មរ៉ូណៃ 4–5

សេចក្តីផ្ដើម

លោកមរ៉ូណៃបានកត់ត្រាពីសេចក្ដីណែនាំរបស់ព្រះអង្គសង្គ្រោះដល់ពួកសាសន៍នីហ្វៃ ទាក់ទងទៅនឹងការបម្រើពិធីសាក្រាម៉ង់ រួមមានការអធិស្ឋានដែលអ្នកកាន់បព្វជិតភាពត្រូវប្រើនៅក្នុងការប្រសិទ្ធិពរដល់នំប៉័ង និងទឹក ។

សូមអញ្ជើញឲ្យមានព្រះវិញ្ញាណបរិសុទ្ធជាសាក្សីដល់សេចក្ដីពិតនេះ

នៅពេលអ្នកជួយសិស្សឲ្យរក ហើយយល់ពីគោលការណ៍ និងគោលលទ្ធិនានានៃដំណឹងល្អ សូមបង្រៀនតាមរបៀបមួយដែលអញ្ជើញឲ្យមានព្រះវិញ្ញាណបរិសុទ្ធជាសាក្សីដល់សេចក្ដីពិតនេះ ។ នៅពេលសិស្សទទួលបានសាក្សីខាងវិញ្ញាណនៃគោលលទ្ធិនៃដំណឹងល្អហើយ នោះពួកគេនឹងចង់ធ្វើសកម្មភាព និងរស់នៅតាមដំណឹងល្អកាន់តែពេញលេញជាងមុន ។

យោបល់សម្រាប់ការបង្រៀន

មរ៉ូណៃ 4–5

លោកមរ៉ូណៃពន្យល់ពីរបៀបដែលពិធីសាក្រាម៉ង់ត្រូវបម្រើ

ប្រសិនបើអាច សូមបង្ហាញនូវថាសដាក់នំប៉័ង និងទឹកនៃពិធីសាក្រាម៉ង់ ។ ( ខណៈពេលដែលវាអាចបង្ហាញរបស់ទាំងនេះ អ្នកមិនគួរមានបំណងណាមួយក្នុងការថតចម្លងពិធីបរិសុទ្ធនានាពីពិធីសាក្រាម៉ង់នោះ ឡើយ )។ សូមចែកក្រដាសមួយសន្លឹកដល់សិស្ស ហើយសូមឲ្យពួកគេសរសេរពីការចងចាំរបស់ពួកគេនូវការអធិស្ឋានសាក្រាម៉ង់មួយ តាមដែលពួកគេអាចធ្វើទៅបាន ។ ក្រោយពីសិស្សបានមានពេលគ្រប់គ្រាន់ហើយ សូមពន្យល់ថា ជាផ្នែកនៃកំណត់ត្រារបស់លោក លោកមរ៉ូណៃបានបញ្ចូលការអធិស្ឋានទាំងនេះ ដូចដែលបានប្រទានដោយព្រះអម្ចាស់ សម្រាប់ការគ្រប់គ្រងក្នុងពិធីសាក្រាម៉ង់ ។ សូមឲ្យពួកគេបើកទៅ មរ៉ូណៃ 4:3 ឬ មរ៉ូណៃ 5:2 ហើយពិនិត្យមើលចម្លើយរបស់គេ ។ បន្ទាប់មក សូមសួរថា ៖

ប្រសិនបើមិត្តម្នាក់ដែលមានសេចក្ដីជំនឿផ្សេងបានសម្រេចថានឹងចូលរូមនៅក្នុងការប្រជុំសាក្រាម៉ង់ជាមួយនឹងអ្នក តើអ្នកនឹងពន្យល់ពីអត្ថន័យនៃពិធីសាក្រាម៉ង់ និងអំពីសារៈសំខាន់របស់វាចំពោះអ្នកយ៉ាងដូចម្ដេច ?

