មេរៀនទី 47
យ៉ាកុប 5:52–77; យ៉ាកុប 6
សេចក្តីផ្ដើម
នៅក្នុងមេរៀនមុន សិស្សបានចាប់ផ្ដើមសិក្សាការប្រៀបធៀបរបស់ស៊ីណូសអំពីដើមអូលីវស្រុក និង ដើមអូលីវព្រៃ ។ នៅក្នុងមេរៀននេះ ពួកគេនឹងសិក្សាអំពីផ្នែកចុងក្រោយនៃការប្រៀបធៀប ដែលម្ចាស់ចំការបានធ្វើការជាមួយនឹងអ្នកបម្រើរបស់គាត់ជាលើកចុងក្រោយដើម្បីជួយដើមឈើនោះឲ្យមានផ្លែល្អ ។ ពួកគេក៏នឹងសិក្សាអំពី យ៉ាកុប 6 ដែលយ៉ាកុបបាននិយាយអំពីការប្រៀបធៀបនោះ និង ដាស់តឿនប្រជាជនរបស់គាត់ឲ្យប្រែចិត្ត ។
យោបល់សម្រាប់ការបង្រៀន
យ៉ាកុប 5:52–60
នៅក្នុងការប្រៀបធៀបអំពីដើមអូលីវស្រុក និង ដើមអូលីវព្រៃនេះ ម្ចាស់ចំការបានសង្គ្រោះដើមឈើនោះ ហើយបានជួយវាឲ្យមានផ្លែល្អ
មុនពេលសិស្សមកដល់ សូមគូសរូបភាពដើមឈើបីដើមនៅលើក្ដារខៀន ។
សូមរំឭកសិស្សថា នៅក្នុងមេរៀនមុន ពួកគេបានចាប់ផ្ដើមសិក្សាការប្រៀបធៀបរបស់ស៊ីណូសអំពីដើមអូលីវស្រុក និង ដើមអូលីវព្រៃនៅក្នុង យ៉ាកុប 5 ។ នៅចុងបញ្ចប់នៃមេរៀននោះ ដើមឈើទាំងអស់នៅក្នុងចំការបាននាំមកនូវផ្លែអាក្រក់ ( សូមមើល យ៉ាកុប 5:30–42 ) ។ នេះតំណាងឲ្យការក្បត់សាសនាដ៏ធំ ។
ដើម្បីរំឭកពីមេរៀនមុន សូមបែងចែកសិស្សក្នុងថ្នាក់ជាដៃគូ ។ សូមឲ្យដៃគូនីមួយៗពិភាក្សាគ្នាពីចម្លើយរបស់ពួកគេចំពោះប្រយោគដែលមិនពេញលេញខាងក្រោម ( អ្នកអាចសរសេរប្រយោគទាំងនេះនៅលើក្ដារខៀន ) ៖
-
ម្ចាស់ចំការតំណាងឲ្យ …
-
ការខិតខំរបស់ម្ចាស់ចំការ ដើម្បីសង្គ្រោះដើមឈើរបស់គាត់តំណាងឲ្យ …
-
រឿងមួយដែលខ្ញុំបានរៀនអំពីព្រះយេស៊ូវគ្រីស្ទមកពីពាក្យ ឬ សកម្មភាពរបស់ម្ចាស់ចំការនោះគឺ …
-
ក្រោយពីដើមឈើទាំងអស់ និង ផ្លែក្នុងចំការនោះបានប្រែទៅជារលួយ នោះម្ចាស់ចំការសម្រេចចិត្តថា …
