យ៉ាកុប 3–4

សេចក្តីផ្ដើម

នៅក្នុងយ៉ាកុប ជំពូកទី 3 យើងអានសេចក្ដីសន្និដ្ឋាននៃទេសនកថាមួយដែលយ៉ាកុបបានផ្ដល់ដល់ប្រជាជនរបស់គាត់ ។ យ៉ាកុបបានផ្ដល់ពាក្យលួងលោមដោយសង្ខេប និង សេចក្ដីសន្យាដល់អ្នកបរិសុទ្ធនៅក្នុងដួងចិត្ត ។ គាត់ក៏បានស្ដីបន្ទោសដល់អ្នកឆ្មើងឆ្មៃ និង អ្នកមិនបរិសុទ្ធនៅក្នុងចំណោមប្រជាជនរបស់គាត់ ដោយព្រមានពួកគេអំពីផលវិបាកដែលនឹងមកបើសិនជាពួកគេមិនព្រមប្រែចិត្តទេនោះ ។ យ៉ាកុប ជំពូកទី 4មាននូវពាក្យដែលយ៉ាកុបត្រូវបានបំផុសគំនិតឲ្យសរសេរសម្រាប់ប្រជាជនដែលនឹងអានកំណត់ត្រារបស់គាត់នៅថ្ងៃណាមួយ ។ គាត់បានថ្លែងទីបន្ទាល់អំពីដង្វាយធួននៃព្រះយេស៊ូវគ្រីស្ទ និង បានដាស់តឿនអ្នកអានរបស់គាត់ឲ្យស្រុះស្រួលខ្លួនគេនឹងព្រះ ជាព្រះវរបិតាតាមរយៈដង្វាយធួន ។ គាត់បានប្រាប់អំពីសាសន៍យូដាដែលបានបដិសេធព្រះយេស៊ូវគ្រីស្ទ និង ភាពច្បាស់លាស់នៃដំណឹងល្អរបស់ទ្រង់ដោយប្រើសំឡេងព្រមាន ។

យោបល់សម្រាប់ការបង្រៀន

យ៉ាកុប 3

យ៉ាកុបបានលួងលោម និង ប្រឹក្សាដល់អ្នកបរិសុទ្ធក្នុងដួងចិត្ត ហើយដាស់សតិឲ្យអ្នកដទៃប្រែចិត្ត

សូមអញ្ជើញសិស្សឲ្យគិតអំពីដំបូន្មានអ្វីដែលពួកគេអាចផ្ដល់ដល់មនុស្សនៅក្នុងស្ថានភាពខាងក្រោមនេះ ៖

យុវនារីម្នាក់កំពុងតស៊ូវរស់នៅដោយសុចរិត ប៉ុន្ដែរងទុក្ខដោយសារឪពុករបស់នាងញៀនគ្រឿងស្រវឹង ។
យុវជនម្នាក់ខិតខំអស់ពីសមត្ថភាពរបស់គាត់ដើម្បីរស់នៅតាមដំណឹងល្អ ប៉ុន្ដែជួបនឹងឧបសគ្គជាច្រើនដោយសារតែការលែងលះរបស់ឪពុកម្ដាយគាត់ ។
យុវនារីដ៏ឈ្លាសវៃម្នាក់ ព្យាយាមស្រឡាញ់គ្រួសាររបស់នាង ប៉ុន្ដែពិបាកនៅផ្ទះដោយសារតែភាពអាត្មានិយម និង សកម្មភាពដែលមិនបានពិចារណាទាំងឡាយរបស់ប្អូនស្រីនាង ។

សូមអញ្ជើញសិស្សឲ្យអានប្រយោគទីមួយនៃ យ៉ាកុប 3:1ដោយស្ងាត់ៗ ។ សូមឲ្យពួកគេស្វែងរកនរណាដែលយ៉ាកុបនិយាយដំបូងគេនៅក្នុងជំពូកនេះ ។

សូមពន្យល់ថា យ៉ាកុបបាននិយាយដោយចំៗទៅកាន់ប្រជាជនដែលមានទោសអំពីការឆ្មើងឆ្មៃ និង អំពើបាបខាងផ្លូវភេទនោះ ។ បន្ទាប់មកគាត់បានបែរការយកចិត្តទុកដាក់របស់គាត់ទៅកាន់ប្រជាជនសុចរិត ដែលកំពុងតែជួបនឹងឧបសគ្គដោយសារតែភាពទុច្ចរិតរបស់អ្នកដទៃ ។ សូមអញ្ជើញសិស្សអាន យ៉ាកុប 3:1ដោយស្ងាត់ៗ ។ សូមឲ្យពួកគេរកមើលរឿងបួន ដែលយ៉ាកុបបានសុំឲ្យពួកអ្នកបរិសុទ្ធនៅក្នុងដួងចិត្តធ្វើ ។