ដើម្បីជួយសិស្សឲ្យយល់ពីគោលបំណងមួយនៃពិធីសាក្រាម៉ង់ សូមឲ្យសិស្សម្នាក់អាន មរ៉ូណៃ 4:1–3 ឮៗ ហើយសូមឲ្យសិស្សម្នាក់ទៀតអាន មរ៉ូណៃ 5:1–2 ។ សូមឲ្យសិស្សរកមើលឃ្លានៅក្នុង មរ៉ូណៃ 4:3 និង មរ៉ូណៃ 5:2 ដែលពន្យល់ពីអត្ថន័យតំណាងឲ្យនំប៉័ង និងទឹកនៃពិធីសាក្រាម៉ង់ ។ អ្នកអាចស្នើថា ពួកគេគួរគូសចំណាំឃ្លាទាំងនេះនៅក្នុងព្រះគម្ពីររបស់ពួកគេ ។ ( អ្នកអាចរំឭកសិស្សថា សព្វថ្ងៃនេះសាសនាចក្រប្រើទឹកនៅក្នុងពិធីសាក្រាម៉ង់ជំនួសឲ្យស្រាទំពាំងបាយជូ ដូចដែលបានអនុញ្ញាតដោយវិវរណៈមួយដែលត្រូវបានប្រទានដល់លោក យ៉ូសែប ស្ម៊ីធ [ សូមមើល គ. និង ស. 27:2] )។

តើនំប៉័ងតំណាងឲ្យអ្វី ? ( ព្រះកាយរបស់ព្រះយេស៊ូវគ្រីស្ទ ។ សូមមើល ម៉ាថាយ 26:26; នីហ្វៃទី 3 18:6–7 )។
តើទឹកតំណាងឲ្យអ្វី ? ( ព្រះលោហិតរបស់ព្រះយេស៊ូវគ្រីស្ទ ។ សូមមើល ម៉ាថាយ 26:27–28; នីហ្វៃទី 318:8–11 )។
ហេតុអ្វីបានជាព្រះកាយ និងព្រះលោហិតរបស់ព្រះអង្គសង្គ្រោះមានសារៈសំខាន់សម្រាប់យើង ? ( នៅពេលសិស្សឆ្លើយនឹងសំណួរនេះ ពួកគេគួរលើកឡើងពីការរងទុក្ខខាងសាច់ឈាម និងការសុគតរបស់ព្រះអង្គសង្គ្រោះនៅលើឈើឆ្កាង ។ ពួកគេគួរនិយាយពីការរស់ឡើងវិញរបស់ទ្រង់ នៅពេលព្រះកាយរបស់ទ្រង់ត្រូវបានផ្គុំនឹងព្រះវិញ្ញាណរបស់ទ្រង់បីថ្ងៃ ក្រោយពីទ្រង់បានទទួលយកសេចក្ដីស្លាប់ដាក់មកលើអង្គទ្រង់ ។ ពួកគេក៏គូរប្រាប់អំពីការរងទុក្ខខាងវិញ្ញាណដ៏ខ្លាំងរបស់ទ្រង់ នៅពេលទ្រង់បានទទួលយកអំពើបាបរបស់យើងដាក់លើអង្គទ្រង់ ដោយបណ្ដាលឲ្យទ្រង់បានចេញឈាមតាមគ្រប់រន្ធញើស ។ ដោយសារទ្រង់បានទទួលយកសេចក្តីស្លាប់ខាងសាច់ឈាមដាក់មកលើអង្គទ្រង់ នោះមនុស្សទាំងអស់ត្រូវបានរស់ឡើងវិញ ។ ដោយសារទ្រង់បានរងទុក្ខចំពោះអំពើបាបរបស់យើង នោះយើងត្រូវអាចបានអភ័យទោសពីអំពើបាបរបស់យើង នៅពេលយើងប្រែចិត្ត )។