ក្រោយពីសិស្សបានពិភាក្សាពីប្រយោគទាំងនេះជាដៃគូហើយ សូមសង្ខេបខ្លីៗអំពីចម្លើយរបស់ពួកគេក្នុងថ្នាក់ទាំងអស់គ្នា ។ នៅពេលសិស្សរាយការណ៍អំពីចម្លើយរបស់ពួកគេពីប្រយោគពីរដំបូងនោះ សូមប្រាកដថាវាមានភាពច្បាស់លាស់ថា ម្ចាស់ចំការតំណាងឲ្យព្រះយេស៊ូវគ្រីស្ទ ហើយថាការខិតខំរបស់គាត់ដើម្បីសង្គ្រោះដើមឈើរបស់គាត់តំណាងឲ្យការខិតខំរបស់ព្រះអង្គសង្គ្រោះដើម្បីជួយរាស្ដ្ររបស់ទ្រង់ឲ្យត្រឡប់ទៅកាន់ទ្រង់វិញ ។ សិស្សអាចចែកចាយពីមេរៀនដ៏មានតម្លៃផ្សេងគ្នា នៅពេលពួកគេបំពេញប្រយោគទីបី ។ សូមឲ្យសិស្សពិនិត្យមើលចម្លើយរបស់ពួកគេចំពោះប្រយោគទីបួនដោយមើលនៅក្នុង យ៉ាកុប 5:51 ដែលនិយាយថា ម្ចាស់ចំការសម្រេចចិត្តប្រណីដល់ចំការរបស់គាត់ « បន្ដិចទៀត » ។
សូមពន្យល់ថា មេរៀនថ្ងៃនេះគ្របដណ្ដប់លើចំណែកចុងបញ្ចប់នៃការប្រៀបធៀបនេះ ដែលតំណាងឲ្យថ្ងៃចុងក្រោយ រួមទាំងការស្ដារឡើងវិញនៃដំណឹងល្អផងដែរ ។
សូមបង្ហាញថា ម្ចាស់ចំការសម្រេចចិត្តថាសង្គ្រោះចំការនោះ ដោយការបំបៅមែកជាច្រើនទៀត ។ សូមឲ្យសិស្សបីបួននាក់ប្ដូរវេនគ្នាអានឮៗនៅក្នុង យ៉ាកុប 5:52–58 ។ សូមអញ្ជើញសិស្សក្នុងថ្នាក់ឲ្យរកមើលអ្វីដែលម្ចាស់ចំការបានធ្វើ ដើម្បីបណ្ដុះមែក និង ឫសទាំងនោះ ។ ( សូមជួយសិស្សឲ្យឃើញថា ម្ចាស់ចំការបំបៅមែកនោះពីដើមធម្មជាតិទៅនឹងដើមដំបូងរបស់វាវិញ —ដើមដែលតំណាងឲ្យវង្សនៃអ៊ីស្រាអែល ។ បន្ទាប់មក គាត់បានបំបៅមែកនានាពីដើមឈើនោះទៅនឹងដើមធម្មជាតិផ្សេងទៀត ។ គាត់ក៏បានកាត់ចោលមែកដែលល្វីងបំផុតបោះទៅក្នុងភ្លើង ។ អ្នកអាចប្រើដើមឈើនៅលើក្ដារខៀន ដើម្បីបង្ហាញពីការពន្យល់នេះ ។ ឧទាហរណ៍ អ្នកអាចលុបមែកមួយពីដើមមួយ ហើយគូរមែកថ្មីមួយនៅលើដើមមួយទៀត ) ។
សូមអញ្ជើញសិស្សម្នាក់អាន យ៉ាកុប 5:59 ឮៗ ។ សូមឲ្យសិស្សក្នុងថ្នាក់ស្ដាប់ និងស្វែងរកអ្វីដែលម្ចាស់ចំការ បានសង្ឃឹមលើសកម្មភាពទាំងនេះថានឹងជួយដល់ឫសដើមឈើនោះ ។
-
