ហេលេមិន 1–9 ( មេរៀនទី 22 )

ការរៀបចំសម្ភារសម្រាប់គ្រូបង្រៀនដល់សិស្សដែលសិក្សានៅផ្ទះ

សេចក្ដីសង្ខេបនៃមេរៀនសិក្សានៅផ្ទះប្រចាំថ្ងៃ

សេចក្ដីសង្ខេបខាងក្រោមស្ដីពីគោលលទ្ធិ និងគោលការណ៍ទាំងឡាយដែលសិស្សបានរៀន នៅពេលពួកគេសិក្សា ហេលេមិន 1–9 ( មេរៀនទី 22 ) មិនមែនសម្រាប់បង្រៀនជាផ្នែកនៃមេរៀនរបស់អ្នកឡើយ ។ មេរៀនដែលអ្នកបង្រៀនផ្ដោតតែលើគោលលទ្ធិ និង គោលការណ៍ទាំងនេះពីរបីប៉ុណ្ណោះ ។ សូមធ្វើតាមការបំផុសនៃព្រះវិញ្ញាណបរិសុទ្ធ នៅពេលអ្នកគិតអំពីតម្រូវការរបស់សិស្ស ។

ថ្ងៃទី 1 (ហេលេមិន 1–2)

នៅពេលសិស្សសិក្សាពីទំនាស់ខាងនយោបាយ និងឃាតកម្មនៅក្នុងចំណោមសាសន៍នីហ្វៃ និង ការវាយយកទីក្រុងសារ៉ាហិមឡាដោយសាសន៍លេមិន ពួកគេបានរៀនថា ការទាស់ទែងគ្នាគឺជាការបែកបាក់ ហើយវាធ្វើឲ្យយើងងាយនឹងរងឥទ្ធិពលពីមារសត្រូវ ។ ពួកគេក៏បានរៀនដែរថា បក្សព័ន្ធសម្ងាត់អាចនាំទៅរកការបំផ្លាញជាច្រើនក្នុងសង្គម ។

ថ្ងៃទី 2 (ហេលេមិន 3–4)

ដោយការសិក្សាពីរបៀបដែលសាសន៍ដ៏រាបសារដើរតាមព្រះអង្គសង្គ្រោះបានស៊ូទ្រាំនឹងការបៀតបៀនជាច្រើន សិស្សបានរៀនថា ទោះបីជាមានការបៀតបៀន និងការសាកល្បងក្ដី ក៏សេចក្តីជំនឿរបស់យើងទៅលើព្រះយេស៊ូវគ្រីស្ទអាចកើនឡើង នៅពេលយើងអំពាវនាវហៅព្រះដោយបន្ទាបខ្លួន និងបែរដួងចិត្តរបស់យើងទៅរកទ្រង់ ។ នៅពេលសិស្សបានសិក្សាពីរបៀបដែលការកើនឡើងនូវភាពឆ្មើងឆ្មៃរបស់សាសន៍នីហ្វៃបានធ្វើឲ្យសាសន៍លេមិនទទួលបានដែនដីពាក់កណ្ដាលពីសាសន៍នីហ្វៃ ពួកគេបានរៀនថា ភាពឆ្មើងឆ្មៃ និងអំពើទុច្ចរិតធ្វើឲ្យយើងឃ្លាតឆ្ងាយពីព្រះវិញ្ញាណនៃព្រះអម្ចាស់ ហើយទុកឲ្យយើងប្រើកម្លាំងរបស់យើងផ្ទាល់ ។

ថ្ងៃទី 3 (ហេលេមិន 5)

ដោយសិក្សាពីការណែនាំដែលហេលេមិនបានផ្ដល់ទៅដល់កូនប្រុសរបស់គាត់នីហ្វៃ និងលីហៃ សិស្សបានរៀនថា ប្រសិនបើយើងសង់គ្រឹះរបសយើងនៅលើព្រះយេស៊ូវគ្រីស្ទ សាតាំងនឹងគ្មានអំណាចមកលើយើងឡើយ ។ តាមរយៈព្រះចេស្ដានៃព្រះ និងសេចក្ដីជំនឿ ហើយនិងការខិតខំផ្សព្វផ្សាយសាសនារបស់នីហ្វៃ និងលីហៃ សាសន៍លេមិនជាច្រើនបានប្រែចិត្ត ។ សិស្សបានរៀនថា នៅពេលយើងអនុវត្តសេចក្តីជំនឿទៅលើព្រះយេស៊ូវគ្រីស្ទ ហើយប្រែចិត្តពីអំពើបាបរបស់យើង នោះព្រះវិញ្ញាណបរិសុទ្ធនឹបំពេញដួងចិត្តយើងដោយសេចក្តីសុខសាន្ត និងសេចក្តីអំណរ ។

