មេរៀនទី 14
នីហ្វៃទី 1 12 –13
សេចក្តីផ្ដើម
ក្រោយពីនីហ្វៃ បានឃើញការបម្រើខាងសាច់ឈាម និង ដង្វាយធួនរបស់ព្រះអង្គសង្គ្រោះនៅក្នុងការនិមិត្តរបស់គាត់ គាត់បានឃើញថា ក្រោយពីសេចក្ដីសុចរិតដែលមានបួនជំនាន់មក កូនចៅរបស់គាត់ នឹងក្លាយជាមានអំនួត ហើយថាពួកគេនឹងបង្អោនតាមការល្បួងរបស់អារក្ស និង ត្រូវបានបំផ្លាញចោលឡើយ ។ គាត់ក៏បានឃើញសេចក្ដីទុច្ចរិតនៃអស់អ្នកដែលដើរតាមសាតាំង នៅក្នុងព្រះវិហារដ៏ធំ និង គួរខ្ពើមឆ្អើម ។ គាត់បានឃើញថា ពួកគេនឹងដកចេញនូវសេចក្ដីពិតដែលងាយយល់ និង មានតម្លៃពីព្រះគម្ពីរបរិសុទ្ធ បណ្ដាលឲ្យមនុស្សជាច្រើនជំពប់ដួលខាងវិញ្ញាណ ។ ថ្វីបើទិដ្ឋភាពដ៏មានទុក្ខព្រួយទាំងនេះកើតមានក្ដី ការនិមិត្តរបស់នីហ្វៃក៏បានផ្ដល់ដល់គាត់នូវហេតុផលចំពោះក្ដីសង្ឃឹមដ៏ធំផងដែរ ។ គាត់បានឃើញថា ព្រះនឹងរៀបចំផ្លូវសម្រាប់ការស្ដារឡើងវិញនៃដំណឹងល្អនៅក្នុងជំនាន់ចុងក្រោយ ។ គាត់ក៏បានធ្វើជាសាក្សីថា កំណត់ត្រានៃប្រជាជនរបស់គាត់ ( ព្រះគម្ពីរមរមន ) នឹងចេញមក នៅក្នុងជំនាន់ចុងក្រោយ ដើម្បីស្ដារឡើងវិញនូវសេចក្ដីពិតដ៏ច្បាស់ និងពិសេសៗដែលបានបាត់បង់ពីពិភពលោកនេះ ។
កំណត់ចំណាំ ៖ អ្នកប្រហែលជា មិនមានពេលគ្រប់គ្រាន់ ដើម្បីធ្វើតាមចំណុចទាំងអស់នៅក្នុងមេរៀននេះបានទេ ។ នៅពេលអ្នករៀបចំ សូមស្វែងរកការណែនាំពីព្រះវិញ្ញាណបរិសុទ្ធ ដើម្បីដឹងថាតើផ្នែកណានៃមេរៀននេះ ដែលសំខាន់បំផុត ហើយអាចអនុវត្តបានច្រើនបំផុតចំពោះសិស្សរបស់អ្នក ។ អ្នកអាចត្រូវធ្វើការសង្ខេបផ្នែកខ្លះនៃមេរៀននេះ ដើម្បីឲ្យមានពេលគ្រប់គ្រាន់ក្នុងការបង្រៀនគោលលទ្ធិ និង គោលការណ៍ដែលសំខាន់បំផុតពោរពេញដោយប្រសិទ្ធភាព ។
យោបល់សម្រាប់ការបង្រៀន
នីហ្វៃទី1 12
នីហ្វៃមើលឃើញពីអនាគតរបស់សាសន៍នីហ្វៃ និង សាសន៍លេមិន
សូមសង្ខេប នីហ្វៃទី1 12 ដោយពន្យល់ថា ជំពូកនេះគឺជាការបន្ដមួយពីការនិមិត្តរបស់នីហ្វៃ ។ នៅក្នុងនោះ ទេវតាបានបង្ហាញដល់នីហ្វៃនូវរបៀបដែលនិមិត្តសញ្ញានៅក្នុងការនិមិត្តនៃដើមជីវិត នឹងអនុវត្តចំពោះកូនចៅរបស់គាត់ ។ គាត់បានឃើញថា កូនចៅខ្លះរបស់គាត់ នឹងទទួលបានពរជ័យទាំងអស់ពីដង្វាយធួន ។ ទោះយ៉ាងណាក្ដី នីហ្វៃក៏បានឃើញដែរថា កូនចៅរបស់គាត់ នឹងត្រូវបានបំផ្លាញនៅទីបញ្ចប់ដោយកូនចៅរបស់បងប្រុសគាត់ ( សាសន៍លេមិន ) ។ សូមអញ្ជើញសិស្សអាន នីហ្វៃទី1 12:16–19 ។ សូមឲ្យគេរកមើលហេតុផលដែលនីហ្វៃត្រូវបានបំផ្លាញចោល ( សូមមើល នីហ្វៃទី1 12:29 ) ។ សូមរំឭកសិស្សថា នៅពេលពួកគេអនុវត្តសេចក្ដីជំនឿនៅក្នុងព្រះយេស៊ូវគ្រីស្ទ ពួកគេអាចយកឈ្នះលើអំនួត និង ការល្បួងបាន ។
នីហ្វៃទី1 13:1– 9
នីហ្វៃ មើលឃើញនូវព្រះវិហារដ៏ធំ និង គួរខ្ពើមឆ្អើម
សុំឲ្យសិស្សលើកដៃឡើង ប្រសិនបើពួកគេចេះលេងកីឡា ។ សុំឲ្យពួកគេពីរបីនាក់ ចែកចាយពីកីឡាដែលពួកគេលេង ។ សូមពន្យល់ថា នៅក្នុងកីឡា ក្រុមទាំងឡាយ ជារឿយៗរៀបចំសម្រាប់ការប្រកួត ដោយការសិក្សាពីការលេង និង យុទ្ធសាស្ដ្រពីអតីតកាលរបស់ក្រុមប្រជែង ។
-
ហេតុអ្វីបានជាមានប្រយោជន៍ចំពោះក្រុមមួយ ដើម្បីសិក្សាពីយុទ្ធសាស្ដ្ររបស់ក្រុមប្រជែង មុនពេលពួកគេប្រកួត ?