តើម្ចាស់ចំការបានសង្ឃឹមថា នឹងមានអ្វីកើតឡើងដល់ឫសនោះ ? ( គាត់ចង់ឲ្យវា « មានកម្លាំង » )
សូមរំឭកសិស្សថា នៅពេលនេះ ដើមឈើទាំងអស់បានដុះផ្លែអាក្រក់ ដែលតំណាងឲ្យពិភពលោកទាំងមូលដែលស្ថិតនៅក្នុងសភាពមួយនៃការក្បត់សាសនា ។ សូមពន្យល់ថា នៅពេលឫសវាមានកម្លាំង មែកផ្សេងៗពេញមួយចំការនឹងផ្លាស់ប្ដូរ « ក្រែងមែកល្អ អាចឈ្នះលើមែកអាក្រក់បាន » ( យ៉ាកុប 5:59 ) ។
សូមប្រាកដថា សិស្សយល់ថា ខគម្ពីរទាំងនេះបង្រៀនថា ឥទ្ធិពលនៃសេចក្ដីសញ្ញារបស់ដំណឹងល្អធ្វើឲ្យកូនចៅរបស់ព្រះវរបិតាសួគ៌យកឈ្នះលើអំពើបាប និង នាំមកនូវសេចក្ដីសុចរិតបាន ។
-
តើសេចក្ដីសញ្ញានៃដំណឹងល្អអាចពង្រឹងយើងបានដោយរបៀបណា ? តើសេចក្ដីសញ្ញារបស់អ្នកបានមានឥទ្ធិពលទៅលើជីវិតរបស់អ្នកដោយរបៀបណា ? ( អ្នកអាចចែកចាយអារម្មណ៍របស់អ្នក និង ថ្លែងទីបន្ទាល់អំពីគោលការណ៍នេះ )
យ៉ាកុប 5:61–77
ម្ចាស់ចំការធ្វើការនៅក្នុងចំការជាមួយនឹងអ្នកបម្រើរបស់គាត់
សូមអញ្ជើញសិស្សឲ្យអាន យ៉ាកុប 5:61–62 ដោយស្ងាត់ៗ ដោយរកមើលអ្វីដែលម្ចាស់ចំការបានណែនាំអ្នកបម្រើរបស់គាត់ឲ្យធ្វើ និង មូលហេតុដែលគាត់បានសុំឲ្យពួកគេធ្វើវា ។
-
អ្នកបម្រើនាពេលដំបូងក្នុងរឿងប្រៀបធៀបនេះ តំណាងឲ្យព្យាការីនៃព្រះអម្ចាស់ ។ តើនរណាអាចត្រូវបានតំណាងឲ្យហ្វូងអ្នកបម្រើនៅក្នុងយ៉ាកុប 5:61 ? ( សូមជួយសិស្សឲ្យមើលឃើញថា អ្នកបម្រើទាំងនេះអាចតំណាងឲ្យសមាជិកសាសនាចក្រទាំងអស់ ៖ ព្យាការី និង សាវក អ្នកដឹកនាំទូទៅ និង អ្នកដឹកនាំសាសនាចក្រក្នុងស្រុក អ្នកផ្សព្វផ្សាយសាសនា គ្រូបង្រៀនតាមផ្ទះ , គ្រូបង្រៀនសួរសុខទុក្ខ និង នរណាក៏ដោយដែលចូលរួមនៅក្នុងកិច្ចការរបស់ព្រះអម្ចាស់ )
-
តើអ្វីដែលសំខាន់អំពីពាក្យ យើង របស់យើង និង ពួកយើង នៅក្នុង យ៉ាកុប 5:61–62 ? ( ព្រះអម្ចាស់ធ្វើការជាមួយនឹងយើង ។ យើងមិនបានទុកឲ្យធ្វើកិច្ចការរបស់ទ្រង់តែម្នាក់ឯងនោះទេ ) ។