តើរឿងទាំងបួននោះមានអ្វីខ្លះ ដែលយ៉ាកុបបានដាស់តឿនឲ្យពួកអ្នកបរិសុទ្ធនៅក្នុងដួងចិត្តធ្វើ ? ( « ចូរមើលទៅព្រះដោយមានគំនិតរឹងប៉ឹង … អធិស្ឋានដល់ព្រះអង្គដោយមានសេចក្ដីជំនឿដ៏លើសលប់ ងើបក្បាលឡើង ហើយទទួលព្រះបន្ទូលដ៏ផ្អែមល្ហែមនៃព្រះ ហើយទទួលទាននូវសេចក្ដីស្រឡាញ់របស់ទ្រង់ចុះ » ) តើយ៉ាកុបបានសន្យាអ្វីដល់អ្នកមានចិត្តបរិសុទ្ធ ប្រសិនបើពួកគេនៅតែស្មោះត្រង់នោះ ? ( ការលួងលោមដល់គ្រាដែលមានទុក្ខលំបាក និង ការការពារពីសត្រូវ ) ។
តើអ្នកគិតថាយើងអាចធ្វើអ្វីបានខ្លះដើម្បីទទួលបានព្រះបន្ទូលនៃព្រះ ?

ទាក់ទងនឹងសំណួរអំពីសេចក្ដីសន្យារបស់យ៉ាកុបចំពោះអ្នកមានចិត្តបរិសុទ្ធសូមធានាថាសិស្សយល់ថាព្រះនឹងលួងលោមអ្នកមានចិត្តបរិសុទ្ធនៅក្នុងសេចក្ដីលំបាករបស់ពួកគេ ។អ្នកអាចត្រូវពន្យល់ថាពាក្យលួងលោមមានន័យថាលួងលោមនរណាម្នាក់ដែលក្រៀមក្រំឬមានកង្វល់ ។ ដើម្បីជួយសិស្សឲ្យសញ្ជឹងគិតនិងអនុវត្តសេចក្ដីពិតនេះសូមសួរ ៖

តើព្រះអម្ចាស់លួងលោមអ្នកដោយរបៀបណា ?
តើការអធិស្ឋានដោយសេចក្ដីជំនឿបានជួយអ្នកអំឡុងពេលមានឧបសគ្គដោយរបៀបណា ?
តើនៅពេលណាដែលព្រះបន្ទូលរបស់ព្រះបានជួយអ្នកឲ្យមានអារម្មណ៍ពីសេចក្ដីស្រឡាញ់របស់ទ្រង់ ?

សូមពន្យល់ថាក្រោយពីបាននិយាយទៅអ្នកមានចិត្តបរិសុទ្ធហើយយ៉ាកុបបាននិយាយទៅកាន់អស់អ្នកទាំងឡាយណាដែលមិនមានចិត្តបរិសុទ្ធម្ដងទៀត ។

សូមអញ្ជើញឲ្យសិស្សម្នាក់អានយ៉ាកុប3:3–4ឮៗ ។ សូមឲ្យសិស្សក្នុងថ្នាក់រកមើលអ្វីដែលយ៉ាកុបបានសុំឲ្យពួកមិនមានចិត្តបរិសុទ្ធធ្វើ ។

តើនឹងមានអ្វីកើតឡើងប្រសិនបើប្រជាជនរបស់យ៉ាកុបមិនព្រមប្រែចិត្តនោះ ?

សូមបង្ហាញថាយ៉ាកុបបាននិយាយថាសាសន៍លេមិនបានរស់នៅសុចរិតជាងប្រជាជននីហ្វៃខ្លះនៅពេលនេះ ។ សូមឲ្យសិស្សអានយ៉ាកុប3:5–7ដោយស្ងាត់ស្ងៀមដោយរកមើលរបៀបទាំងឡាយដែលសាសន៍លេមិនគឺសុចរិតជាងប្រជាជននីហ្វៃខ្លះនោះ ។

តើសាសន៍លេមិនសុចរិតជាងប្រជាជននីហ្វៃខ្លះតាមរបៀបណាខ្លះ ?
តើគោលការណ៍អ្វីដែលអ្នកបានរៀនពី យ៉ាកុប3:7 អំពីទំនាក់ទំនងជាគ្រួសារ ? ( ប្ដីនិងប្រពន្ធត្រូវស្រឡាញ់គ្នាទៅវិញទៅមកហើយឪពុកម្ដាយត្រូវស្រឡាញ់កូនៗរបស់ខ្លួន ) ។
តើមានផលវិបាកអ្វីខ្លះ ដែលអាចកើតឡើងនៅពេលសមាជិកគ្រួសារមិនបានស្រឡាញ់គ្នាទៅវិញទៅមក ហើយមិនបានបំពេញទំនួលខុសត្រូវគ្រួសាររបស់ពួកគេនោះ ?