សូមសរសេរឃ្លាមិនពេញលេញខាងក្រោមនេះនៅលើក្តារខៀន ៖ និមិត្តសញ្ញានៃពិធីសាក្រាម៉ង់ជួយយើងឲ្យចងចាំដល់ … ។ សូមសួរសិស្សថាតើពួកគេនឹងសង្ខេបគោលបំណងដ៏សំខាន់អំពីពិធីសាក្រាម៉ង់នេះដោយរបៀបណា ។ បន្ទាប់មក សូមបំពេញសេចក្ដីពិតនៅលើក្ដារខៀនដូចខាងក្រោម ៖ និមិត្តនៃពិធីសាក្រាម៉ង់ជួយយើងឲ្យចងចាំដល់ដង្វាយធួននៃព្រះយេស៊ូវគ្រីស្ទ ។

សូមឲ្យសិស្សសញ្ជឹងគិតពីសំណួរខាងក្រោមនេះ ដែលបានសួរដោយអែលឌើរ ដាវីឌ ប៊ី ហេត នៃកូរ៉ុមនៃពួកសាវកដប់ពីរនាក់ ៖

រូបភាព

អែលឌើរ ដាវីឌ ប៊ី ហេត

« តើយើងគួរធ្វើយ៉ាងណា ក្នុងនាមជាសមាជិកសាសនាចក្រក្នុងការរំឭកចងចាំដល់ព្រះអម្ចាស់ និងព្រះអង្គសង្គ្រោះរបស់យើង ពលិកម្មរបស់ទ្រង់ និងអំណរគុណរបស់យើងចំពោះទ្រង់ ? ( « Remembering the Savior’s Atonement » Ensign ខែ មេសា ឆ្នាំ 1988 ទំព័រ 7 ) ។

តើយើងអាចធ្វើអ្វីខ្លះដើម្បីផ្ដោតលើការចងចាំអំពីដង្វាយធួន អំឡុងពេលធ្វើពិធីសាក្រាម៉ង់ ?
តើអ្នកធ្លាប់បានទទួលអ្វីខ្លះ នៅពេលអ្នកបានសញ្ជឹងគិតដោយស្មោះសដល់ដង្វាយធួនរបស់ព្រះអង្គសង្គ្រោះ អំឡុងពេលនៃពិធីសាក្រាម៉ង់ ?

ក្រោយពីសិស្សចែកចាយពីការយល់ដឹងរបស់គេហើយ សូមឲ្យពួកគេសរសេរនៅក្នុងសៀវភៅកំណត់ហេតុការសិក្សាព្រះគម្ពីរ ឬ សៀវភៅសរសេរក្នុងថ្នាក់អំពីរបៀបមួយដែលពួកគេអាចផ្ដោតលើគំនិតរបស់គេលើដង្វាយធួន អំឡុងពេលទទួលយកសាក្រាម៉ង់នាពេលក្រោយ ។ ( អ្នកសុំឲ្យសិស្សពីរបីនាក់ចែកចាយនូវអ្វីដែលពួកគេបានសរសេរ )។

ដើម្បីជួយសិស្សឲ្យយល់ពីគោលបំណងបន្ថែមទៀតនៃពិធីសាក្រាម៉ង់ សូមគូសតារាងខាងក្រោមនេះនៅលើក្ដារខៀនមុនពេលបង្រៀន ដោយទុកចន្លោះត្រង់ចម្លើយនៅក្នុងវង់ក្រចក ។ សូមឲ្យសិស្សគូសតារាងនេះនៅក្នុងសៀវភៅកំណត់ហេតុការសិក្សាព្រះគម្ពីរ ឬ សៀវភៅសរសេរក្នុងថ្នាក់ ។

អ្វីដែលខ្ញុំធ្វើសេចក្ដីសញ្ញាថានឹងធ្វើតាម	អ្វីដែលខ្ញុំគិតថាវាមានន័យក្នុងការធ្វើតាមផ្នែកនេះនៃសេចក្ដីសញ្ញារបស់ខ្ញុំ	អ្វីដែលខ្ញុំអាចធ្វើបានក្នុងការធ្វើតាមផ្នែកនេះនៃសេចក្ដីសញ្ញារបស់ខ្ញុំ
( មានឆន្ទៈនឹងលើកដាក់មកលើខ្លួនខ្ញុំនូវព្រះនាមនៃព្រះអម្ចាស់ )
( ចងចាំដល់ទ្រង់ជានិច្ច )
(រក្សាបទបញ្ញត្តិរបស់ទ្រង់)