-
យោងតាម យ៉ាកុប 5:62តើអ្វីដែលពិសេសអំពីពេលដែលអ្នកបម្រើទាំងនេះត្រូវបានហៅឲ្យបម្រើ ? ( វាគឺជា « លើកចុងក្រោយបង្អស់ » ដែលម្ចាស់ចំការនឹងកាត់លួសចំការនោះ ។ ព្យាការីបានសំដៅ « លើកចុងក្រោយបង្អស់ » នេះថាជា « គ្រាកាន់កាប់ត្រួតត្រានៃពេលពេញកំណត់ » ។ ឧទាហរណ៍ សូមមើល អេភេសូ 1:10 និង គ. និង ស. 128:20 )
ដើម្បីជួយសិស្សឲ្យឃើញពីរបៀបដែលផ្នែកនៃការប្រៀបធៀបនេះទាក់ទងនឹងពួកគេ សូមឲ្យសិស្សម្នាក់អានសេចក្ដីថ្លែងការណ៍ខាងក្រោមដោយអែលឌើរ ដេន អេល. ឡាសិន នៃក្រុមចិតសិបនាក់ ៖
« [ ឥឡូវនេះ ] គឺជាពេលវេលាដែលព្រះអម្ចាស់ និង អ្នកបម្រើរបស់គាត់នឹងធ្វើការខិតខំធ្វើការខ្លាំងលើកចុងក្រោយដើម្បីនាំសារលិខិតនៃសេចក្ដីពិតទៅដល់មនុស្សទាំងអស់នៅលើផែនដី និង អប់រំកូនចៅអ៊ីស្រាអែលពីបុរាណដែលបានបាត់បង់អត្តសញ្ញាណពិតរបស់ខ្លួន ។ …
« អ្នកបានចុះមកផែនដី នៅពេលគ្រឹះបានដាក់ចុះសម្រាប់កិច្ចការដ៏អស្ចារ្យនេះ ។ ដំណឹងល្អត្រូវបានស្ដារឡើងវិញសម្រាប់ជំនាន់ចុងក្រោយ ។ សាសនាចក្រត្រូវបានស្ថាបនានៅស្ទើរតែគ្រប់ផ្នែកនៃពិភពលោក ។ ឈុតឆាកនេះត្រូវដាក់ឲ្យអនុមត័សម្រាប់ផ្ទាំងវិនាកដម្មចុងក្រោយបង្អស់ ។ អ្នកនឹងជាអ្នកសម្ដែងដ៏សំខាន់ ។ អ្នកគឺជាអ្នកបម្រើនៅក្នុងចំណោមអ្នកបម្រើចុងក្រោយបង្អស់នៅក្នុងចំការនោះ ។ … នេះគឺជាការបម្រើដែលអ្នកត្រូវបានជ្រើសរើសឲ្យធ្វើ » ( « A Royal Generation »Ensignខែ ឧសភា ឆ្នាំ 1983 ទំព័រ 33 ) ។
-
តើវាមានឥទ្ធិពលដល់អ្នកយ៉ាងណាដែរ ដោយដឹងថាអ្នកត្រូវបានហៅឲ្យបម្រើជាមួយនឹងព្រះអម្ចាស់ អំឡុងពេលចុងក្រោយនៃការបម្រើនេះ ?
-
តើនៅពេលណាដែលអ្នកមានអារម្មណ៍ថា ព្រះអម្ចាស់បានធ្វើការជាមួយអ្នក នៅពេលអ្នកបានចូលរួមនៅក្នុងកិច្ចការរបស់ទ្រង់ ?