សូមឲ្យសិស្សអាន យ៉ាកុប 3:10 ដោយស្ងាត់ស្ងៀម ដោយរកមើលការព្រមានដែលយ៉ាកុបបានផ្ដល់យ៉ាងជាក់លាក់ទៅដល់ឪពុកជាសាសន៍នីហ្វៃទាំងឡាយ ។

តើយ៉ាកុបបានផ្ដល់ការព្រមានអ្វីខ្លះដល់ឪពុកជាសាសន៍នីហ្វៃទាំងឡាយ ?
តើអ្នកគិតថា ហេតុអ្វីបានជាវាសំខាន់សម្រាប់សមាជិកគ្រួសារទាំងឡាយដើម្បីធ្វើជាគំរូល្អសម្រាប់គ្នាទៅវិញទៅមកនោះ ?

សូមអាន យ៉ាកុប 3:11–12 ឮៗដល់សិស្ស ។ អ្នកអាចពន្យល់ថា នៅក្នុងខទី 11 ឃ្លាថា « ដាស់សមត្ថភាពទាំងឡាយនៃព្រលឹងអ្នកឲ្យភ្ញាក់ឡើង » សំដៅទៅលើតម្រូវការឲ្យភា្ញក់ឡើងខាងវិញ្ញាណ ។ នៅក្នុង យ៉ាកុប 3:12 ឃ្លា « ការកំផិត និង ការអាសអាភាស » សំដៅទៅលើអំពើបាបខាងផ្លូវភេទទាំងឡាយ ។ នៅពេលអ្នកអានខគម្ពីរទាំងនេះ សូមបញ្ជាក់អំពី « ផលដ៏ធ្ងន់ធ្ងរ » នៃអំពើបាបខាងផ្លូវភេទទាំងនេះ ។ បន្ថែមលើនេះ សូមរំឭកសិស្សអំពីសេចក្ដីសន្យាទាំងឡាយរបស់យ៉ាកុប ចំពោះអ្នកមានចិត្តបរិសុទ្ធ ( សូមមើល យ៉ាកុប 3:1–2 ) ។ សូមជួយសិស្សឲ្យយល់ថារបៀបដ៏ល្អបំផុតដើម្បីទទួលបានពរជ័យដែលបានសន្យាទាំងនោះ គឺត្រូវតែមានចិត្តបរិសុទ្ធជានិច្ច ។ ទោះជាយ៉ាងណាក្ដី មនុស្សដែលបានប្រព្រឹត្តអំពើបាបខាងផ្លូវភេទទាំងឡាយ អាចស្វែងរកជំនួយពីប៊ីស្សព ឬ ប្រធានសាខារបស់ពួកគេ ដែលនឹងជួយពួកគេឲ្យប្រែចិត្ត ក្លាយជាស្អាតតាមរយៈដង្វាយធួនរបស់ព្រះយេស៊ូវគ្រីស្ទ និង ទទួលបានពរជ័យដែលបានសន្យាទាំងឡាយដល់ពួកដែលមានចិត្តបរិសុទ្ធ ។

យ៉ាកុប 4

យ៉ាកុបថ្លែងទីបន្ទាល់ថា តាមរយៈដង្វាយធួនរបស់ព្រះយេស៊ូវគ្រីស្ទ យើងអាចបានស្រុះស្រួលនឹងព្រះ

មុនចាប់ផ្ដើមថ្នាក់ សូមដាក់រូបភាពតូចមួយនៃព្រះយេស៊ូវគ្រីស្ទនៅចំកណ្ដាលក្ដារខៀន ។ នៅជុំវិញរូបភាពនោះ សូមសរសេរពាក្យពីរបីដែលតំណាងឲ្យរឿងទាំងឡាយដែលអាចទាក់ទាញមនុស្សពីព្រះអង្គសង្គ្រោះ និង ដំណឹងល្អរបស់ទ្រង់ ។ ឧទាហរណ៍ អ្នកអាចរួមបញ្ចូលរឿងល្អៗខ្លះ—ដូចជា ការអប់រំ កីឡា និង មិត្តភក្ដិ— ដែលសំខាន់ ប៉ុន្ដែដែលមិនគួរក្លាយជាការផ្ដោតចម្បងនៅក្នុងជីវិតរបស់យើងនោះទេ ។ អ្នកក៏អាចសរសេរពីរឿងផ្សេងៗផងដែរ —ដូចជា រឿងអាសអាភាស តន្ដ្រីមិនសមរម្យ និង ថ្នាំញៀន— ដែលប៉ះពាល់ដល់វិញ្ញាណរបស់យើង និង នាំយើងចេញឆ្ងាយពីព្រះអង្គសង្គ្រោះ ។

