចិត្ត ដោយមានសេចក្ដីជំនឿជឿដល់ព្រះគ្រីស្ទ › ( មរ៉ូណៃ ១០:៤ ) ។ នៅពេលយើងធ្វើដូច្នោះ សេចក្ដីពិតនៃការណ៍ទាំងអស់អាចត្រូវបានបង្ហាញដល់យើង ‹ ដោយព្រះចេស្ដានៃព្រះវិញ្ញាណបរិសុទ្ធ › (មរ៉ូណៃ ១០:៥) ។

« ចូរកុំខ្លាចឡើយ សូមសួរសំណួរ ។ ចូរឆ្ងល់ ប៉ុន្ដែកុំសង្ស័យឡើយ ! សូមកាន់ខ្ជាប់ទៅនឹងសេចក្ដីជំនឿ និង ពន្លឺដែលអ្នកបានទទួលរួចហើយនោះជានិច្ច ។ ដោយសារយើងឃើញភាពមិនឥតខ្ចោះនៅក្នុងជីវិតរមែងស្លាប់នេះ នោះមិនមែនអ្វីៗទាំងអស់នឹងយល់នាពេលឥឡូវនេះទេ ។ តាមពិតទៅ ខ្ញុំគិតថា ប្រសិនបើអ្វីៗនឹងធ្វើឲ្យយើងយល់ វានឹងជាភស្ដុតាងថា ទាំងអស់ត្រូវបានប្រឌិតឡើងដោយគំនិតខាងសាច់ឈាមមួយ ។ សូមចាំថា ព្រះបានមានព្រះបន្ទូលថា ៖

« គំនិតយើងមិនមែនដូចជាគំនិតរបស់ឯងរាល់គ្នាទេ ឯផ្លូវរបស់ឯងរាល់គ្នាក៏មិនមែនជាផ្លូវរបស់យើងដែរ ។

« ដ្បិតដែលផ្ទៃមេឃខ្ពស់ជាងផែនដីយ៉ាងណា នោះអស់ទាំងផ្លូវរបស់អញ ខ្ពស់ជាងផ្លូវរបស់ឯងហើយគំនិតរបស់អញ ក៏ខ្ពស់ជាងគំនិតរបស់ឯងរាល់គ្នាយ៉ាងនោះដែរ » ( អេសាយ 55:8–9

« ហេតុដូច្នោះហើយ អ្នកដឹងថា គោលបំណងនៃជីវិតរមែងស្លាប់មួយគឺដើម្បីក្លាយកាន់តែដូចជាព្រះវរបិតាសួគ៌របស់អ្នកនៅក្នុងគំនិតរបស់អ្នក និង ផ្លូវរបស់អ្នក ។ ដោយបានឃើញពីទស្សនវិស័យនេះ ការស្វែងរកចម្លើយចំពោះសំណួររបស់អ្នកអាចនាំអ្នកឲ្យកាន់តែខិតទៅជិតព្រះ ដោយការពង្រឹងទីបន្ទាល់របស់អ្នក ជាជាងបោះបង់វាចោល ។ វាពិតថា ‹ សេចក្ដីជំនឿគឺពុំមែនជា … ដំរិះដ៏ឥតខ្ចោះនោះទេ › ( អាលម៉ា 32:21 ) ប៉ុន្ដែនៅពេលអ្នកអនុវត្តសេចក្ដីជំនឿរបស់អ្នក ដោយការអនុវត្តគោលការណ៍ទាំងឡាយនៃដំណឹងល្អរាល់ថ្ងៃទោះស្ថិតក្រោមកាលៈទេសៈណាក៏ដោយនោះ អ្នកនឹងភ្លក់នូវផ្លែឈើដ៏ផ្អែមនៃដំណឹងល្អ ហើយតាមរយៈផ្លែនេះ អ្នកនឹងដឹងពីសេចក្ដីពិតរបស់វា ( សូមមើល ម៉ាថាយ :16–20; យ៉ូហាន 7:17; អាលម៉ា 32:41–43 ) » ( « The Reflection in the Water » [ ការប្រជុំស៊ីអ៊ីអេស សម្រាប់មជ្ឈិមវ័យនៅលីវ ថ្ងៃទី 1 ខែ វិច្ឆិកា ឆ្នាំ 2009 ] ) ។

ដើម្បីជួយសិស្សឲ្យឆ្លើយនឹងសំណួរ ឬ ការរិះគន់ពីសេចក្ដីជំនឿរបស់ពួកគេ អ្នកអាចសុំឲ្យពួកគេមើលធនធានខាងក្រោមនេះ ៖

រ៉ូបឺតឌី.ហែល « Christian Courage: The Price of Discipleship » Ensign ឬ Liahona ខែ វិច្ឆិកា ឆ្នាំ 2008 ទំព័រ 72–75 ។

នៅក្នុងសុន្ទរកថានៃសន្និសីទទូទៅនេះ អែលឌើរ ហែល បានបង្រៀនអំពីរបៀបដែលយើងអាចឆ្លើយតបទៅនឹងការរិះគន់ ឬ ការដាក់ទោសដោយសេចក្ដីក្លាហាន ការអត់ឱន និង សប្បុរសធម៌ ។
ពិតចំពោះសេចក្តីជំនឿ ៖ ឯកសារយោងដំណឹងល្អ ( ឆ្នាំ 2004 ) ។

សៀវភៅនេះមានបញ្ជីរៀបតាមលំដាប់អក្សរនៃប្រធានបទ និង វិចារណកថាដំណឹងល្អ ។ គណៈប្រធានទីមួយបានសរសេរថា គោលបំណងមួយនៃសៀវភៅនេះគឺ ដើម្បីជួយសមាជិកនៃសាសនាចក្រ « ឆ្លើយនឹងសំណួរអំពីសាសនាចក្រ » ( ពិតចំពោះសេចក្ដីជំនឿ ទំព័រ 1 ) ។
www.lds.org/study/topics

គេហទំព័រជាផ្លូវការរបស់សាសនាចក្រ មានបញ្ជីរៀបតាមលំដាប់អក្សរនៃប្រធានបទ និង វិចារណកថាដំណឹងល្អ ជាមួយនឹងវិបសាយភ្ជាប់ទៅនឹងសម្ភារសិក្សា និង សន្និសីទ អត្ថបទ និង សេចក្ដីថ្លែងការណ៍នានាដែលទាក់ទងគ្នាដោយអ្នកដឹកនាំសាសនាចក្រទាំងឡាយ ។