-
តើអ្នកមានឱកាសអ្វីខ្លះដើម្បីបម្រើដល់ព្រះអម្ចាស់ និង ជួយដល់អ្នកដទៃឲ្យនាំមកនូវ « ផ្លែល្អ » ? ( សិស្សអាចនិយាយអំពីការហៅឲ្យបម្រើ និង កិច្ចការក្នុងសាសនាចក្ររបស់ពួកគេ ទំនួលខុសត្រូវរបស់ពួកគេដើម្បីជួយដល់សមាជិកគ្រួសារ មិត្តភក្ដិ និង អ្នកដទៃឲ្យខិតចូលទៅជិតព្រះអង្គសង្គ្រោះ និង ឱកាសដែលពួកគេនឹងមានដើម្បីបម្រើដល់ព្រះអម្ចាស់ ជាអ្នកផ្សព្វផ្សាយសាសនាពេញម៉ោង )
សូមសរសេរ យ៉ាកុប 5:70–75 នៅលើក្ដារខៀន ។ សូមណែនាំខគម្ពីរទាំងនេះដោយការពន្យល់ថា វាបង្រៀនអំពីទំនាក់ទំនងដែលព្រះអម្ចាស់មានជាមួយនឹងអ្នកបម្រើរបស់ទ្រង់ ។ ពួកគេក៏បានពិពណ៌នាពីអ្វីដែលព្រះអម្ចាស់ និង អ្នកបម្រើរបស់ទ្រង់អាចសម្រេចបាន តាមរយៈកិច្ចការរបស់ពួកគេរួមគ្នានោះផងដែរ។ សូមអញ្ជើញសិស្សឲ្យអានខគម្ពីរទាំងនេះដោយស្ងាត់ៗ ហើយជ្រើសរើសខគម្ពីរមួយដែលផ្ដល់ជាការពិពណ៌នាដែលពួកគេចូលចិត្តអំពីទំនាក់ទំនងរបស់ព្រះអម្ចាស់ជាមួយនឹងអ្នកបម្រើទ្រង់ ។ ក្រោយពីសិស្សមានពេលអានហើយ សូមអញ្ជើញពួកគេពីរបីនាក់ឲ្យនិយាយពីខគម្ពីរដែលពួកគេបានជ្រើសរើស មូលហេតុដែលពួកគេចូលចិត្តវា និង ពីរបៀបដែលវាអាចជួយពួកគេ នៅពេលពួកគេបម្រើដល់ព្រះអម្ចាស់ ។
នៅពេលសិស្សចូលរួមនៅក្នុងសកម្មភាពនេះ សូមប្រាកដថាពួកគេយល់ថា ព្រះអម្ចាស់សន្យានឹងយើងថាមានសេចក្ដីអំណរ នៅពេលយើងធ្វើការជាមួយនឹងទ្រង់ ដើម្បីសម្រេចកិច្ចការរបស់ទ្រង់ ។ដើម្បីជួយសិស្សឲ្យយល់កាន់តែច្បាស់អំពី យ៉ាកុប 5:70–75សូមគិតពីការសួរសំណួរខ្លះដូចខាងក្រោម ៖
-
តើម្ចាស់ចំការបានសន្យាអ្វីខ្លះ ដល់អ្នកទាំងឡាយណាដែលធ្វើការជាមួយនឹងទ្រង់នោះ ? ( សូមមើល យ៉ាកុប 5:71, 75 ) តើនៅពេលណាដែលអ្នកមានអារម្មណ៍អំណរនៅក្នុងកិច្ចការរបស់ព្រះអម្ចាស់ ?
-
តើអ្នកគិតថា ហេតុអ្វីបានជាវាសំខាន់ដែលអ្នកបម្រើបានធ្វើការ « ដោយសមត្ថភាពរបស់ពួកគេ » និង « ដោយអស់ទាំងសេចក្ដីព្យាយាម » នោះ ? ( សូមមើល យ៉ាកុប 5:72, 74 ) ។ តើមេរៀនអ្វីដែលអ្នកអាចយកចេញពីឃ្លាទាំងនេះ នៅពេលអ្នកបម្រើដល់ព្រះអម្ចាស់ ?