សូមរំឭកសិស្សថា នៅពេលយើងទទួលយកសាក្រាម៉ង់ នោះយើងបានធ្វើសេចក្ដីសញ្ញា ឬធ្វើការព្រមព្រៀងដ៏ពិសិដ្ឋជាមួយនឹងព្រះ ។ សូមឲ្យសិស្សរំឭក មរ៉ូណៃ 4:3 ដោយស្ងាត់ស្ងៀម ។ នៅក្នុងកូឡោមទីមួយនៃតារាងនេះ សូមឲ្យពួកគេសរសេរសេចក្ដីសន្យាបីដែលពួកគេបានធ្វើ នៅពេលពួកគេបានទទួលយកសាក្រាម៉ង់ ។ សូមឲ្យពួកគេត្រួតពិនិត្យចម្លើយរបស់ពួកគេជាមួយនឹងនរណាម្នាក់ដែលអង្គុយនៅក្បែរពួកគេ ។ បន្ទាប់មក សូមឲ្យពួកគេបំពេញក្នុងកូឡោនទីពីររៀងៗខ្លួន ។ ក្រោយពីមានពេលគ្រប់គ្រាន់ហើយ សូមឲ្យសិស្សពីរបីនាក់ចែកចាយនូវអ្វីដែលពួកគេបានសរសេរ ។ នៅពេលសិស្សចែកចាយនូវអ្វីដែលពួកគេបានសរសេរ សូមប្រើសម្ភារទាំងនេះខ្លះ ឬទាំងអស់ដើម្បីជួយដល់ពួកគេឲ្យយល់កាន់តែច្បាស់អំពីចំណែកនីមួយៗនៃសេចក្តីសញ្ញា ។

ដើម្បីជួយសិស្សឲ្យយល់កាន់តែស៊ីជម្រៅអំពីអត្ថន័យនៃការលើកដាក់មកលើខ្លួនគេនូវព្រះនាមនៃព្រះយេស៊ូវគ្រីស្ទ សូមឲ្យសិស្សម្នាក់អាននូវសេចក្ដីថ្លែងការណ៍ខាងក្រោមដោយប្រធាន ហិនរី ប៊ី អាវរិង នៃគណៈប្រធានទីមួយ ៖

រូបភាព

ប្រធាន ហិនរី ប៊ី អាវរិង

« យើងសន្យាថានឹងលើកដាក់លើខ្លួនយើងនូវព្រះនាមរបស់ទ្រង់ ។ នោះមានន័យថា យើងត្រូវតែមើលខ្លួនយើងថាដូចជាទ្រង់ ។ យើងនឹងដាក់ទ្រង់ជាអាទិភាពនៅក្នុងជីវិតរបស់យើង ។ យើងនឹងចង់បានអ្វី ដែលទ្រង់ចង់បាន ជាជាងអ្វីដែលយើងចង់បាន ឬអ្វីដែលពិភពលោកបង្រៀនយើងឲ្យយើងចង់បាន » ( « That We May Be One » Ensign ខែ ឧសភា ឆ្នាំ 1998 ទំព័រ 67 ) ។

សូមពន្យល់ថា នៅពេលយើងធ្វើជាសាក្សីដល់ឆន្ទៈរបស់យើងក្នុងការលើកដាក់នូវព្រះនាមនៃព្រះយេស៊ូវគ្រីស្ទមកលើខ្លួនយើង នោះយើងបានប្ដេជ្ញាថានឹងរស់នៅជាសិស្សរបស់ទ្រង់ ។ យើងសន្យាថា យើងនឹងមិននាំមកនូវការអាប់ឱន ឬការរិះគន់មកដល់ព្រះនាមរបស់ទ្រង់ឡើយ ។ យើងប្ដេជ្ញាថានឹងបម្រើដល់ទ្រង់ និងបងប្អូនរបស់យើង ។ យើងក៏បង្ហាញដែរថា យើងមានឆន្ទៈក្នុងការទទួលស្គាល់ជាមួយនឹងទ្រង់ និងសាសនាចក្ររបស់ទ្រង់ ។