សូមឲ្យសិស្សបើកទៅ យ៉ាកុប4:14 ។ សូមពន្យល់ថា ខគម្ពីរនេះរួមមានឃ្លា « ដោយមើលហួសទីដៅ » ។ អែលឌើរ នែលអេ.ម៉ាក់ស្វែល នៃកូរ៉ុមនៃពួកសាវកដប់ពីរនាក់ បានបង្រៀនថានៅក្នុងខគម្ពីរនេះ « ទីដៅគឺជាព្រះគ្រីស្ទ » ( « Jesus of Nazareth, Savior and King »Ensign ខែ ធ្នូ ឆ្នាំ 2007 ទំព័រ 45 ) ។ អ្នកអាចលើកទឹកចិត្តសិស្សឲ្យសរសេរឃ្លានេះនៅក្នុងព្រះគម្ពីររបស់ពួកគេក្បែរ យ៉ាកុប 4:14 ។

ក្រោយពីការចែកចាយការពន្យល់នេះហើយ សូមអញ្ជើញសិស្សម្នាក់ឲ្យអាន យ៉ាកុប 4:14–15 ឮៗ ។

តើអ្នកគិតថា វាអាចមានន័យយ៉ាងណាក្នុងការមើលហួសទីដៅ ? ( ការដាក់ជីវិតរបស់យើងនៅលើអ្វីផ្សេងទៀតសំខាន់ជាងព្រះអង្គសង្គ្រោះ និងដំណឹងល្អរបស់ទ្រង់ ) ។
យោងតាមយ៉ាកុប តើឥរិយាបថ និង សកម្មភាពអ្វីខ្លះដែលរារាំងសាសន៍យូដាពីការទទួលយកព្រះយេស៊ូវគ្រីស្ទ ?

សូមពន្យល់ថា ខណៈដែលយ៉ាកុបបាននិយាយសំដៅយ៉ាងជាក់លាក់ទៅលើអំពើបាបនៃប្រជាជនយូដាខ្លះៗ ចំណែកខ្លះនៃ យ៉ាកុប 4:14–15 ក៏អាចអនុវត្តចំពោះយើងផងដែរ ហើយអាចធ្វើជាការព្រមានមួយដល់យើង ។ ដើម្បីជួយសិស្សឲ្យឃើញពីការអនុវត្តនេះ សូមសួរសំណួរខាងក្រោមនេះ ៖

ហេតុអ្វីបានជាពេលខ្លះមនុស្សបដិសេធ « ព្រះបន្ទូលដ៏ច្បាស់លាស់ទាំងនេះ » ហើយស្វែងរកអ្វីៗដែលពួកគេមិនអាចយល់បានទៅវិញ ? តើមានគ្រោះថ្នាក់អ្វីខ្លះនៃការមើលហួសសេចក្ដីពិតសាមញ្ញនៃដំណឹងល្អនោះ ?
តើយើងអាចបន្ថែមអ្វីទៅលើក្ដារខៀនថាជាគំរូផ្សេងទៀតនៃការទាក់ទាញនានាចេញពីព្រះអង្គសង្គ្រោះ និង ដំណឹងល្អរបស់ទ្រង់ ? ( សូមបន្ថែមចម្លើយរបស់សិស្សទៅលើពាក្យដែលអ្នកបានសរសេររួចហើយនោះ ដាក់លើក្ដារខៀន ) ។

សូមលុបពាក្យ ដែលអ្នកបានសរសេរនៅលើក្ដារខៀន ហើយសរសេរសំណួរខាងក្រោម ៖ តើយើងអាចធ្វើអ្វីបានខ្លះ ដើម្បីមិនមើលហួសទីដៅ ប៉ុន្ដែបន្ដផ្ដោតលើព្រះយេស៊ូវគ្រីស្ទ ?