សូមបញ្ចប់ផ្នែកនៃមេរៀននេះ ដោយការសុំសិស្សឲ្យឆ្លើយតបនឹងសំណួរខាងក្រោមនេះ នៅក្នុងកំណត់ហេតុសិក្សាព្រះគម្ពីរ ឬ សៀវភៅសរសេរក្នុងថ្នាក់របស់ពួកគេ ( អ្នកអាចសរសេរវានៅលើក្ដារខៀន ) ៖
-
នៅពេលអ្នកគិតពីឱកាសរបស់អ្នកដើម្បីបម្រើដល់ព្រះអម្ចាស់ តើអ្នកនឹងអនុវត្តសេចក្ដីពិតទាំងឡាយដែលយើងបានពិភាក្សានៅក្នុង យ៉ាកុប ជំពូក 5 យ៉ាងដូចម្ដេច ?
ក្រោយពីសិស្សបានមានពេលសរសេរគ្រប់គ្រាន់ហើយ អ្នកអាចសុំឲ្យពួកគេម្នាក់ ឬ ពីរនាក់ឡើងអានចម្លើយរបស់ពួកគេដល់សិស្សក្នុងថ្នាក់ ។
យ៉ាកុប 6
យ៉ាកុបបង្រៀនអំពីសេចក្ដីមេត្តាករុណា និង សេចក្ដីយុត្តិធម៌នៃព្រះអម្ចាស់ និង អញ្ជើញឲ្យប្រជាជនរបស់គាត់ប្រែចិត្ត
សូមបង្ហាញសង្ខេបៗអំពី យ៉ាកុប 6 ដោយការពន្យល់ថាវារួមមានសេចក្ដីសង្ខេបរបស់យ៉ាកុបអំពីសេចក្ដីពិតទាំងឡាយដែលមានសារៈសំខាន់មកពីរឿងប្រៀបធៀបអំពីដើមអូលីវស្រុក និង ដើមអូលីវព្រៃ ។
សូមអញ្ជើញសិស្សម្នាក់ឲ្យអាន យ៉ាកុប 6:4–6 ។ សូមឲ្យសិស្សពាក់កណ្ដាលថ្នាក់រកមើលអ្វីដែលយ៉ាកុបចង់ឲ្យប្រជាជនរបស់គាត់រៀនអំពីព្រះអម្ចាស់ ។ ( ថាទ្រង់នឹកចាំដល់ប្រជាជនរបស់ទ្រង់ ថាទ្រង់ « បានចូលជាប់នឹង [ ពួកគេ ] » ហើយថា « ព្រះពាហុនៃសេចក្ដីមេត្តាករុណារបស់ទ្រង់លាចេញមករក [ ពួកគេ ] » ។ អ្នកអាចពន្យល់ថា នៅក្នុងវគ្គនេះពាក្យ ចូលជាប់ មានន័យថា នៅក្បែរជាប់គ្នានឹងអ្វីមួយ ឬ នរណាម្នាក់ ) ។ សូមឲ្យសិស្សពាក់កណ្ដាលថ្នាក់ទៀតរកមើលអ្វីដែលយ៉ាកុបបានលើកទឹកចិត្តដល់ប្រជាជនរបស់គាត់ឲ្យធ្វើ ដែលជាលទ្ធផលនៃការដឹងនេះ ។ ( កុំឲ្យធ្វើចិត្តគេរឹងរូស ប្រែចិត្ត ចូលមករកព្រះអម្ចាស់ « ដោយអស់ពីដួងចិត្ត » ហើយ « តោងជាប់ទៅនឹងព្រះ ដូចជាទ្រង់ចូលជាប់នឹង [ ពួកគេ ] ដែរ » ) ។ ក្រោយពីសិស្សបានប្រាប់សិស្សផ្សេងទៀតពីអ្វីដែលពួកគេបានរៀនហើយ សូមសួរ ៖
-
តើយ៉ាកុបបានពិពណ៌នាពីព្រះអម្ចាស់ដោយរបៀបណា ? តើវាមានន័យយ៉ាងណាដល់អ្នកថា « ព្រះពាហុនៃសេចក្ដីមេត្តាករុណារបស់ទ្រង់លាចេញមករកអ្នក » ?