តើអ្នកធ្លាប់បានសាកល្បងបង្ហាញឆន្ទៈរបស់អ្នកក្នុងការលើកដាក់ព្រះនាមរបស់ព្រះអម្ចាស់មកលើខ្លួនអ្នកដែរឬទេ ? តើវាមានឥទ្ធិពលអ្វីខ្លះមកលើជីវិតរបស់អ្នក ?

សូមឲ្យសិស្សប្រៀបធៀបការអធិស្ឋានដល់នំប៉័ងនៅក្នុង មរ៉ូណៃ 4:3 ជាមួយនឹងការអធិស្ឋានដល់ស្រាទំពាំងបាយជូនៅក្នុង មរ៉ូណៃ 5:2 ។ សូមសួរពួកគេពីភាពខុសគ្នា និងភាពដូចគ្នាដែលពួកគេបានកត់សម្គាល់ ។ សូមបង្ហាញថា សេចក្ដីសន្យាថានឹង « តែងតែចងចាំដល់ទ្រង់ជានិច្ច » លេចឡើងនៅក្នុងការអធិស្ឋានទាំងពីរ ។

តើអ្នកគិតថាវាមានន័យយ៉ាងណាក្នុងការ « តែងតែចងចាំដល់ទ្រង់ជានិច្ច » នោះ ?

សូមឲ្យសិស្សម្នាក់អានសេចក្ដីថ្លែងការណ៍ខាងក្រោមដោយអែលឌើរ ឌី ថត គ្រីស្តូហ្វឺសិន នៃកូរ៉ុមនៃពួកសាវកដប់ពីរនាក់ ។ សូមឲ្យសិស្សស្ដាប់ និងរកនូវអ្វីដែលយើងអាចធ្វើបានដើម្បីជួយខ្លួនយើងឲ្យតែងតែចងចាំដល់ព្រះអង្គសង្គ្រោះជានិច្ច ។

រូបភាព

អែលឌើរ ឌី ថត គ្រីស្តូហ្វឺសិន

« ជាបឋម យើងគួររៀបចំអ្វីៗដែលអាចធ្វើទៅបានក្នុងការចងចាំដល់ទ្រង់ —ការអធិស្ឋានជាញឹកញាប់ និងការសិក្សាព្រះគម្ពីរ ការសិក្សាដោយផ្ចិតផ្ចង់ពីការបង្រៀនរបស់ពួកសាវក ការរៀបចំប្រចាំសប្ដាហ៍ដើម្បីទទួលយកសាក្រាម៉ងដោយសាកសម ការថ្វាយបង្គំនៅថ្ងៃសិល្ប៍ និងការកត់ត្រា និងចងចាំនូវអ្វីដែលព្រះវិញ្ញាណ និងបទពិសោធន៍ទាំងឡាយបង្រៀនយើងអំពីពួកសិស្ស ។

« រឿងផ្សេងៗទៀតអាចចូលមកក្នុងគំនិតដែលសក្ដិសមនឹងអ្នកជាពិសេសនៅក្នុងចំណុចនេះនៃជីវិតរបស់អ្នក ។ …

« … ខ្ញុំអាចអះអាងថា ពេលវេលាកន្លងទៅ បំណង និងសមត្ថភាពរបស់យើងក្នុងការចងចាំ និងធ្វើតាមព្រះអង្គសង្គ្រោះជានិច្ចនោះ នឹងរីកចម្រើនឡើង ។ យើងគួរអភិវឌ្ឍទៅដល់ទីបញ្ចប់នោះប្រកបដោយការអត់ធ្មត់ និងតែងតែអធិស្ឋានសុំការកាត់សេចក្ដី និងជំនួយដ៏ទេវភាពដែលយើងត្រូវការ » ( « To Always Remember Him » Ensign ខែ មេសា ឆ្នាំ 2011 ទំព័រ 51 ) ។