សូមពន្យល់ថា នីហ្វៃបានឃើញនៅក្នុងការនិមិត្តនូវបំណងប្រាថ្នា និង យុទ្ធសាស្ដ្ររបស់អ្នកដែលប្រឆាំងនឹងសាសចក្រនៃព្រះយេស៊ូវគ្រីស្ទ នៅក្នុងថ្ងៃចុងក្រោយ ។ សូមលើកទឹកចិត្តសិស្សឲ្យស្វែងរកយុទ្ធសាស្ដ្រទាំងនោះ នៅពេលពួកគេសិក្សានៅក្នុងជំពូកនេះ ដូច្នេះពួកគេអាចរៀបចំខ្លួន ដើម្បីស្គាល់នូវយុទ្ធសាស្ដ្រ ហើយមិនត្រូវបានបោកបញ្ឆោតដោយយុទ្ធសាស្ដ្រទាំងនោះឡើយ ។
សូមអញ្ជើញសិស្សពីរបីនាក់ឲ្យប្ដូរវេនគ្នាអាន នីហ្វៃទី1 13:1–4, 6 ឮៗ ។ សុំឲ្យសិស្សម្នាក់រកនូវក្រុមដែល នីហ្វៃបានឃើញថាបានបង្កើតឡើងក្នុងចំណោមសាសន៍ដទៃនៅក្នុងថ្ងៃចុងក្រោយ ។
ដើម្បីជួយសិស្សឲ្យយល់អត្ថន័យនៃខគម្ពីរទាំងនេះ សូមចែកចាយនូវវិចារណកថាខាងក្រោមដោយ អែលឌើរ ប្រ៊ូស អ័រ ម៉ាក់ខន់ឃី នៃកូរ៉ុមនៃពួកសាវកដប់ពីរនាក់ ។ សុំឲ្យសិស្សស្ដាប់ដោយប្រុងប្រយ័ត្ន និង រកនូវនិយមន័យមួយនៃព្រះវិហារដ៏ធំ និង គួរខ្ពើមឆ្អើម ។
« ចំណងជើង សាសនាចក្រនៃអារក្ស និង ព្រះវិហារដ៏ធំ និង គួរខ្ពើមឆ្អើម ត្រូវបានប្រើដើម្បីសម្គាល់អស់ទាំង… អង្គការដែលមានឈ្មោះ ឬ ទ្រង់ទ្រាយអ្វីក៏ដោយ — មិនថាខាងនយោបាយ ទស្សនវិជ្ជា វិស័យអប់រំ សេដ្ឋកិច្ច សង្គម ភាតរភាព ពលរដ្ឋ ឬ សាសនា— ដែលត្រូវបានធ្វើឡើងដើម្បីនាំមនុស្សនៅក្នុងផ្នែកមួយ ដែលនាំចេញពីព្រះ និង ក្រឹត្យវិន័យរបស់ទ្រង់ក្តី ហើយហេតុដូច្នេះ ចេញពីសេចក្ដីសង្គ្រោះនៅក្នុងនគរនៃព្រះ » ( គោលលទ្ធិមរមន កំណែទី 2. [1966], 137–38) ។
សូមបញ្ជាក់ថា ឃ្លា « ព្រះវិហារដ៏ធំ និង គួរខ្ពើមឆ្អើម » មិនសំដៅលើនិកាយ ឬ ព្រះវិហារជាក់លាក់ណាមួយ នោះទេ ។ វាសំដៅលើគ្រប់អង្គការណាទាំងអស់ដែលធ្វើឡើង ដើម្បីដឹកនាំមនុស្សឲ្យឃ្លាតចេញពីព្រះ និង ក្រឹត្យវិន័យរបស់ទ្រង់ ។
អ្នកអាចលើកទឹកចិត្តសិស្សឲ្យសរសេរឃ្លា អង្គការទាំងអស់ ដែលធ្វើឡើងដើម្បីដឹកនាំមនុស្សឃ្លាតចេញពីព្រះ និង ក្រឹត្យវិន័យរបស់ទ្រង់ នៅរឹមទំព័រក្បែរ នីហ្វៃទី1 13:6 ។
-
ហេតុអ្វីអ្នកជឿថា វាសំខាន់ដើម្បីដឹងថា សាតាំងរៀបចំកម្លាំងរបស់វា ដើម្បីដឹកនាំយើងឃ្លាតចេញពីព្រះ និង ក្រឹត្យវិន័យរបស់ទ្រង់ ?