សូមសរសេរខគម្ពីរយោងខាងក្រោមនៅលើក្ដារខៀន ៖ យ៉ាកុប 4:4–5; យ៉ាកុប 4:6–7; យ៉ាកុប 4:8–9; យ៉ាកុប 4:10; យ៉ាកុប 4:11–13 ។សូមពន្យល់ថា នៅក្នុង យ៉ាកុប 4 យ៉ាកុបចែកចាយគោលការណ៍ដែលអាចជួយយើងឲ្យនៅផ្ដោតលើព្រះយេស៊ូវគ្រីស្ទ ។ សូមចាត់តាំងសិស្សឲ្យធ្វើការជាដៃគូ ហើយរកមើលគោលការណ៍ទាំងនេះនៅក្នុងវគ្គព្រះគម្ពីរមួយដែលមាននៅលើក្ដារខៀន ។ ( ដោយពឹងលើចំនួនសិស្សនៅក្នុងថ្នាក់របស់អ្នក អ្នកអាចចាត់តាំងវគ្គនីមួយៗដល់សិស្សជាដៃគូនោះច្រើនជាងមួយគូ ។ ឬ អ្នកអាចត្រូវសុំឲ្យដៃគូមួយអានច្រើនជាងមួយវគ្គ ) ។

ក្រោយពីពីរបីនាទី សូមអញ្ជើញសិស្សឲ្យរាយការណ៍អំពីចម្លើយរបស់ពួកគេ ។ នៅពេលពួកគេធ្វើដូច្នោះ អ្នកអាចសួរសំណួរដើម្បីជួយពួកគេឲ្យគិតជ្រៅជាងនេះអំពីអ្វីដែលពួកគេបានរៀននៅក្នុងខគម្ពីរទាំងនេះ ។ ដើម្បីជួយអ្នកឲ្យដឹកនាំការពិភាក្សានេះ សំណួរខាងក្រោមត្រូវបានរៀបចំយោងតាមខគម្ពីរដែលបានចាត់តាំង ៖

យ៉ាកុប 4:4–5 ។ តើទីបន្ទាល់របស់ព្យាការីទាំងឡាយបានជួយអ្នកឲ្យផ្ដោតលើព្រះយេស៊ូវគ្រីស្ទដោយរបៀបណា ? តើអ្នកត្រូវបានពង្រឹងដោយទីបន្ទាល់របស់មនុស្សផ្សេងទៀតអំពីព្រះអង្គសង្គ្រោះដោយរបៀបណា ? យ៉ាកុបបាននិយាយថា ការគោរពប្រតិបត្តិរបស់ប្រជាជនគាត់តាមច្បាប់ម៉ូសេមានប្រសិទ្ធភាពនៅក្នុង « ការតម្រង់ព្រលឹង [ របស់ពួកគេ ] ទៅកាន់ » ព្រះអម្ចាស់ ។ តើការខិតខំប្រឹងប្រែងរបស់យើងដើម្បីទទួលបានពិធីបរិសុទ្ធនៃបព្វជិតភាព និង កាន់តាមព្រះបញ្ញត្តិទាំងឡាយតម្រង់ព្រលឹងរបស់យើងទៅកាន់ព្រះអម្ចាស់ដោយរបៀបណា ?
យ៉ាកុប 4:6–7 ។ តើវិវរណៈដល់ព្យាការីទាំងឡាយជួយយើងឲ្យទទួលបានសេចក្ដីសង្ឃឹម និង សេចក្ដីជំនឿទៅលើព្រះយេស៊ូវគ្រីស្ទដោយរបៀបណា ? តើវិវរណៈផ្ទាល់ខ្លួន ឬ សាក្សីខាងវិញ្ញាណដែលអ្នកបានទទួល ពង្រឹងសេចក្ដីជំនឿរបស់អ្នកដោយរបៀបណាដែរ ? តើអ្នកគិតថា ហេតុអ្វីបានជាវាសំខាន់ដើម្បីចងចាំថា វាមានតែតាមរយៈព្រះគុណរបស់ព្រះអម្ចាស់ប៉ុណ្ណោះ ដែលយើងអាចធ្វើការរបស់ទ្រង់បាននោះ ?
យ៉ាកុប 4:8–9 ។ តើអ្នកគិតថា ហេតុអ្វីបានជាវាសំខាន់ដើម្បីទទួលស្គាល់ថា កិច្ចការរបស់ព្រះអម្ចាស់គឺ « ធំ ហើយអស្ចារ្យមែន » ? តើកិច្ចការរបស់ព្រះអង្គសង្គ្រោះជាព្រះដ៏បង្កើតផែនដីជះឥទ្ធិពលដល់ទីបន្ទាល់របស់អ្នកអំពីទ្រង់ដោយរបៀបណា ? តើវាមានន័យយ៉ាងណាចំពោះអ្នកដើម្បី « កុំមើលងាយដល់វិវរណៈទាំងឡាយនៃព្រះឡើយ ?» តើយើងអាចបង្ហាញដល់ព្រះអម្ចាស់ថា យើងផ្ដល់តម្លៃដល់វិវរណៈដែលទ្រង់បានប្រទានដោយរបៀបណា ?
យ៉ាកុប 4:10 ។ តើគំរូអ្វីខ្លះអំពីរបៀបដែលមនុស្សម្នាក់អាច « មិនចង់ទូន្មានដល់ព្រះអម្ចាស់ឡើយ ប៉ុន្ដែទទួលដំបូន្មានពីព្រះហស្ដរបស់ទ្រង់វិញ » នោះ ?
យ៉ាកុប 4:11–13 ។ ដូចដែលបានលើកឡើងនៅក្នុងមេរៀនទី 35 ពាក្យ ស្រុះស្រួល មានន័យថាការនាំមកនូវការត្រូវគ្នា ។ តើដង្វាយធួនជួយយើងឲ្យចូលជាធ្លុងតែមួយនឹងព្រះវរបិតាសួគ៌យើងដោយរបៀបណា ? យ៉ាកុបបានរំឭកយើងអំពីសារៈសំខាន់នៃការបង្រៀនអំពីដង្វាយធួនដោយសួរថា « ហេតុអ្វីបានជាមិននិយាយដល់ដង្វាយធួននៃព្រះគ្រីស្ទ … ? » តើយើងអាចធ្វើតាមគោលការណ៍នេះ នៅពេលយើងចែកចាយទីបន្ទាល់របស់យើងជាមួយនឹងអ្នកដទៃ និង នៅពេលយើងមានឱកាសផ្សេងៗដើម្បីបង្រៀនដំណឹងល្អដោយរបៀបណា ? នៅពេលយើងចែកចាយទីបន្ទាល់របស់យើង តើហេតុអ្វីបានជាវាសំខាន់ដើម្បីថ្លែងទីបន្ទាល់តាមរបៀបមួយដែលមនុស្សអាចយល់បាន ? តើព្រះវិញ្ញាណជួយយើងឲ្យសម្រេចការណ៍នេះដោយរបៀបណា ?