តើអ្នកបានធ្វើអ្វីខ្លះដើម្បី « ចងចាំដល់ទ្រង់ជានិច្ច » ?
តើការចងចាំដល់ព្រះអង្គសង្គ្រោះបានជួយយើងឲ្យរក្សាផ្នែកផ្សេងទៀតនៃសេចក្ដីសញ្ញារបស់យើងដោយរបៀបណា ?
តើអ្នកគិតថា ហេតុអ្វីបានជាវាសំខាន់សម្រាប់យើងដើម្បីទទួលយកពិធីសាក្រាម៉ង់រាល់សប្ដាហ៍ ?

ដើម្បីបញ្ជាក់ពីសេចក្ដីសន្យារបស់យើងក្នុងការកាន់តាមព្រះបញ្ញត្តិទាំងឡាយ សូមឲ្យសិស្សម្នាក់អានសេចក្ដីថ្លែងការណ៍ខាងក្រោមពី ដើម្បីកម្លាំងនៃយុវជន ៖

« ព្រះវរបិតាសួគ៌បានប្រទានដល់អ្នកនូវសិទ្ធជ្រើសរើស សមត្ថភាពដើម្បីជ្រើសរើសត្រូវពីខុស និងដើម្បីអនុវត្តដោយខ្លួនអ្នកផ្ទាល់ ។សិទ្ធដើម្បីដឹកនាំជីវិតរបស់អ្នកគឺជាអំណោយមួយដ៏មហិមាក្នុងចំណោមអំណោយនានារបស់ព្រះដល់អ្នក បន្ទាប់ពីការប្រទាននូវជីវិត ។ខណៈដែលនៅលើផែនដីនេះ អ្នកគឺកំពុងតែបង្ហាញភស្តុតាងឲ្យឃើញថាប្រសិនបើអ្នកនឹងប្រើសិទ្ធជ្រើសរើសរបស់អ្នកដើម្បីបង្ហាញសេចក្តីស្រឡាញ់របស់អ្នកដល់ព្រះដោយការគោរពតាមព្រះបញ្ញត្តិទាំងឡាយរបស់ទ្រង់ » ( ដើម្បីកម្លាំងនៃយុវជន [ ឆ្នាំ 2011 ] ទំព័រ 2 ) ។

តើអ្នកធ្វើអ្វីខ្លះរាល់ថ្ងៃដើម្បីជួយខ្លួនអ្នកឲ្យកាន់តាមព្រះបញ្ញត្តិរបស់ព្រះ ?

ក្រោយពីសិស្សបានពិភាក្សាពីសេចក្ដីសន្យាទាំងឡាយដែលយើងរំឭកវាតាមរយៈពិធីសាក្រាម៉ងរាល់សប្ដាហ៍នោះ សូមឲ្យពួកគេសរសេរវានៅលើកូឡោនទីបីនៃតារាងនូវរឿងមួយដែលពួកគេនឹងធ្វើ អំឡុងពេលសប្ដាហ៍នេះដើម្បីកាន់តាមផ្នែកនីមួយៗនៃសេចក្តីសញ្ញាឲ្យបានកាន់តែប្រសើរ ។ សូមឲ្យពួកគេចែកចាយគំនិតរបស់គេខ្លះ ( សូមប្រាកដថា ពួកគេយល់ថា ពួកគេមិនគួរចែកចាយអ្វីៗដែលឯកជន ឬ ផ្ទាល់ខ្លួនពេកនោះ ) ។