សូមពន្យល់ថា នីហ្វៃបានរៀបរាប់ពីព្រះវិហារដ៏ធំ និង គួរខ្ពើមឆ្អើម ។ សូមអញ្ជើញសិស្សម្នាកអាន នីហ្វៃទី1 13:5– 9 ឮៗ ។
-
តើអ្វីដែល អស់អ្នកនៅក្នុងព្រះវិហារដ៏ធំ និង គួរខ្ពើមឆ្អើមចង់បាន ? ( សូមមើល នីហ្វៃទី1 13: 7–8 ) ។
-
ដោយយោងតាម នីហ្វៃទី1 13:5, 9 តើអ្នកដែលនៅក្នុងព្រះវិហារដ៏ធំ និង គួរខ្ពើមឆ្អើមចង់សម្រេចបានអ្វីខ្លះ ? ហេតុអ្វី ? ( អ្នកអាចសរសេរសេចក្ដីពិតខាងក្រោមនៅលើក្ដារខៀន ៖ សាតាំង និង អ្នកដើរតាមវា ចង់បំផ្លាញពួកបរិសុទ្ធនៃព្រះ និង នាំពួកគេទៅកាន់ការជាប់ឃុំឃាំង ។ )
-
តើការដឹងពីបំណងប្រាថ្នា និង គោលបំណងរបស់សាតាំង និង អ្នកដើរតាមវា ជួយយើងឲ្យប្រយុទ្ធនឹងពួកវាយ៉ាងដូចម្ដេច ?
សូមប្រាប់សិស្សថា បន្ដិចទៀតនៅក្នុងជំពូកនេះ ពួកគេនឹងរៀនអំពីរបៀបមួយដែលព្រះវិហារដ៏ធំ និង គួរខ្ពើមឆ្អើម បានព្យាយាមបំផ្លាញអ្នកដែលស្វែងរកព្រះ ។
នីហ្វៃទី1 13:10–19
នីហ្វៃមើលឃើញព្រះហស្ដរបស់ព្រះ នៅក្នុងការបង្កើតដែនដីសេរីភាពមួយ ដែលដំណឹងល្អនឹងត្រូវបានស្ដារឡើងវិញ
សូមថ្លែងទីបន្ទាល់ថា ព្រះអម្ចាស់បានបញ្ជាក់ថា កិច្ចការរបស់ទ្រង់នឹងទៅមុខ ទោះបីជាព្រះវិហារដ៏ធំ និង គួរខ្ពើមឆ្អើមខិតខំធ្វើឲ្យប្រជាជនជំពប់ដួលខាងវិញ្ញាណក៏ដោយ ។ ទ្រង់ធ្វើដូច្នេះ ដោយការរៀបចំផ្លូវសម្រាប់ការស្ដារឡើងវិញនៃដំណឹងល្អរបស់ទ្រង់ ។
សេចក្ដីថ្លែងការណ៍ក្នុងបញ្ជីខាងក្រោម សង្ខេបពីព្រឹត្តិការណ៍សំខាន់ដែល នីហ្វៃបានឃើញនៅក្នុងការនិមិត្តរបស់គាត់ ។ សូមឲ្យសិស្សអាន នីហ្វៃទី1 13:10–19 និង ផ្គូផ្គងព្រះគម្ពីរយោងនីមួយៗក្នុងបញ្ជីខាងក្រោម ទៅនឹងព្រឹត្តិការណ៍ដែលវាពណ៌នា ។ ( អ្នកអាចបង្ហាញព្រះគម្ពីរយោងទាំងនេះ និង សេចក្ដីថ្លែងការណ៍នៅលើក្ដារខៀន មុនចាប់ផ្ដើមបង្រៀន ។ ឬ អ្នកអាចធ្វើក្រដាសចែក ដែលមានព្រះគម្ពីរយោងទាំងនេះ និង សេចក្ដីថ្លែងការណ៍ ។ ខាងក្រោម គឺជាព្រះគម្ពីរយោង ដែលបានផ្គូផ្គងទៅនឹងសេចក្ដីថ្លែងការណ៍ដែលត្រឹមត្រូវ ។ ដើម្បីឲ្យសកម្មភាពនេះ បានជោគជ័យ អ្នកនឹងត្រូវផ្លាស់ប្ដូរលំដាប់នៃសេចក្ដីថ្លែងការណ៍ នៅពេលអ្នកបង្ហាញវានៅលើក្ដារខៀន ឬ ដាក់វាលើក្រដាសចែក ) ។
-
នីហ្វៃទី1 13:12កូឡុំប៊ឺសបានធ្វើដំណើរទៅអាមេរិក
-
នីហ្វៃទី1 13:13ពួកអ្នកធម្មយាត្រា ចេញទូកទៅអាមេរិក ដើម្បីស្វែងរកសេរីភាពខាងសាសនា
-
នីហ្វៃទី1 13:14ជនជាតិអាមេរិកដើម ត្រូវបានបណ្ដេញចេញពីដែនដីរបស់ពួកគេ
-
នីហ្វៃទី1 13:15សាសន៍ដទៃរីកចម្រើនឡើងនៅក្នុងអាមេរិក
-
នីហ្វៃទី1 13:16 –19ទោះបីជាកងទ័ពខ្មាំងសត្រូវមានចំនួនច្រើនក៏ដោយ កងទ័ពបដិវត្តន៍អាមេរិកបានជ័យជំនះ
នៅពេលសិស្សចែកចាយចម្លើយរបស់ពួកគេ អ្នកអាចលើកទឹកចិត្តពួកគេឲ្យសរសេរពាក្យ ឬ ឃ្លាគន្លឹះមួយនៅក្នុងព្រះគម្ពីររបស់ពួកគេ ក្បែរវគ្គនីមួយៗ ។ ជាឧទាហរណ៍ ពួកគេអាចសរសេរ កូឡុំប៊ឺស ក្បែរ នីហ្វៃទី1 13:12 ។
-
ដោយយោងតាម នីហ្វៃទី1 13:12 ហេតុអ្វីបានជាកូឡុំប៊ឺស ធ្វើដំណើរទៅអាមេរិក ?