ថ្ងៃទី 4 (ហេលេមិន 6–9)

សិស្សបានរៀនថា នៅពេលយើងជឿ ហើយគោរពតាមព្រះបន្ទូលរបស់ព្រះអម្ចាស់ នោះទ្រង់នឹងចាក់ស្រោចព្រះវិញ្ញាណរបស់ទ្រង់មកលើយើង ។ នីហ្វៃបានព្រមានពួកសាសន៍នីហ្វៃដ៏ទុច្ចរិតអំពីលទ្ធផលនៃអំពើទុច្ចរិតរបស់គេ ហើយបញ្ជាក់ថា ប្រសិនបើយើងមិនព្រមប្រែចិត្តពីអំពើបាបរបសយើងទេ យើងនឹងបាត់បង់ការការពាររបស់ព្រះអម្ចាស់ និងពរជ័យនៃជីវិតដ៏នៅអស់កល្បជានិច្ច ។ ក្រោយពីបានស្ដាប់ពាក្យសម្ដីរបស់នីហ្វៃ មនុស្សខ្លះបានក្រោកឈរឡើងគាំទ្រគាត់ ។ សិស្សបានរៀនថា ប្រសិនបើយើងប្រឆាំងនឹងអំពើអាក្រក់ យើងអាចរារាំងវាពីការបន្ដទៅទៀតបាន ។ នីហ្វៃបានរំឭកប្រជាជនថា ព្យាការីជាច្រើនបានថ្លែងទីបន្ទាល់អំពីព្រះអង្គសង្គ្រោះ ហើយបានបង្រៀនថា នៅពេលយើងផ្ដោតលើព្រះយេស៊ូវគ្រីស្ទ ហើយអនុវត្តសេចក្តីជំនឿលើទ្រង់ នោះយើងនឹងទទួលបានជីវិតដ៏នៅអស់កល្បជានិច្ច ។ ចេញពីការបង្រៀនរបស់នីហ្វៃដែលបានកត់ត្រានៅក្នុង ហេលេមិន 7–9 សិស្សបានរៀនថា ពាក្យសម្ដីរបស់ព្យាការីនឹងត្រូវបានបំពេញ ។

សេចក្តីផ្ដើម

នៅក្នុងចំណោមការទាស់ទែងគ្នា និងអំពើទុច្ចរិតដែលកំពុងរីកចម្រើន នីហ្វៃបានបង្រៀនកូនប្រុសរបស់គាត់ថា គ្រឹះនៃសេចក្ដីជំនឿរបស់ពួកគេគួរសង់នៅលើព្រះយេស៊ូវគ្រីស្ទ ។ ការបង្រៀនរបស់នីហ្វៃអំពីការប្រែចិត្ត និងការស្ដាប់តាមពាក្យសម្ដីរបស់ព្យាការីនៃព្រះអម្ចាស់ មានសារសំខាន់ដល់សុភមង្គលរបស់មនុស្ស ។

យោបល់សម្រាប់ការបង្រៀន

ហេលេមិន 1–5

សាសន៍នីហ្វៃរងភាពបរាជ័យដោយសារតែការទាស់ទែងគ្នា និងអំពើទុច្ចរិត ។ សាសន៍លេមិនជាច្រើនបានប្រែចិត្តជឿនៅពេលនីហ្វៃ និងលីហៃផ្សាយដំណឹងល្អ

សូមឲ្យសិស្សសញ្ជឹងគិតពីមូលហេតុដែលអគារខ្លះនៅរឹងមាំរយៈពេលយូរ ខណៈអគារផ្សេងទៀតត្រូវរលំ ។ រួចសួរថា ៖ ហេតុអ្វីបានជាវាសំខាន់ដែលអគារមួយត្រូវមានគ្រឹះដ៏មាំមួន ?