ជាលទ្ធផលនៃការពិភាក្សានេះ សូមប្រាកដថាសេចក្ដីពិតខាងក្រោមនេះមានភាពជាក់ច្បាស់ ៖ តាមរយៈដង្វាយធួនរបស់ព្រះយេស៊ូវគ្រីស្ទ យើងអាចពោរពេញដោយសេចក្ដីសង្ឃឹម និង ស្រុះស្រួលខ្លួនយើងជាមួយនឹងព្រះ ។

សូមចែកចាយអារម្មណ៍នៃអំណរគុណរបស់អ្នកចំពោះព្រះអង្គសង្គ្រោះ និង ដង្វាយធួនរបស់ទ្រង់ ។ សូមថ្លែងទីបន្ទាល់ថា ព្រះយេស៊ូវគ្រីស្ទគឺជា « ទីដៅ » ដែលយើងគួរតែដាក់ជីវិតរបស់យើងផ្ដោតលើ ។ ដើម្បីបញ្ចប់មេរៀននេះ សូមឲ្យសិស្សគិតពីអ្វីដែលពួកគេនឹងធ្វើ ដើម្បីផ្ដោតចិត្តលើព្រះអង្គសង្គ្រោះពេញរយៈពេលពីរបីថ្ងៃទៀត ។ អ្នកអាចស្នើថា ពួកគេគួរតែសរសេរគម្រោងរបស់ពួកគេនៅក្នុងកំណត់ហេតុសិក្សាព្រះគម្ពីររបស់ពួកគេ ។ សូមគិតពីការអញ្ជើញពួកគេពីរបីនាក់ឲ្យប្រាប់សិស្សក្នុងថ្នាក់អំពីអ្វីដែលពួកគេបានគ្រោងនឹងធ្វើ ។