-
យោងតាមនីហ្វៃទី1 13:13 ហេតុអ្វីបានជាពួកអ្នកធម្មយាត្រាផ្លាស់ប្ដូរលំនៅទៅអាមេរិក ?
-
ដោយយោងតាម នីហ្វៃទី1 13:15– 19 ហេតុអ្វីបានជាសាសន៍ដទៃរីកចម្រើន និង មានឯករាជ្យភាពពី « សាសន៍ផ្សេងទៀតទាំងអស់ » ?
សូមអញ្ជើញសិស្សម្នាក់អានសេចក្ដីថ្លែងការណ៍ខាងក្រោមឮៗ ដោយប្រធាន យ៉ូសែប អេហ្វ ស៊្មីធ ៖
« ជាតិអាមេរិកដ៏អស្ចារ្យនេះ ព្រះដ៏មានមហិទ្ធិឫទ្ធិបានលើកឡើងដោយអំណាចនៃព្រះហស្ដដ៏មានគ្រប់ព្រះចេស្តា ដ៏ខ្ពស់បំផុតរបស់ទ្រង់ ដើម្បីវាអាចកើតមាននគរនៃព្រះនៅថ្ងៃចុងក្រោយនៅលើផែនដី ។ ប្រសិនបើព្រះអម្ចាស់មិនបានរៀបចំផ្លូវដោយការដាក់គ្រឹះនៃជាតិដ៏រុងរឿងនេះទេ វានឹងមិនអាចកើតមាននោះទេ ( នៅក្រោមច្បាប់ដ៏តឹងរ៉ឹង និង ការប្រកាន់សាសនានៃរដ្ឋាភិបាលនៃរាជានិយមរបស់ពិភពលោក ) ក្នុងការដាក់គ្រឹះសម្រាប់ការមកដល់នៃនគរដ៏មហិមារបស់ទ្រង់ ។ ព្រះអម្ចាស់បានធ្វើការណ៍នេះ » ( គោលលទ្ធិនៃដំណឹងល្អ 5th ed. [1939], ទំព័រ 409 ) ។
សូមថ្លែងទីបន្ទាល់ថា ព្រះអម្ចាស់បានរៀបចំផ្លូវមួយសម្រាប់ការស្ដារឡើងវិញ ដោយការស្ថាបនាប្រទេសមួយ ឲ្យមានសេរីភាពខាងសាសនា ដែលទ្រង់អាចស្ដារឡើងវិញនូវសាសនាចក្ររបស់ទ្រង់ ។ សូមថ្លែងទីបន្ទាល់ថា ព្រះអម្ចាស់បានរៀបចំ ហើយនឹងបន្ដរៀបចំ ផ្លូវមួយសម្រាប់ដំណឹងល្អដែលបានស្ដារឡើងវិញរបស់ទ្រង់ បានចូលទៅដល់គ្រប់ជាតិសាសន៍ទាំងអស់ ។
ប្រសិនបើអ្នកកំពុងបង្រៀនមេរៀននេះនៅក្នុងប្រទេសមួយ ក្រៅពីសហរដ្ឋអាមេរិក សូមសួរ ៖
-
តើព្រះអម្ចាស់បានរៀបចំផ្លូវមួយសម្រាប់ការបង្រៀនដំណឹងល្អដែលបានស្ដារឡើងវិញ នៅក្នុងប្រទេសយើងដោយរបៀបណា ?