-
តើអ្នកបានរៀនអ្វីខ្លះ អំពីព្រះអម្ចាស់ក្នុងរឿងប្រៀបធៀបអំពីដើមអូលីវដែលបានបង្ហាញអំពីរបៀបដែលទ្រង់បានចូលជាប់នឹងអ្នក ? តើអ្នកអាចធ្វើអ្វីខ្លះ ដើម្បីបង្ហាញថាអ្នកនឹងតោងជាប់នឹងព្រះអម្ចាស់នោះ ?
សូមសង្ខេប យ៉ាកុប 6:7–10 ដោយការពន្យល់ថាក្រោយពីយើងត្រូវបាន « ចិញ្ចឹមឲ្យរស់ដោយព្រះបន្ទូលដ៏ល្អនៃព្រះ » នោះយើងមិនត្រូវផ្ដល់ផ្លែអាក្រក់មកនោះទេ ។ យើងត្រូវធ្វើតាមពាក្យរបស់ព្យាការី ។ ប្រសិនបើយើងមិនព្រមប្រែចិត្តនោះទេ យ៉ាកុបបានព្រមានថា យើងនឹងត្រូវទទួលខុសត្រូវចំពោះអំពើបាបរបស់យើងនៅថ្ងៃជំនុំជម្រះរបស់ព្រះអម្ចាស់ ។ សូមលើកទឹកចិត្តសិស្សឲ្យអាន យ៉ាកុប 6:11–13ដោយស្ងាត់ស្ងៀម ហើយរកមើលការទូន្មានចុងក្រោយរបស់យ៉ាកុប ។ ក្រោយពីពួកគេបានចែកចាយនូវអ្វីដែលពួកគេបានរកឃើញហើយ សូមសួរ ៖
-
ហេតុអ្វីបានជាវាជាការឆ្លាតវៃដើម្បីជ្រើសរើសធ្វើការប្រែចិត្ត ហើយរៀបចំនាពេលឥឡូវនេះដើម្បីឈរនៅចំពោះព្រះភ័ក្រ្ដនៃព្រះអម្ចាស់ និង ត្រូវបានកាត់សេចក្ដីដោយទ្រង់នោះ ?
សូមបញ្ជាក់ថា យើងគឺជាមនុស្សឆ្លាតវៃ បើយើងរៀបចំពីពេលឥឡូវនេះសម្រាប់ការកាត់សេចក្ដីដោយការប្រែចិត្ត និង ការទទួលបានសេចក្ដីមេត្តាករុណាពីព្រះអម្ចាស់ ។
ដើម្បីបញ្ចប់មេរៀននេះ សូមបញ្ជាក់ថាការប្រែចិត្ត មិនត្រឹមតែរៀបចំយើងសម្រាប់ការកាត់សេចក្ដីនៅថ្ងៃចុងក្រោយប៉ុណ្ណោះទេ ប៉ុន្ដែថែមទាំងអាចបម្រើដល់ព្រះអម្ចាស់នាពេលឥឡូវនេះផងដែរ ។ សូមថ្លែងទីបន្ទាល់ដល់សិស្សថា ព្រះអម្ចាស់ចង់ឲ្យពួកគេបម្រើជាមួយនឹងទ្រង់ ហើយស្វែងរកសេចក្ដីអំណរជាមួយនឹងទ្រង់ ហើយថាពួកគេអាចបានស័ក្ដិសមដើម្បីធ្វើដូច្នោះ នៅពេលពួកគេគោរពតាមព្រះបញ្ញត្តិ ប្រែចិត្ត ហើយទទួលបានសេចក្ដីមេត្តាករុណារបស់ទ្រង់ ។
វិចារណកថា និង ព័ត៌មានសាច់រឿង
យ៉ាកុប 5 ។ សេចក្ដីសង្ខេបអំពីរឿងប្រៀបធៀបនៃដើមអូលីវស្រុក និង ដើមអូលីវព្រៃ