សូមឲ្យសិស្សម្នាក់អាន ហេលេមិន 5:12 ឮៗ ។ ដោយសារនេះគឺជាវគ្គចំណេះចំណានខគម្ពីរមួយ សូមឲ្យសិស្សពីរបីនាក់ព្យាយាមសូត្រវា ។ សូមលើកទឹកចិត្តពួកគេឲ្យព្យាយាម ទោះបីជាពួកគេមិនអាចចាំវាទាំងអស់ក្ដី ។ បន្ទាប់មក សួរពួកគេនូវសំណួរដូចខាងក្រោមនេះ ៖

តើការសន្យានៅក្នុងខគម្ពីរនេះមានអ្វីខ្លះ ប្រសិនបើយើងសង់ជីវិតយើងនៅលើគ្រឹះរបស់ព្រះយេស៊ូវគ្រីស្ទ ? ( ចម្លើយរបស់សិស្សអាចបង្ហាញថា ប្រសិនបើយើងសង់គ្រឹះរបស់យើងនៅលើព្រះយេស៊ូវគ្រីស្ទ នោះសាតាំងនឹងគ្មានអំណាចមកលើយើងឡើយ ) ។
តើអ្នកបានធ្វើអ្វីខ្លះដើម្បីសាងជីវិតរបស់អ្នកនៅលើគ្រឹះរបស់ព្រះយេស៊ូវគ្រីស្ទ ?

សូមឲ្យសិស្សប្រាប់អំពីពេលដែលទីបន្ទាល់របស់គេអំពីព្រះអង្គសង្គ្រោះបានជួយពួកគេឲ្យយកឈ្នះលើការល្បួង ឬតស៊ូនឹងឧបសគ្គ ។ សូមចែកចាយទីបន្ទាល់របស់អ្នកអំពីកម្លាំងខាងវិញ្ញាណដែលអ្នកបានទទួល ដោយសារអ្នកបានសាងជីវិតរបស់អ្នកលើគ្រឹះរបស់ព្រះយេស៊ូវគ្រីស្ទ ។ សូមលើកទឹកចិត្តឲ្យសិស្សគិតពីរបៀបមួយ ឬច្រើនដែលពួកគេនឹងខំសាងជីវិតរបស់គេនៅលើសិលានៃព្រះគ្រីស្ទឲ្យកាន់តែប្រសើរ ។

ហេលេមិន 6–7

សាសន៍លេមិនបានក្លាយជាសុចរិតច្រើនជាងមុន ខណៈដែលសាសន៍នីហ្វៃក្លាយទៅជាទុច្ចរិតជាងមុន នីហ្វៃបង្រៀនដល់សាសន៍នីហ្វៃទុច្ចរិត ហើយបញ្ជាឲ្យពួកគេប្រែចិត្ត

សូមរំឭកសិស្សថា ខណៈដែលសាសន៍លេមិនជាច្រើនបានប្រែចិត្ត ហើយបានរឹងមាំនៅក្នុងដំណឹងល្អ នោះសាសន៍នីហ្វៃបានរស់នៅក្នុងអំពើទុច្ចរិត ហើយព្រះវិញ្ញាណបរិសុទ្ធបានដកថយចេញពីពួកគេ ។ សូមឲ្យសិស្សគិតអំពីពេលមួយនៅក្នុងជីវិតរបស់គេ នៅពេលពួកគេមានអារម្មណ៍ថាព្រះវិញ្ញាណបានដកថយចេញពីពួកគេដោយសារតែជម្រើសរបស់ពួកគេ ។

សូមពន្យល់ថា នៅពេលនីហ្វៃបានឃើញពីស្ថានភាពរបស់ប្រជាជនគាត់ « នោះចិត្តលោកពោរពេញទៅដោយសេចក្ដីព្រួយនៅក្នុងទ្រូងលោក » ( ហេលេមិន 7:6 ) ។ លោកបានចេញទៅប៉មនៅក្នុងសួនច្បាររបស់លោកដើម្បីអធិស្ឋាន ហើយទូញយំចំពោះអំពើទុច្ចរិតរបស់ប្រជាជន ។ ហ្វូងមនុស្សបានប្រមូលគ្នាជុំវិញលោក ហើយនីហ្វៃបានប្រើឱកាសនេះដើម្បីបង្រៀនដល់ពួកគេ ។