នីហ្វៃទី1 13:20–42
នីហ្វៃមើលឃើញពីសាសន៍ដទៃនៅថ្ងៃអនាគត ជាមួយនឹងព្រះគម្ពីរបរិសុទ្ធ ព្រះគម្ពីរមរមន និង ព្រះគម្ពីរនៅថ្ងៃចុងក្រោយ
សូមអញ្ជើញសិស្សម្នាក់ឲ្យអាន នីហ្វៃទី1 13:20–24 ។ សុំឲ្យគាត់រកមើលវត្ថុដែលនីហ្វៃ បានឃើញពួកអាណានិគមអាមេរិកដើម « បាននាំចេញទៅក្នុងចំណោមពួកគេ » ។ សូមលើកព្រះគម្ពីរបរិសុទ្ធមួយក្បាលឡើង ហើយពន្យល់ថា វាគឺព្រះគម្ពីរនៅក្នុងការនិមិត្តរបស់នីហ្វៃ ។ អ្នកអាចអញ្ជើញសិស្សឲ្យសរសេរ ព្រះគម្ពីរបរិសុទ្ធ នៅគែមទំព័រក្បែរនីហ្វៃទី1 13:20 ។
សូមពន្យល់ថា ទេវតាបានបង្រៀននីហ្វៃថា ព្រះគម្ពីរបរិសុទ្ធ គឺជាកំណត់ត្រា « ដ៏មានតម្លៃ » ( នីហ្វៃទី1 13:23 ) ។ នៅពេលវិវរណៈជាច្រើននៅក្នុងព្រះគម្ពីរបរិសុទ្ធ ត្រូវបានកត់ត្រាពីដើមដំបូង វា « មាននូវភាពពោរពេញនៃដំណឹងល្អរបស់ព្រះអម្ចាស់ » ( នីហ្វៃទី1 13:24 ) ។ សុំឲ្យសិស្សម្នាក់ឲ្យអាន នីហ្វៃទី1 13:26–27 ឮៗ ។
-
តើព្រះវិហារដ៏ធំ ហើយគួរខ្ពើមឆ្អើមនោះបានដកអ្វីខ្លះចេញពីព្រះគម្ពីរបរិសុទ្ធ ? ហេតុអ្វីបានជារឿងទាំងនេះ ត្រូវបានដកចេញ ?
សុំឲ្យសិស្សម្នាក់ឲ្យទៀតអាន នីហ្វៃទី1 13:29 ឮៗ ។
-
តើមានអ្វីកើតឡើង ដែលជាលទ្ធផលនៃការដកចេញនូវរឿងដ៏ច្បាស់ និងពិសេសៗ និង សេចក្ដីសញ្ញាជាច្រើននៃព្រះអម្ចាស់ ពីព្រះគម្ពីរបរិសុទ្ធ ?
សូមឲ្យសិស្សបួននាក់ប្ដូរវេនគ្នាអានឮៗ នៅក្នុង នីហ្វៃទី1 13:34–36, 39 ។ សុំឲ្យសិស្សក្នុងថ្នាក់រកមើលអ្វីដែលព្រះអម្ចាស់នឹងធ្វើ ដើម្បីជួយមនុស្សឲ្យយកឈ្នះលើការខិតខំនៃព្រះវិហារដ៏ធំ និង គួរខ្ពើមឆ្អើម ។
-
ដោយយោងតាម នីហ្វៃទី1 13:34 តើព្រះអម្ចាស់នឹងនាំអ្វីចេញមក ដោយសារតែសេចក្ដីមេត្តាករុណារបស់ទ្រង់ ?
-
យោងតាមនីហ្វៃទី1 13:35–36 តើអ្វីនឹង « ត្រូវបានលាក់ទុក » ដើម្បីឲ្យបានចេញមកដល់ពួកសាសន៍ដទៃ ? ( អ្នកអាចផ្ដល់យោបល់ថា សិស្សគួរតែសរសេរក្បែរ នីហ្វៃទី1 13:35 ថា « សេចក្ដីទាំងនេះ » សំដៅលើព្រះគម្ពីរមរមន ) ។
-
យោងតាម នីហ្វៃទី1 13:39 តើមានអ្វីផ្សេងទៀត ដែលព្រះអម្ចាស់នឹងនាំចេញមកនៅក្នុងជំនាន់ចុងក្រោយ បន្ថែមលើព្រះគម្ពីរមរមន ? តើ « ព្រះគម្ពីរផ្សេងទៀត » ដែលព្រះអម្ចាស់បាននាំចេញមក ជាផ្នែកនៃការស្ដារឡើងវិញមានអ្វីខ្លះ ? ( ព្រះគម្ពីរគោលលទ្ធិ និង សេចក្ដីសញ្ញា ព្រះគម្ពីរមុក្ដាដ៏មានតម្លៃមហិមា និង ការបកប្រែរបស់យ៉ូសែប ស្ម៊ីធ ពីព្រះគម្ពីរបរិសុទ្ធ ) ។