ការរំឭកចំណេះចំណានខគម្ពីរ

ការធ្វើដដែលៗជួយសិស្សឲ្យចាំនូវទីតាំងនៃវគ្គចំណេះចំណានខគម្ពីរ ។ របៀបមួយដើម្បីលើកទឹកចិត្តឲ្យមានការធ្វើដដែលៗនេះ គឺត្រូវប្រើកាតចំណេះចំណានខគម្ពីរ ( លេខកូដកាត ១០៤៥៩ ; ក៏មានផងដែរជាឯកសារ PDF នៅ si.lds.org ) ។ ប្រសិនបើអ្នកមិនមានកាតទាំងនេះទេ សូមជួយសិស្សឲ្យបង្កើតកាតផ្ទាល់ខ្លួនគេ ដោយមានពាក្យគន្លឹះមកពីវគ្គនៅម្ខាងនៃកាតនីមួយៗ និង សេចក្ដីយោងនៅម្ខាងទៀត ។ សូមបែងចែកសិស្សឲ្យធ្វើការជាដៃគូ ។ សូមឲ្យពួកគេចំណាយពេលពីរបីនាទីសួរគ្នាទៅវិញទៅមកនូវអ្វីដែលមាននៅក្នុងកាតនោះ ។ ជាឧទាហរណ៍ សិស្សម្នាក់អាចអានពាក្យគន្លឹះ ខណៈពេលដែលសិស្សផ្សេងទៀតគិតពីសេចក្ដីយោងបទគម្ពីរ ។ សូមអញ្ជើញសិស្សឲ្យប្រើកាតទាំងនេះញឹកញាប់ ដើម្បីសួរខ្លួនគេ និង សួរគ្នាទៅវិញទៅមក ។

កំណត់ចំណាំ ៖ប្រវែងពេលនៃមេរៀននេះ អាចឲ្យមានពេលសម្រាប់សកម្មភាពនៃការរំឭកចំណេះចំណានខគម្ពីរនេះបាន ។ អ្នកអាចដឹកនាំសកម្មភាពនោះនៅពេលចាប់ផ្ដើមថ្នាក់រៀន នៅពេលសម្រាកម្ដងរវាងផ្នែកនៃមេរៀន ឬក៏នៅចុងបញ្ចប់នៃថ្នាក់ក៏បាន ។ សូមធ្វើឲ្យសកម្មភាពនេះឲ្យខ្លី ដើម្បីមានពេលសម្រាប់បង្រៀនមេរៀន ។ សម្រាប់សកម្មភាពរំឭកផ្សេងទៀត សូមមើលឧបសម្ព័ន្ធនៅក្នុងសៀវភៅសិក្សានេះ ។

វិចារណកថា និង ព័ត៌មានសាច់រឿង

យ៉ាកុប 4:4 ។ ព្យាការីក្នុងព្រះគម្ពីរសញ្ញាចាស់ បានថ្លែងបន្ទាល់អំពីព្រះយេស៊ូវគ្រីស្ទ

ជាង 400 ឆ្នាំមុនការប្រសូតរបស់ព្រះយេស៊ូវគ្រីស្ទ យ៉ាកុបបាននិយាយថា ព្យាការីទាំងអស់ពីមុនគាត់បានថ្លែងទីបន្ទាល់អំពីព្រះអង្គសង្គ្រោះ ( សូមមើល យ៉ាកុប 4:4 ) ។ អ្នកខ្លះអាចឆ្ងល់ថា ហេតុអ្វីបានជាព្រះគម្ពីរសញ្ញាចាស់មិនមាននូវរឿងបន្ថែមអំពីព្រះយេស៊ូវគ្រីស្ទ ។ អែលឌើរ ជែហ្វ្រីអ័រ.ហូឡិន នៃកូរ៉ុមនៃពួកសាវកដប់ពីរនាក់បានដកស្រង់ការពន្យល់របស់នីហ្វៃអំពី « ភាគដ៏ច្បាស់ និង ពិសេសៗជាច្រើន » ត្រូវបាន « យកចេញពី » ព្រះគម្ពីរបរិសុទ្ធ ( សូមមើល នីហ្វៃទី1 13:26–29ហើយបន្ទាប់មកបានសង្កេតឃើញថា ៖

« ពិតប្រាកដណាស់ សេចក្ដីពិតដ៏ច្បាស់ និង ពិសេសៗភាគច្រើន នៃសេចក្ដីពិតទាំងអស់ដែលបានបាត់ពីព្រះគម្ពីរបរិសុទ្ធ ជាពិសេសព្រះគម្ពីរសញ្ញាចាស់ គឺជាការប្រកាសដ៏ច្បាស់ និង គ្មានមន្ទិលសង្ស័យអំពីបេសកកម្មរបស់ព្រះយេស៊ូវគ្រីស្ទ ជាតួនាទីដែលបានតែងតាំងតាំងពីមុនរបស់ទ្រង់ជាព្រះម៊ែស៊ី និង ព្រះអង្គសង្គ្រោះនៃពិភពោលោក និង ធាតុនៃសេចក្ដីសញ្ញានៃដំណឹងល្អរបស់ទ្រង់ ដែលត្រូវបានបង្រៀនមកពី អ័ដាមចុះមកតាមរយៈគ្រាកាន់កាប់ត្រួតត្រាបន្ដនីមួយៗ ។ ហេតុដូច្នេះហើយ គោលបំណងដ៏ខ្ពស់បំផុតនៃគម្ពីរមរមន គឺត្រូវស្ដារឡើងវិញនូវគ្រួសារនៃសាកលលោករបស់ព្រះដែលជាតួនាទីនៃចំណេះដឹងដ៏សំខាន់នៃព្រះគ្រីស្ទនៅក្នុងការសង្គ្រោះដល់បុរស ស្ដ្រី និង កុមារគ្រប់រូបដែលកំពុងរស់នៅនាពេលនេះ ធ្លាប់បានរស់នៅ ឬ នឹងចុះមករស់នៅលើផែនដីនេះ » ( (Christ and the New Covenant: The Messianic Message of the Book of Mormon ឆ្នាំ 1997 ] ទំព័រ 6–7 ) ។