សូមឲ្យសិស្សម្នាក់ឡើងមកខាងមុខថ្នាក់ជាតំណាងឲ្យនីហ្វៃនៅលើប៉មលោក ។ សូមឲ្យសិស្សនោះអាន ហេលេមិន 7:15–22, 26–28 ឮៗនៅពេលសិស្សក្នុងថ្នាក់ផ្សេងទៀតមើលតាម ។ មុនពេលសិស្សនោះអាន សូមបំបែកសិស្សជាពីរក្រុម ។ សូមឲ្យសិស្សក្រុមទីមួយរកមើលអ្វីដែលនីហ្វៃបានបង្រៀនដែលជាអំពើបាបរបស់សាសន៍នីហ្វៃ ហើយសុំឲ្យក្រុមទីពីររកមើលលទ្ធផលដែលនីហ្វៃបានថ្លែងថានឹងកើតឡើង ប្រសិនបើសាសន៍នីហ្វៃមិនព្រមប្រែចិត្តទេនោះ ។ បន្ទាប់មក សូមឲ្យសិស្សរៀបរាប់ពីអ្វីដែលពួកគេបានរកឃើញ ។

ក្រោយពីសិស្សបានឆ្លើយ សូមឲ្យពួកគេនិយាយពីគោលការណ៍ដែលយើងអាចរៀនពីដំណើររឿងនេះ ។ សិស្សអាចចែកចាយនូវគោលការណ៍ខុសគ្នា ប៉ុន្ដែពួកគេគួរបង្ហាញថា ប្រសិនបើយើងមិនព្រមប្រែចិត្តពីអំពើបាបរបស់យើង នោះយើងនឹងបាត់បង់ការការពារ និងពរជ័យទាំងឡាយនៃជីវិតដ៏នៅអស់កល្បជានិច្ច ។

ដើម្បីជួយសិស្សឲ្យយល់ពីគោលការណ៍នេះ សូមឲ្យពួកគេពន្យល់ពីផលវិបាកដែលនឹងកើតឡើងដល់ប្រជាជននៅក្នុងសា្ថនភាពខាងក្រោម ៖ ( 1 ) យុវជនម្នាក់មិនព្រមប្រែចិត្តពីការញៀននឹងរូបអាសគ្រាម ។ ( 2 ) អាទិភាពដ៏ចម្បងរបស់យុវនារីម្នាក់គឺត្រូវកា្លយជាអ្នកល្បីល្បាញ និងមានប្រជាប្រិយភាពម្នាក់ ទោះបីជាត្រូវបានបង្រៀនដោយឪពុកម្ដាយនាងខុសគ្នាក្ដី ។ ( 3 ) យុវជនម្នាក់បានស្ដាប់តាមការណែនាំរបស់ព្យាការីក្នុងការសិក្សាស្រាវជ្រាវព្រះគម្ពីរ ហើយអធិស្ឋាន ប៉ុន្ដែគាត់បដិសេធដើម្បីធ្វើតាម ។

សូមឲ្យសិស្សសញ្ជឹងគិតថាតើមានអ្វីខ្លះដែលពួកគេត្រូវប្រែចិត្ត ដើម្បីឲ្យពួកគេអាចមានកម្លាំងរបស់ព្រះអម្ចាស់ពេញលេញបន្ថែមទៀតនៅក្នុងជីវិតរបស់ពួកគេ ។

ហេលេមិន 8

នីហ្វៃបង្រៀនថា ព្យាការីទាំងអស់ថ្លែងទីបន្ទាល់អំពីព្រះយេស៊ូវគ្រីស្ទ

សូមសរសេរពាក្យ ទទួលយក និងបដិសេធ នៅលើក្ដារខៀន ។ សូមឲ្យសិស្សពន្យល់ពីភាពខុសគ្នារវាងពាក្យទាំងពីរនេះ ។ សូមឲ្យសិស្សម្នាក់អាន ហេលេមិន 8:13 ខណៈដែលសិស្សក្នុងថ្នាក់រកមើលអ្វីដែលនីហ្វៃបាននិយាយអ្វីប្រជាជនបានបដិសេធ ។ អ្នកអាចណែនាំសិស្សឲ្យគូសចំណាំអ្វីដែលពួកគេរកឃើញ ។

សូមបង្ហាញសិស្សនូវរូបភាពរបស់ម៉ូសេ និងសត្វពស់លង្ហិន ( 62202 សៀវភៅរូបភាពដំណឹងល្អ [ ឆ្នាំ 2009 ] ល.រ. 16 ) ។ សូមឲ្យពួកគេអាន ហេលេមិន 8:14–15 ហើយរកមើលអ្វីដែលម៉ូសេបានបង្រៀនអំពីព្រះអង្គសង្គ្រោះ ។ សូមឲ្យពួកគេរៀបរាប់ពីអ្វីដែលពួកគេបានរៀន ។ រួចសួរថា ៖