សូមអញ្ជើញសិស្សឲ្យអាន នីហ្វៃទី1 13:40–41 ។ សូមឲ្យពួកគេរកមើលការពិពណ៌នាមួយអំពីអ្វីដែលព្រះគម្ពីរនៃការស្ដារឡើងវិញ នឹងធ្វើឲ្យមនុស្សទាំងអស់ស្គាល់ ។ ក្រោយពីសិស្សចែកចាយអ្វីដែលពួកគេបានរកឃើញហើយ សូមលើកព្រះគម្ពីរបរិសុទ្ធឡើង ហើយសូមចែកចាយនូវទីបន្ទាល់របស់អ្នកអំពីសេចក្ដីពិតពេញលេញរបស់វា ។ សូមលើកព្រះគម្ពីរមរមនឡើង ហើយដាក់វាជាមួយនឹងព្រះគម្ពីរបរិសុទ្ធ ។ សូមថ្លែងទីបន្ទាល់ថា ព្រះគម្ពីរមរមន និង ព្រះគម្ពីរនៅថ្ងៃចុងក្រោយ បានស្ដារឡើងវិញនូវសេចក្ដីពិតដ៏ច្បាស់ និងពិសេសៗដែលជួយយើងឲ្យដឹងថា ព្រះយេស៊ូវគ្រីស្ទ គឺជាព្រះរាជបុត្រានៃព្រះ ហើយវាជួយយើងឲ្យដឹងពីរបៀបដើម្បីចូលមករកទ្រង់ ។
សុំឲ្យសិស្សរកឃ្លាមួយនៅចុងឃ្លាក្នុង នីហ្វៃទី1 13:41 ដែលពិពណ៌នាពីអ្វីដែលព្រះអម្ចាស់នឹងធ្វើ ជាមួយនឹងកំណត់ត្រានៃសាសន៍យូដា ( ព្រះគម្ពីរបរិសុទ្ធ ) និង កំណត់ត្រានៃកូនចៅរបស់នីហ្វៃ ( ព្រះគម្ពីរមរមន ) ។ សូមថ្លែងទីបន្ទាល់ថា កំណត់ត្រាទាំងនេះគឺ « ត្រូវបានតាំងឡើងជារបស់តែមួយ » ( នីហ្វៃទី1 13:41 ) និង បាន « រួមទៅជាមួយគ្នា » ( នីហ្វៃទី2 3:12 ) ដើម្បីជួយយើងឲ្យដឹងច្បាស់ពីរបៀបដើម្បីចូលមករកព្រះអង្គសង្គ្រោះ ។
ដើម្បីជួយសិស្សកោតសរសើរពីរបៀបដែលការស្ដារឡើងវិញនៃសេចក្ដីពិតដ៏ច្បាស់ និងពិសេសៗនេះ មានឥទ្ធិពលលើជីវិតរបស់ពួកគេ សូមអញ្ជើញពួកគេឲ្យសញ្ជឹងគិតសំណួរដូចខាងក្រោម ៖
-
តើព្រះគម្ពីរមរមនបានមានឥទ្ធិពលយ៉ាងដូចម្ដេចលើទីបន្ទាល់របស់អ្នកអំពីព្រះយេស៊ូវគ្រីស្ទ ហើយបានជួយអ្នកឲ្យចូលមកជិតទ្រង់ដោយរបៀបណា ?
ក្រោយពីផ្ដល់ពេលវេលាឲ្យសិស្សគិតហើយ សូមអញ្ជើញសិស្សពីរបីនាក់ឲ្យចែកចាយចម្លើយរបស់ពួកគេ ។ អ្នកក៏អាចចែកចាយទីបន្ទាល់របស់អ្នកផ្ទាល់អំពីព្រះគម្ពីរមរមរន និង ពីរបៀបដែលវាបានពង្រឹងទីបន្ទាល់របស់អ្នកអំពីព្រះយេស៊ូវគ្រីស្ទ និង បានជួយអ្នកឲ្យដឹងពីរបៀបដើម្បីចូលទៅរកទ្រង់ ។ នៅពេលអ្នកបញ្ចប់មេរៀន សូមអញ្ជើញឲ្យសិស្សសិក្សាព្រះគម្ពីរមរមនដោយយកចិត្តទុកដាក់ពេញមួយឆ្នាំ ដោយរកមើលការបង្រៀន និង ដំណើររឿងដែលពង្រឹងដល់ទីបន្ទាល់របស់ពួកគេ អំពីព្រះយេស៊ូវគ្រីស្ទ និង បង្រៀនពួកគេពីរបៀបដើម្បីចូលទៅរកទ្រង់ ។
វិចារណកថា និង ព័ត៌មានសាច់រឿង
នីហ្វៃទី1 12–14 ។ សេចក្តីសង្ខេប
តារាងខាងក្រោម ជួយយើងឲ្យមើលឃើញពីព្រឹត្តិការណ៍សំខាន់ៗ ដែលនាំទៅរកការស្ថាបនានៃនគររបស់ព្រះនៅលើផែនដី ៖
នីហ្វៃទី1 13 ។ តើពាក្យថា សាសន៍ដទៃ នៅក្នុងព្រះគម្ពីរមរមនន័យយ៉ាងណា ?