សូមពន្យល់ថា នៅពេលយើងកាន់តាមសេចក្តីសញ្ញាដែលយើងបានធ្វើជាមួយនឹងព្រះអម្ចាស់ នោះទ្រង់សន្យាថានឹងប្រទានពរដល់យើង ( សូមមើល គ. និង ស. 82:10 ) ។ សូមឲ្យសិស្សសិក្សានៅក្នុង មរ៉ូណៃ 4:3 និង មរ៉ូណៃ 5:2 ដោយរកមើលអ្វីដែលព្រះអម្ចាស់សន្យានឹងយើង ប្រសិនបើយើងកាន់តាមការសន្យាទាំងឡាយ ដែលយើងរំឭក នៅពេលយើងទទួលយកសាក្រាម៉ង់នោះ ។ សូមសរសេរឃ្លាមិនពេញលេញខាងក្រោមនៅលើក្តារខៀន នៅក្រោមតារាងនេះ ៖ នៅពេលយើងកាន់តាមសេចក្ដីសញ្ញា សាក្រាម៉ង់ដោយស្មោះត្រង់ … ។ សូមឲ្យសិស្សបំពេញប្រយោគនៅលើក្ដារខៀនដោយផ្អែកលើអ្វីដែលពួកគេបានរៀនពី មរ៉ូណៃ 4:3 និង មរ៉ូណៃ 5:2 ។ ( របៀបមួយដើម្បីបំពេញប្រយោគនេះ អាចធ្វើដូចខាងក្រោម ៖ នៅពេលយើងកាន់តាមសេចក្ដីសញ្ញា សាក្រាម៉ង់ដោយស្មោះត្រង់ នោះយើងអាចមានព្រះវិញ្ញាណរបស់ព្រះអម្ចាស់គង់នៅជាមួយនឹងយើងជានិច្ច )។

តើការសន្យាដែលថា ព្រះវិញ្ញាណតែងគង់នៅជាមួយនឹងយើងជានិច្ច មានតម្លៃសក្ដិសមនឹងការខំប្រឹងប្រែងរបស់យើងក្នុងការកាន់តាមសេចក្ដីសញ្ញានេះដោយរបៀបណា ?

សូមឲ្យសិស្សម្នាក់អានសេចក្ដីថ្លែងការណ៍ខាងក្រោមដោយអែលឌើរ ដាវីឌ អេ បែដណា នៃកូរ៉ុមនៃពួកសាវកដប់ពីរនាក់ ។ សូមឲ្យសិស្សស្ដាប់រកនូវអ្វីដែលព្រះវិញ្ញាណអាចធ្វើសម្រាប់យើង ។

រូបភាព

អែលឌើរ ដាវីឌ អេ បែដណា

« ព្រះវិញ្ញាណនៃព្រះអម្ចាស់អាចក្លាយជាណែនាំរបស់យើង ហើយប្រទានពរដល់យើងនូវការដឹកនាំ ការណែនាំ និងការការពារខាងវិញ្ញាណអំឡុងពេលដំណើរក្នុងជីវិតខាងសាច់ឈាមរបស់យើង » ( « That We May Always Have His Spirit to Be with Us » Ensign ឬ Liahona ខែ ឧសភា ឆ្នាំ 2006 ទំព័រ 31 ) ។

តើនៅពេលណាដែលអ្នកបានទទួលនូវការដឹកនាំ ការប្រាប់ទិសដៅ ការណែនាំ ឬ ការការពារដោយសារតែភាពជាដៃគូនៃព្រះវិញ្ញាណបរិសុទ្ធនោះ ? ( បន្ថែមទៅលើការសុំសិស្សឲ្យចែកចាយនូវបទពិសោធន៍ អ្នកអាចចែកចាយនូវបទពិសោធន៍មួយពីជីវិតរបស់អ្នកផ្ទាល់បាន )។
រាល់សប្ដាហ៍អំឡុងពេលសាក្រាម៉ង់ យើងមានឱកាសដើម្បីពិចារណាពីកម្រិតដែលយើងកាន់តាមសេចក្តីសញ្ញាបានល្អប៉ុណ្ណា ជាអ្វីដែលត្រូវបានរៀបរាប់នៅក្នុងការអធិស្ឋានសាក្រាម៉ង់ ។ តើការណ៍នេះអាចជួយយើងនៅក្នុងការខិតខំប្រឹងរបស់យើងក្នុងការតែងតែមានព្រះវិញ្ញាណគង់នៅជាមួយនឹងយើងដោយរបៀបណា ?
នៅពេលអ្នកសញ្ជឹងគិតពីអ្វីដែលអ្នកបានរៀននៅថ្ងៃនេះ អំពីការទទួលយកពិធីសាក្រាម៉ង់ តើអ្វីដែលជាផ្នែកនៃការអធិស្ឋានសាក្រាម៉ង់ដែលមានន័យយ៉ាងពិសេសដល់អ្នក ? ហេតុអ្វី ?