តើវិធីមួយចំនួនដែលបុគ្គលម្នាក់អាចសម្លឹងមើលទៅព្រះអង្គសង្គ្រោះដោយសេចក្តីជំនឿមានអ្វីខ្លះ ?
តើការមាន « វិញ្ញាណទន់ទាប » មានន័យដូចម្ដេច ? ( ការបន្ទាបខ្លួន ប្រែចិត្ត ហើយទទួលយកព្រះឆន្ទៈរបស់ព្រះអម្ចាស់ ) ។ ហេតុអ្វីបានជាឥរិយាបថនេះសំខាន់នៅពេលយើងសម្លឹងមើលទៅព្រះអង្គសង្គ្រោះ ?
តើការដឹងអំពីដង្វាយធួនរបស់ព្រះអង្គសង្គ្រោះអាចជួយយើងឲ្យប្រឆាំងនឹងអំពើអាក្រក់ ហើយប្រែចិត្តនៅពេលយើងធ្វើបាបបានដោយរបៀបណា ?

សូមឲ្យសិស្សនិយាយពីគោលការណ៍មួយដែលយើងអាចរៀនពីខគម្ពីរទាំងនេះ ។ សិស្សអាចប្រើពាក្យខុសៗគ្នា ប៉ុន្ដែពួកគេគួរបង្ហាញថា ប្រសិនបើយើងផ្តោតទៅលើព្រះយេស៊ូវគ្រីស្ទ ហើយអនុវត្តសេចក្តីជំនឿទៅលើទ្រង់ យើងនឹងទទួលបាននូវជីវិតដ៏នៅអស់កល្បជានិច្ច ។

សូមឲ្យសិស្សម្នាក់អាន ហេលេមិន 8:16 ឮៗហើយសូមឲ្យសិស្សក្នុងថ្នាក់រកមើលថាតើនរណាទៀតដែលបានបង្រៀនអំពីបេសកកម្មរបស់ព្រះអង្គសង្គ្រោះ ។ សូមឲ្យសិស្សសិក្សាត្រួសៗលើ ហេលេមិន 8:17–22 រកឈ្មោះព្យាការីផ្សេងទៀតដែលបានថ្លែងទីបន្ទាល់អំពីព្រះយេស៊ូវគ្រីស្ទ ។ សូមឲ្យសិស្សគិតអំពីរបៀបដែលព្យាការីកាលពីសម័យបុរាណ ក៏ដូចជាព្យាការីនៅជំនាន់យើងនេះ បានថ្លែងទីបន្ទាល់អំពីបេសកកម្ម និងពលិកម្មដែលធួន របស់ព្រះអង្គសង្គ្រោះ ។

សូមឲ្យសិស្សចែកចាយទីបន្ទាល់របស់ពួកគេថាតើដង្វាយធួនរបស់ព្រះអង្គសង្គ្រោះមានន័យយ៉ាងណានៅក្នុងជីវិតរបស់ពួកគេ ។ អ្នកក៏អាចចែកចាយទីបន្ទាល់របស់អ្នកផងដែរ ។

មេរៀនបន្ទាប់ (ហេលេមិន 10–16)

សូមឲ្យសិស្សស្រមៃថា ព្រះអម្ចាស់បានសន្យានឹងពួកគេថា ទ្រង់នឹងធ្វើអ្វីដែលពួកគេសុំទ្រង់ឲ្យធ្វើ ។ នីហ្វៃមានចិត្តស្មោះត្រង់ជាខ្លាំង រហូតដល់ព្រះអម្ចាស់បានសន្យាការណ៍នេះដល់លោក ហើយបានប្រគល់ដល់លោកនូវអំណាចផ្សារភ្ជាប់ ។ សូមណែនាំឲ្យសិស្សសិក្សា ហេលេមិន 10–11 នៅសប្ដាហ៍នេះ ដោយរកមើលរបៀបដែលនីហ្វៃបានប្រើអំណាចដែលព្រះអម្ចាស់បានប្រគល់ដល់លោកដើម្បីជួយប្រជាជនរបស់លោក ។ សូមឲ្យពួកគេរកមើលពីរបៀបដែលទីសម្គាល់ជាច្រើនអំពីការសូត្រ និងការសុគតរបស់ព្រះយេស៊ូវគ្រីស្ទ ដែលពួកគេអាចរកឃើញ នៅពេលពួកគេសិក្សាពីការព្យាកររបស់សាំយូអែល ជាសាសន៍លេមិននៅក្នុងហេលេមិន 13–16 ។