សាសន៍ដទៃ មានន័យថា « ជាតិសាសន៍ជាច្រើន » ។ វាសំដៅលើ (1) អស់អ្នកណាដែលមិនមែនជាពូជពង្សនៃអ៊ីស្រាអែល (2) អស់អ្នកណាដែលមិនជឿលើព្រះនៃអ៊ីស្រាអែល ឬ ដែលមិនមានដំណឹងល្អ ដោយមិនគិតពីពូជអំបូររបស់ពួកគេ និង (3) អ្នកណាដែលមិនមែនមកពី ឬ មិនបានរស់នៅក្នុងដែនដីយូដា ។ ឧទាហរណ៍ដូចជា ពួកអ្នកធម្មយាត្រានិង ពួកអាណានិគមនៅក្នុងដែនដីអាមេរិក ត្រូវបានហៅថាជា សាសន៍ដទៃ នៅក្នុង នីហ្វៃទី1 13:3–13 អ្នកដែលបាននាំព្រះគម្ពីរមរមនចេញមក ត្រូវបានហៅថាជា សាសន៍ដទៃ នៅក្នុង នីហ្វៃទី1 13:34 គោលលទ្ធិ និង សេចក្ដីសញ្ញា និង មុក្តាដ៏មានតម្លៃមហិមាក៏ត្រូវបាននាំមកដោយសាសន៍ដទៃដែរ ( សូមមើល នីហ្វៃទី1 13:39 ) ។ សហរដ្ឋអាមេរិក ត្រូវបានហៅថាជា ពួកសាសន៍ដទៃមួយ នៅក្នុង នីហ្វៃទី1 13:34, 39
នីហ្វៃទី1 13:20–29 ។ សេចក្ដីពិតដ៏ច្បាស់ និងពិសេសៗត្រូវបានដកចេញពីព្រះគម្ពីរបរិសុទ្ធ
អែលឌើរ ជែហ្វ្រី អ័រ ហូឡិន នៃកូរ៉ុមនៃពួកសាវកដប់ពីរនាក់ បានបង្រៀនថា ៖ « ធាតុ … ដែលបានបាត់ពីព្រះគម្ពីរបរិសុទ្ធ គឺ ‹ ងាយយល់ និង មានតម្លៃ › ។ ពួកគេងាយយល់តាមភាពសាមញ្ញ និង ភាពច្បាស់លាស់របស់វា ផ្តល់ភាពងាយស្រួលដល់‹ ការយល់ពី … មនុស្ស › ។ ពួកគេមានតម្លៃក្នុងបរិសុទ្ធភាព និង តម្លៃដ៏មហិមារបស់វា សារៈសំខាន់ក្នុងការសង្គ្រោះ និង សារៈសំខាន់ដ៏នៅអស់កល្បជានិច្ចរបស់ពួកវាចំពោះកូនចៅរបស់ព្រះ » ( ព្រះគ្រីស្ទ និង សេចក្ដីសញ្ញាថ្មី ៖ សារលិខិតនៃព្រះម៊ែស៊ី ពីព្រះគម្ពីរមរមន 1997] ទំព័រ 5 ) ។
យ៉ូសែប ស្ម៊ីធ បានបង្រៀនថា « ចំណុចសំខាន់ជាច្រើន ដែលប៉ះពាល់ដល់ការសង្រ្គោះមនុស្ស ត្រូវបានដកចេញពីព្រះគម្ពីរបរិសុទ្ធ ឬ ត្រូវបានបាត់មុនពេលវាត្រូវបានគេចងក្រង » (Teachings of Presidents of the Church: Joseph Smith [ 2007 ] ទំព័រ 217 ) ។ គាត់ក៏បានមានប្រសាសន៍ថា គាត់ជឿលើព្រះគម្ពីរបរិសុទ្ធ « ដោយសារវាអាន នៅពេលវាចេញមកប៊ិចរបស់អ្នកសរសេរដើម » ហើយថា « អ្នកបកប្រែដ៏ល្ងង់ខ្លៅ អ្នកប្រែភាសាដ៏ខ្ជីខ្ជា ឬ សង្ឃដែលធ្វើ និង បំផ្លាញ បានបង្កើតកំហុសជាច្រើន » (ការបង្រៀន ៖ យ៉ូសែប ស្ម៊ីធ ទំព័រ 207 ) ។
អ្នកអាចបង្ហាញថា សេចក្ដីថ្លែងការណ៍ទាំងនេះ ថ្លែងដោយយ៉ូសែប ស្ម៊ីធ ត្រូវបានបញ្ចូលនៅក្នុង Bible Dictionary ( សូមមើល សេចក្តីណែនាំដល់បទគម្ពីរទាំងឡាយ « ព្រះគម្ពីរបរិសុទ្ធ ») ។ អ្នកអាចលើកទឹកចិត្តសិស្សឲ្យគូសចំណាំសេចក្ដីថ្លែងការណ៍ទាំងនេះ នៅក្នុងព្រះគម្ពីររបស់ពួកគេ ។
នីហ្វៃទី1 13:32–40 ។ សេចក្ដីដ៏ច្បាស់ និងពិសេសៗទាំងឡាយត្រូវបានស្ដារឡើងវិញ
ប្រធាន ជែមស៍ អ៊ី ហ្វោស្ត នៃគណៈប្រធានទីមួយ បានមានប្រសាសន៍ថា កិច្ចការបទដ្ឋាននៃសាសនាចក្រ គឺជារបៀបដ៏សំខាន់មួយនៃសេចក្ដីពិតដែលបានបាត់បង់តែត្រូវបានស្ដារឡើងវិញ ៖
« ព្រះគម្ពីរមរមនគឺជាសក្ខីបទមួយទៀតអំពីព្រះយេស៊ូវគ្រីស្ទ។ វាបានស្ដារឡើងវិញនូវសេចក្ដីពិតពិសេសៗទាំងឡាយដែលទាក់ទងនឹងការធ្លាក់ ដង្វាយធួន ការរស់ឡើងវិញ និង ជីវិតបន្ទាប់ពីសេចក្ដីស្លាប់នេះទៅ ។