សូមលើកទឹកចិត្តសិស្សឲ្យសញ្ជឹងគិតពីដង្វាយធួនរបស់ព្រះអង្គសង្គ្រោះ នៅពេលពួកគេទទួលយកសាក្រាម៉ង់ ។ សូមឲ្យពួកគេរំឭកពីតារាងរបស់ពួកគេ ហើយធ្វើតាមគំនិតរបស់គេក្នុងការរក្សានូវសេចក្ដីសញ្ញានៃពិធីសាក្រាម៉ង់ឲ្យកាន់តែបានពេញលេញជាងនេះ ។ សូមរំឭកសិស្សពីសេចក្ដីសន្យារបស់ព្រះអម្ចាស់ដល់យើង នៅពេលយើងរក្សានូវសេចក្ដីសញ្ញានេះ ៖ យើងនឹងតែងតែមានព្រះវិញ្ញាណរបស់ទ្រង់គង់នៅជាមួយនឹងយើង ។ សូមថ្លែងទីបន្ទាល់អំពីពរជ័យនានាដែលនឹងមកដល់ក្នុងជីវិតរបស់យើង នៅពេលយើងចងចាំ និងកាន់តាមសេចក្ដីសញ្ញាដែលយើងធ្វើរាល់សប្ដាហ៍ នៅពេលយើងទទួលយកសាក្រាម៉ង់ ។

ការរំឭកចំណេះចំណានខគម្ពីរ

អ្នកអាចដាក់ថ្ងៃកំណត់មួយសម្រាប់ការប្រឡង ឬសកម្មភាពរំឭកចំណេះចំណានខគម្ពីរ ដើម្បីជួយសិស្សឲ្យចេះច្បាស់ពីវគ្គនៃខគម្ពីរជ្រើសរើសពីក្នុងព្រះគម្ពីរមរមន ។ សូមសម្រេចចិត្តពីរបៀបដែលអ្នកនឹងសាកល្បងចំណេះដឹងរបស់គេ ហើយគ្រោងធ្វើសកម្មភាពមួយដែលសមនឹងគោលបំណងនោះ ។ អ្នកអាចបង្កើតការប្រឡងផ្គូផ្គង ឬបំពេញចន្លោះដែលមានសេចក្ដីយោង និងពាក្យគន្លឹះ ឬដំណើររឿងណាមួយ ឬ អ្នកអាចឲ្យសិស្សល្បងពីការចេះចងចាំវគ្គមួយចំនួនថាតើគេចាំបានប៉ុណ្ណា ។ របៀបមួយទៀតដែលអាចធ្វើគឺ ត្រូវដាក់ឲ្យសិស្សម្នាក់ៗបង្រៀននូវមេរៀនខ្លីមួយ ឬផ្ដល់នូវការនិយាយខ្លីមួយដោយប្រើវគ្គចំណេះចំណានខគម្ពីរជាប្រភពដ៏សំខាន់ ។ ទោះជាយ៉ាងណាក្ដី អ្នកត្រូវសម្រេចដើម្បីបង្កើតនូវបទពិសោធន៍ជាមួយនឹងវគ្គចំណេះចំណានខគម្ពីរចុងបញ្ចប់ ដោយផ្ដល់ពេលដល់សិស្សឲ្យសិក្សា និងរៀបចំជាមុន ។ ប្រវែងមេរៀនថ្ងៃនេះ អាចផ្ដល់ពេលវេលាខ្លះឲ្យចាប់ផ្ដើមការរៀបចំនេះ ។