យ៉ាកុប 4:5 ។ ថ្វាយបង្គំដល់ព្រះវរបិតាដោយនៅក្នុងព្រះនាមនៃព្រះយេស៊ូវគ្រីស្ទ

ការសរសេររបស់យ៉ាកុប ផ្ដល់ជាទស្សនៈវិស័យដ៏សំខាន់មួយទៅក្នុងច្បាប់របស់ម៉ូសេ និង ព្រះគម្ពីរសញ្ញាចាស់ ។ នៅក្នុង យ៉ាកុប 4:5យើងដឹងថាព្យាការីពីមុនជំនាន់របស់យ៉ាកុប បានថ្វាយបង្គំដល់ព្រះវរបិតាសួគ៌ាដោយនៅក្នុងព្រះនាមនៃព្រះយេស៊ូវគ្រីស្ទ ដោយបង្ហាញថាពួកគេបានដឹងអំពីព្រះវរបិតា និង ព្រះរាជបុត្រាថាជាអង្គពីរផ្សេងគ្នា ។ ពាក្យពេចន៍របស់យ៉ាកុបបានបង្ហាញថា ច្បាប់របស់ម៉ូសេគឺលើសពីភាពសាមញ្ញមួយនៃបទបញ្ញត្តិ និង ច្បាប់ដ៏តឹងរ៉ឹងមួយ ដូចដែលអ្នកប្រាជ្ញសម័យទំនើបខ្លះបានលើកឡើង ។ ច្បាប់ម៉ូសេបានថ្លែងទីបន្ទាល់អំពីព្រះយេស៊ូវគ្រីស្ទ ហើយបានដឹកនាំពួកសុចរិតទៅកាន់ការញែកចេញជាបរិសុទ្ធតាមរយៈដង្វាយធួនរបស់ទ្រង់ ។

យ៉ាកុប 4:10 ។ « ទទួលដំបូន្មានពីព្រះហស្ដរបស់ទ្រង់ »

ប្រធាន ម៉ារ៉ុនជី.រ៉មនី នៃគណៈប្រធានទីមួយបានពន្យល់អំពីសារៈសំខាន់នៃការដឹង និង ការធ្វើតាមដំបូន្មានរបស់ព្រះអម្ចាស់ថា ៖

« ខ្ញុំគិតថា សមាជិកសាសនាចក្រជាច្រើនមិនបាន [ ធ្វើតាម ] ដោយមានមនសិការខ្លួនទៅតាមការបញ្ចុះបញ្ចូលរបស់មនុស្ស ឬ ដំបូន្មានរបស់ខ្លួនគេ ជាជាងការគោរពតាមដំបូន្មានរបស់ព្រះអម្ចាស់ឡើយ ។ ទោះយ៉ាងណាក្ដី នៅពេលយើងមិនបានរក្សាខ្លួនយើងឲ្យនៅធ្វើតាមការទូន្មានដូចដែលអ្វីដែលជាដំបូន្មានរបស់ព្រះអម្ចាស់បានប្រាប់ទេនោះ យើងហាក់ដូចជាឆាប់ជំនួសការប្រឹក្សាផ្ទាល់ខ្លួនយើងមកដាក់ជំនួសឲ្យដំបូន្មានរបស់ព្រះវិញ ។ ជាការពិត គ្មានអ្វីផ្សេងទៀតដែលយើងអាចធ្វើបានឡើយ ប៉ុន្ដែធ្វើតាមការប្រឹក្សារបស់ខ្លួនយើងផ្ទាល់នៅពេលយើងមិនបានដឹងពីការណែនាំរបស់ព្រះអម្ចាស់ » ( « Seek Not to Counsel the Lord » Ensign ខែ សីហា ឆ្នាំ 1985 ទំព័រ 5 ) ។