« ពីមុនការស្ដារឡើងវិញ ស្ថានសួគ៌ធ្លាប់បានបិទជាច្រើនសតវត្សន៍ ។ ប៉ុន្ដែដោយមានព្យាការី និង សាវកនៅលើផែនដីម្ដងទៀត ស្ថានសួគ៌បានបើកជាថ្មីម្ដងទៀត ដោយមានទស្សននិមិត្ត និង វិវរណៈ ។ វិវរណៈជាច្រើន ដែលបានមកដល់ព្យាការីយ៉ូសែប ស្ម៊ីធ ត្រូវបានកត់ត្រាទុកនៅក្នុងសៀវភៅមួយ ដែលក្លាយជា គោលលទ្ធិ និង សេចក្ដីសញ្ញា ។ វារួមមានទស្សនៈវិស័យជ្រៅជ្រះច្បាស់បន្ថែមទៀត អំពីគោលការណ៍ និង ពិធីបរិសុទ្ធ ហើយវាជាប្រភពដែលមានទាក់ទងនឹងរចនាសម្ព័ន្ធនៃបព្វជិតភាព ។ លើសពីនេះទៀត យើងមានគម្ពីរគំរូមួយទៀត ដែលហៅថា មុក្ដាដ៏មានតម្លៃមហិមា ។ វារួមមានព្រះគម្ពីរម៉ូសេ ដែលបានមកដោយវិវរណៈទៅដល់ព្យាការីយ៉ូសែប ស្ម៊ីធ និង ព្រះគម្ពីរអ័ប្រាហាំ ដែលគាត់បានបកប្រែពីការក្រដាសរមូរទិញពីសាសន៍អេស៊ីព្ទ ។ ចេញពីការណ៍នេះ យើងមិនត្រឹមតែបានរៀនជាច្រើនបន្ថែមទៀតអំពី ម៉ូសេ អ័ប្រាហាំ អេណុស និង ព្យាការីផ្សេងទៀតនោះទេ ប៉ុន្ដែថែមទាំងសេចក្ដីលម្អិតជាច្រើនទៀតអំពីការបង្កបង្កើត ។ យើងដឹងថា ដំណឹងល្អនៃព្រះយេស៊ូវគ្រីស្ទ ត្រូវបានបង្រៀនទៅដល់ព្យាការីទាំងអស់ តាំងពីដើមដំបូង —តាំងពីជំនាន់អ័ដាមមកម៉្លេះ » ( « The Restoration of All Things » Ensign ឬ Liahona ខែ ឧសភា ឆ្នាំ 2006 ទំព័រ 67–68 ) ។
ការបកប្រែរបស់យ៉ូសែប ស្ម៊ីធ លើព្រះគម្ពីរបរិសុទ្ធ ក៏ជួយស្ដារឡើងវិញនូវសេចក្ដីពិតដែលងាយយល់ និង ដ៏មានតម្លៃជាច្រើនទៀត ។ ការបកប្រែរបស់យ៉ូសែប ស្ម៊ីធ គឺជា « ការពិនិត្យឡើងវិញ ឬ កំណែបកប្រែរបស់សេ្ដចជែមស៍ នៃព្រះគម្ពីរបរិសុទ្ធជាភាសាអង់គ្លេស ដែលព្យាការី យ៉ូសែប ស្ម៊ីធ បានចាប់ផ្ដើមនៅខែ មិថុនា ឆ្នាំ 1830 ។ គាត់ត្រូវបានដាក់បញ្ញត្តិដោយព្រះ ឲ្យធ្វើការបកប្រែ និង ចាត់ទុកវាជាផ្នែកមួយនៃការហៅបម្រើរបស់គាត់ ជាព្យាការីម្នាក់ ។…
« ការបកប្រែរបស់យ៉ូសែប ស្ម៊ីធ បានស្ដារឡើងវិញនូវសេចក្ដីដ៏ច្បាស់ និង ពិសេសៗដែលបានបាត់បង់ពីព្រះគម្ពីរបរិសុទ្ធ (នីហ្វៃទី1 13) ។ ទោះបីជា វាមិនមែនជាព្រះគម្ពីរបរិសុទ្ធនៃសាសនាចក្រជាផ្លូវការក្ដី ក៏ការបកប្រែនេះបានផ្ដល់នូវទស្សនៈវិស័យជ្រៅជ្រះគួរឲ្យចាប់អារម្មណ៍ជាច្រើន ហើយវាមានតម្លៃជាខ្លាំងដើម្បីយល់ពីព្រះគម្ពីរបរិសុទ្ធដែរ ។ វាក៏ជាសាក្សីមួយ ចំពោះការហៅឲ្យបម្រើ និង ការបម្រើដ៏ទេវភាពនៃព្យាការីយ៉ូសែប ស្ម៊ីធ » ( សេចក្ដីណែនាំដល់បទគម្ពីរទាំងឡាយ « ការបកប្រែដោយយ៉ូសែប ស្ម៊ីធ » scriptures.lds.org សូមមើលផងដែរ នីហ្វៃទី23:11; History of the Church 1:238) ។
ដោយការបន្ដមានវិវរណៈនៅក្នុងសាសនាចក្ររបស់ព្រះអម្ចាស់ នោះដំណើរការនៃការនាំមកនូវគោលលទ្ធិ និង គោលការណ៍ដ៏ច្បាស់ និង ពិសេសៗនៃដំណឹងល្អ ទៅដល់មនុស្សតាមរយៈពិភពលោក នឹងបន្ដ ។ ការបង្រៀនដែលបំផុសគំនិតរបស់ព្យាការី និង សាវករបស់ព្រះ គឺសំខាន់ដើម្បីយល់ពីសេចក្ដីពិតដ៏ច្បាស់ និង ពិសេសៗនៃដំណឹងល្អ ។
នីហ្វៃទី1 10–14 ។ សេចក្ដីសង្ខេបនៃទស្សននិមិត្តរបស់នីហ្វៃ